Yesaya 15 - BAIBLO ALOO NGMAMI KLƆUKLƆU Ɔ

Mawu ma kpata Moab hɛ mi

¹ Sɛ gbi nɛ kɔɔ Moab he ji nɛ ɔ nɛ. Nyɔ kake too mi ɔ, a kpata Ar kɛ Kir a hɛ mi, kɛkɛ nɛ Moab zugba a nɔ tsuo jɔ.

² Dibon bi ɔmɛ kuɔ yo ɔ, nɛ a ya wo yana ngɛ a jami he ɔmɛ. Moab bi ɔmɛ wo yana kɛ nyɛ ya ha Nebo kɛ Medeba. A sɛ a yi, kɛ a kpɛni tsuo kɛ ye kɔmɔ.

³ A bu kpekpe ya bo kɛ nyɛɛ gbɛjegbɛ ɔmɛ a nɔ, nɛ a wo yana ngɛ ma kpe he ɔmɛ kɛ a tsu ɔmɛ a yi mi.

⁴ Heshbon kɛ Eleale bi ɔmɛ wo yana nɛ a fo boboobo. A nu huhui ɔ ngɛ Yahaz tɔɔ. Sawale nu Moab ta buli ɔmɛ, nɛ a he ngɛ doe blibliibli.

⁵ Ye tsui ngɛ yee ngɛ Moab he! Ma mi bi ɔmɛ tu fo kɛ ho Zoar, kɛ Eglat Shelishiya ma amɛ a mi ya. Ni komɛ kuɔ yoku ɔ kɛ ho Luhit ya, nɛ ni komɛ hu tu fo kɛ ho Horonaim ya kɛ ya boboobo, kɛ kɔmɔ yemi babauu.

⁶ Nimrim pa a mii ta, nɛ nga nɛ ngɛ pa a nya a gbli; nɔ́ mumu ko kulaa be lejɛ ɔ hu.

⁷ Lɔ ɔ he ɔ, ni ɔmɛ ngɔ a weto ní tsuo kɛ tu fo kɛ gu Pamploo kɔ̃ ɔ mi kɛ ho kɔ̃ ɔ se ya.

⁸ A nu yana a boboobo ngɛ Moab huzu ɔmɛ tsuo a nɔ. A nu ngɛ Eglaim kɛ Beerelim ma amɛ a mi hulɔ.

⁹ Dibon pa a pee tsutsuu kɛ muɔ sɔuu. Se Mawu to yayami nɛ pe enɛ ɔ po ha nihi nɛ ngɛ lejɛ ɔ. Nihi nɛ a he maa je mi, nɛ maa piɛ ngɛ Moab zugba a nɔ ɔ, haomi maa ba a nɔ kaa nɔ́ nɛ jata lɛ ba tua mɛ.