Yeremia 33 - BAIBLO ALOO NGMAMI KLƆUKLƆU Ɔ

Hɛ kɛ nɔ fɔmi he si womi ekpa

¹ Benɛ i ngɛ tsu ɔ mi ngɛ kue ɔ mi kɛ mwɔɔ ɔ, i ná Yawɛ sɛ gbi ekohu.

² Yawɛ, nɔ nɛ pee je ɔ, nɛ e ngɔ je ɔ ngɔ to e blɔ he ɔ kɛ mi tu munyu. Nɔ nɛ e biɛ ji Yawɛ ɔ, de mi ke,

³ “Tsɛ mi, nɛ ma he mo nɔ; ma sɛɛ mo ní nguanguahi a he sane, kɛ nyakpɛ níhi nɛ o li.

^4-5 Imi Yawɛ, Israel Mawu ɔ, i ngɛ dee ke a maa ku Yerusalem we ɔmɛ, kɛ Yuda matsɛ we ɔ ngɔ pue si. E he be se nami bae ha nyɛ kaa nyɛ maa je kpo nɛ nyɛɛ kɛ Babilonia bi ɔmɛ ya hwu ta ngɛ kpoku nɛ a fia kɛ bɔle ma a he. Ke nyɛ pee ja a, nyɛ ma ha nɛ nihi nɛ i kɛ abofu maa gbe ɔ a gbogboe ma hyi ma a mi tɔ. Ní yayamihi nɛ ma nɛ ɔ mi bi ɔmɛ pee he je ɔ, i kua ma a.

⁶ Se kɛ̃ ɔ, be ma nɛ ma tsa Yerusalem hiɔ ɔ, nɛ ma ha nɛ ma mi bi ɔmɛ ma na he wami. Ma ha nɛ a ma plɔke, nɛ a ma na he jɔmi.

⁷ Ma ha nɛ Yuda kɛ Yerusalem ma na a he ekohu, nɛ ma to mɛ si kaa kekle ko ɔ.

⁸ Ma tsu a he kɛ je yayamihi tsuo nɛ a pee kɛ si mi ɔ a he; ma ngɔ a he yayami ɔmɛ, kɛ ye hɛ mi atuã nɛ a tsɔ ɔ kɛ pa mɛ.

⁹ Yerusalem ma ha nɛ ma na biɛ, yi jemi, kɛ hɛ mi nyami ngɛ je ma amɛ tsuo a kpɛti, ke je ma amɛ nu ní kpakpahi tsuo nɛ i pee ha ma a. Ke je ma amɛ nu ní nɛ ɔmɛ a he, nɛ a na bɔ nɛ kplɔkɔtɔ, kɛ he jɔmi ba ma a mi ɔ, a tsui maa po nɛ a he maa do blibliibli.”

¹⁰ Yawɛ ke, “Nihi deɔ ke hiɛmɛ nɛ ɔ ngɛ kaa nga kplanaa nɔ, he nɛ nimli loo lohwehi be. Niinɛ, ke a de ja a, a nɔ́ da. Yuda ma amɛ pee ma dokuhi, nɛ Yerusalem gbɛjegbɛ ɔmɛ hu a nɔ fɔɔ si gu; nɔmlɔ adesa ko, loo lohwe ko be lejɛ ɔmɛ. Se ngɛ lejɛ ɔmɛ nɔuu ɔ, nyɛ maa nu

¹¹ bua jɔmi, kɛ lele hwɔmi gbi ekohu. Nyɛ maa nu ayɛflo kɛ e huno a gbi, kɛ la nɛ nihi nɛ ngɔ sina bɔhi kɛ ma Yawɛ we ɔ ngɛ lae ke, ‘Nyɛɛ na Yawɛ Tabohiatsɛ ɔ si, ejakaa Yawɛ hi, nɛ e suɔmi ɔ ngɛ daa!’ Ma ha nɛ kplɔkɔtɔ, kɛ he jɔmi maa ba zugba nɛ ɔ nɔ kaa kekle ko ɔ. Imi, Yawɛ lɛ i de.”

