Yeremia 46 - BAIBLO ALOO NGMAMI KLƆUKLƆU Ɔ

A ye Egipt nɔ ngɛ Karkemish

¹ Yawɛ kɛ mi tu je ma amɛ a he munyu;

² e je sisi kɛ je Egipt nɔ. Egipt matsɛ, Neko tabo ɔ nɛ Babilonia matsɛ, Nebukadnezar ye a nɔ ngɛ Karkemish, ngɛ Yufrate pa a nya a, bɔ nɛ Yawɛ de ngɛ a he ji nɛ ɔ nɛ. Sane nɛ ɔ ba ngɛ Yuda matsɛ, Yehoyakim yi nɔ jeha eywiɛne ɔ mi.

³ “Egipt asafoatsɛmɛ ɔmɛ kpa ngmlaa ke, ‘Nyɛ dla nyɛ he kɛ nyɛ tsɛi ɔmɛ, nɛ nyɛɛ hia ta!

⁴ Nyɛɛ mia nyɛ okpɔngɔ ɔmɛ, nɛ nyɛɛ hi a nɔ! Nyɛ bu nyɛ dade pɛɛ ɔmɛ, nɛ nyɛ ya da nyɛ blɔ hehi! Nyɛɛ duɔ nyɛ akplɔ ɔmɛ a nya. Nyɛ kpla nyɛ ta hwumi ní ɔmɛ!’ ”

⁵ Yawɛ bi ke, “Se mɛni i ngɛ hyɛe ɔ? Sawale nu Egipt tabo ɔ, nɛ a gbee senyasenya kɛ ma. A ye a ta buli kpanaa amɛ a nɔ; a kɛ gbenɔ kɛ kã tu fo kɛ ma kitikiti, nɛ a plɛ we nɛ a hyɛ a se.

⁶ Nihi nɛ a he sɔɔ wawɛɛ po, a he be mi jee; ta buli kpanakpanaa amɛ hu, ja nɔuu. A ma tɛ nɔ́, nɛ a maa nɔɔ si ngɛ omleyi je, ngɛ Yufrate pa a nya.

⁷ Mɛnɔ lɛ ma nɛ ɔ, kaa Nilo pa a, kaa pa nɛ hia lalaala kɛ ha zugba a tsuo hɛ mi ɔ?

⁸ Egipt lɛ hia kɛ ma kaa Nilo pa a nɛ, kaa pa nɛ hia lalaala kɛ ha zugba a tsuo hɛ mi. Egipt de ke, ‘Ma hia kɛ ba ha je ɔ tsuo hɛ mi. Ma kpata mahi, kɛ nimli nɛ ngɛ ma amɛ a mi ɔ a hɛ mi.

⁹ Nyɛ okpɔngɔhi, nyɛɛ ya nyɛ hɛ mi esɔ. Nyɛ zugba lɛhi, nyɛ sa fo! Nyɛ katsɛmɛ, nyɛɛ je kpo: Sudan kɛ Libia tsɛi hɛɛli, kɛ Lidia kɛ̃ɛ̃ tsɛ̃li nɛ nyɛ nine nya da.’ ”

¹⁰ Nyɔmtsɛ Yawɛ Tabohiatsɛ ɔ ligbi ɔ ji nɛ ɔ nɛ; mwɔnɛ ligbi nɛ ɔ, Yawɛ maa ye e he lue; mwɔnɛ ligbi nɛ ɔ, e maa gbla e he nyɛli ɔmɛ a tue. Yawɛ klaate ɔ maa pee kaa nɔ ko nɛ ye ní nɛ e tɔ, aloo nɔ ko nɛ nu muɔ nɛ e de kaa dã. Nyɔmtsɛ Yawɛ Tabohiatsɛ ɔ ngɔ e he nyɛli ɔmɛ kɛ ngɛ bɔ sãe ngɛ omleyi je, ngɛ Yufrate pa a tue.

¹¹ Egipt ma, nyɛɛ ya Gilead nɛ nyɛ ya hla tsopa ngɛ lejɛ ɔ! Tsopahi babauu nɛ nyɛ ngɛ pee ɔ he be se nami; nyɛ be he wami nae.

¹² Je ma amɛ nu kaa nyɛ hɛ mi pue si; nɔ tsuaa nɔ nu ngmlaa nɛ nyɛ ngɛ kpae ɔ. Katsɛmɛ ɔmɛ ngɛ a sibi tɛe, nɛ a ngɛ si nɔɔe.

Nebukadnezar ba

¹³ Benɛ Babilonia matsɛ, Nebukadnezar ma nɛ e ba tua Egipt ɔ, Yawɛ kɛ mi tu munyu. Yawɛ de mi ke,

¹⁴ “Nyɛɛ fiɛ ngɛ Egipt ma amɛ a mi, ngɛ Migdol, Memfis, kɛ Tapanhes ke, ‘Nyɛɛ mia, nɛ nyɛɛ pee klaalo, ejakaa ta ngɛ ní puɛe ngɛ mahi nɛ bɔle nyɛ ɔ a mi kɛ ma!

