Yeremia 37 - BAIBLO ALOO NGMAMI KLƆUKLƆU Ɔ

Zedekia ba bi Yeremia nɔ́ ko

¹ Babilonia matsɛ, Nebukadnezar wo Zedekia, Yosia bi ɔ Yuda matsɛ ngɛ Yehoyakim bi Yehoyakin nane mi.

² Se sɛ gbi nɛ Yawɛ kɛ ha mi ɔ, lɛ Zedekia a, kɛ e tsɔli ɔmɛ, kɛ ma a tsuo bui tue fɛɛ.

³ Matsɛ Zedekia tsɔ Yehukal, Shelemia bi ɔ, kɛ osɔfo Zefania, Maaseya bi ɔ kɛ ba ye ngɔ ke a ba de mi nɛ ma kpa Yawɛ, wa Mawu ɔ pɛɛ ha wa ma a.

⁴ Jamɛ a be ɔ, a wui mi tsu lolo, nɛ i nyɛɛɔ kɛ yaa kɛ baa ngɛ ma mi bi ɔmɛ a kpɛti.

⁵ Jamɛ a be ɔ nɔuu ɔ, Babilonia tabo ɔ ba sa Yerusalem ma a yi momo. Se benɛ a nu kaa Farao ɔ tabo ɔ je Egipt kɛ ma a, a gbee senyasenya kɛ je Yerusalem.

⁶ Jehanɛ, Yawɛ, Israel Mawu ɔ de mi ke

⁷ ma ya de Zedekia ke, “Farao ɔ tabo ɔ nɛ ba piɛ o he ɔ maa kpale a se kɛ ya mɛ nitsɛmɛ a zugba nɔ ngɛ Egipt.

⁸ Ke a je ɔ, Babilonia bi ɔmɛ maa kpale kɛ ba, nɛ a ma ba tua ma nɛ ɔ ekohu. A maa ngɔ ma a, nɛ a maa mɛ he la.

⁹ Imi Yawɛ i ngɛ nyɛ dee ke nyɛ ko sisi nyɛ he; nyɛ ko susu kaa Babilonia bi ɔmɛ be kpalee kɛ ba hu. A maa ba kokooko!

¹⁰ Ke e ba mi kaa nyɛ ye Babilonia tabo ɔ tsuo nɔ, nɛ e piɛ nihi nɛ plaa kɛ pueɔ si ngɛ a bo tsuhi a mi po, jamɛatsɛmɛ ɔmɛ maa te si nɛ a maa sã ma nɛ ɔ kɛ̃.”

A nu Yeremia kɛ wo tsu

¹¹ Benɛ Egipt tabo ɔ ma, nɛ Babilonia bi ɔmɛ je Yerusalem ɔ,

¹² jamɛ a be ɔ, imi hu i je Yerusalem kɛ yaa Benyamin zugba a nɔ, konɛ weku weto ní ɔ nɛ ngɛ lejɛ ɔ, ma ya ngɔ ye blɔ fa mi nɔ́.

¹³ Se benɛ i su Benyamin agbo ɔ nya a, bulɔ ko nu mi nɛ e po ye nya ke, “Babilonia bi ɔmɛ a ngɔ o tu fo kɛ yaa nɛ ɔ nɛ!” Bulɔ ɔ nɛ nu mi ɔ biɛ ji Iriya, nɛ Hanania bi Shelemia lɛɛ e bi ji lɛ.

¹⁴ I he nɔ ke, “Dɛbi! Pi Babilonia bi ɔmɛ a ngɔ nɛ i tu fo kɛ yaa!” Se Iriya bui mi tue. Mohu ɔ, e nu mi kɛ ya ha ma nimeli ɔmɛ.

¹⁵ Ma nimeli ɔmɛ a mi mi fu mi wawɛɛ nitsɛ. A fia mi ní, nɛ a wo mi tsu ngɛ matsɛ pɛdiyo ɔ nɛ a tsɛɛ Yonatan ɔ we ɔ mi. (Jamɛ a be ɔ mi ɔ, a kɛ lejɛ ɔ pee he nɛ a woɔ nɔ tsu ngɛ.)

¹⁶ A kɛ mi wo tsu ko nɛ mi wo diblii mi ngɛ zugba a sisi, nɛ i hi lejɛ ɔ be babauu.

¹⁷ Be ko se ɔ, Matsɛ Zedekia tsɔ nɛ a ba ngɔ mi kɛ ba e ngɔ. Nɛ e bi mi ngɛ laami mi zaa ngɛ matsɛ we ɔ mi ke, “Anɛ sɛ gbi ko je Yawɛ ngɔ lo?” I he nɔ ke, “Ee, sɛ gbi ko ba!” I ya nɔ nɛ i de lɛ ke, “A maa ngɔ mo kɛ wo Babilonia matsɛ ɔ dɛ mi.”

¹⁸ Jehanɛ, i bi Matsɛ Zedekia ke, “Mɛni yayami i pee mo, loo o tsɔli ɔmɛ, loo ma nɛ ɔ, loko nyɛ wo mi tsu ɔ?

¹⁹ O gbali ɔmɛ nɛ de mo ke Babilonia matsɛ ɔ be bae nɛ e ba tua mo, loo zugba nɛ ɔ, jije a ngɛ?

²⁰ Lɔ ɔ he ɔ, nɛnɛ, i kpa mo pɛɛ nɛ o bu mi tue, nɛ o pee nɔ́ nɛ ma bi mo ɔ ha mi. I kpa mo pɛɛ, ko ha nɛ a kpale mi kɛ ya wo tsu ngɛ matsɛ pɛdiyo Yonatan we ɔ mi hu. Ke o pee ja a, ma gbo ngɛ lejɛ ɔ.”

²¹ Kɛkɛ nɛ Matsɛ Zedekia fa, nɛ a ya wo mi tsu ngɛ matsɛ we ɔ kue ɔ mi. Daa ligbi ɔ a jeɔ abolo sali ɔmɛ a hi he ɔ, ba haa mi abolo bɔbɔɛ kake. Nɔ́ nɛ ɔ ya nɔ hluu kɛ ya si abolo ta ma a mi tsuo.