Yeremia 6 - BAIBLO ALOO NGMAMI KLƆUKLƆU Ɔ

He nyɛli ba sá Yerusalem ma a yi

¹ Nyɛ Benyamin bi, nyɛɛ tu fo nɛ nyɛ he nyɛ yi wami! Nyɛɛ tu fo kɛ je Yerusalem esɔ! Nyɛ kpa titimati ngɛ Tekoa, nɛ nyɛ slɛ la ngɛ Bet Hekerem kɛ tsɔɔ okadi! Ejakaa haomi agbo je omleyi je kɛ ma nɛ ma ba kpata ma hɛ mi.

² Zion ma, Yerusalem ɔ ngɛ fɛu kaa yiheyo saminyayoo ko. Se kɛ̃ ɔ, a ma kpata e hɛ mi.

³ Matsɛmɛ ma ba pue si ngɛ Yerusalem kɛ a tabo ɔmɛ. A maa ma a bo tsu ɔmɛ kɛ bɔle ma a kɛ kpe nɔ tsuaa nɔ ngɛ e nɔ́ mi.

⁴ A ma de ke, “Nyɛɛ mia, nɛ nyɛ gba ta kɛ wo Yerusalem he! Nyɛ dla nyɛ he! Wa ma ya tua ma a piani!” Se jamɛ a be ɔ nɔuu ɔ, a ma de ke, “Akuanyɛ! Wa yi ta pɛ! Mamoo je jɔ wɔ. Nyɛɛ hyɛ bɔ nɛ pu ɔ ha nɛ nini ɔmɛ ka gagaa ha!

⁵ Nyɛɛ mia! Wa ma ya tua ma a nyɔ mi, nɛ wa maa ku mɔ ɔmɛ ngɛ ma a mi kɛ pue si.”

⁶ Yawɛ Tabohiatsɛ ɔ fa matsɛmɛ nɛ ɔmɛ nɛ a po tso kɛ pee kpoku kɛ bɔle Yerusalem kɛ kpe, nɛ a sa ma a yi. Yawɛ de to ke, “Ma gbla ma nɛ ɔ tue, ejakaa amimi sɔuu lɛ a ngɛ yee ngɛ ma a mi.

⁷ Kaa bɔ nɛ vu jeɔ nyu ɔ, ja pɛ lɛ Yerusalem bi ɔmɛ peeɔ yayamihi babauu. I nuɔ haomi kɛ hɛ mi kpatami he hoo ngɛ ma a mi; nihi nɛ a plaa, nɛ a pee hiɔtsɛmɛ ji ni nɛmɛ nɛ i naa.

⁸ Nyɛ Yerusalem bi, nyɛɛ kase ní kɛ je haomi nɛ ɔmɛ a mi. Ke pi ja a, ma ngmɛɛ nyɛ he; ma ha nyɛ ma a ma plɛ pee ma doku nɛ nɔ ko nɔ ko be mi hie hu.”

Israel, atuã tsɔlɔ

⁹ Yawɛ Tabohiatsɛ ɔ de mi ke, “Haomi maa ba Israel bi ɔmɛ a nɔ nɔtonɔto kɛ yaa si a ma tsake. Ke wai nya bualɔ kplɔ wai ta tso mi ɔ, e ngɔɔ e nine kɛ kplaa tso ɔ mi kɛ hyɛɛ kaa wai ɔmɛ tsuo ta lo. Lɔ ɔ he ɔ, he ni nɛmɛ nɛ piɛ ɔ a yi wami loko be yayami ɔ nɛ ba.”

¹⁰ I he nɔ ke, “Ke i kɛ mɛ tu munyu nɛ i ka a hɛ mi ɔ, mɛnɔ maa bu mi tue? Ni ɔmɛ a tue wa, nɛ a sume kaa a maa bu o munyu ɔ tue. Ke o ha mi sɛ gbi nɛ i ya de mɛ ɔ, pe a muɔɔ mi; a nya we he.

¹¹ Yawɛ, enɛ ɔmɛ a he je ɔ, ye mi mi fu mɛ wawɛɛ nitsɛ kaa bɔ nɛ mo hu o mi mi fu mɛ ɔ pɛ; jehanɛ lɛɛ i be nyɛe tsui tomi hu.” Kɛkɛ nɛ Yawɛ de mi ke, “Ngɔɔ ye mi mi fumi ɔ kɛ kple jokuɛwi a nɔ ngɛ gbɛjegbɛ ɔ nɔ; ngɔɔ kɛ kple nihewi a nɔ ngɛ a he nya buami he ɔmɛ. A maa nuu nyumuhi kɛ a yihi kɛ je, nɛ nihi nɛ bwɔ kotokoto po be a he yee.

¹² A wehi, a zugbahi, kɛ a yihi ma plɛ pee ni kpahi a níhi, ejakaa ma gbla zugba nɛ ɔ nɔ bi ɔmɛ a tue.

¹³ Kɛ je nimli wawihi a nɔ kɛ ya si nimli nguahi a nɔ ɔ, nɔ tsuaa nɔ hɛ dɔ kɛ ngɛ nɔ sisie nɛ e kɛ na ní. Gbali kɛ osɔfohi po ngɛ nɔ sisie.

¹⁴ Pá nɛ ngɛ ye ma mi bi ɔmɛ a he ɔ, a tsɔɔ lɛ fa kɛ fa kɛkɛ, nɛ e peeɔ mɛ kaa pa a gbo. Lɔ ɔ he ɔ, a deɔ ke, ‘Wa ngɛ tue mi jɔmi, wa ngɛ tue mi jɔmi,’ be mi nɛ tue mi jɔmi ko be.

