Yeremia 51 - BAIBLO ALOO NGMAMI KLƆUKLƆU Ɔ

A maa gbla Babilonia tue ekohu

¹ Bɔ nɛ Yawɛ de ji nɛ ɔ nɛ: “Ma ha nɛ kɔɔhiɔ nɛ puɛɔ ní maa fia ngɛ Babilonia zugba a nɔ, nɛ e ma kpata nihi a hɛ mi.

² Ma ha nɛ he nyɛli ma ba sa Babilonia zugba a yi kɛ kpe; a ma kpata zugba a hɛ mi pɛsɛpɛsɛ. Babilonia zugba a maa pee falifali kaa zugba nɛ kɔɔhiɔ muɔ jakati ngɛ nɔ kɛ ho; nɔ́ ko nɔ́ ko be piɛe ngɛ nɔ.

³ Nyɛ ko ngmɛ a ta buli ɔmɛ blɔ nɛ a kpla a gbaja amɛ. Nyɛ ko ngmɛ mɛ blɔ nɛ a tsɛ̃ a kɛ̃ɛ̃ ɔmɛ. Nyɛ ko ha nɛ a nihewi ɔmɛ a yi nɛ na wami! Nyɛ kpata tabo ɔ tsuo hɛ mi!

⁴ A maa plaa mɛ ngɔ pue si ngɛ Kaldea gbɛjegbɛ ɔmɛ a nɔ, nɛ a ma gbo ngɛ lejɛ ɔ.

⁵ Niinɛ, Israel kɛ Yuda pee yayami kɛ si imi, Israel Nɔ Klɔuklɔu ɔ. Se imi Yawɛ Tabohiatsɛ Mawu ɔ, imi lɛɛ i kua we mɛ.

⁶ Nyɛɛ tu fo kɛ je Babilonia nɛ nyɛ kɛ he nyɛ yi wami. Nyɛ ko ha nɛ a gbe nyɛ ngɛ Babilonia bi ɔmɛ a he yayami ɔ he. Amlɔ nɛ ɔ, i ngɛ ye he lue yee ngɛ a nɔ, nɛ i ngɛ a tue gblae bɔ nɛ sa mɛ.

⁷ Babilonia ngɛ kaa sika tsu kplu ko ngɛ ye dɛ mi nɛ ha je ɔ tsuo tɔ dã. Je ma amɛ tsuo nu wai ngɛ kplu nɛ ɔ mi, nɛ a fo godo.

⁸ Babilonia nɔ si tlukaa, nɛ e hɛ mi kpata. Nyɛ nya awe ha lɛ! Nyɛɛ to e pa amɛ a nɔ tsopa kaa alini e ma na he wami lo.

⁹ Nibwɔhi nɛ ngɛ Babilonia a de ke, ‘Jinɛ wa ka kaa wa maa piɛ a he, se wa ya nyɛ we. Lɔ ɔ he ɔ, nyɛ ha nɛ waa je e he; nɔ tsuaa nɔ nɛ pue e ma mi blɔ. Mawu gbla Babilonia tue wawɛɛ nitsɛ; Mawu kpata zugba a hɛ mi pɛsɛpɛsɛ.’ ”

¹⁰ Yawɛ ke, “Ye ma, nyɛ he ose, nɛ nyɛ de ke, ‘Yawɛ wo wɔ nguɔ! Nyɛ ha nɛ waa ya Yerusalem, nɛ wa ya bɔ ma a nɔ́ nɛ Yawɛ, wa Mawu ɔ pee.’ ”

¹¹ Yawɛ ha nɛ Media matsɛmɛ ɔmɛ a mumi te si, konɛ a ya kpata Babilonia hɛ mi. Bɔ nɛ e to nɛ e maa ye e he lue, nɛ e maa gbla Babilonia tue ngɛ lɛ Yawɛ, e we ɔ nɛ a ble ɔ he ji nɛ ɔ nɛ. Tatsɛmɛ ɔmɛ nɛ nyɛɛ ta a hɛ mi ɔ fa ke, “Nyɛɛ duɔ nyɛ kɛ̃ɛ̃ mi bi ɔmɛ a nya! Nyɛ wo nyɛ tsɛ̃i ɔmɛ a nɔ!

