Yeremia 32 - BAIBLO ALOO NGMAMI KLƆUKLƆU Ɔ

Yeremia he zugba ko

¹ Yuda matsɛ, Zedekia yi nɔ jeha nɛ ji nyɔngma a mi ɔ, Yawɛ kɛ mi tu munyu. Jamɛ a be ɔ, Babilonia matsɛ, Nebukadnezar hu na jeha nyɔngma kɛ kpaanyɔ momo ngɛ e sɛ ɔ nɔ.

² Jamɛ a be ɔ mi ɔ, Babilonia matsɛ ɔ tabo ɔ ya sa Yerusalem ma a yi, be mi nɛ imi, Yeremia lɛɛ a wo mi tsu ngɛ kue ɔ mi ngɛ Yuda matsɛ we ɔ.

³ Matsɛ Zedekia wo mi tsu ngɛ lejɛ ɔ, nɛ e po ye nya ke i kɛ Yawɛ biɛ fiɛ ke, “Ma ngɔ ma nɛ ɔ kɛ wo Babilonia matsɛ ɔ dɛ mi, e maa ngɔ ma a,

⁴ nɛ Yuda matsɛ, Zedekia be e he yee. A maa nu lɛ kɛ ya ha Babilonia matsɛ ɔ; e maa na lɛ hɛ mi kɛ hɛ mi, nɛ e kɛ lɛ maa tu munyu.

⁵ A maa ngɔ Zedekia kɛ ya Babilonia, nɛ e ma ya hi lejɛ ɔ kɛ yaa si i kɛ lɛ maa to ní. Ke e kɛ Babilonia bi ɔmɛ hwu ta po e be mɛ nyɛe. Imi, Yawɛ lɛ i de.”

⁶ Yawɛ de mi

⁷ ke Hanamel, ye tsɛko Shalum bi ɔ ma ba de mi ke ma he e zugba a nɛ ngɛ Anatot ɔ. Ejakaa ye nyɛmi tutuutu ji lɛ, nɛ i ngɛ he blɔ nɛ i kpɔɔ zugba a.

⁸ Nɛ kaa bɔ nɛ Yawɛ de mi ɔ, Hanamel ba ye ngɔ ngɛ kue ɔ mi nɛ e ba de mi ke ma he e zugba a nɛ ngɛ Anatot ngɛ Benyamin zugba a mi ɔ. Hanamel de mi ke imi lɛ i ngɛ he blɔ nɛ i kpɔɔ zugba a kