Yesaya 13 - BAIBLO ALOO NGMAMI KLƆUKLƆU Ɔ

Mawu maa gbla Babilon tue

¹ Sɛ gbi nɛ kɔɔ Babilon tue gblami he nɛ Mawu ngɔ ha Yesaya, Amoz bi ɔ, ngɛ nina mi ji nɛ ɔ nɛ.

² Nyɛɛ si aflangaa ngɛ yo kpataa ko nɔ. Nyɛ kpa ngmlaa kɛ tsɛ ta buli ɔmɛ; nyɛɛ fɔ mɛ nine kɛ pee okadi ha mɛ ke a ya tua odehe ɔmɛ a ma a, nɛ a sɛ agbo ɔmɛ a mi.

³ Yawɛ tsɛ e ta buli katsɛmɛ ɔmɛ, kɛ e ni klɔuklɔu ɔmɛ, konɛ a gbla ni nɛmɛ nɛ ngɛ a he nɔ woe kɛ ngɛ e mi mi la woe ɔ a tue.

⁴ Nyɛɛ bu tue, a ngɛ hoo pee ngɛ yo ɔmɛ a nɔ; nihi babauu lɛ a ngɛ hoo pee nɛ ɔ nɛ. Niinɛ, je mahi, kɛ nɔ yemihi ngɛ a he nya buae. Yawɛ Tabohiatsɛ ɔ ngɛ e tabo ɔmɛ miae kɛ ha ta.

⁵ A je tsitsaa je mi nyagbe he ɔmɛ tsuo kɛ ma. Yawɛ kɛ e mi mi fumi ɔ ma kpata zugba a tsuo hɛ mi.

⁶ Nyɛ kpa bubuubui! Yawɛ ligbi ɔ su jehanɛ. Ligbi nɛ Tabohiatsɛ ɔ ma kpata níhi a hɛ mi ji nɛ ɔ nɛ.

⁷ Nɔ tsuaa nɔ he mi maa po, nɛ sawale maa nu lɛ.

⁸ A maa ye gbeye; nɛ a he mi maa hia mɛ kaa yo nɛ nu kɔɔmi. Gbeye ma ha a maa hi a sibi a hɛ mi hyɛe gaa kɛkɛ, nɛ a hɛ mi maa tsu paa kɛ zo kpɔtɔɔ.

⁹ Yawɛ ligbi ɔ nɛ ngɛ gbeye ɔ ma; a maa na e mi mi fumi nɛ nya wa a, kɛ e hɛdɔ ɔ. Je ɔ tsuo hɛ mi ma kpata; a ma kpata yayami peelɔ tsuaa yayami peelɔ hɛ mi.

¹⁰ Dodoe tsuaa dodoe, kɛ dodoe kuu ɔmɛ nɛ a ngɛ hiɔwe ɔ be kpɛe hu. Ke pu je po, diblii maa wo, nɛ nyɔhiɔ hu be kpɛe.

¹¹ Bɔ nɛ Yawɛ ngɛ dee ji nɛ ɔ nɛ: “Ma ha amanehlu maa ba je ɔ mi tsuo, nɛ ma gbla yiwutsotsɛmɛ tsuo a tue ngɛ a yayami ɔmɛ a he. Nɔ tsuaa nɔ nɛ woɔ e he nɔ ɔ, ma ba lɛ si; nɛ nɔ tsuaa nɔ nɛ peeɔ pupuupu, aloo e yi mi wa a, ma gbla e tue.

¹² Nihi nɛ a yi ma na wami ɔ, a he be hiɛe kulaa; nimli adesahi a he maa hia pe sika tsu ngmingmiingmi.

¹³ Jamɛ a ligbi ɔ nɛ imi Yawɛ Tabohiatsɛ ɔ ma je ye mi mi fumi ɔ kpo kɛ tsɔɔ ɔ, ma ha hiɔwe tsuo ma mimiɛ, nɛ zugba a maa je e blɔ he.

¹⁴ “Nibwɔhi nɛ ngɛ Babilon ɔ maa ma fo kɛ ho mɛ nitsɛmɛ a zugbahi a nɔ ya; a maa gbɛ fĩa kaa odabɔhi nɛ ngɛ fo tue kɛ je de dali a blɔ mi, loo kaa tohi nɛ be hyɛlɔ.

¹⁵ Nɔ tsuaa nɔ nɛ a maa nu ɔ, a kɛ dade maa gbe lɛ.

¹⁶ A maa ngɔ a bimwɔwi ngɔ fiaa si, nɛ a ma gbo; a maa ha a we mi níhi, nɛ a maa pee a yi ɔmɛ basabasa ngɛ a hɛ mi paa.”

¹⁷ Yawɛ ngɛ dee ke, “Ma ha nɛ Media bi ɔmɛ ma ba tua Babilon. Media bi ɔmɛ lɛɛ a bui sika hiɔ, nɛ a hɛ kɔɛ sika tsu nɔ.

¹⁸ A kɛ a kɛ̃ɛ̃ ɔmɛ maa gbe nihewi. Bimwɔwi ngɛ a nyɛmɛ a mi mi po, a be mɛ mɔbɔ nae, nɛ jokuɛwi hu, a be a he bee.

¹⁹ Babilonia nɔ yemi ɔ ji nɔ yemi ko nɛ hɛ mi ngɛ nyami pe kulaa; nɛ lɔ ɔ he ɔ, e mi bi ɔmɛ fĩaa. Se imi Yawɛ, ma kpata Babilon hɛ mi pɛsɛpɛsɛ kaa bɔ nɛ i pee Sodom kɛ Gomora a!

²⁰ Nɔ ko nɔ ko be lejɛ ɔ hie hu. Arabia no nɛ ngɛ lalaalo woe po be e bo tsu mae ngɛ lejɛ ɔ gblegbleegble; nɛ to hyɛlɔ ko hu be e to ɔmɛ tsɔ̃e kɛ ya ye ní ngɛ lejɛ ɔ.

²¹ Se nga mi lohwehi maa bu si ngɛ lejɛ ɔ, nɛ a we ɔmɛ a mi ma hyi tɔ kɛ lohwehi nɛ ngɛ pɛe hoo. Lejɛ ɔ ji he nɛ dugumahi maa bu si ngɛ, nɛ nibɔ níhi kɛ a he gbeyegbeye: yi je kaa nɔmlɔ, kɛ a nane kaa lohwe maa do ngɛ lejɛ ɔ.

²² Ogbeteehi maa hi pɛe ngɛ a mɔ ɔmɛ a mi, kɛ nga mi gbehi hu ngɛ a tsu saminyawiiwi ɔmɛ a mi. Babilon be ɔ su jehanɛ. Be bɔbɔyoo pɛ nɛ piɛ ha lɛ; e ligbi ɔmɛ a nya ta.”