¹² Nyɛ wo aflaangaa amɛ a nɔ kɛ pee okadi nɛ a kɛ ma tua Babilon gbogbo ɔmɛ. Nyɛɛ hla buli kpakpahi, nɛ nyɛ ha nɛ a ya da a blɔ hehi! Nyɛ ha nɛ ka woli ɔmɛ nɛ a dla a he!” Bɔ nɛ Yawɛ to kaa e maa pee Babilonia bi ɔmɛ ɔ, ja e pee ɔ nɛ.

¹³ Pahi fuu ngɛ jamɛ a zugba a nɔ, nɛ a juetli hu hiɛ babauu. Se a nyagbe ɔ su; a po a wami kpa a.

¹⁴ Yawɛ Tabohiatsɛ ɔ ka e he kita ke e maa ngɔ nihi babauu kaa baalɛhi kɛ ba tua Babilonia. A maa ye kunimi, nɛ a ma hwɔ lele.

Mawu yi jemi la

¹⁵ Yawɛ lɛ bɔ je ɔ ngɛ e he wami nya. Nile lɛ e kɛ bɔ je ɔ, nɛ jamɛ a nile ɔ nɔuu e kɛ bli hiɔwe mi.

¹⁶ Ke e wo gbi kikɛ nɛ ɔ, nyu nɛ ngɛ hiɔwe ɔ keɔ wawɛɛ nitsɛ; Yawɛ haa nɛ afua teɔ si kɛ jeɔ zugba a nyagbe he ɔmɛ. E haa oslabai gbaa, be mi nɛ hiɔmi ngɛ nɛe, nɛ e jeɔ kɔɔhiɔ kpo kɛ jeɔ e nito he ɔ.

¹⁷ Nimli adesahi tsuo biɛ; a li nɔ́ ko nɔ́ ko. Sika gali a hɛ mi pue si pɛ, ejakaa amagahi nɛ a puɛɛ ɔ, ní guhi ji mɛ; wami ko wami ko be a mi.

¹⁸ Amaga amɛ ɔ, se nami ko be a he, yakayaka níhi, kɛ zo níhi kɛkɛ ji mɛ. Be mi nɛ Yawɛ ma ba gbla ma a tue ɔ, a we amaga amɛ hu a maa ku mɛ dukuduku.

¹⁹ Yakob Mawu ɔ be kaa mɛ; lɛ ji nɔ nɛ pee nɔ́ tsuaa nɔ́, nɛ e hla Israel kɛ pee lɛ nitsɛ e ma. E biɛ ji Yawɛ Tabohiatsɛ.

Yawɛ hamle ɔ

²⁰ Yawɛ ke, “Babilonia, ye hamle ji mo; o ngɛ kaa ye ta hwumi ní. I ngɔ mo kɛ kpata je mahi, kɛ matsɛ yemihi a hɛ mi.

²¹ I ngɔ mo kɛ kpata okpɔngɔhi kɛ a nɔ hili a hɛ mi. I ngɔ mo kɛ kpata ta zugba lɛhi kɛ a kudɔli a hɛ mi.

²² I ngɔ mo kɛ gbe nyumuhi kɛ yihi, nikɔtɔmahi kɛ jokuɛwi, nihewi kɛ yihewi.

²³ I ngɔ mo kɛ kpata to hyɛli kɛ a to ɔmɛ a hɛ mi. I ngɔ mo kɛ kpata ngmɔ huli kɛ a na kpakplaahi a hɛ mi. Amlaalohi kɛ ma ní tsuli hu, mo nɔuu i kɛ kpata a hɛ mi.”

A maa gbla Babilonia tue

²⁴ Yawɛ ke, “Yayamihi tsuo nɛ Babilonia kɛ Babilonia ma mi bi ɔmɛ pee Yerusalem he je ɔ, ma gbla a tue nɛ nyɛ maa na kɛ nyɛ hɛngmɛ.

²⁵ Mo Babilonia nɛ o ngɛ kaa yoku, nɛ o ngɛ je ɔ tsuo hɛ mi kpatae, i kɛ mo na! Ma nu mo, nɛ ma kpɛne mo kɛ je tɛ sa amɛ a nɔ ba ko si, nɛ o maa pee kaa yo nɛ sã.

²⁶ Tɛhi nɛ maa je o mi ɔ, a be eko ngɔe kɛ ma tsu; a kɛ be kɔ nya tɛ, loo tsu sisi tomi tɛ pee. Mohu ɔ, o maa pee kaa zugba kplanaa kɛ ya neneene. Imi, Yawɛ lɛ i de.