¹⁵ Kɛ ba lɛ kɛɛ loko Apis, nyɛ mawu kpetekpleenyɛ ɔ tu fo kɛ je nyɛ he ɔ? Ee, Yawɛ lɛ fia lɛ nɔ́ kɛ fɔ si!’

¹⁶ Nyɛ ta buli ɔmɛ tɛ nɔ́ nɛ a nɔɔ a sibi a nɔ, nɛ a de ke, ‘Nyɛ ha nɛ waa te si, nɛ waa tu fo kɛ je he nyɛli ɔmɛ a klaate ɔ nya. Nyɛ ha nɛ waa kpale kɛ ya wɔ nitsɛmɛ wa ma mi, he nɛ a fɔ wɔ ngɛ ɔ.’

¹⁷ “Egipt matsɛ ɔ, nyɛɛ wo lɛ biɛ he; nyɛ tsɛ Farao ɔ ke, ‘Nyapuutsɛ nɛ e he wami ta!’

¹⁸ Imi Yawɛ Tabohiatsɛ ɔ, imi ji Mawu hɛ kalɔ ɔ nɛ. Kaa bɔ nɛ Tabor yo ɔ daa si gagaa ngɛ yo ɔmɛ a kpɛti, aloo kaa bɔ nɛ Karmel yo ɔ daa si ngɛ wo tue ɔ, jã ji bɔ nɛ nɔ nɛ ma mo tuami ɔ e he wami ngɛ.

¹⁹ Nyɛ Egipt bi, nyɛ dla nyɛ he, ejakaa a ma ba nuu nyɛ kɛ ho ma se ya. Nyɛ ma a nɛ a tsɛɛ Memfis ɔ, a ma kpata e hɛ mi. Memfis maa pee ma doku, nɛ nɔ ko be mi hie hu.

²⁰ Egipt ngɛ kaa na yo saminyayoo nɛ pwɔlwɛ je omleyi je ba kɔ lɛ.

²¹ Ta buli nɛ Egipt bɔ mɛ apaa a, mɛ po a ngɛ kaa na bimɛ kɛkɛ. A nyɛ we nɛ a da si ngɛ ta a nya; mɛ tsuo a tu fo kɛ je ta a nya. A haomi be ɔ su, a hɛ mi kpatami be ɔ su.

²² Egipt bi ɔmɛ tu fo ngɛ a he nyɛli ɔmɛ a nya kɛ a nɔ ngmlaa kaa sinɔ nɛ ngɛ si sãe kɛ yaa. He nyɛli ɔmɛ ba tua lɛ kɛ gbiɛhi kaa nihi nɛ ngɛ tso hɛɛe,

²³ aloo nihi nɛ ngɛ hue tso gbae. A ta buli ɔmɛ ɔ, nɔ ko li a nya; a he hiɛ babauu pe baalɛhi po.

²⁴ A bɔ Egipt bi ɔmɛ ahlua; nihi nɛ je omleyi je ɔ ye a nɔ kunimi. Imi, Yawɛ lɛ i de.”

²⁵ Yawɛ Tabohiatsɛ, Israel Mawu ɔ ke, “Ma gbla Amon, Tebes mawu ɔ, kɛ Egipt mawu kpa amɛ tsuo a tue. Farao ɔ, kɛ nihi tsuo nɛ ngɔɔ a hɛ kɛ fɔɔ e nɔ ɔ, mɛ hu ma gbla a tue.

²⁶ Ma ngɔ mɛ kɛ wo nihi nɛ ngɛ mɛ hlae nɛ a gbe ɔ, Babilonia matsɛ, Nebukadnezar, kɛ e tsɔli ɔmɛ a dɛ mi. Se pee se ɔ, nihi ma ba hi Egipt ekohu kaa sa a. Imi, Yawɛ lɛ i de.”

Yawɛ ma he e ma a yi wami

²⁷ “Ye ma, nyɛ tsui nɛ ko po, Israel bi, nyɛ ko ye gbeye. Ma je nyɛ kɛ je jamɛ a ma se zugba a nɔ he nɛ a nuu nyɛ kɛ ho ɔ. Nyɛ maa kpale kɛ ba we, nɛ nyɛ ma ba hi si ngɛ tue mi jɔmi mi; nyɛ he mi maa jɔ nyɛ, nɛ nɔ ko nɔ ko be nyɛ he gbeye woe.

²⁸ Ye ma, nyɛ tsui ko po, ejakaa i kɛ nyɛ ngɛ. Je ma amɛ, hehi nɛ i fie nyɛ kɛ ho ɔ, ma kpata mɛ tsuo a hɛ mi; se nyɛɛ lɛɛ i be nyɛ hɛ mi kpatae. Se kɛ̃ ɔ, i be hae nɛ nyɛɛ ye nyɛ he kulaa; ma gbla nyɛ tue bɔ nɛ sa kɛkɛ. Imi, Yawɛ lɛ i de.”