Yeremia 52 - BAIBLO ALOO NGMAMI KLƆUKLƆU Ɔ

A kpata Yerusalem hɛ mi

¹ Zedekia ye jeha nyingmi enyɔ kɛ kake benɛ e ba bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kake. E nyɛ biɛ ji Hamutal. Yeremia nɛ je Libna a biyo ji lɛ.

² Matsɛ Zedekia pee yayami kɛ si Yawɛ kaa bɔ nɛ Yehoyakim pee ɔ pɛpɛɛpɛ.

³ Yawɛ mi mi fu Yuda ma a, kɛ nihi nɛ ngɛ Yerusalem ɔ wawɛɛ nitsɛ kɛ ya si e je e hɛ ngɛ a nɔ. Zedekia tsɔ atuã kɛ wo Babilonia matsɛ, Nebukadnezar.

⁴ Enɛ ɔ he je ɔ, Zedekia yi nɔ jeha nɛ ji nɛɛ ɔ, nyɔhiɔ nɛ ji nyɔngma a we ligbi nɛ ji nyɔngma a nɔ ɔ, Babilonia matsɛ, Nebukadnezar kɛ e tabo ɔ tsuo ba tua Yerusalem. A sa ma a yi, nɛ a fia kpokuhi kɛ bɔle ma a kɛ kpe.

⁵ A sa ma a yi hluu kɛ ya si Matsɛ Zedekia yi nɔ jeha nɛ ji nyɔngma kɛ kake ɔ.

⁶ Nyɔhiɔ nɛ ji eywiɛ ɔ we ligbi nɛ ji nɛɛ ɔ, benɛ hwɔ ɔ nya ba wa, nɛ ma mi bi ɔmɛ na we ní nɛ a ye ɔ,

⁷ a hule gbogbo ɔ nɛ a fia kɛ wo ma a he ɔ. Jamɛ a be ɔ mi ɔ, Babilonia bi ɔmɛ bɔle ma a kɛ kpe mohu, se matsɛ ɔ, kɛ ta buli ɔmɛ tsuo tu fo nyɔ ɔ mi. A gu matsɛ abɔɔ ɔ mi kɛ ya be ngɛ agbo ɔ nɛ ngɛ gbogbo enyɔ ɔmɛ a kpɛti ɔ mi, nɛ a ngɔ a yi ngɔ ka Yordan kɔ̃ ɔ mi blɔ.

⁸ Babilonia tabo ɔ nyɛɛ Zedekia se, nɛ a ya nu lɛ ngɛ Yeriko nga a nɔ; e ta buli ɔmɛ tsuo gbɛ fĩa kɛ je e he.

⁹ A ngɔ Zedekia ya ha Matsɛ Nebukadnezar ngɛ Ribla, ngɛ Hamat zugba a nɔ; nɛ lejɛ ɔ Nebukadnezar kojo lɛ nɛ e bu lɛ fɔ ngɛ.

¹⁰ Nebukadnezar gbe Zedekia binyumu ɔmɛ ngɛ Zedekia hɛ mi ngɛ Ribla. E gbe Yuda ma nimeli ɔmɛ tsuo hulɔ.

¹¹ Lɔ ɔ se ɔ, e ta Zedekia hɛngmɛhi; e bɔ lɛ pã, nɛ e ngɔ lɛ kɛ ya Babilon, nɛ e ya wo lɛ tsu. Zedekia hi tsu ɔ mi kɛ ya si e gbenɔ ligbi.

A puɛ Yawɛ we ɔ

¹² Babilonia matsɛ, Nebukadnezar yi nɔ jeha nyɔngma kɛ nɛɛ ɔ mi, nyɔhiɔ nɛ ji enuɔ ɔ we ligbi nɛ ji nyɔngma a nɔ ɔ, Nebukadnezar tatsɛ, kɛ tsɔlɔ nɛ a tsɛɛ lɛ Nebuzaradan ɔ ya Yerusalem.

¹³ E sã Yawɛ we ɔ, matsɛ we ɔ, kɛ ni nguahi tsuo nɛ ngɛ Yerusalem ɔ a wehi,

¹⁴ nɛ e ta buli ɔmɛ hule gbogbo nɛ a fia kɛ wo ma a he ɔ.

¹⁵ Nihi nɛ piɛ ngɛ ma a mi, ni nɛmɛ nɛ ku nigii kɛ ho Babilonia matsɛ ɔ ngɔ ya, kɛ ga ní tsuli nɛ piɛ ɔ, Nebuzaradan ngɔ mɛ tsuo kɛ ho Babilonia ya.

¹⁶ Se e si ohiatsɛmɛ komɛ nɛ nɔ́ ko be a dɛ ɔ ngɛ Yuda, konɛ a tsu ní ngɛ wai abɔɔ ɔmɛ a mi, kɛ ngmɔ ɔmɛ a nɔ.

¹⁷ Babilonia bi ɔmɛ ywia akɔblee titima amɛ nɛ ngɛ Yawɛ we ɔ, kɛ akɔblee nyu nɔ́ agbo ɔ kɛ e sisi daka amɛ; nɛ a muɔ akɔblee ɔ tsuo kɛ ho Babilon ya.

¹⁸ A muɔ buɛ ɔmɛ, sofi ɔmɛ, la gbemi ní ɔmɛ, tsopa kɛ e he via kã amɛ, kɛ akɔblee ní ɔmɛ nɛ a kɛ sɔmɔɔ ngɛ Yawɛ we ɔ hulɔ kɛ ho.

