Yeremia 8 - BAIBLO ALOO NGMAMI KLƆUKLƆU Ɔ

¹ “Jamɛ a be ɔ mi ɔ, a maa tsua Yuda matsɛmɛ ɔmɛ, ganɔ ɔmɛ, osɔfo ɔmɛ, gbali ɔmɛ, kɛ ni kpa amɛ nɛ hi Yerusalem ɔ a wuhi ngɛ yɔkɔ ɔmɛ a mi.

² A be wu nɛ ɔmɛ a nya buae, nɛ a be mɛ pue hulɔ; wu ɔmɛ maa pee kaa kuku ngɛ zugba a nɔ. A ma ka wu ɔmɛ ngɔ ha pu kɛ nyɔhiɔ kɛ dodoehi. Ní nɛ ɔmɛ ji níhi nɛ ma a suɔ saminya; ma a sɔmɔ mɛ, nɛ a bi ní ngɛ a ngɔ, nɛ a ja mɛ hulɔ.

³ Ke e ba mi ja, ma yayami nɛ ɔ mi bi nɛ a yi ma na wami ngɛ hehi nɛ ma sake mɛ ngɔ pue ɔ, a maa suɔ kaa a ma gbo mohu pe nɔ́ nɛ a maa hi je mi. Imi, Yawɛ Tabohiatsɛ ɔ lɛ i de.”

Yayami kɛ tue gblami

⁴ Yawɛ de mi ke ma de ma a ke, “Ke nɔ ko nɔ si ɔ, anɛ e ti si ekohu lo? Ke nɔ ko laa blɔ ɔ, anɛ e kpale we e se lo?

⁵ Ye ma! Mɛni he je mɔ lɛ nyɛ je ye se, nɛ nyɛ sume kaa nyɛ maa kpale kɛ ba a? Mɛni he je nyɛɛ kɛ nyɛ he ha sisimi ní hi kikɛ nɛ ɔ, nɛ nyɛ sume kaa nyɛ maa kpale kɛ ba ye ngɔ ɔ?

⁶ Ke i bu nyɛ ní sɛɛmi he tue keii ɔ, mɛni ji nɔ́ nɛ i nuɔ? Lakpa sɔuu! Nɔ ko nɔ ko tu we anɔkuale. Nyɛ ti nɔ ko nɔ ko he yayami dɔɛ lɛ nɛ e pia e he, nɛ́ e bi e he ke, ‘Ao, mɛni ji nɔ́ nɛ i pee nɛ ɔ?’ Nɔ tsuaa nɔ ngɛ lɛ nitsɛ e blɔ nɔ kɛ bee kaa okpɔngɔ nɛ ngɛ fo tue kitikiti ngɛ ta nga nɔ.

⁷ Godohi tete le be nɛ a kɛ kpaleɔ a se kɛ baa we; lahuɛ, otoklii, kɛ aklawa hu le be nɛ a kɛ jeɔ he kake kɛ yaa he kake. Se ye ma, nyɛɛ lɛɛ nyɛ li ye mlaa amɛ.

⁸ Kɛ peeɔ kɛɛ nɛ nyɛ deɔ ke ní leli ji nyɛ, nɛ nyɛ le ye mlaa amɛ, be mi nɛ yakayaka womi ngmali tsake mlaa amɛ tsuo a hɛ mi kikɛ nɛ ɔ?

⁹ Zo gbe nyɛ ní leli ɔmɛ; bibi gbe mɛ, nɛ a pa li nɔ́ nɛ nɔ nɛ a ngɛ hu. A kua ye munyu ɔ, lɛɛ mɛni ji ní ɔ nɛ a le ɔ mɔ?

¹⁰ Lɔ ɔ he ɔ, ma ngɔ a ngmɔ ɔmɛ kɛ ha ni nɛmɛ nɛ ma ba ye a nɔ ɔ; a yi ɔmɛ hu i kɛ ma ha nyumu kpahi. Kɛ je nimli wawihi a nɔ kɛ ya si nimli nguahi a nɔ ɔ, nɔ tsuaa nɔ hɛ dɔ kɛ ngɛ nɔ sisie nɛ e kɛ na ní. Gbali kɛ osɔfohi po ngɛ nɔ sisie.

¹¹ Pá nɛ ngɛ ye ma mi bi ɔmɛ a he ɔ, a tsɔɔ lɛ fa kɛ fa kɛkɛ, nɛ e peeɔ mɛ kaa pá a gbo. Lɔ ɔ he ɔ, a deɔ ke, ‘Wa ngɛ tue mi jɔmi, wa ngɛ tue mi jɔmi’, be mi nɛ tue mi jɔmi ko be.

