Yesaya 10 - BAIBLO ALOO NGMAMI KLƆUKLƆU Ɔ

¹ Musu tloo nyɛ! Nyɛ nɛ nyɛ woɔ mlaahi nɛ dɛ, nɛ nyɛ ngmaa mlaahi nɛ nyɛ kɛ waa ye ma a yi mi.

² Jã nyɛ peeɔ kɛ kpɔɔ ohiatsɛmɛ a blɔ nya níhi ngɛ a dɛ, nɛ nyɛ yi dami sane ha we mɛ. Jã nyɛ peeɔ kɛ kpɔɔ yalɔyihi kɛ awusahi a weto ní ngɛ a dɛ.

³ Ke Mawu bɔni nyɛ tue gblami ɔ, kɛ nyɛ maa pee kɛɛ? Ke e ngɔ haomi kɛ je ma se kɛ ba na nyɛ ɔ, kɛ nyɛ maa pee kɛɛ? Mɛnɔ ngɔ nyɛ ma sa fo kɛ ya ya hla yemi kɛ buami? Jije nyɛ maa ngɔ nyɛ juetli kɛ to?

⁴ Nɔ́ nɛ maa ba nyɛ nɔ ji, nyɛ maa nɔ ngɛ ta mi, aloo a maa nuu nyɛ kɛ ho kaa pamitsɛmɛ. Enɛ ɔ tsuo se ɔ, Yawɛ mi mi fumi ɔ se be poe kɛ yaa si e ma kpata a hɛ mi pɛsɛpɛsɛ.

Mawu maa ngɔ Asiria matsɛ ɔ kɛ gbla e ma a tue

⁵ Bɔ nɛ Yawɛ de ji nɛ ɔ nɛ: “Asiria, o ngɛ kaa to tsɔmi tso ko nɛ i kɛ gblaa nihi nɛ woɔ ye mi mi la a a tue.

⁶ I tsɔ Asiria bi ɔmɛ ke a ya tua ma ko nɛ li Mawu, ma nɛ wo ye mi mi la a. I tsɔ mɛ ke a ya ha ní, nɛ a kpɔ níhi pani nya; nɛ a naa ni ɔmɛ a nɔ kaa mɔsɔ ngɛ blɔ mi.”

⁷ Se Asiria matsɛ ɔ lɛɛ e to yi mi kpa mohu. E to kaa e ma kpata je mahi babauu a hɛ mi.

⁸ E fĩaa nɛ e deɔ ke, “Anɛ ye tatsɛmɛ ɔmɛ ɔ, pi matsɛmɛ ji mɛ tsuo lo?

⁹ Kalno ma a, kɛ Karkemish ma a nɛɛ, mɛni slɔɔto ngɛ a kpɛti? Anɛ Hamat ma a be kaa Arpad ma a lo? Samaria kɛ Damasko ɔ nɛɛ, slɔɔto ko ngɛ a kpɛti lo?

¹⁰ Jamɛ a nɔ yemi he ɔmɛ kɛ a mi amagahi nɛ hiɛ kulaa pe amagahi tsuo nɛ ngɛ Yerusalem kɛ Samaria a, pi imi nɛ i gbla mɛ tsuo pɛpɛɛpɛ a tue lo?

¹¹ Bɔ nɛ i kpata Samaria, kɛ e we amaga amɛ tsuo a hɛ mi ɔ, anɛ i be nyɛe ma pee Yerusalem, kɛ amaga amɛ nɛ ngɛ lejɛ ɔ hu jã lo?”

¹² Se Yawɛ ke, “Ke i gbe nɔ́ nɛ i ngɛ tsue ngɛ Zion yo ɔ nɔ, kɛ Yerusalem ɔ nya a, ma gbla Asiria matsɛ ɔ tue ngɛ e he nɔ womi, kɛ e fiami babauu ɔ he.”

¹³ Asiria matsɛ ɔ ngɛ fĩae nɛ e ngɛ dee ke, “Imi nitsɛ lɛ i tsu ní nɛ ɔmɛ tsuo. Ye he wa, i le ní, nɛ i to ga saminya. I ye zugba a tsuo nɔ, nɛ i gbɛ ma amɛ a huzu ɔmɛ tsuo ngɛ je ma amɛ a kpɛti; nɛ níhi nɛ a bua nya ngɔ to ɔ, i ngɔ. I ngɔ ye he wami nɛ i kɛ ye ma a mi bi ɔmɛ a nɔ.

¹⁴ Je ma amɛ a juetli ɔ pee kaa lohwe pɛlitsɛ tsu nɛ ye nine ya su nɔ. Kaa bɔ nɛ a muɔɔ hlui nɛ a je he ɔ, ja i bua je ɔ tsuo nya. Lohwe ko fiɛ pɛli mi ɔ, i nui eko kuɛ si, loo pɛmi po.”

¹⁵ Se nɔ́ nɛ Yawɛ ngɛ bie ji, “Anɛ gbiɛ ma nyɛ maa fĩa ke e kle pe nɔmlɔ nɛ ngɔ lɛ kɛ ngɛ ní tsue ɔ lo? Anɛ sau ma nyɛ maa wo e he ha nɔ nɛ ngɛ lɛ gblae ɔ lo? Tsa pi dɛma tso nɛ hɛɛɔ nɔmlɔ; nɔmlɔ mohu nɛ hɛɛɔ dɛma tso. To tsɔmi tso ɔ, lɛ nitsɛ e fɔ we e he; nɔ ko nɛ fɔɔ lɛ.”

