Yeremia 44 - BAIBLO ALOO NGMAMI KLƆUKLƆU Ɔ

Yawɛ sɛ gbi nɛ e kɛ ha Israel bi ɔmɛ ngɛ Egipt

¹ Yawɛ ha mi sɛ gbi nɛ ɔ nɛ kɔɔ Israel bi tsuo nɛ ngɛ Egipt ɔ a he, nihi nɛ ngɛ Migdol, Tapanhes, kɛ Memfis ma amɛ a mi, kɛ ni nɛmɛ nɛ ngɛ zugba a leneyi je ɔ tsuo.

² Yawɛ Tabohiatsɛ, Israel Mawu ɔ ke, “Nyɛ nitsɛmɛ nyɛ na bɔ nɛ i kpata Yerusalem, kɛ Yuda ma kpa amɛ a hɛ mi. Amlɔ nɛ ɔ, ma amɛ pee ma dokuhi nɛ nɔ ko nɔ ko be a mi,

³ ejakaa ma amɛ a mi bi ɔmɛ pee yayami, nɛ a wo ye mi mi la. A sã bɔhi nɛ a kɛ sɔmɔ mawu kpahi nɛ mɛ nitsɛmɛ, loo nyɛ, loo nyɛ nɛmɛ ɔmɛ po li gblee.

⁴ Daa nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ, nɛ a ba deɔ nyɛ ke nyɛ ko pee nɔ́ nɛ ɔ, ejakaa i hie.

⁵ Se nyɛ bui tue. Nyɛ yaa nɔ nɛ nyɛ sãã tsopa kɛ e he via kɛ haa mawu kpahi, nɛ nyɛ kpale we kɛ ji nyɛ blɔ yayami ɔmɛ a nɔ.

⁶ Enɛ ɔ he je ɔ, ye mi mi la nɛ nya wa a puɛ ní ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ kaa bɔ nɛ la sãã nɔ́ ɔ. Nɛ ma amɛ a hɛ mi kpata, nɛ a pee ma dokuhi kaa bɔ nɛ a ngɛ mwɔnɛ ɔ.

⁷ “Lɔ ɔ he ɔ, imi Yawɛ Tabohiatsɛ, Israel Mawu ɔ, i ngɛ bie ke mɛni he je nyɛ ngɛ nyɛ nitsɛmɛ nyɛ he yayami nguaa kaa kikɛ nɛ ɔ pee? Anɛ nyɛ suɔ kaa nyɛ tsuo nyɛ hɛ mi nɛ kpata, nyumuhi, yihi, jokuɛwi, kɛ bimwɔwi, nɛ nyɛ ti nɔ ko nɔ ko nɛ ko piɛ ngɛ Yuda lo?

⁸ Nyɛ ngɛ amagahi sɔmɔe, nɛ nyɛ ngɛ tsopa kɛ e he via sãe ha mawu kpahi ngɛ Egipt hiɛmɛ nɛ ɔ, he nɛ nyɛ ba nɛ nyɛ ba hi ɔ. Mɛni he je lɛ nyɛ ngɛ ní nɛ ɔmɛ pee kɛ ngɛ ye mi mi la woe ɔ? Anɛ nyɛ ngɛ ní nɛ ɔmɛ pee nɛ nyɛ kɛ kpata nyɛ nitsɛmɛ nyɛ hɛ mi, konɛ je ma amɛ tsuo nɛ a hie nyɛ, nɛ a ngɔ nyɛ biɛ kɛ pee gbiɛmi nɔ́ lo?

⁹ Ní yayamihi tsuo nɛ a pee ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ ɔ, anɛ nyɛ hɛ je nɔ lo? Níhi nɛ nyɛ nɛmɛ ɔmɛ pee, níhi nɛ Yuda matsɛmɛ ɔmɛ kɛ a yi ɔmɛ pee, kɛ níhi nɛ nyɛ nitsɛmɛ kɛ nyɛ yi ɔmɛ pee ɔ, anɛ nyɛ hɛ je nɔ lo?

¹⁰ Se kɛ ba si mwɔnɛ ligbi nɛ ɔ, nyɛ bɛ nyɛ he si. Nyɛ wui ye hɛ mi nyami, nɛ mlaahi tsuo nɛ i wo nyɛ, kɛ nyɛ nɛmɛ ɔmɛ ɔ, nyɛ yi mlaa amɛ a nɔ.