¹² Anɛ zo gbe mɛ benɛ a tsu musu ní nɛ ɔmɛ lo? Dɛbi, zo gbi mɛ fɛɛ; nɔ́ nɛ a tsɛɛ ke zo po a li. Enɛ ɔ he je ɔ, mɛ hu a ma gbo kɛ piɛ ni nɛmɛ nɛ a maa gbe ɔ a he. Ke i gbla a tue kɛkɛ a nyagbe ji lɔ ɔ nɛ. Imi, Yawɛ lɛ i de.

¹³ “I ka kaa ma bua ye ma a nya kaa bɔ nɛ ngmɔ hulɔ buaa e ngmɔ niba ní nya a; se e hí peemi. Ye ma a ngɛ kaa wai tso nɛ wai yiblii be nɔ. A ngɛ kaa ngmɔkɔ tso nɛ ngmɔkɔ be nɔ; ba amɛ tete po ngla. Enɛ ɔ he je ɔ, i ha nɛ nibwɔhi ba ngɔ a zugba a.”

¹⁴ Mawu ma a mi bi ɔmɛ bi a he ke, “Mɛni he je lɛ wa hii si ngɛ hiɛmɛ nɛ ɔ kɛ mwɔɔ? Nyɛ ha nɛ waa tu fo kɛ ya mahi nɛ a fia gbogbo ngɔ wo a he ɔ a mi, nɛ wa ya gbo ngɛ jamɛ a ma amɛ a mi. Yawɛ, wa Mawu ɔ bu wɔ gbenɔ fɔ, nɛ e ngɔ nyu kɛ kplu nɛ duɔ ngɛ mi ngɔ ha wɔ ke waa nu, ejakaa wa pee yayami kɛ si lɛ.

¹⁵ Wa hyɛ tue mi jɔmi blɔ, se tue mi jɔmi bɛ; wa hyɛ tsami be blɔ, se gbeye mohu ji nɔ́ nɛ ba.

¹⁶ Wa he nyɛli ɔmɛ ba sɛ Dan ma a mi momo. Wa ngɛ a okpɔngɔ ɔmɛ a he nue nɛ a ngɛ a gugwɔ mi flie ngɛ lejɛ ɔ. Ke okpɔngɔ ɔmɛ ngɛ pɛe kikɛ nɛ ɔ, kɛkɛ zugba a tsuo ngɛ mimiɛe. Wa he nyɛli ɔmɛ ba konɛ a ba kpata zugba a hɛ mi, kɛ nɔ́ tsuaa nɔ́ nɛ ngɛ zugba a nɔ, wa ma a, kɛ ma mi bi ɔmɛ tsuo.”

¹⁷ Yawɛ ke, “Ma tsɔ sinɔhi kɛ ba nyɛ kpɛti, sangahi ma ba kɔɔ nyɛ; kunya yelɔ ko kunya yelɔ ko be nyɛe maa jɔɔ a he.”

Yeremia ye kɔmɔ ha e ma a

¹⁸ Ye we aywilɛho ɔ nya wa tsɔ ha mi; i nyɛ we hu. Ye tsui kpa miɔ nɛ e ma tsɔ.

¹⁹ Nyɛɛ bu tue! Ngɛ zugba a tsuo nɔ ɔ, i nu nɛ ye ma a ngɛ ngmlaa kpae nɛ a ngɛ bie ke, “Anɛ Yawɛ be Zion hu lo? Zion matsɛ ɔ be ma a mi hu lo?” Yawɛ bi ke, “Mɛni he je lɛ nyɛ ya ja amagahi, nɛ nyɛɛ kɛ nɔ́ nɛ ɔ peemi wo ye mi mi la a? Mɛni he je lɛ nyɛ ya kpla si ha ma se wohi?”

²⁰ Ma a he nɔ kɛ ngmlaa ke, “Latsa be ɔ se po, nɛ a kpa ní ta, se a he we wa yi wami lolo.”

²¹ Bɔ nɛ ye ma mi bi ɔmɛ a he mi ngɛ mɛ hiae ɔ, ja nɔuu imi hu ye he mi ngɛ mi hiae. Ye ywilɛ ho ye he; gbeye kɛ sawale nu mi.

²² Anɛ tsopa be Gilead lo? Tsopatsɛ ko be lejɛ ɔ lo? Mɛni he je mɔ nɛ a tsa we ye ma mi bi ɔmɛ lolo ɔ?