Yeremia 48 - BAIBLO ALOO NGMAMI KLƆUKLƆU Ɔ

A kpata Moab zugba a hɛ mi

¹ Bɔ nɛ Yawɛ Tabohiatsɛ, Israel Mawu ɔ de ngɛ Moab he ji nɛ ɔ nɛ: “Musu tloo Nebo bi ɔmɛ, ejakaa a kpata a ma a hɛ mi! A pue Kiriataim hɛ mi si, nɛ a ngɔ ma a. A ku mɔ ngua a ngɔ pue si, nɛ a bɔ lɛ ahlua.

² Moab hɛ mi nyami ɔ ta. He nyɛli ɔmɛ ngɔ Heshbon, nɛ a to kaa a ma kpata Moab zugba a hɛ mi. Madmen ma a hu, a ma ya tua lɛ, nɛ a ma kpata ma a hɛ mi.

³ Horonaim bi ɔmɛ jé ngmlaa, ejakaa a ngɛ níhi a hɛ mi kpatae basabasa ngɛ lejɛ ɔ.

⁴ “Moab jokuɛ tsɔwitsɔwi ɔmɛ wo yana ke, a kpata Moab ma a hɛ mi.

⁵ Nyɛɛ hyɛ bɔ nɛ a wo yana kɛ yaa, benɛ a ngɛ Luhit yoku ɔ kuɔe ɔ. Nyɛɛ hyɛ mɛ nɛ a ngɛ awe nyae, benɛ a ngɛ kplee kɛ ma Horonaim ɔ.

⁶ A ke, ‘Nyɛɛ tu fo esɔ, kaa nga mi teji yo, nɛ nyɛ kɛ he nyɛ yi wami!’

⁷ “Moab bi, nyɛ ngɔ nyɛ hɛ ngɔ fɔ nyɛ he wami, kɛ nyɛ juetli nɔ, lɔ ɔ he ɔ, nyɛ hu a ma ba ngɔ nyɛ kɛ ho. Nyɛ mawu ɔ nɛ a tsɛɛ lɛ Kemosh ɔ, a maa ngɔ lɛ kɛ ho ma se ya kɛ e ganɔ ɔmɛ, kɛ e we osɔfo ɔmɛ.

⁸ He nyɛlɔ ɔ ma kpata mahi tsuo pɛpɛɛpɛ a hɛ mi; ma ko ma ko he be mi jee. A ma kpata kɔ̃ kɛ nga kplanaa tsuo a hɛ mi. Imi, Yawɛ lɛ i de.

⁹ Nyɛɛ ma kaimi nɔ́ ko ha Moab; ejakaa e be kɛe nɛ a ma kpata ma a hɛ mi. Moab ma amɛ maa pee ma dokuhi nɛ nɔ ko nɔ ko be a mi hie hu.”

¹⁰ Nihi nɛ tsuɔ ní ha Yawɛ kɛ yi si fiami ɔ, a gbiɛ mɛ. Ni nɛmɛ nɛ sume kaa a maa ngɔ klaate kɛ pue muɔ si kaa bɔ nɛ Yawɛ fa mɛ ɔ, a gbiɛ mɛ!

A kpata Moab ma amɛ a hɛ mi

¹¹ Bɔ nɛ Yawɛ de ji nɛ ɔ nɛ: “Moab he mi jɔ lɛ kɛ je sa, nɛ a ngɔɛ lɛ kɛ yɛ ma se hyɛ. Moab ngɛ kaa wai atiati nɛ a si ngɛ tɔ mi kɛ ma si, nɛ a plɛ we kɛ wui tɔ kpa mi. Bɔ nɛ e ngɛ sa a, ja ko e ngɛ; e nya nyu gbo we, nɛ e puɛ we hulɔ.

¹² “Lɔ ɔ he ɔ, jehanɛ be ma nɛ ma tsɔ he nyɛli kɛ ba nɛ a ba kpata Moab hɛ mi pɛsɛpɛsɛ. Kaa bɔ nɛ nɔ́ puɛli ma plɛ wai ngɔ pue si nɛ a maa ywia wai tɔ ɔ wɔtsɔwɔtsɔ ɔ, kikɛ nɛ ɔ he nyɛli ɔmɛ maa pee Moab ɔ nɛ.

¹³ Jamɛ a be ɔ mi loko Moab bi ɔmɛ a hɛ mi ma pue si kaa bɔ nɛ Israel bi ɔmɛ hu a hɛ mi pue si be ko ɔ. A ma kpa si kaa mamoo a mawu Kemosh ɔ be he wami ko kaa Israel bi ɔmɛ hu a mawu Betel ɔ nɛ a ngɔ a hɛ ngɔ fɔ e nɔ ɔ.

¹⁴ “Moab bi! Mɛni he je nyɛ deɔ ke, ‘Wɔɔ lɛɛ ta buli katsɛmɛ nɛ he biɛ ji wɔ ɔ?’

