Yeremia 39 - BAIBLO ALOO NGMAMI KLƆUKLƆU Ɔ

A kpata Yerusalem hɛ mi

¹ Yuda matsɛ, Zedekia yi nɔ jeha nɛɛne ɔ we nyɔhiɔ nɛ ji nyɔngma a mi ɔ, Babilonia matsɛ, Nebukadnezar ngɔ e tabo ɔ tsuo kɛ ba Yerusalem, nɛ e ba sa ma a yi.

² Benɛ Zedekia ye jeha nyɔngma kɛ kake ngɛ sɛ ɔ nɔ ɔ, jamɛ a jeha a we nyɔhiɔ eywiɛne ɔ we ligbi nɛ ji nɛɛ ɔ, a ywia Yerusalem gbogbo ɔ nɛ a je puɔ ngɛ mi.

³ Benɛ a ngɔ Yerusalem ɔ, Babilonia matsɛ ɔ ma nimeli ɔmɛ tsuo ba hi si ngɛ a blɔ hehi ngɛ kpɛti agbo ɔ mi. A ti ni komɛ ji Nergal Sarezer, Samgar Nebo, Sarsekim, kɛ Nergal Sarezer kpa ko.

⁴ Benɛ Yuda matsɛ, Zedekia kɛ e ta buli ɔmɛ tsuo na mɛ ɔ, a tu fo kɛ je ma a mi nyɔ ɔ mi. A gu matsɛ abɔɔ ɔ mi, kɛ ya be ngɛ agbo ɔ nɛ ngɛ gbogbo enyɔ ɔmɛ a kpɛti ɔ, nɛ a tu fo kɛ yaa Yordan kɔ̃ ɔ mi je.

⁵ Se Babilonia tabo ɔ nyɛɛ a se, nɛ a ya nu Zedekia ngɛ Yeriko nga a nɔ. A ngɔ lɛ kɛ ba ha Matsɛ Nebukadnezar ngɛ Ribla, ngɛ Hamat zugba a nɔ. Nɛ lejɛ ɔ Nebukadnezar kojo lɛ nɛ e bu lɛ fɔ ngɛ.

⁶ Babilonia matsɛ ɔ gbe Zedekia bimɛ ɔmɛ ngɛ Zedekia hɛ mi. E gbe Yuda ma nimeli ɔmɛ tsuo ja nɔuu.

⁷ Lɔ ɔ se ɔ, e ta Zedekia hɛngmɛ. E ha nɛ a bɔ lɛ pã, nɛ a ngɔ lɛ kɛ ho Babilonia ya.

⁸ Babilonia bi ɔmɛ sã matsɛ we ɔ, kɛ ma mi bi ɔmɛ a wehi, nɛ a ku Yerusalem gbogbo ɔmɛ ngɔ pue si.

⁹ Nebuzaradan, tatsɛ ɔ nuu nihi nɛ piɛ ngɛ ma a mi ɔ, kɛ ni nɛmɛ nɛ ku kɛ ba piɛ e he ɔ kɛ ho Babilonia ya.

¹⁰ Se Nebuzaradan, tatsɛ ɔ si ohiatsɛmɛ komɛ nɛ weto ní be a dɛ ngɛ Yuda zugba a nɔ, nɛ e ha mɛ wai ngmɔhi kɛ zugba.

A je Yeremia ngɛ tsu mi

¹¹ Babilonia matsɛ, Nebukadnezar fa Nebuzaradan, tatsɛ ɔ fami nɛ ɔ nɛ kɔɔ Yeremia he ke,

¹² “Yaa nɛ o ya ngɔ Yeremia, nɛ o hyɛ e nɔ saminya. Koo pee lɛ yayami ko; se mohu nɔ́ tsuaa nɔ́ nɛ e ngɛ hlae ɔ, pee ha lɛ.”

¹³ Kɛkɛ nɛ Nebuzaradan, tatsɛ ɔ, kɛ asafoatsɛnguahi Nebushazban kɛ Nergal Sarezer, kɛ Babilonia matsɛ we asafoatsɛngua kpa amɛ tsuo

¹⁴ ba ngɔ mi kɛ je tsu ɔ mi ngɛ matsɛ we ɔ. A ngɔ mi kɛ wo Shafan bi Ahikam bi Gedalia dɛ, konɛ e hyɛ nɛ ma ya su we mi. Nɛ i hi ye ma mi bi ɔmɛ a kpɛti.

Hɛ kɛ nɔ fɔmi ngɛ ha Ebedmelek

¹⁵ Benɛ i ngɛ tsu mi ngɛ matsɛ we ɔ kɛ mwɔɔ ɔ, Yawɛ de mi

¹⁶ ke ma ya de Ebedmelek, Etiopia no ɔ ke bɔ nɛ lɛ Yawɛ Tabohiatsɛ, Israel Mawu ɔ, de ji nɛ ɔ nɛ: “Kaa bɔ nɛ i de to ɔ, ma ha nɛ haomi maa ba ma nɛ ɔ nɔ, se pi nɔ́ kpakpa. Nɛ ke nɔ́ nɛ ɔ ba a, o maa na paa kɛ o hɛngmɛ.

¹⁷ Se moo lɛɛ ma he o yi wami jamɛ a ligbi ɔ, nɛ a be mo ngɔe kɛ wo nihi nɛ o ngɛ mɛ gbeye yee ɔ a dɛ mi.

¹⁸ Ma baa o yi, nɛ nɔ ko nɔ ko be mo gbee. O maa ye o he, ejakaa o ngɔ o hɛ kɛ fɔ ye nɔ. Imi, Yawɛ lɛ i de.”