Yeremia 45 - BAIBLO ALOO NGMAMI KLƆUKLƆU Ɔ

Mawu wo Baruk si

¹ Yuda matsɛ, Yehoyakim, Yosia bi ɔ yi nɔ jeha nɛ ji eywiɛ ɔ mi ɔ, Neria bi Baruk ngma munyu ɔ nɛ i de lɛ ke e ngma a. Kɛkɛ nɛ i de lɛ ke,

² Yawɛ, Israel Mawu ɔ ke, “Baruk,

³ munyu nɛ ngɛ o nya jee ji, ‘Jehanɛ lɛɛ ye yi ta pɛ! Ejakaa Yawɛ pa ngɔ aywilɛho kɛ piɛ ye haomi ɔ he. Ye kɛmɛmi ɔ nya ba wa tsɔ, nɛ i be he jɔmi!’

⁴ “Se imi Yawɛ, nɔ́ nɛ i ma a, lɔ ɔ nɔuu i ngɛ kue ɔ nɛ; nɔ́ nɛ i du ɔ, lɔ ɔ i ngɛ hiae ɔ nɛ. Bɔ nɛ ma pee je ɔ tsuo ji nɛ ɔ nɛ.

⁵ Moo lɛɛ ní nguahi o ngɛ hlae ha o he? Ko hla! Ejakaa ma ngɔ haomi kɛ ba adesahi tsuo a nɔ. Se moo lɛɛ he tsuaa he nɛ o maa gu ɔ, o he maa je mi. Imi, Yawɛ lɛ i de.”