Yeremia 5 - BAIBLO ALOO NGMAMI KLƆUKLƆU Ɔ

Yerusalem pee yayami

¹ Yerusalem bi, nyɛɛ tu fo kɛ gu gbɛjegbɛ ɔmɛ a nɔ kɛ ya kɛ ba! Nyɛɛ po nyɛ hɛ nɛ nyɛɛ hyɛ kɛ bɔle si! Nyɛɛ kpa jua amɛ a nɔ nɛ nyɛ hla fitsofitso kaa nyɛ maa na nɔ kake ngmelu nɛ peeɔ nɔ́ nɛ da, nɔ nɛ bɔɔ mɔde kaa e maa ye Mawu anɔkuale lo? Ke nyɛ na nɔ kake ngmelu kaa ja a, lɛɛ Yawɛ maa ngɔ Yerusalem he yayami ɔmɛ kɛ pa lɛ.

² Nyɛ ngɔɔ Yawɛ biɛ kɛ kaa kita, se nyɛ ní peemi níhi slo.

³ Anɛ pi anɔkuale yemi pɛ nɛ Yawɛ suɔ lo? Yawɛ fia nyɛ ní, se nyɛ bui fɛɛ. Yawɛ kpata nyɛ hɛ mi, se nyɛ kase we ní kɛ ji mi. Nyɛ kplii nyɛ tsui kaa tɛ sa, nɛ nyɛ kpale we kɛ ji nyɛ yayami ɔmɛ a se.

⁴ Kɛkɛ nɛ i de ke, “Nimli guhi kɛkɛ ji nimli nɛ ɔmɛ; a be juɛmi; a biɛ. A li Yawɛ, a Mawu ɔ blɔ ɔmɛ. Kɛ a maa pee kɛ bu lɛ tue kɛɛ?

⁵ Ma ya nimli ngua amɛ a ngɔ, nɛ i kɛ mɛ ma ya tu munyu. Niinɛ, mɛɛ lɛɛ a le nɔ́ nɛ Yawɛ, a Mawu ɔ ngɛ hlae nɛ a pee.” Se ni nɛ ɔmɛ hu ngɛ kaa nimli gu ɔmɛ kɛ̃; mɛ hu a tsɔ Yawɛ hɛ mi atuã, nɛ a bui lɛ fɛɛ.

⁶ Enɛ ɔ he je ɔ, jata maa je pu mi kɛ ba gbe mɛ; ogbetee maa je nga nɔ kɛ ba tsɔtslɔɔ a mi dukuduku, nɛ ngatsɛ ma ba wo ka ngɛ a ma amɛ a mi. Nɔ tsuaa nɔ nɛ maa je kpo ɔ, a ma tsɔtslɔɔ lɛ; ejakaa a pee yayamihi fuu, nɛ a tsɔ Mawu hɛ mi atuã si abɔ.

⁷ Yawɛ bi ke, “Mɛni he je lɛ ma ngɔ ye ma a he yayami ɔmɛ kɛ pa mɛ ɔ? Ye ma a kua mi nɛ a ya ja yaka mawuhi. I lɛ ye ma a kɛ ya si a tɔ saminya, se ajuama bɔmi mohu ji nɔ́ nɛ a suɔ, nɛ yaholi a wehi a mi a naa mɛ ngɛ.

⁸ A ngɛ kaa okpɔngɔ kuhi nɛ plɔke saminya nɛ a he mi ngɛ mɛ ngɔɔe, nɛ a he mi abua ngɛ nɔ́ dee ha mɛ; nɔ tsuaa nɔ hɛ dɔ ngɛ e nyɛmi e yo se.

⁹ Anɛ e sɛ kaa a gblaa a tue ngɛ ní nɛ ɔmɛ a he lo? Ma nɛ ngɛ kaa kikɛ nɛ ɔ, e sɛ kaa i gblaa a tue lo?

¹⁰ Ma tsɔ he nyɛli nɛ a ya poo ye ma mi bi ɔmɛ a wai tso ɔmɛ ngɔ pue si, se i be hae nɛ a kpata a hɛ mi pɛsɛpɛsɛ. Ma ha nɛ a kplɔ tso kɔni ɔmɛ, ejakaa pi imi Yawɛ, ye níhi ji mɛ.

¹¹ Israel kɛ Yuda tsuo yi mi anɔkuale. Imi, Yawɛ lɛ i de.”

Yawɛ kua Israel

¹² Yawɛ ma mi bi ɔmɛ sisi mɛ nitsɛmɛ a he, nɛ a de ke, “Yawɛ loo! Mɛni e ma nyɛ maa pee? Haomi ko haomi ko be wa nɔ bae fɛɛ! Ta, loo hwɔ hu be bae.”

^13-14 A deɔ ke gbali ɔmɛ a munyu ɔmɛ ngɛ kaa kɔɔhiɔ kɛkɛ; Yawɛ sɛ gbi ko be mi. Yawɛ Tabohiatsɛ Mawu ɔ de mi ke, “Yeremia, akɛnɛ nimli nɛ ɔmɛ tu kikɛmɛ a munyu nɛ ɔmɛ he je ɔ, ma ha nɛ ye munyu ɔmɛ maa pee kaa la ngɛ o nya mi. Ma nɛ ɔ maa pee kaa lɛ́, nɛ la a maa sã mɛ.”

¹⁵ Nyɛ Israel bi, Yawɛ ha nɛ je ma ko je tsitsaa kɛ ma nɛ e ba tua nyɛ. Blema ma ji ma nɛ ɔ nɛ, nɛ ma mi bi ɔmɛ a he wa wawɛɛ nitsɛ. Nimli nɛ ɔmɛ a gbi ɔ, nyɛ li; ke a tu munyu hu nyɛ be sisi nue.