²⁷ “Nyɛɛ si aflaangaa. Nyɛ kpa titimati nɛ je ma amɛ nɛ a nu! Nyɛ ha nɛ je ma amɛ nɛ a mia, nɛ a kɛ Babilonia ya hwu ta! Nyɛ de Ararat, Mini, kɛ Ashkenaz matsɛ yemi ɔmɛ ke a ya tua Babilonia. Nyɛ hla tatsɛ nɛ e nyɛɛ a hɛ mi. Nyɛɛ ngɔ okpɔngɔhi babauu kaa baalɛhi kɛ ba.

²⁸ Nyɛ ha nɛ je ma amɛ nɛ a mia, nɛ a kɛ Babilonia ya hwu ta. Nyɛ ya kpee Media matsɛmɛ ɔmɛ, a we amlaalo ɔmɛ, ma ní tsuli ɔmɛ, kɛ a nɔ yemi he ɔmɛ tsuo kɛ ba.

²⁹ Yawɛ to e yi mi kaa e ma ha nɛ Babilonia zugba a maa pee kaa nga kplanaa nɔ, nɛ nɔ ko nɔ ko be lejɛ ɔ hie. Yawɛ yi mi tomi nɛ ɔ ba mi. Enɛ ɔ he je ɔ, zugba ngɛ mimiɛe, nɛ e ngɛ hosoe.

³⁰ Babilonia ta buli ɔmɛ kpa ta hwumi, nɛ a hii si ngɛ a mɔ ɔmɛ a mi. A kɔni mi jɔ̃, nɛ a pee kaa yihi. Babilonia agbo ɔmɛ ku kɛ pueɔ si, nɛ we ɔmɛ sã.

³¹ Tsɔli babauu ngɛ fo nɔ kɛ yaa nɛ a ya bɔ Babilonia matsɛ ɔ amaniɛ ke he nyɛli ba ngɔ e ma a tsuo.

³² A ngɔ pa pomi he ɔmɛ, a mɛ mɔ ɔmɛ a he la, nɛ sawale nu Babilonia ta buli ɔmɛ.

³³ E be kɛe kulaa nɛ a maa poo a mi ngɔ pue si kaa blɛfo ngɛ ngma mi sami he. Imi Yawɛ Tabohiatsɛ, Israel Mawu ɔ lɛ i de.”

³⁴ Babilonia matsɛ, Nebukadnezar poo Yerusalem mi nɛ e ye. E muɔ níhi kɛ je ma a mi, nɛ ma a fɔɔ si kaa buɛ mi gu. E mi ma a kaa bɔ nɛ sinɔ ngua miɔ nɔ́ ɔ. E ye ma a mi ní kpakpa amɛ, nɛ e sake nɔ́ nɛ piɛ ɔ ngɔ pue he.

³⁵ Nyɛ ha nɛ Zion bi ɔmɛ nɛ a de ke, “Yi mi nɛ Babilonia bi ɔmɛ wa wɔ ɔ, a gbla a tue kɛ to nya!” Nyɛ ha nɛ Yerusalem bi ɔmɛ nɛ a de ke, “Haomi nɛ ba wa nɔ ɔ, a gbla Babilonia bi ɔmɛ a tue kɛ to nya!”

Yawɛ maa piɛ Israel he

³⁶ Lɔ ɔ he ɔ, bɔ nɛ Yawɛ de Israel bi ɔmɛ ji nɛ ɔ nɛ: “Ma ye nyɛ sane ɔ ha nyɛ, nɛ ma gbla nyɛ he nyɛli ɔmɛ a tue ha nyɛ. Ma ha nɛ Babilonia wo ɔ, kɛ pa amɛ ma gbli.

³⁷ Ma ha nɛ Babilon maa pee ma doku; e maa pee nga mi gbehi a hi he, nɛ nɔ ko nɔ ko be lejɛ ɔ hie hu. Nihi nɛ ma ba be ngɛ lejɛ ɔ, a nya maa kpɛ a he, nɛ a maa ye gbeye.

³⁸ Babilonia bi ɔmɛ tsuo maa hi huãe kaa jata; a maa hi pɛe kaa jata bimɛ.

