Yeremia 34 - BAIBLO ALOO NGMAMI KLƆUKLƆU Ɔ

Sɛ gbi kɛ ha Zedekia

¹ Benɛ Babilonia matsɛ, Nebukadnezar kɛ e tabo ɔ, kɛ je mahi tsuo nɛ ngɛ e sisi ɔ ba tua Yerusalem kɛ mahi nɛ bɔle Yerusalem ɔ, i ná sɛ gbi kɛ je Yawɛ ngɔ.

² Yawɛ, Israel Mawu ɔ fa mi ke ma ya de Yuda matsɛ, Zedekia ke, “Imi Yawɛ, ma ngɔ ma nɛ ɔ kɛ wo Babilonia matsɛ ɔ dɛ mi, nɛ e maa sã ma a.

³ Mo nitsɛ hu o be o he yee; a maa nu mo kɛ ya ha Babilonia matsɛ ɔ. O maa na lɛ hɛ mi kɛ hɛ mi, nɛ o kɛ lɛ maa tu munyu; nɛ lɔ ɔ se ɔ, a maa ngɔ mo kɛ ho Babilonia ya.

⁴ Yuda matsɛ, Zedekia, bu nɔ́ nɛ i ngɛ dee ngɛ o he ɔ tue! O be gboe ngɛ ta nga nɔ.

⁵ O ma gbo ngɛ tue mi jɔmi mi. Nɛ kaa bɔ nɛ a sã tsopa kɛ e he via kɛ pu o nɛmɛ, nɛ ji matsɛmɛ ɔmɛ nɛ nyɛɛ o hɛ mi ɔ, ja nɔuu a maa sã tsopa kɛ e he via kɛ ha mo. A maa wo yana, nɛ a ma de ke, ‘Nɛnɛ! Due! Due!’ Imi, Yawɛ lɛ i de.”

⁶ Kɛkɛ nɛ i ngɔ sɛ gbi nɛ ɔ ya ha Yuda matsɛ, Zedekia ngɛ Yerusalem.

⁷ Jamɛ a be ɔ, Babilonia matsɛ ɔ tabo ɔ ya tua ma a momo, nɛ a kɛ Lakish kɛ Azeka hu ngɛ ta hwue. Ma nɛ ɔmɛ pɛ ji Yuda mahi nɛ a fia gbogbo ngɔ wo a he ɔ nɛ piɛ.

Israel yi somi ɔ nɔ

⁸ Matsɛ Zedekia, kɛ nihi nɛ ngɛ Yerusalem ma a mi tsuo so kaa a ma ha nɛ

⁹ a Hebri nyɔguɛ ɔmɛ nɛ a ye a he, nyumu ɔmɛ kɛ yi ɔmɛ tsuo, konɛ nɔ ko kɛ e nyɛmi Israel fɔfɔɛ kó pee nyɔguɛ hu.

¹⁰ Ma a, kɛ ma nimeli ɔmɛ tsuo kplɛɛ kaa a maa ngmɛɛ a nyɔguɛ ɔmɛ a he nɛ a ye a he, konɛ nɔ ko kɛ e nyɛmi kó pee nyɔguɛ hu. Niinɛ, a pee ja, nɛ a ha nɛ a nyɔguɛ ɔmɛ ye a he.

¹¹ Se pee se ɔ, a tsake a yi mi tomi ɔ. Nyɔguɛhi, nyumuhi kɛ yihi nɛ a ha nɛ a ye a he ɔ, a kpale ya ngɔ mɛ kɛ ba, nɛ a nyɛ a nɔ, nɛ a pee mɛ nyɔguɛhi ekohu.

¹² Kɛkɛ nɛ Yawɛ,

¹³ Israel Mawu ɔ de mi ke ma ya de ma a ke, “Benɛ i ya je nyɛ nɛmɛ ɔmɛ kɛ je Egipt zugba a nɔ, nɛ i ha nɛ a ye a he kɛ je nyɔguɛ si himi mi ɔ, i kɛ mɛ so somi ko. I de mɛ ke

¹⁴ daa jeha kpaago ɔ, a ti nɔ tsuaa nɔ nyɛmi Hebri no nyɔguɛ ko nɛ sɔmɔ lɛ jeha ekpa a, e ha nɛ e ye e he. Se nyɛ nɛmɛ ɔmɛ bui mi tue fɛɛ, nɛ munyu nɛ i kɛ mɛ tu ɔ hu a ngɔɛ.