¹⁶ Nyɔmtsɛ Yawɛ Tabohiatsɛ ɔ maa ngɔ hiɔ kɛ gbla ta buli nɛ je oblai ɔ tsuo a tue. A maa ta he lo. La ko ma mle ngɛ a nɔmlɔ tso mi, nɛ la nɛ ɔ maa tso wawɛɛ.

¹⁷ Mawu nɛ ji la kɛ ha Israel ɔ ma mle. Mawu klɔuklɔu ha Israel ɔ ma mle kɛ la, nɛ ligbi kake too mi ɔ, e maa sã nɔ́ tsuaa nɔ́; e maa sã mio ɔmɛ, kɛ mio tso ɔmɛ tsuo.

¹⁸ Hue kpakpa amɛ, kɛ ngmɔhi nɛ baa ní saminya a, a hɛ mi ma kpata pɛsɛpɛsɛ kaa bɔ nɛ gbenɔ hiɔ kpataa nɔmlɔ adesa hɛ mi ɔ.

¹⁹ Tsohi bɔɔ pɛ maa piɛ ngɛ hue ɔ mi, nɛ jokuɛ nɛ wɛ po ma nyɛ maa kane mɛ.

Nihi bɔbɔyoo pɛ maa kpale kɛ ba

²⁰ Jamɛ a be ɔ, Israel bi nɛ a yi na wami ɔ be a hɛ ngɔe kɛ fɔ ma a nɛ ka a hɛ mi kpatami ɔ nɔ hu. A maa ngɔ a hɛ kɛ fɔ Yawɛ, Israel Mawu klɔuklɔu ɔ nɔ kulaa.

²¹ Israel ma a mi nihi bɔbɔyoo pɛ maa kpale kɛ ba a Mawu kpetekpleenyɛ ɔ ngɔ ekohu.

²² E ngɛ mi kaa amlɔ nɛ ɔ, Israel ma a mi bi ɔmɛ a he hiɛ babauu kaa wo nya zia lɛɛ, se nihi bɔbɔyoo pɛ nɛ maa kpale kɛ ba. A fa nɛ a kpata ma a hɛ mi, nɛ jã pɛpɛɛpɛ nɛ e sa mɛ.

²³ Nɔ́ jemi ko be he kaa Nyɔmtsɛ Yawɛ Tabohiatsɛ ɔ ma kpata zugba a tsuo hɛ mi kaa bɔ nɛ e de ke e maa pee ɔ.

Yawɛ maa gbla Asiria tue

²⁴ Lɔ ɔ he ɔ, bɔ nɛ Nyɔmtsɛ Yawɛ Tabohiatsɛ ɔ ngɛ e ma nɛ ngɛ Zion ɔ dee ji nɛ ɔ nɛ: “Nyɛ ko ye Asiria bi ɔmɛ gbeye; ke kaa a ngɛ nyɛ yi mi wae kaa bɔ nɛ Egipt bi ɔmɛ pee be ko ɔ po, nyɛ ko ye mɛ gbeye.

²⁵ Ma gbla nyɛ tue be bɔɔ ko kɛkɛ, nɛ lɔ ɔ se ɔ, ma kpata a hɛ mi.

²⁶ Imi Yawɛ Tabohiatsɛ ɔ nitsɛ ma fia mɛ kpa kaa bɔ nɛ i pee Midian bi ɔmɛ ngɛ Oreb tɛ sa a he ɔ. Ma gbla Asiria tue kaa bɔ nɛ i gbla Egipt tue ɔ.

²⁷ Jamɛ a be ɔ, ma je Asiria tlomi ɔ kɛ je nyɛ nɔ, nɛ ma ku kuɛpã tso ɔ nɛ e kɛ wo nyɛ kuɛ ɔ.”

He nyɛlɔ ɔ ba tua ma amɛ

²⁸ He nyɛli ɔmɛ a ta a je Rimon ba ngɔ Ai ma a! Ta a ya gu Migron! A kɛ a tlomi ɔmɛ ya to si ngɛ Mikmash!

²⁹ A gu yo kpɛ blɔ ɔ kɛ ya hwɔ Geba nyɔ mi! Nihi nɛ a ngɛ Rama ma a mi ɔ ye gbeye, nɛ Matsɛ Saul ma, Gibea bi ɔmɛ ma fo.

³⁰ Galim bi, nyɛ kpa ngmlaa! Laisha bi, nyɛɛ bu tue! Nyɛ he nɔ koo, nyɛ Anatot bi!

³¹ Nihi nɛ ngɛ Madmena, kɛ Gebim ma amɛ a mi ɔ ma fo kɛ je gbenɔ nya.

³² He nyɛli ɔmɛ ngɛ Nob ma a mi mwɔnɛ ɔ, nɛ a ma kɔ̃ kɛ ngɛ Zion yo ɔ, kɛ Yerusalem ma a tsɔɔe.

³³ Nyɔmtsɛ Yawɛ Tabohiatsɛ ɔ maa ngɔ mɛ ngɔ koo si kaa bɔ nɛ tso kɔnihi nɛ a poo ngɛ tso ɔ he nɔɔ si ɔ. Ni nɛmɛ nɛ wo a he nɔ gojoo pe kulaa a, a maa poo mɛ ngɔ pue si, nɛ a hɛ mi hu ma pue si.

³⁴ Yawɛ maa poo mɛ pue si kaa bɔ nɛ a kɛ gbiɛ poo tsohi ngɛ hue mi ɔ; a maa nɔɔ si haa bum kaa bɔ nɛ Lebanon tso kpakpahi nɔɔ si ɔ!