Yesaya 19 - BAIBLO ALOO NGMAMI KLƆUKLƆU Ɔ

Mawu maa gbla Egipt tue

¹ Sɛ gbi nɛ kɔɔ Egipt he ji nɛ ɔ nɛ. Yawɛ hi bɔku nɔ kɛ fo kɛ ma Egipt. Egipt amaga amɛ a he ngɛ doe blibliibli kaa Yawɛ ma, nɛ Egipt bi ɔmɛ hu sawale nu mɛ.

² Yawɛ ke, “Ma ha Egipt bi ɔmɛ ma gba ta kɛ wo mɛ nitsɛmɛ a he; nɔ kɛ e nyɛmi, nɔ kɛ e piɛ nine nɔ no, zugba kɛ zugba, ma kɛ ma, matsɛ kɛ matsɛ.

³ Ma ha ga amɛ nɛ Egipt bi ɔmɛ to ɔ maa pee yaka, nɛ a mumu nya maa ta. A ma de amaga amɛ ke a ba piɛ a he; a ma ya bi ní ngɛ ní peeli a ngɔ, nɛ a ma bi ga womi kɛ je klamɔhi, kɛ kpade tsɛli a ngɔ.

⁴ Ma ngɔ Egipt bi ɔmɛ ngɔ wo matsɛ yiwutsotsɛ ko dɛ mi; e maa ye a nɔ, nɛ a ma tsu ní kpakpataa ha lɛ. Imi, Nyɔmtsɛ Yawɛ Tabohiatsɛ ɔ lɛ i de.”

⁵ Nilo pa a maa fã hluu kɛ yaa si nyu ɔ maa ta pa a mi, nɛ lejɛ ɔ ma gbli.

⁶ Be mi nɛ nyu dɔ ɔmɛ ngɛ tae ɔ, a ma bɔni fu jemi. Ngɔwu kɛ go ma gbli;

⁷ niba ní tsuo nɛ a du ngɛ Nilo pa a tue ɔ ma ngla, nɛ kɔɔhiɔ ma kpata a hɛ mi.

⁸ Hɛli kɛ nihi tsuo nɛ fɔɔ gbowe ngɛ Nilo pa a mi ɔ maa ye kɔmɔ, nɛ a maa wo yana. Ya fɔli tsuo a ni maa pee mɔbɔ.

⁹ Kpa tslɔli, kɛ kploba loli tsuo a nine mi maa je wu.

¹⁰ A ma kpata ma a mi nimeli ɔmɛ tsuo a hɛ mi, nɛ apaa yeli ɔmɛ maa ye kɔmɔ.

¹¹ Ganɔ ɔmɛ nɛ a ngɛ Zoan ɔ, kuasiahi sɔuu ji mɛ! Ga woli nɛ a buu mɛ ngɛ Egipt ɔ, ga yaya mohu a woɔ! Kɛ ba kɛɛ nɛ a deɔ matsɛ ɔ ke blema womi mi leli, kɛ matsɛmɛ a bimɛ ji mɛ kɛɛ?

¹² Egipt matsɛ, jije o ga woli nɛ le ní saminya a ngɛ? Eko ɔ, a ma nyɛ ma de mo yi mi nɛ Yawɛ Tabohiatsɛ ɔ to ngɛ Egipt he.

¹³ Zoan kɛ Memfis ganɔ ɔmɛ ɔ, kuasiahi sɔuu ji mɛ. Mɛ nɛ́ a ko tsɔɔ ma a blɔ ɔ, mɛ mohu a ha ma a laa blɔ.

¹⁴ Yawɛ ha a juɛmi tsaka, nɛ a woɔ ga yaya. Lɔ ɔ he ɔ, yayami sɔuu Egipt ngɛ pee. Ma a mi bi ɔmɛ ngɛ si tataae kaa dã tɔlɔ ko nɛ ngɛ si nɔe ngɛ lɛ nitsɛ e vie mi.

¹⁵ Nɔ ko nɔ ko be Egipt nɛ ma nyɛ nɔ́ kpakpa ko maa pee ha mɛ, niatsɛ jio, dɛgulɔ jio, nɔ nɛ ngɛ biɛ jio, nɔ gu jio.

Egipt ma ja Yawɛ

¹⁶ Be ma nɛ Egipt bi ɔmɛ maa pee a he fɔ̃li kaa yihi. Ke a na kaa Yawɛ Tabohiatsɛ ɔ miɔ nɛ e kɛ e he wami ɔ maa gbla a tue ɔ, a he ma bɔni domi blibliibli.

¹⁷ Be tsuaa be nɛ a maa wo Yuda ta a, sawale maa nu Egipt bi ɔmɛ ngɛ nɔ́ nɛ Yawɛ Tabohiatsɛ ɔ to nɛ maa ba Egipt nɔ ɔ he.

¹⁸ Ke jamɛ a be ɔ su ɔ, Hebri gbi ji gbi nɛ a maa tu ngɛ Egipt ma ngua enuɔ ɔmɛ a mi. Yawɛ Tabohiatsɛ ɔ biɛ a kɛ ma ka kita. Nɛ a maa wo ma amɛ eko biɛ ke, “Pu ma.”

¹⁹ Ke jamɛ a be ɔ su ɔ, a maa ma Yawɛ bɔ sami la tɛ ngɛ Egipt zugba a nɔ; nɛ a maa to tɛ titima ko nɛ a gbaa nɔ ha Yawɛ ngɛ Egipt huzu ɔ nya.

²⁰ Ní nɛ ɔmɛ maa da si kaa Yawɛ Tabohiatsɛ ɔ nɛ ngɛ a kpɛti ngɛ Egipt zugba a nɔ ɔ he okadihi. Lɔ ɔ he ɔ, ke nihi nɛ ngɛ lejɛ ɔ ma kpa ngmlaa kɛ tsɛ Yawɛ ngɛ yi mi nɛ a ngɛ mɛ wae ɔ he ɔ, e maa tsɔ nɔ ko nɛ e ba kpɔ mɛ.

²¹ Yawɛ ma je e he si kɛ tsɔɔ Egipt bi ɔmɛ, nɛ a maa le lɛ; a ma ja lɛ, nɛ a kɛ sami bɔhi, kɛ nike ní ma ba ha lɛ. A ma ka Yawɛ kita nɛ a maa ye nɔ pɛpɛɛpɛ.

²² Yawɛ maa fiaa Egipt bi ɔmɛ ní, se lɛ nɔuu ji nɔ nɛ ma tsa mɛ. A maa kpale kɛ ba e ngɔ; e maa bu a kue fami ɔmɛ tue, nɛ e ma tsa mɛ.

²³ Ke jamɛ a be ɔ su ɔ, a maa je gbɛjegbɛ ko kɛ je Egipt kɛ ya Asiria. Egipt bi ɔmɛ maa ya Asiria bi ɔmɛ a ngɔ, nɛ Asiria bi ɔmɛ hu maa ya Egipt bi ɔmɛ a ngɔ, nɛ a maa pee kake kɛ ja Mawu.

²⁴ Ke jamɛ a be ɔ su ɔ, Israel maa pee ma nɔ́ nɛ ji etɛ kɛ piɛ Egipt kɛ Asiria he, nɛ ma nɛ ɔmɛ ma ba pee gbaami ha je ɔ tsuo.

²⁵ Yawɛ Tabohiatsɛ ɔ maa gbaa mɛ ke, “A gbaa mo, ye ma, Egipt, kɛ Asiria nɛ i ngɔ ye nine kɛ bɔ, kɛ Israel, ma nɛ i hla ngɔ to kaa ye weto ní.”