Yeremia 35 - BAIBLO ALOO NGMAMI KLƆUKLƆU Ɔ

Yeremia kɛ Rekab bi ɔmɛ

¹ Yuda matsɛ, Yehoyakim, Yosia bi ɔ yi nɔ ɔ, Yawɛ de mi ke,

² “Yaa Rekab bi ɔmɛ a we ɔ mi nɛ o kɛ mɛ ya tu munyu. Ke o kɛ mɛ tu munyu ɔ gbe nya a, ngɔɔ mɛ kɛ ba tsu kake mi ngɛ Yawɛ we ɔ, nɛ o ba ha mɛ wai nɛ a nu.”

³ Kɛkɛ nɛ i ya ngɔ Rekab we ɔ tsuo kɛ ba. Mɛ ji Yaazania, Habazinia bi Yeremia bi ɔ, kɛ e nyɛmimɛ ɔmɛ, kɛ e binyumu ɔmɛ tsuo.

⁴ I ngɔ mɛ kɛ ba Yawɛ we ɔ, nɛ i kɛ mɛ ba wo gbalɔ Hanan, Igdalia bi ɔ se nyɛɛli ɔmɛ a tsu ɔ mi. Tsu nɛ ɔ ngɛ ma nimeli ɔmɛ a tsu ɔ kasa nya, ngɛ Shalum bi Maaseya tsu ɔ yiti je. Maaseya ji agbo nya bulɔ.

⁵ Jehanɛ, i ngɔ buɛhi, kɛ kpluhi nɛ wai hyi mɛ tɔ kɛ ma Rekab bi ɔmɛ a hɛ mi, nɛ i de mɛ ke, “Nyɛɛ nu dã.”

⁶ Se a he nɔ ke, “Wa be wai nue, ejakaa wa nɛ̃, Yonadab wo wɔ mlaa ke wa ko nu wai ligbi ko ligbi ko, wɔ jio, wa nina jio.

⁷ E ke wa ko po we, wa ko du ní, wa ko pee wai ngmɔ, nɛ wa ko hi ní nɛ ɔmɛ ekoeko. E wo wɔ mlaa ke waa hi bo tsu mi wa wami be ɔ tsuo, konɛ wa se nɛ kɛ ngɛ zugba a nɛ wa ba to nubwɔ ngɛ nɔ ɔ nɔ.

⁸ Mlaa nɛ wa nɛ̃, Yonadab, Rekab bi ɔ wo wɔ ke wa ko nu dã wa wami be ɔ tsuo ɔ, wa ngɛ nɔ yee, nɛ wa ti nɔ ko nɔ ko nui dã wɔ nitsɛmɛ jio, wa yi ɔmɛ jio, wa binyumu ɔmɛ jio, wa biyi ɔmɛ jio.

^9-10 Jã kɛ̃, wa mɛ wehi nɛ waa hi a mi; bo tsuhi a mi wa ngɛ. Wai ngmɔ, loo zugba, loo blɛfo be wa dɛ. Mlaa nɛ wa nɛ̃, Yonadab wo wɔ ɔ, wa ye lɛ tsuo nɔ.

¹¹ Se benɛ Matsɛ Nebukadnezar ba tua zugba a, wa ya ye Babilonia kɛ Siria bi ɔmɛ a tabo ɔmɛ gbeye, nɛ wa pee wa yi mi kaa wa maa tu fo kɛ je a nya kɛ ba Yerusalem. Enɛ ɔ he je lɛ wa ba ngɛ Yerusalem ɔ nɛ.”

^12-13 Kɛkɛ nɛ Yawɛ Tabohiatsɛ, Israel Mawu ɔ de mi ke ma ya nɛ ma ya de Yuda ma a, kɛ Yerusalem ma mi bi ɔmɛ ke “Imi Yawɛ, i ngɛ nyɛ bie ke anɛ nyɛ sume kaa nyɛ maa kase ní lo. Mɛni he je nyɛ sume kaa nyɛ maa bu ye munyu ɔmɛ tue?

¹⁴ Mlaa nɛ Yonadab, Rekab bi ɔ wo e nina ke a ko nu wai ɔ, a ye nɔ. Nɛ kɛ ba si mwɔnɛ ɔ, a ti nɔ ko nɔ ko nui dã. Nyɛɛ lɛɛ kpamisa nɛ ɔ, i kɛ nyɛ ngɛ munyu tue, se nyɛ bui mi tue fɛɛ.

¹⁵ Daa nɛ ɔ, i tsɔɔ ye tsɔli gbali ɔmɛ kɛ baa nyɛ ngɔ. A ba deɔ nyɛ ke nyɛɛ kpale kɛ je nyɛ blɔ yayami ɔmɛ a nɔ, nɛ nyɛɛ pee nɔ́ nɛ da. A bɔ nyɛ kɔkɔ ke nyɛ ko ja mawu kpahi, nɛ nyɛ ko sɔmɔ mɛ hulɔ, bɔ nɛ pee nɛ nyɛɛ hi zugba a nɛ i ha nyɛɛ kɛ nyɛ nɛmɛ ɔmɛ ɔ nɔ. Se nyɛ bui mi tue, nɛ ye munyu ɔmɛ hu nyɛ ngɔɛ.

¹⁶ Yonadab nina ye mlaa nɛ a nɛ̃ wo mɛ ɔ nɔ, se nyɛ ma nɛ ɔ lɛɛ nyɛ bui mi tue fɛɛ.

¹⁷ Lɔ ɔ he ɔ, imi Yawɛ Tabohiatsɛ, Israel Mawu ɔ, bɔ nɛ i ngɛ dee ji nɛ ɔ nɛ. Nyɛ Yuda ma, kɛ Yerusalem ma mi bi, ní yayamihi tsuo nɛ i wo si ke e maa ba nyɛ nɔ ɔ, ma ngɔ kɛ ba nyɛ nɔ jehanɛ. Ma pee nɔ́ nɛ ɔ, ejakaa i kɛ nyɛ tu munyu, se nyɛ nui; i tsɛ nyɛ, se nyɛ he we nɔ.”

¹⁸ Se Rekab we ɔ lɛɛ i de mɛ ke, “Bɔ nɛ Yawɛ Tabohiatsɛ, Israel Mawu ɔ de ji nɛ ɔ nɛ: ‘Mlaa nɛ nyɛ nɛ̃, Yonadab wo nyɛ ɔ, nyɛ ye nɔ; blɔ nyahi tsuo nɛ e to, kɛ níhi tsuo nɛ e fa nyɛ ke nyɛɛ pee ɔ, nyɛ pee pɛpɛɛpɛ.

¹⁹ Lɔ ɔ he ɔ, imi Yawɛ Tabohiatsɛ ɔ, i ngɛ si woe kaa nyumu nɛ ma sɔmɔ mi be Yonadab, Rekab bi ɔ we mi tae gblegbleegble.’ ”