¹⁶ A kɛ̃ɛ̃ tsɛ̃li ɔmɛ ɔ, ta buli katsɛmɛ sɔuu ji mɛ; a gbeɔ nɔ basabasa nɛ a hyɛ we a se.

¹⁷ A maa ye nyɛ ngmɔ niba ní ɔmɛ, kɛ nyɛ niye ní ɔmɛ tsuatsuaatsua; a maa gbe nyɛ binyumu ɔmɛ, kɛ nyɛ biyi ɔmɛ. A ma tsɔtslɔɔ nyɛ to ɔmɛ, kɛ nyɛ na amɛ, nɛ a ma kpata nyɛ wai, kɛ nyɛ ngmɔkɔ ɔmɛ a hɛ mi. Nyɛ mahi nɛ a fia gbogbo ngɔ wo a he, nɛ nyɛ ngɔ nyɛ hɛ kɛ fɔ a nɔ ɔ, he nyɛli ɔmɛ a tabo ɔmɛ ma kpata jamɛ a ma amɛ a hɛ mi.

¹⁸ Yawɛ ke, “Se jamɛ a be ɔ mi po, i be ye ma a hɛ mi kpatae pɛsɛpɛsɛ.

¹⁹ Yeremia, ke a bi mo ke mɛni he je lɛ imi Yawɛ, a Mawu ɔ kɛ mɛ ye sane yaya kaa kikɛ nɛ ɔ, de mɛ ke, kaa bɔ nɛ a je ye se nɛ a ya sɔmɔ ma se mawuhi ngɛ mɛ nitsɛmɛ a zugba nɔ ɔ, jã nɔuu kɛ̃ lɛ a ma ya sɔmɔ nibwɔhi ngɛ ma se zugba nɔ.”

Mawu bɔ e ma a kɔkɔ

²⁰ Yawɛ ke, “De Yakob nina nɛ ji Yuda bi ɔmɛ ke,

²¹ Nyɛ kuasiahi, kɛ nihi nɛ nyɛ be juɛmi! Nyɛ ngɛ hɛngmɛ, se nyɛ hyɛ we nɔ́; nyɛ ngɛ tue, se nyɛ nui nɔ́. Nyɛɛ bu tue!

²² Imi ji Yawɛ; mɛni he je lɛ nyɛ yi mi gbeye? Mɛni he je nyɛ he dui blibliibli ngɛ ye hɛ mi? Imi lɛ i ngɔ zia kɛ wo huzu ha wo, huzu nɛ ngɛ daa kɛ daa, nɛ wo be nyɛe maa hane ligbi ko ligbi ko. Ke wo gli kaa mɛni, e be nyɛe maa hane huzu nɛ ɔ. Ke oslɔkehi ngɛ kue nɛ wo ɔ pee hamahama kaa mɛni, e be nyɛe maa be huzu nɛ ɔ he gblegbleegble.

²³ Se nyɛ kikɛmɛ a ma nɛ ɔ lɛɛ nimli nɛ a tsui kplii, kɛ atuã tsɔli ji nyɛ; nyɛ tsɔ ye hɛ mi atuã, nɛ nyɛ kua mi.

²⁴ Nyɛ susuu we hyɛ kaa e sa kaa nyɛɛ wo imi Yawɛ, nyɛ Mawu ɔ, ye hɛ mi nyami: imi nɛ i haa nɛ gbo kɛ gbiɛ nyu nɛɛ ha nyɛ ngɛ be nɛ sa mi, nɛ i haa nɛ nyɛ kpaa ní daa jeha a!

²⁵ Se nyɛ ní peemi ní yayami ɔmɛ tsake ní nɛ ɔmɛ; nyɛ yayami ɔmɛ ha nɛ ní kpakpa nɛ ɔmɛ bɔ nyɛ.

²⁶ “Yiwutsotsɛmɛ ngɛ ye ma mi bi ɔmɛ a kpɛti. A woɔ ka kaa bɔ nɛ nihi nɛ tsɔɔ lohwe pɛlitsɛmɛ klama peeɔ ɔ. Se mɛɛ lɛɛ ke a tsɔ klama a, nimli lɛ a duɔ.

²⁷ Ju níhi hyi a wehi a mi tɔ kaa lohwe pɛlitsɛmɛ nɛ a nuu kɛ wo kusii mi. Enɛ ɔmɛ a he je ɔ, a na ní, nɛ a pee nimli nguahi.

²⁸ A plɔke, nɛ a pee tɔfutɔfu, nɛ a yi mi wa kaa nɔ́ ko. A ha we awusahi a blɔ fa mi níhi nɛ sa, nɛ dɛgutsɛmɛ hu a yi dami sane ha we mɛ.

²⁹ “Anɛ e sɛ kaa i gblaa a tue ngɛ ní nɛ ɔmɛ a he lo? Ma nɛ ngɛ kaa kikɛ nɛ ɔ, e sɛ kaa i gblaa a tue lo?

³⁰ A ye sane yaya ngɛ zugba a nɔ nɛ ke o nu ɔ, ja o he mi po.

³¹ Gbali ɔmɛ a sɛ gbi ɔ, lakpa sɔuu; nɔ́ nɛ mɛɛ a fa osɔfo ɔmɛ ke a pee ɔ, lɔ ɔ osɔfo ɔmɛ peeɔ. Nɛ ye ma a hu suɔ ja. Se nyagbe ɔ, kɛ a maa pee kɛɛ?”