¹⁹ A muɔ nɔ́ tsuaa nɔ́ nɛ a kɛ sika tsu, aloo sika hiɔ pee ɔ, kã wawi ɔmɛ, ngɛyu ɔmɛ, kã ngua amɛ, buɛ ɔmɛ, kane tso ɔmɛ, tsopa kɛ e he via kã amɛ, kɛ likɔkɔ ɔmɛ kɛ ho.

²⁰ Akɔblee níhi nɛ Matsɛ Salomo pee kɛ wo Yawɛ we ɔ nɛ ji titima enyɔ ɔmɛ, nyu nɔ́ agbo ɔ, kɛ na ku nyɔngma kɛ enyɔ ɔmɛ nɛ nyu nɔ́ ɔ maa si ngɛ a nɔ ɔ, kɛ a sisi daka amɛ lɛɛ a nyɛ we nɛ a ngmɛ, ejakaa a jiɔ tsɔ.

^21-22 Titima enyɔ ɔmɛ tsuo sɔ fiee; kake kami ji gugue eywiɛ kɛ fa, nɛ kpa gugue etɛ maa kpe he. Puɔ ngɛ titima enyɔ ɔmɛ tsuo a mi, nɛ akɔblee nɛ a kɛ pee ɔ, e timi ji nine nguɛ eywiɛ. Akɔblee kpɔ ngɛ titima amɛ eko tsuaa eko yi mi. Kpɔ kake hiɔwe yami maa pee gugue kake kɛ fa, nɛ a kɛ akɔblee pee ya kɛ e mi níhi kaa tso yiblii nɛ ngɔɔ tsɔwitsɔwihi kɛ mimlaa akɔblee kpɔ ɔmɛ.

²³ Níhi kaa tso yiblii nɛ ngɔɔ tsɔwitsɔwihi nɛ ngɛ akɔblee ya a eko tsuaa eko mi ji lafa, se nyingmi nɛɛ kɛ ekpa ji nɔ́ nɛ o maa na ngɛ zugba.

A ngɔ Yuda bi ɔmɛ kɛ ho Babilonia ya

²⁴ Nebuzaradan, tatsɛ ɔ ngɔ osɔfo nɔkɔtɔma Seraya e se yelɔ, osɔfo Zefania, kɛ Yawɛ we buli etɛ ɔmɛ hu nyɔguɛ.

²⁵ Jehanɛ, nihi nɛ e ngɔ kɛ je ma a mi ji nɛ ɔmɛ nɛ: asafoatsɛ ɔ nɛ hyɛɛ ta buli ɔmɛ a nɔ ɔ, matsɛ ga woli kpaago nɛ ngɛ ma a mi kɛ mwɔɔ ɔ, asafoatsɛ ɔ pɛdiyo ɔ nɛ buaa ma mi bi ɔmɛ a nya kɛ yaa ta a, kɛ ma mi bi kpahi nyingmi ekpa.

²⁶ Nebuzaradan ngɔ mɛ ya ha Babilonia matsɛ ɔ ngɛ Ribla.

²⁷ Babilonia matsɛ ɔ fia mɛ ní, nɛ e gbe mɛ ngɛ Ribla, ngɛ Hamat zugba a nɔ. Bɔ nɛ a pee kɛ ngɔ Yuda bi ɔmɛ nyɔguɛ kɛ je a zugba a nɔ ji nɛ ɔ nɛ.

²⁸ Nihi tsuo nɛ Nebukadnezar ngɔ nyɔguɛ kɛ ho ɔ, a hiɛmi ji nɛ ɔ nɛ: benɛ e ye jeha kpaago ngɛ matsɛ sɛ ɔ nɔ ɔ, e ngɔ Yuda bi 3,023 kɛ ho;

²⁹ benɛ e ye jeha nyɔngma kɛ kpaanyɔ ngɛ matsɛ sɛ ɔ nɔ ɔ, e ngɔ nihi 832 kɛ je Yerusalem kɛ ho;

³⁰ jehanɛ, benɛ Nebukadnezar ye jeha nyingmi enyɔ kɛ etɛ ngɛ matsɛ sɛ ɔ nɔ ɔ, e tatsɛ Nebuzaradan ba ngɔ Yuda bi 745 nyɔguɛ kɛ ho. Ni ɔmɛ tsuo a hiɛmi ji 4,600.

³¹ Jeha mi nɛ Evilmerodak ba bɔni matsɛ yemi ngɛ Babilonia ma a nɔ ɔ, e na Yuda matsɛ, Yehoyakin mɔbɔ, nɛ e je lɛ kɛ je tsu mi jamɛ a jeha a nɔuu. Nyɔhiɔ nyɔngma kɛ enyɔ ɔ we ligbi nɛ ji nyingmi enyɔ kɛ enuɔ ɔ nɔ lɛ a ngmɛɛ Yehoyakin he ɔ nɛ. Jamɛ a be ɔ, Yehoyakin na jeha nyingmi etɛ kɛ kpaago momo ngɛ nyɔguɛ si himi mi.

³² Evilmerodak kɛ Yehoyakin hi si saminya, nɛ e ha lɛ blɔ nya nɛ pe bɔ nɛ e pee matsɛmɛ kpa amɛ nɛ e ngɔ mɛ nyɔguɛ kɛ piɛ e he ngɛ Babilonia a.

³³ Enɛ ɔ he je ɔ, a ngmɛ Yehoyakin blɔ nɛ e je pã mi tade ɔmɛ ngɛ e he ngɔ pue si, nɛ e ya yeɔ ní ngɛ matsɛ okplɔɔ he daa ligbi kɛ ya si e gbenɔ be.

³⁴ Jehanɛ se hu, matsɛ ɔ haa lɛ yemi kɛ buami sika ko daa ligbi kɛ ya si e gbenɔ be.