³⁹ Ke a he mi akɔnɔ te si ɔ, ma tsɛ mɛ ní yemi; ma ha mɛ dã nɛ a nu nɛ a de. Kɛkɛ ɔ, a maa sɛ mahe vii mi, nɛ a be si tee hu.

⁴⁰ Lɔ ɔ se ɔ, ma ngɔ mɛ kɛ ho nɛ a ya gbe mɛ kaa bɔ nɛ a gbeɔ jijɔ, loo apletsi, loo agbosu. Imi, Yawɛ lɛ i de.”

Babilon hɛ mi kpata

⁴¹ Bɔ nɛ Yawɛ de ngɛ Babilon he ji nɛ ɔ nɛ: “Kɛ e ba lɛ kɛɛ nɛ a ngɔ Babilon, ma nɛ je ɔ tsuo jeɔ e yi ɔ! Kɛ e ba lɛ kɛɛ loko Babilon ba pee nɔ́ nɛ a hiee ngɛ je ma amɛ tsuo a kpɛti kikɛ nɛ ɔ!

⁴² Wo ɔ te si kɛ wo Babilon, nɛ wo oslɔke ɔmɛ nɛ ngɛ pɛe ɔ ha e nɔ.

⁴³ Babilon ma amɛ plɛ pee níhi nɛ a hiee; zugba a pee kaa nga kplanaa nɛ nyu be nɔ. Nɔ ko nɔ ko be lejɛ ɔ, nɛ nɔ ko hu ba bi ngɛ lejɛ ɔ.

⁴⁴ Ma gbla Babilonia mawu ɔ nɛ a tsɛɛ Bel ɔ tue, nɛ ma je e ju ní ɔmɛ kpo; je ma amɛ be lɛ jae hu. “Babilon gbogbo ɔmɛ ku kɛ pueɔ si.

⁴⁵ Ye ma, Israel, nyɛɛ tu fo kɛ je lejɛ ɔ! Nyɛɛ tu ye mi mi fumi nɛ nya wa a nya fo, konɛ nɔ tsuaa nɔ nɛ he e yi wami.

⁴⁶ Nyɛ nine mi nɛ ko je wu; sanehi nɛ nyɛ nu ɔ hu a ko po nyɛ tsui. Daa jeha a, a ke sane he ko kɛ̃ maa ba. Ke sane ɔ kɔ we yi wu tso níhi nɛ a ngɛ pee ngɛ zugba a nɔ a he ɔ, lɛɛ matsɛ kɛ matsɛ lɛ na.

⁴⁷ Lɔ ɔ he ɔ, be ma nɛ i kɛ Babilonia amaga amɛ maa to ní. Babilonia zugba a tsuo hɛ mi ma pue si, nɛ Babilonia bi ɔmɛ tsuo a hɛ mi ma kpata.

⁴⁸ Nihi maa je omleyi je kɛ ba kpata Babilonia hɛ mi. Jamɛ a be ɔ, níhi tsuo nɛ ngɛ hiɔwe kɛ zugba a nɔ ɔ ma hwɔ lele.

⁴⁹ Babilonia kpata nihi babauu a hɛ mi ngɛ je ɔ mi tsuo. Enɛ ɔ he je ɔ, ja a kpata Babilonia hu hɛ mi kokooko, ejakaa e gbe Israel bi babauu. Imi, Yawɛ lɛ i de.”

Mawu sɛ gbi kɛ ha Israel bi nɛ ngɛ Babilonia

⁵⁰ Yawɛ ma a nɛ ngɛ Babilonia a, bɔ nɛ e ngɛ mɛ dee ji nɛ ɔ nɛ: “Nyɛ nɛ nyɛ je klaate nya! Nyɛɛ ho esɔesɔ! Nyɛ ko to tsle! Nyɛɛ kɛ we he kɛ mohu lɛɛ, se kɛ̃ ɔ, nyɛ susu imi Yawɛ, ye he; nɛ nyɛ hɛ ko je Yerusalem nɔ.

⁵¹ Nyɛ deɔ ke, ‘Wa hɛ mi pue si! Ahlua bɔ wɔ! Wa yi ta pɛ! Ejakaa he klɔuklɔuhi ngɛ Yawɛ we ɔ, nibwɔhi ba ngɔ.’