¹⁵ A kpata Moab zugba a, kɛ ma amɛ tsuo a hɛ mi; a gbe Moab nihewi kpakpa amɛ tsuo. Imi matsɛ ɔ, Yawɛ Tabohiatsɛ ɔ, imi lɛ i de.

¹⁶ Moab amanehlu be ɔ su ta; Moab hɛ mi kpatami be ɔ ma kɛ fo.

¹⁷ “Nyɛ nihi tsuo nɛ nyɛ bɔle Moab, nyɛ ni nɛmɛ tsuo nɛ nyɛ nu bɔ nɛ e biɛ pɛɛ be ko ɔ, nyɛɛ ye lɛ kɔmɔ. Nyɛ de ke, ‘E nɔ yemi kpetekpleenyɛ ɔ se po; e hɛ mi nyami, kɛ e he wami ɔ ta.’

¹⁸ Nyɛ Moab bi, nyɛ je nyɛ hɛ mi nyami ɔ ngɔ fɔ si; nyɛ ba hi si ngɛ zia mi ngɛ zugba. Moab he nyɛli ɔmɛ ma ba tua nyɛ hulɔ, nɛ a ma kpata nyɛ mɔ ɔmɛ a hɛ mi.

¹⁹ Nyɛ Aroer bi, nyɛ ya da blɔ he nɛ nyɛɛ huɔ! Nyɛ bi nihi nɛ ngɛ fo tue kɛ yaa a ke, ‘Mɛni sane ba?’

²⁰ A ma he nɔ ke, ‘A bɔ Moab ahlua; a kpata Moab hɛ mi. Nyɛɛ wo yana nɛ nyɛ nya awe! Nyɛɛ fiɛ ngɛ Arnon pa a nya ke a kpata Moab hɛ mi!’

²¹ “A gbla ma nɛ ɔmɛ nɛ ngɛ nga kplanaa a nɔ ɔ a tue: Holon, Yaza, Mefat,

²² Dibon, Nebo, Bet Diblataim,

²³ Kiriataim, Betgamut, Betmeon,

²⁴ Keriot, kɛ Bozra. A gbla mahi tsuo nɛ ngɛ Moab zugba a nɔ ɔ a tue, mahi nɛ ngɛ se lokoo, kɛ ní nɛmɛ nɛ a he kɛ we.

²⁵ Moab he wami kpetekpleenyɛ ɔ je e dɛ; a kpata Moab hɛ mi. Imi, Yawɛ lɛ i de.”

A maa ba Moab si

²⁶ Bɔ nɛ Yawɛ de ji nɛ ɔ nɛ: “Nyɛ ha nɛ Moab nɛ pee kaa nɔ ko nɛ tɔ dã, ejakaa e te si kɛ si mi. Moab ma kokloo si ngɛ lɛ nitsɛ e vie mi, nɛ nihi maa muɔ lɛ.

²⁷ Tse Israel plɛ pee muɔ nɔ́ ha mo? Israel ɔ, anɛ juli a kpɛti a naa lɛ ngɛ lo? Be tsuaa be nɛ o maa tu Israel he munyu ko ɔ, o maa tuu, ma mimiɛ o yi! Pi ja lo?

²⁸ “Nyɛ Moab bi, nyɛɛ je nyɛ ma amɛ a mi! Nyɛɛ ho nɛ nyɛ ya hi tɛ sa amɛ a mi! Nyɛɛ pee nyɛ ní kaa okpohi nɛ a maa tsu ngɛ puɔhi a mi ngɛ kɔ̃ he ɔ.

²⁹ Moab woɔ e he nɔ tsɔ! E he womi, e nɔ buimi, kɛ bɔ nɛ e buu lɛ nitsɛ e he ha a, i le lɛ tsuo pɛpɛɛpɛ.

³⁰ Imi Yawɛ, i le kaa Moab bi ɔmɛ bui nɔ. Fiami puu kɛkɛ a le, nɛ a tsu we nɔ́ kpakpa ko.

³¹ Lɔ ɔ he ɔ, ma fo ya ha nihi tsuo nɛ ngɛ Moab zugba a nɔ ɔ, nɛ ma ye kɔmɔ ha Kir Heres bi ɔmɛ.

³² Nyɛ Sibma bi, ma fo nyɛ kulaa pe bɔ nɛ ma fo Yazer bi. Sibma ma, o ngɛ kaa wai tso nɛ kɔnihi gba kɛ ya be ngɛ Ngo wo ɔ he kɛ ya su Yazer tɔɔ. Se amlɔ nɛ ɔ, a kpata o tso yiblii ɔmɛ, kɛ o wai yiblii ɔmɛ tsuo a hɛ mi.

³³ Bua jɔmi, kɛ nyami se po ngɛ Moab zugba kpakpa nɛ baa ní ɔ nɔ. I ha nɛ wai se po ngɛ wai ngami he ɔmɛ. Nihi nɛ peeɔ wai, nɛ ke a ngɛ wai ɔ pee nɛ a hii lele hwɔe kɛ hii he toe ɔ, jamɛatsɛmɛ ɔmɛ a ti nɔ ko nɔ ko be hu.

³⁴ “Heshbon kɛ Eleale bi ngɛ awe nyae, nɛ a ngɛ ngmlaa a he nue ngɛ Yahaz tɔɔ. Ngmlaa a ngɛ pɛe ngɛ Zoar, Horonaim, kɛ Eglat Shelishiya tɔɔ. Nimrim pa a po gbli.

³⁵ Ma ha nɛ Moab bi ɔmɛ ma kpa sami bɔ sami ngɛ a jami he ɔmɛ, nɛ tsopa kɛ e he via nɛ a sãã ha a mawu ɔmɛ hu se maa po. Imi, Yawɛ lɛ i de.

³⁶ “Lɔ ɔ he ɔ, kaa bɔ nɛ a kpaa ya la mɔbɔmɔbɔ ngɛ bɛ mi ɔ, ja nɛ i ngɛ tsui yee ha Moab, kɛ Kir Heres ma mi bi ɔmɛ, ejakaa a ní nɛ a na a tsuo hɛ mi kpata.

³⁷ A ti nɔ tsuaa nɔ sã e yi nɔ kpalokpalo, nɛ e sɛ kpɛni. Mɛ tsuo a poo a kɔnihi a he, nɛ a ngɔ kpekpe kɛ muɔ a mlɛ mi.

³⁸ Ngɛ tsuhi a yi mi, kɛ blɔhi a nɔ ngɛ Moab zugba a nɔ ɔ, nɔ́ nɛ o maa nu kɛkɛ ji kɔmɔ yemi, ejakaa i ha nɛ Moab pee kaa buɛ nɛ ywia wɔtsɔwɔtsɔ nɛ nɔ ko sume hu.

³⁹ Nyɛɛ hyɛ bɔ nɛ a kpata Moab zugba a hɛ mi ha! Nyɛɛ hyɛ bɔ nɛ Moab bi ɔmɛ ngɛ awe nyae ha! Nyɛɛ hyɛ bɔ nɛ a bɔ Moab ahlua ha! Moab plɛ pee muɔ nɔ́, kɛ nɔ́ ko nɛ je mahi tsuo nɛ bɔle lɛ ɔ hiee. Imi, Yawɛ lɛ i de.”

Peepee ko be ha Moab

⁴⁰ Bɔ nɛ Yawɛ de to ji nɛ ɔ nɛ. E ke, “Je ma ko ma ba tua Moab tlukaa kaa kɔle nɛ gbɛ e pɛlihi a mi kɛ ma.

⁴¹ A maa ngɔ ma amɛ, kɛ mɔ ɔmɛ. Jamɛ a ligbi ɔ, sawale maa nu Moab ta buli ɔmɛ kaa yo nɛ nu kɔɔmi.

⁴² A ma kpata Moab hɛ mi pɛsɛpɛsɛ, nɛ e be ma pee hu; ejakaa e te si kɛ si mi.

⁴³ Haomi fɔɔ si ha Moab bi; a tsua muɔ kɛ to mɛ, nɛ a tsɔ mɛ klama hulɔ. Yawɛ lɛ de.

⁴⁴ Ke nɔ ko tu fo kɛ je haomi ɔ nya a, e ma ya nɔ muɔ mi. Nɛ ke e je muɔ ɔ mi ɔ, e ma ya du klama. Ní nɛ ɔmɛ maa ba mi, ejakaa Yawɛ to be nɛ a kɛ ma kpata Moab hɛ mi.

⁴⁵ Nihi nɛ a he wami ta maa ka kaa a maa tu fo nɛ a ya laa a he ngɛ Heshbon mɔ ɔ mi, he nɛ Matsɛ Sihon ye tsɛ ngɛ be ko ɔ. Se la sã Moab zugba a tsuo; atuã tsɔli nɛ ɔmɛ a zugba a sã kɛ je zugba a nya he kake kɛ ya si he kake.

⁴⁶ Moab bi, due! Nyɛ nihi nɛ nyɛ sɔmɔɔ Kemosh ɔ, a kpata nyɛ hɛ mi, nɛ a nuu nyɛ binyumu ɔmɛ, kɛ nyɛ biyi ɔmɛ kɛ je.”

⁴⁷ Se be ma nɛ Yawɛ ma ha nɛ Moab maa bɔ ekohu. Nɔ́ nɛ Yawɛ de to ke e maa ba Moab nɔ ɔ, lɔ ɔ ji nɛ ɔ nɛ.