Yesaya 11 - BAIBLO ALOO NGMAMI KLƆUKLƆU Ɔ

Matsɛ yemi nɛ tue mi jɔmi ngɛ mi

¹ Ishai, Matsɛ David tsɛ ɔ weku kpa ngɛ kaa tso ko nɛ a po ngɔ fɔ si. Se matsɛ he maa te si ngɛ David nina a mi kaa bɔ nɛ tso kpɔ nɛ ngɛ zu mi tsɛ̃ɔ kɔni ɔ.

² Yawɛ mumi ɔ maa ba e nɔ. E ma ha lɛ sane se kɔmi, nile, kɛ ga nɛ e kɛ maa ye e ma a nɔ. E maa le Yawɛ suɔmi nya ní, nɛ e maa bu lɛ.

³ E maa ye Yawɛ gbeye. Pi nɔ́ nɛ e hɛngmɛ na, loo e tue nu ɔ nɛ e kɛ maa kojo.

⁴ Se e kɛ dami sane yemi maa kojo ohiatsɛmɛ, nɛ e maa bu nihi nɛ a ní ngɛ mɔbɔ ɔ a he. Ke e fa ke a gbla nɔ ko tue ɔ, kɛkɛ a maa gbla e tue. Ke e fa ke a gbe yayami peelɔ ko ɔ, kɛkɛ pe a gbe lɛ ɔ nɛ.

⁵ Dami sane yemi, kɛ anɔkuale yemi ji níhi nɛ e kɛ maa ye ma a nɔ.

⁶ Ogbetee kɛ jijɔ maa hi si ngɛ he kake, nɛ ngatsɛ kɛ apletsi bɔbɔyoo maa bu si ngɛ he kake. Na bi kɛ jata bi ma bla kɛ ye ní, nɛ jokuɛ wayoo pɛ maa hyɛ a nɔ.

⁷ Na yo kɛ osisiblisi ma bla kɛ ye ní; a bimɛ maa bu si ngɛ he kake, nɛ jata ma kpe nga kaa na.

⁸ Bimwɔyo po ma fiɛ ngɛ sinɔ muɔ nya, nɛ bi nɛ je nyɔ nya kɛ e nine maa wo sinɔ duɔtsɛ muɔ mi.

⁹ Nɔ ko nɔ ko be e nyɛmi awi yee ngɛ ye yo klɔuklɔu ɔ nɔ, nɛ nɔ ko nɔ ko be e nyɛmi hɛ mi kpatae. Ejakaa zugba a tsuo maa le Yawɛ kaa bɔ nɛ wo hyi tɔ kɛ nyu ɔ.

Nihi nɛ a nuu kɛ ho ma se ya a maa kpale kɛ ba

¹⁰ Jamɛ a ligbi ɔ, matsɛ he nɛ je Ishai powu ɔ mi ɔ maa da si kaa okadi ko ha je ma amɛ. A ma bua a he nya kɛ maa ba e matsɛ ma a mi, nɛ a ma ba wo e hɛ mi nyami.

¹¹ Jamɛ a ligbi ɔ, Nyɔmtsɛ ɔ ma tsu ní kɛ he wami; e maa kpale e ma mi bi ɔmɛ nɛ piɛ ngɛ zugba nɛ ɔmɛ a nɔ ɔ kɛ maa ba we ekohu. A maa je Asiria, Egipt, Patros, Sudan, Elam, Babilonia, Hamat, kɛ mahi nɛ ngɛ wo nya a kɛ ba.

¹² Yawɛ maa si aflangaa kɛ pee okadi kɛ tsɔɔ je ma amɛ kaa Israel, kɛ Yuda ma amɛ nɛ a gbɛ fĩa je ɔ mi tsuo ɔ, e ngɛ a nya buae ekohu, konɛ e kpale mɛ kɛ ba we.

¹³ Israel, Efraim nina a kɛ Yuda be nɔ́ he plee hu; nɛ Yuda be Israel nya dooe hu.

¹⁴ Jehanɛ lɛɛ, a maa pee kake kɛ ya tua Filisti bi ɔmɛ ngɛ bonyoku je; nɛ a maa ha nihi nɛ ngɛ beleku je ɔ a níhi. A maa ye Edom kɛ Moab bi ɔmɛ a nɔ kunimi, nɛ Amon bi ɔmɛ hu maa ba a he si ha mɛ.

¹⁵ Yawɛ ma kpata Egipt pa kɔni nɛ a tsɛɛ ke Suez ɔ hɛ mi pɛsɛpɛsɛ. E ma ha nɛ ahlabata kɔɔhiɔ maa fia ngɛ lejɛ ɔ, nɛ pa a ma gba maa pee pa tsɔwi kpaago, bɔ nɛ ke nɔ wo tokota po e ma nyɛ kɛ po.

¹⁶ Gbɛjegbɛ ko maa je Asiria kɛ ha Israel ma a mi bi nɛ a ngɛ je mi kɛ mwɔɔ ɔ, konɛ a nyɛɛ nɔ kaa bɔ nɛ a nɛmɛ ɔmɛ nyɛɛ zugba gbigbli nɔ, benɛ a je Egipt zugba a nɔ kɛ ma a.