¹¹ “Lɔ ɔ he ɔ, imi Yawɛ Tabohiatsɛ, Israel Mawu ɔ, i to ye yi mi kaa ma ngɔ haomi kɛ ba nyɛ nɔ, nɛ ma kpata Yuda tsuo hɛ mi.

¹² Yuda bi nɛ piɛ, nɛ a to a yi mi kaa a maa ya Egipt nɛ a ya hi lejɛ ɔ, ma hyɛ nɛ a kpata mɛ tsuo a hɛ mi. Mɛ tsuo a ma gbo ngɛ Egipt zugba a nɔ, nimli wawi, kɛ nimli nguahi tsuo. Ni komɛ ma gbo ngɛ ta mi, nɛ hwɔ maa gbe ni komɛ. Nihi maa hie mɛ; a maa bɔ mɛ ahlua, nɛ a kɛ a biɛ maa gbiɛ nɔ.

¹³ Ma ngɔ ta, hwɔ, kɛ gbenɔ hiɔ kɛ gbla nihi nɛ ngɛ Egipt ɔ a tue kaa bɔ nɛ i gbla Yerusalem tue ɔ.

¹⁴ Yuda bi nɛ piɛ, nɛ a ho Egipt ya nɛ a ya hi lejɛ ɔ, a ti nɔ ko he be mi jee, nɛ nɔ ko yi be wami nae. Yuda zugba a nɛ a ko suɔ nɛ a ba hi mi ekohu ɔ, a ti nihi bɔɔ kɛkɛ lɛ a maa kpale kɛ ba lejɛ ɔ; pi mɛ tsuo.”

¹⁵ Nyumuhi tsuo nɛ le kaa a yihi sãã tsopa kɛ e he via kɛ haa mawu kpahi, yihi tsuo nɛ daa si ngɛ lejɛ ɔ, kɛ Israel bi nɛ ngɛ Egipt leneyi je ɔ, nimli babauu nɛ ɔmɛ tsuo de mi ke,

¹⁶ “Munyu ɔ nɛ o kɛ wɔ tu ngɛ Yawɛ biɛ mi ɔ, wa be tue bue fɛɛ.

¹⁷ Níhi tsuo nɛ wa de ke wa maa pee ɔ, lɔ ɔmɛ wa maa pee. Wa maa sã tsopa kɛ e he via kɛ ha wa yo mawu ɔ nɛ ji hiɔwe manyɛ ɔ, nɛ wa maa sã wai bɔ ha lɛ kaa bɔ nɛ waa kɛ wa nɛmɛ ɔmɛ, wa matsɛ ɔ, kɛ wa ma nimeli ɔmɛ pee be ko ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ ɔ. Jamɛ a be ɔ mi ɔ, wa ngɛ niye ní babauu; wa plɔke, nɛ haomi ko be wa nɔ.

¹⁸ Se kɛ je be mi nɛ wa kpa tsopa kɛ e he via, kɛ wai bɔ sami kɛ ha hiɔwe manyɛ ɔ, wa yi fi wawɛɛ nitsɛ; nɛ ta, kɛ mi mi hwɔ ngɛ wɔ gbee.”

¹⁹ Yi ɔmɛ de kɛ piɛ he ke, “Jamɛ a be ɔ mi ɔ, tse wa bɔɔ keeki kaa bɔ nɛ hiɔwe manyɛ ɔ su ngɛ ɔ, nɛ́ wa sãã? Tse wa sãã tsopa kɛ e he via kɛ haa hiɔwe manyɛ ɔ, nɛ wa sãã wai bɔ haa lɛ? Anɛ tsa pi wa hunomɛ ɔmɛ a gbi nɔ nɛ wa peeɔ níhi kaa kikɛ nɛ ɔmɛ lo?”

²⁰ Kɛkɛ nɛ i de ma a tsuo, nyumuhi kɛ yihi nɛ kɛ mi tu munyu kaa kikɛ nɛ ɔ ke,

²¹ “Tsopa kɛ e he via nɛ nyɛɛ kɛ nyɛ nɛmɛ ɔmɛ, nyɛ matsɛmɛ ɔmɛ, nyɛ ma nimeli ɔmɛ, kɛ ma mi bi ɔmɛ sã ngɛ Yuda ma amɛ a mi, kɛ Yerusalem gbɛjegbɛ ɔmɛ a nɔ ɔ, anɛ nyɛ susu kaa Yawɛ li lo? Nyɛ bu kaa e hɛ je nɔ?

