Yeremia 41 - BAIBLO ALOO NGMAMI KLƆUKLƆU Ɔ

¹ Jamɛ a jeha a mi nɔuu, nyɔhiɔ kpaago ɔ mi ɔ, Elishama bi Netania bi Ishmael kɛ nyumuhi nyɔngma ba Gedalia ngɔ ngɛ Mizpa. Ishmael je matsɛ we mi, nɛ matsɛ tsɔli nikɔtɔma amɛ a kpɛti nɔ kake ji lɛ. Benɛ mɛ tsuo a bua nɛ a ngɛ ní yee ɔ,

² Ishmael kɛ nyumuhi nyɔngma nɛ piɛ e he ɔ hia klaate wo Gedalia he, nɛ a gbe lɛ.

³ Israel bi tsuo nɛ ngɛ Gedalia ngɔ ngɛ Mizpa, kɛ Babilonia ta buli nɛ ngɛ lejɛ ɔ jamɛ a be ɔ mi ɔ, Ishmael gbe mɛ tsuo pɛpɛɛpɛ.

⁴ E nɔ jena benɛ nɔ ko nɔ ko nui he lolo kaa a gbe Gedalia a,

⁵ nyumuhi nyingmi kpaanyɔ komɛ je Shekem, Shilo, kɛ Samaria kɛ ba. Nɛ a ma a, a sɛ a kpɛnihi, nɛ a hía a he tadehi, nɛ a je blɔ nɛ a plaa mɛ nitsɛmɛ a he. A hɛɛ niye ní bɔ, kɛ tsopa kɛ e he via ngɛ a dɛ mi kɛ ma Yawɛ we ɔ.

⁶ Ishmael, Netania bi ɔ je Mizpa ya kpee mɛ; benɛ e yaa a tsuo, e ngɛ ya foe ngɛ blɔ ɔ nɔ. Benɛ e kɛ mɛ ya bua a, e de mɛ ke, “Nyɛɛ ba waa ho Ahikam bi Gedalia ngɔ ya.”

⁷ Benɛ a ba su ma a mi pɛ, Ishmael kɛ e we bi ɔmɛ gbe mɛ, nɛ a sake a gbogboe ɔmɛ kɛ wo vu ko mi.

⁸ Se a ti ni nyɔngma de Ishmael ke, “Koo gbe wɔ! Wa ngɔ ngma, blɛfo, oliv nu, kɛ hwo ngɔ laa ngɛ nga a mi.” Kɛkɛ nɛ e ngmɛɛ a he, nɛ e gbi mɛ ngɔ piɛ a nyɛmimɛ ɔmɛ a he.

⁹ Vu ɔ nɛ Ishmael sake nihi tsuo nɛ e gbe ɔ a gbogboe ɔmɛ kɛ wo mi ɔ, jamɛ a vu ɔ, Matsɛ Asa lɛ tsua. Matsɛ ɔ tsua vu nɛ ɔ be mi nɛ Israel matsɛ, Baasha ba tua lɛ ɔ. Vu nɛ ɔ mi lɛ Netania bi Ishmael sake ni gbogboe ɔmɛ kɛ wo tɔ ɔ nɛ.

¹⁰ Jehanɛ Ishmael nuu nihi tsuo nɛ piɛ ngɛ Mizpa a kɛ je. Matsɛbiyi ɔmɛ, kɛ nihi tsuo nɛ tatsɛ Nebuzaradan ngɔ kɛ wo Ahikam bi Gedalia dɛ mi po, Ishmael nuu mɛ, nɛ e kɛ mɛ pue nɔ kɛ yaa Amon bi ɔmɛ a zugba a nɔ.

¹¹ Benɛ Yohanan, Karea bi ɔ, kɛ asafoatsɛmɛ ɔmɛ tsuo nɛ piɛ e he ɔ nu ní yayamihi nɛ Netania bi Ishmael pee ɔ,

¹² a ngɔ a ta buli ɔmɛ tsuo kɛ nyɛɛ e se konɛ a kɛ lɛ ya hwu ta. A ya na lɛ ngɛ taku agbo ɔ nɛ ngɛ Gibeon ɔ kasa nya.

¹³ Benɛ ni ɔmɛ nɛ Ishmael nuu ɔ na Karea bi Yohanan, kɛ asafoatsɛmɛ ɔmɛ nɛ piɛ e he ɔ, a nya.

¹⁴ Kɛkɛ nɛ mɛ tsuo pɛpɛɛpɛ a tu fo kɛ ba Yohanan ngɔ.

¹⁵ Se Ishmael kɛ e we bi kpaanyɔ komɛ lɛɛ a je Yohanan dɛ mi, nɛ a tu fo kɛ ho Amon bi ɔmɛ a zugba a nɔ ya.

¹⁶ Jehanɛ, ni ɔmɛ nɛ Netania bi Ishmael nuu kɛ je Mizpa kɛ yaa benɛ e gbe Ahikam bi Gedalia se ɔ, Yohanan kɛ asafoatsɛmɛ ɔmɛ nɛ piɛ e he ɔ ba ngɔ mɛ: ta buli, yihi, jokuɛwi, kɛ nyumuhi nɛ a puɛ mɛ.

^17-18 A ye Babilonia bi ɔmɛ gbeye, ejakaa Netania bi Ishmael gbe Ahikam bi Gedalia, nɔ nɛ Babilonia matsɛ ɔ nitsɛ ngɔ to a nya kaa amlaalo ɔ. Enɛ ɔ he je ɔ, a plɛ a hɛ mi ngɔ ka Egipt blɔ, konɛ a tu fo kɛ je Babilonia bi ɔmɛ a nya. Benɛ a yaa a, a ya to si ngɛ Kimham, ngɛ Betlehem kasa nya.