¹⁵ Be bɔɔ ji nɛ ɔ, nyɛ tsake nyɛ yi mi tomi ɔmɛ, nɛ nyɛ pee nɔ́ nɛ sa ye hɛ mi. Nyɛ tsuo pɛpɛɛpɛ nyɛ kplɛɛ kaa nyɛ ma ha nɛ nyɛ nyɛmimɛ, Israel fɔfɔɛ ɔmɛ nɛ a ye a he. Nyɛ so somi ngɛ ye hɛ mi, ngɛ we ɔ he nɛ a jaa mi ngɛ ɔ.

¹⁶ Se nyɛ kpale nyɛ nya se, nɛ nyɛ pue ye hɛ mi si. Nyɛ nyɔguɛhi, nyumuhi kɛ yihi nɛ nyɛ ha nɛ a ye a he ngɛ mɛ nitsɛmɛ a suɔmi nya a, nyɛ ya ngɔ mɛ kɛ ba, nɛ nyɛ ba nyɛ a nɔ nɛ a ba pee nyɛ nyɔguɛhi ekohu.

¹⁷ Enɛ ɔ he je ɔ, imi Yawɛ, i ngɛ nyɛ dee ke nyɛ gbo tue; nyɛ ha we nɛ nyɛ nyɛmimɛ, Israel fɔfɔɛ ɔmɛ nɛ a ye a he. Saminya! Imi lɛɛ ma ha nɛ nyɛɛ lɛɛ nyɛ maa ye nyɛ he mɔ! Ma ngmɛɛ nyɛ he kɛ wo gbenɔ dɛ mi, nɛ ta, hiɔ, kɛ hwɔ maa gbe nyɛ. Nɛ ma ha nɛ a gbɛ nyɛ ngɔ fĩa je ma amɛ tsuo a mi.

^18-19 I kɛ Yuda ma nimeli ɔmɛ, Yerusalem ma nimeli ɔmɛ, matsɛ we ɔ tsɔli ɔmɛ, osɔfo ɔmɛ, kɛ ma hɛ mi nyɛɛli ɔmɛ tsuo so somi. Okadi nɛ a pee ji a gbe na bi, nɛ a gba mi enyɔ, nɛ a nyɛɛ fa enyɔ ɔmɛ a mi kɛ be. Se a yi somi ɔ, kɛ blɔ nya tomi ɔmɛ a nɔ. Lɔ ɔ he ɔ, bɔ nɛ a pee na bi ɔ, ja nɔuu ma pee mɛ.

²⁰ Ma je mɛ kɛ wo a he nyɛli, kɛ ni nɛmɛ nɛ ngɛ mɛ hlae nɛ a gbe ɔ, a dɛ mi. A gbogboe ɔmɛ maa pee lohwe pɛlitsɛmɛ, kɛ pu mi lohwehi a niye ní.

²¹ Yuda matsɛ, Zedekia kɛ e ma nimeli ɔmɛ hu, ma ngɔ mɛ kɛ wo a he nyɛli ɔmɛ, kɛ ni nɛmɛ nɛ ngɛ mɛ hlae nɛ a gbe ɔ a dɛ mi. Ma ngɔ mɛ kɛ wo Babilonia tabo ɔ nɛ jɔɔ nyɛ se nyɛɛmi ɔ a dɛ mi.

²² Ma fa mɛ, nɛ a maa kpale kɛ ba ma nɛ ɔ mi ekohu. A ma ba tua ma a; a maa ngɔ ma a, nɛ a maa sã ma a. Ma ha nɛ Yuda ma amɛ maa pee ma dokuhi, nɛ nɔ ko nɔ ko be ma amɛ a mi hie hu. Imi, Yawɛ lɛ i de.”