Yeremia 47 - BAIBLO ALOO NGMAMI KLƆUKLƆU Ɔ

Yawɛ sɛ gbi nɛ kɔɔ Filistia he

¹ Loko Egipt matsɛ ɔ ya tua Filistia a, Yawɛ kɛ mi tu munyu nɛ kɔɔ Filistia he.

² Yawɛ ke, “Hyɛ! Nyu babauu je omleyi je kɛ ma kaa pa nɛ hia lalaala. Nyu nɛ ɔ ma ba ha zugba a nɔ tsuo; e maa ha mahi, nimli, kɛ nɔ́ tsuaa nɔ́ nɔ. Ngmlaa maa je nyumuhi po a nya, nɛ nɔ tsuaa nɔ maa wo yana ngɛ zugba a nɔ.

³ A maa nu nɛ okpɔngɔhi a nane kokloto ngɛ si sie glɛi, glɛi, glɛi! A maa nu nɛ zugba lɛhi a nane ngɛ pɛe kplakatsa, kplakatsa, kplakatsa! Tsɛmɛ be plɛe nɛ a hyɛ a bimɛ; a nine mi maa je wu.

⁴ Be ɔ su nɛ a ma kpata Filisti bi ɔmɛ, kɛ a huɛmɛ ɔmɛ tsuo nɛ piɛ ɔ, Tiro, kɛ Sidon a hɛ mi. Imi, Yawɛ nitsɛ ma kpata Filisti bi ɔmɛ, ni nɛmɛ tsuo nɛ je Kreta wo ɔ nya kɛ ba a a hɛ mi.

⁵ Amanehlu agbo ba Gaza bi ɔmɛ a nɔ, nɛ Ashkelon bi ɔmɛ pee dii. Filisti bi ɔmɛ nɛ piɛ ɔ, mɛni be a maa ye kɔmɔ kɛ ya si?

⁶ Ngmlaa je nyɛ nya nɛ nyɛ bi ke, ‘Yawɛ klaate, mɛni be o ma kpa ní tsumi? Yaa sɛ o kpo ɔ mi, nɛ o jɔɔ o he, nɛ o pee dii!’

⁷ Se kɛ klaate ɔ maa jɔɔ e he kɛɛ, be mi nɛ i ha lɛ ní tsumi ke e tsu ɔ? I fa klaate ɔ ke e ya tua Ashkelon bi ɔmɛ, kɛ ni nɛmɛ nɛ ngɛ wo ɔ nya a.”