²² Mwɔnɛ ligbi nɛ ɔ, nyɛ zugba a hɛ mi kpata, nɛ nɔ ko nɔ ko be nɔ. Nyɛ zugba a plɛ pee nɔ́ ko nɛ a hiee, nɛ nihi kɛ e biɛ gbiɛɛ nɔ; ejakaa nyɛ yi wu tso ní peemi ɔmɛ, kɛ nyɛ yayami ɔmɛ ba ti Yawɛ.

²³ Haomi mi nɛ nyɛ ngɛ mwɔnɛ nɛ ɔ, nɔ́ nɛ kɛ haomi nɛ ɔ ba ji nyɛ pee yayami kɛ si Yawɛ. Nyɛ sã tsopa kɛ e he via ha mawu kpahi; nyɛ bui Yawɛ gbi tue, nɛ e mlaa amɛ, kɛ e blɔ nya tomi ɔmɛ hu nyɛ yi nɔ.”

^24-25 I de ma a tsuo, titli yi ɔmɛ ke, bɔ nɛ Yawɛ Tabohiatsɛ, Israel Mawu ɔ ngɛ Yuda bi nɛ ngɛ Egipt zugba a nɔ dee ji nɛ ɔ nɛ: “Nyɛɛ kɛ nyɛ yi ɔmɛ tsuo ka hiɔwe manyɛ ɔ kita, nɛ nyɛɛ kɛ nyɛ ní peepee ma nɔ mi. Nyɛ wo lɛ si veveeve kaa nyɛ maa sã tsopa kɛ e he via ha lɛ, nɛ nyɛ maa sã wai bɔ ha lɛ. Saminya! Nyɛɛ pee ja! Nyɛɛ ye nyɛ si womi ɔ nɔ.

²⁶ Se jehanɛ, nyɛ Israel bi tsuo nɛ nyɛ ngɛ Egipt, nyɛɛ bu kita nguaa nɛ imi, Yawɛ hu i ka ye he, ngɛ ye biɛ kpetekpleenyɛ ɔ mi ɔ tue. Kɛ je mwɔnɛ ɔ kɛ yaa a, i be nyɛ ti nɔ ko nɔ ko blɔ ngmɛe hu nɛ e ngɔ ye biɛ kɛ ka kita nɛ e de ke, ‘I na Nyɔmtsɛ Yawɛ, hɛ kalɔ ɔ!’

²⁷ Ma hyɛ, nɛ nɔ́ ko nɔ́ ko be hie ha nyɛ. Nyɛ Israel bi tsuo nɛ nyɛ ngɛ Egipt zugba a nɔ ɔ, nyɛ tsuo nyɛ hɛ mi ma kpata, nɛ nɔ kake ngmelu po he be mi jee. Nyɛ ti ni komɛ ma gbo ngɛ ta mi, nɛ hwɔ maa gbe ni komɛ.

²⁸ Se nyɛ ti nihi bɔɔ ko kɛ̃ a he maa je mi, nɛ a maa kpale kɛ je Egipt zugba a nɔ kɛ ya Yuda zugba a nɔ. Jamɛ a be ɔ loko nihi nɛ a yi na wami ɔ maa le kaa imi lɛ ye munyu ba mi, aloo mɛ.

²⁹ Imi Yawɛ, ma to nyɛ okadi kaa ma gbla nyɛ tue ngɛ hiɛmɛ nɛ ɔ; nɛ lɔ ɔ nyɛɛ kɛ maa na kaa si ko nɛ i wo kaa ma kpata nyɛ hɛ mi ɔ maa ba mi niinɛ.

³⁰ Ma ngɔ Egipt matsɛ, Hofra kɛ wo e he nyɛli ɔmɛ nɛ ngɛ lɛ hlae nɛ a gbe ɔ a dɛ mi kaa bɔ nɛ i pee Yuda matsɛ, Zedekia a. I ngɔ Matsɛ Zedekia nɛ ɔ kɛ wo Babilonia matsɛ, Nebukadnezar, nɛ ji e he nyɛlɔ ɔ nɛ ngɛ lɛ hlae nɛ e gbe ɔ dɛ mi.”