Yeremia 43 - BAIBLO ALOO NGMAMI KLƆUKLƆU Ɔ

A ngɔ Yeremia kɛ ho Egipt ya

¹ I bɔ ma a níhi tsuo nɛ Yawɛ, a Mawu ɔ tsɔ mi ke ma ba de mɛ ɔ.

² Benɛ i gbe nya a, Hoshaya bi Azaria, Karea bi Yohanan, kɛ nyumuhi he nɔ woli kpa amɛ tsuo de mi ke, “Lakpa munyu o ngɛ tue nɛ ɔ nɛ. Yawɛ, wa Mawu ɔ tsɔ we mo ke o ba de wɔ ke wa ko ya hi Egipt.

³ Neria bi Baruk ji nɔ nɛ wo o yi mi nɛ e su mo kɛ wo wa he. E pee enɛ ɔ konɛ e ngɔ wɔ kɛ wo Babilonia bi ɔmɛ a dɛ mi nɛ a gbe wɔ, loo a nuu wɔ kɛ ya Babilonia.”

⁴ Lɔ ɔ he ɔ, fami ɔ nɛ Yawɛ fa ke a hi Yuda zugba a nɔ ɔ, nɔ ko nɔ ko bui fɛɛ, Karea bi Yohanan jio, asafoatsɛmɛ ɔmɛ jio, ma a jio.

⁵ Kɛkɛ nɛ Yohanan, kɛ asafoatsɛmɛ ɔmɛ tsuo ngɔ nihi tsuo nɛ piɛ ngɛ Yuda a kɛ ho Egipt ya. Ni nɛmɛ nɛ a fie kɛ ho je ma amɛ a nɔ ya nɛ a kpale kɛ ba a, jamɛatsɛmɛ ɔmɛ hu piɛ he,

⁶ nyumuhi, yihi, jokuɛwi, kɛ matsɛbiyihi. Imi Yeremia, Neria bi Baruk, kɛ nihi tsuo nɛ tatsɛ Nebuzaradan si ha Gedalia nɛ e ngɛ a nɔ hyɛe ɔ, wɔ hu wa piɛ nihi nɛ a ngɔ kɛ ho ɔ a he.

⁷ A bui Yawɛ munyu ɔ tue, nɛ a je kɛ ho Egipt zugba a nɔ ya, kɛ ya su Tapanhes tɔɔ.

⁸ Benɛ wa ngɛ Tapanhes ɔ, Yawɛ de mi ke,

⁹ “Yaa hla tɛ agboagbo komɛ nɛ o pu ngɛ zu mi ngɛ he nɛ a ka tɛ ngɛ, ngɛ Egipt matsɛ ɔ we ɔ hɛ mi ɔ. Ke o ngɛ nɔ́ nɛ ɔ pee ɔ, ha nɛ Israel bi ɔmɛ nɛ a na mo.

¹⁰ De mɛ ke imi Yawɛ Tabohiatsɛ, Israel Mawu ɔ, i yaa ngɔ Babilonia matsɛ Nebukadnezar, ye tsɔlɔ ɔ kɛ ba hiɛ ɔ. E maa ngɔ e matsɛ sɛ ɔ ba ma tɛ nɛ nyɛ pu ɔ nɔ, nɛ e kɛ e we akatabai ɔ maa ma lejɛ ɔ.

¹¹ Ke Nebukadnezar ba a, e ma ba kpata Egipt zugba a hɛ mi; nihi nɛ i de to kaa gbenɔ hiɔ maa gbe ɔ, gbenɔ hiɔ maa gbe mɛ; nihi nɛ i de to kaa a maa nuu kɛ ho ɔ, a maa nuu mɛ kɛ ho; ni nɛmɛ nɛ i de to kaa a maa nɔ ta a, a maa nɔ ta.

¹² Ma mɛ Egipt mawu ɔmɛ a jami he ɔmɛ a he la, nɛ Babilonia matsɛ ɔ maa sã mawu ɔmɛ; aloo ke e suɔ ɔ, e maa muɔ mɛ kɛ ho. Kaa bɔ nɛ to hyɛlɔ nuɔ ngmo ngɛ e bo mi nɛ e peeɔ lɛ falifali ɔ, ja pɛ Nebukadnezar maa pee Egipt zugba a falifali. Nɛ ke e gbe nya a, e maa je lejɛ ɔ kɛ tue mi jɔmi.

¹³ E maa ku amagahi nɛ a kɛ tɛ pee, nɛ maa si ngɛ Heliopolis ngɛ Egipt zugba a nɔ ɔ, nɛ e maa sã Egipt mawu ɔmɛ a jami he ɔmɛ.”