⁵² Lɔ ɔ he ɔ, i ngɛ dee ke, be ma nɛ i kɛ Babilon amaga amɛ maa to ní, nɛ a maa nu nihi nɛ plaa a he nɛ a ngɛ kɛmɛe ngɛ zugba a nɔ tsuo.

⁵³ Ke Babilon kuɔ kɛ ho hiɔwe ya nɛ e ya ma mɔ nɛ he wa ngɛ lejɛ ɔ tete po, ma tsɔ nihi kɛ ya lejɛ ɔ nɛ a ya kpata e hɛ mi. Imi, Yawɛ lɛ i de.”

Babilon hɛ mi kpata pɛsɛpɛsɛ

⁵⁴ Yawɛ ke, “Nyɛɛ bu tue! Ngmlaa nɛ nya wa ngɛ pɛe ngɛ Babilon. A wo yana boboobo ngɛ lejɛ ɔ, ejakaa zugba a hɛ mi kpata!

⁵⁵ I ngɛ Babilon hɛ mi kpatae nɛ nɔ ko pa be e he nue hu. Ta buli ɔmɛ a he sɔ kɛ ba sɛ ma a mi, nɛ a ba tua a he nyɛli ɔmɛ gidigidi kɛ ngmlaa kaa bɔ nɛ oslɔke kuɔ kɛ ba pueɔ wo dɔ mi ɔ.

⁵⁶ A ba kpata Babilon hɛ mi; a nuu Babilon ta buli ɔmɛ, nɛ a ku a kɛ̃ɛ̃ ɔmɛ. Mawu nɛ woɔ yayami he hiɔ ji mi, ma gbla Babilon tue bɔ nɛ sa lɛ.

⁵⁷ Ma ha nɛ a ma nimeli ɔmɛ, ní leli ɔmɛ, amlaalo ɔmɛ, ma ní tsuli ɔmɛ, kɛ ta buli ɔmɛ maa tɔ dã. Ke a hwɔ si ɔ, a be si tee hu. Imi, matsɛ ɔ lɛ i de. Ye biɛ ji Yawɛ Tabohiatsɛ.

⁵⁸ A maa hule Babilonia gbogbohi kɛ a hɛ mi gbajagbajaa a ngɔ pue si, nɛ a maa mɛ agbo gagaaga amɛ a he la. Je ma amɛ tsu yaka ní pɛ; a gbo dengme kɛ ha la nɛ e ba sã. Imi, Yawɛ Tabohiatsɛ ɔ lɛ i de.”

Yeremia ngɔ sɛ gbi kɛ mane Babilonia

⁵⁹ Matsɛ Zedekia tsɔli ɔmɛ a kpɛti nɔkɔtɔma kake ji Neria bi Seraya, Maseya bibi ɔ. Yuda matsɛ, Zedekia yi nɔ jeha eywiɛne ɔ, benɛ lɛ Zedekia a yaa Babilonia a, Seraya kɛ lɛ ya. I ngɔ sɛ gbi kɛ ha Seraya kɛ ho.

⁶⁰ I ngma amanehlu tsuo nɛ maa ba Babilonia nɔ, kɛ ní kpahi tsuo nɛ kɔɔ Babilonia he kɛ wo womi mi.

⁶¹ I de Seraya ke, “Ke o su Babilon ɔ, moo kane níhi tsuo nɛ a ngma ngɛ hiɛ ɔ kɛ ha ma a.

⁶² Lɔ ɔ se ɔ, moo sɔle nɛ o de ke, ‘Yawɛ, o de ke o ma kpata hiɛmɛ nɛ ɔ hɛ mi pɛsɛpɛsɛ, nɛ nɔmlɔ, loo lohwe be hiɛ ɔ hie hu. O de ke hiɛmɛ nɛ ɔ maa pee ma doku kɛ ya neneene.’

⁶³ Seraya, ke o kane womi nɛ ɔ gbe nya a, o fi tɛ kɛ wo he, nɛ o ya sake kɛ fɔ Yufrate pa a mi,

⁶⁴ nɛ o de ke, ‘Bɔ nɛ Babilonia ma mu kɛ ya nyu sisi ji nɛ ɔ nɛ. Babilonia ma mu, nɛ e be hiae hu, ejakaa Yawɛ ma kpata zugba a hɛ mi pɛsɛpɛsɛ.’ ” Yeremia sɛ gbi ɔ nya ta ngɛ hiɛ ɔ.