¹⁵ Anɛ zo gbe mɛ benɛ a tsu musu ní nɛ ɔmɛ lo? Dɛbi, zo gbi mɛ fɛɛ; nɔ́ nɛ a tsɛɛ zo po a li. Enɛ ɔ he je ɔ, mɛ hu a ma gbo kɛ piɛ ni nɛmɛ nɛ a maa gbe ɔ a he. Ke i gbla a tue kɛkɛ a nyagbe ji lɔ ɔ nɛ. Imi, Yawɛ lɛ i de.”

Israel kua Mawu blɔ ɔ

¹⁶ Yawɛ de e ma a ke, “Nyɛ ya da blɔ gbla nya nɛ nyɛɛ hyɛ. Nyɛ bi nɛ a tsɔɔ nyɛ blema nane blɔ kpakpa amɛ nɛ nyɛɛ nyɛɛ nɔ. Nyɛɛ pee ja, konɛ nyɛ na tue mi jɔmi.” Se ma a he nɔ ke, “Dɛbi, wa be pee fɛɛ!”

¹⁷ Jehanɛ, to Yawɛ buli ngɛ ma a mi konɛ ma a nɛ bu titimati ɔ pɛmi tue. Se a de ke, “Wa be tue bue fɛɛ!”

¹⁸ Lɔ ɔ he ɔ, Yawɛ de ke, “Nyɛ je ma amɛ, nyɛɛ bu tue nɛ nyɛɛ nu sane nɛ maa ba ye ma a nɔ.

¹⁹ Je ɔ, bu tue! Ma ngɔ haomi kɛ ba ma nɛ ɔ nɔ kaa yayamihi nɛ mɛ nitsɛmɛ a pee ɔ he tue gblami. Ejakaa a bui ye munyu ɔmɛ tue, nɛ ye mlaa a hu a yi nɔ.

²⁰ Tsopa kɛ e he via nɛ a kɛ jeɔ Sheba kɛ ba haa mi ɔ, mɛni ma pee he? Nu he via nɛ a kɛ jeɔ ma se lokoo kɛ ba haa mi ɔ, i hla we. I be a sami bɔ ɔmɛ ngɔe; bɔ kpa amɛ hu i sume.

²¹ Lɔ ɔ he ɔ, ma fɔ blɔ mi tso ha mɛ; a ma tɛ nɔ nɛ a maa nɔ si bum. Tsɛmɛ kɛ a bimɛ ma gbo, nɛ nihi kɛ a huɛmɛ a hɛ mi ma kpata.”

He nyɛli maa je omleyi je kɛ ba

²² Yawɛ ke, “Ma ko mi bi je omleyi je kɛ ma; je ma ko nɛ a he wa saminya je tsitsaa kɛ ma nɛ a ba tua nyɛ.

²³ Nimli nɛ ɔmɛ ɔ, yiwutsotsɛmɛ ji mɛ; mɔbɔ nami kake too be a mi. A mia kɛ kɛ̃ɛ̃ kɛ akplɔ, nɛ a hi okpɔngɔhi a nɔ kɛ ma. Okpɔngɔ ɔmɛ a nane si ngɛ pɛe glɛi glɛi glɛi kaa wo nɛ gli. A ma nɛ a ba tua Yerusalem.”

²⁴ Yerusalem bi ɔmɛ ke, “Wa nu a he, nɛ wa nine mi je wu! Wa tsui po, nɛ wa pee kaa yo nɛ nu kɔɔmi nɛ e miɔ nɛ e ma fɔ.

²⁵ Wa be nyɛe maa je kpo kɛ ya nga a nɔ, loo waa nyɛɛ ngɛ gbɛjegbɛ ɔmɛ a nɔ hu. Ejakaa he nyɛli ɔmɛ hɛɛ klaate, nɛ he tsuaa he pee gbeyegbeye.”

²⁶ Yawɛ de e ma a ke, “Nyɛ bu kpekpe ya bo, nɛ nyɛɛ ngɔ nyɛ he kɛ wuwlua si ngɛ la zu mi. Nyɛɛ wo yana nɛ nyɛɛ ye kɔmɔ kaa a yeɔ kɔmɔ kɛ haa bi kake too nɛ gbo, ejakaa ta a nɛ ma nyɛ hɛ mi kpatami ɔ ma ba tua nyɛ tlukaa.

²⁷ Kaa bɔ nɛ sika he ní tsulɔ hlaa sika nitsɛ ngɛ sika yaya kpɛti ɔ, jã kɛ̃ i hla mo Yeremia, konɛ o hyɛ ye ma mi bi ɔmɛ fitofitso kaa kɛ ji bɔ nɛ a je mi bami ngɛ kɛɛ.

²⁸ Mɛ tsuo pɛpɛɛpɛ atuã tsɔli, kɛ yakayaka nimli ji mɛ; a tue wa kaa akɔblee kɛ dade. Daa nɛ ɔ, a ngɛ nihi a sisi nyɛɛe kɛ ngɛ bee.

²⁹ La ngɛ tsoe nɛ sumui sileɔ ngɛ mi. Se e he hia we kaa a ya nɔ nɛ a tsu ye ma mi bi ɔmɛ a he hu, ejakaa nimli yayamihi nɛ ngɛ a kpɛti ɔ, a je we mɛ.

³⁰ A ma tsɛ mɛ ke dade fi, ejakaa imi Yawɛ, i kua mɛ.”