¹² Yawɛ Tabohiatsɛ ɔ ke, “Zugba nɛ ɔ nɛ ngɛ kaa nga kplanaa nɔ, kɛ ma amɛ nɛ plɛ pee ma dokuhi nɛ nɔmlɔ adesa, loo lohwe be a mi ɔ, be ma nɛ hiɛmɛ nɛ ɔ ma ba pee lohwehi a lɛmi he, nɛ to hyɛli kɛ a lohwehi ma ba hi hiɛ ɔ ekohu.

¹³ Ngɛ yo nɔ ma amɛ, kɛ nga nɔ ma amɛ a mi, kɛ Yuda leneyi je, Benyamin zugba a nɔ, Yerusalem kɔpe ɔmɛ, kɛ Yuda ma amɛ a mi ɔ, to hyɛli maa kane a tohi ekohu. Imi, Yawɛ lɛ i de.”

¹⁴ Yawɛ ke, “Be ma nɛ si nɛ i wo Israel bi, kɛ Yuda bi ɔ, ma ye nɔ.

¹⁵ Jamɛ a be ɔ mi ɔ, ma hla dalɔ ko kɛ je David nina a a kpɛti nɛ e ye matsɛ. Matsɛ nɛ ɔ maa ye dami sane, nɛ e maa pee nɔ́ nɛ da ngɛ zugba a nɔ tsuo.

¹⁶ E yi nɔ ɔ, a ma he Yuda yi wami, nɛ tue mi jɔmi maa ba Israel. Nɛ biɛ nɛ a kɛ ma tsɛ lɛ ji, ‘Yawɛ ji wa dami.’

¹⁷ Imi, Yawɛ, i ngɛ si woe kaa David nina maa ye matsɛ ngɛ Israel ma a nɔ daa.

¹⁸ Jehanɛ hu, a ma na osɔfohi kɛ maa je Levi wɛtso ɔ mi, nɛ osɔfo nɛ ɔmɛ maa sã sami bɔ, kɛ niye ní bɔ, kɛ bɔ kpahi ha mi daa be tsuaa be.”

¹⁹ Yawɛ de mi ke,

²⁰ “I kɛ piani kɛ nyɔ so somi, nɛ enɛ ɔ he je ɔ, piani kɛ nyɔ baa ngɛ a be mi pɛpɛɛpɛ daa ligbi. Jamɛ a somi ɔ, nɔ ko nɔ ko be nyɛe maa po mi.

²¹ I kɛ ye tsɔlɔ David so somi kaa e nina maa ye matsɛ daa. Jehanɛ se hu, i kɛ osɔfohi nɛ je Levi wɛtso ɔ mi ɔ hu so kaa a ma sɔmɔ mi daa be tsuaa be. Kikɛmɛ a somi nɛ ɔmɛ ɔ, nɔ ko nɔ ko be nyɛe maa po a mi.

²² Ma ha nɛ ye tsɔlɔ David nina, kɛ osɔfohi nɛ je Levi wɛtso ɔ mi ɔ a he maa hiɛ babauu kaa hiɔwe dodoehi, loo wo nya zia; nɔ ko nɔ ko be nyɛe maa kane mɛ.”

²³ Yawɛ de mi ke,

²⁴ “Tse o nu kaa nihi ngɛ dee ke weku enyɔ, Israel kɛ Yuda nɛ i hla a, imi Yawɛ, i kua mɛ! Enɛ ɔ he je ɔ, a gbeɔ ye ma a he guɛ, nɛ a bui mɛ hu kaa je ma ko ji mɛ.

²⁵ Se imi Yawɛ, i kɛ piani kɛ nyɔ so somi, nɛ i pee mlaahi nɛ yeɔ hiɔwe kɛ zugba a nɔ.

²⁶ Ní nɛ ɔmɛ nɛ i nyɛ pee he je ɔ, somi nɛ i kɛ Yakob nina, kɛ ye tsɔlɔ David so ɔ hu ma ye nɔ sisiisi. Ma hla David nina ko nɛ e ye Abraham, Isak, kɛ Yakob a nina a nɔ. Ma na ye ma a mɔbɔ, nɛ ma ha nɛ a ma ná a he ekohu.”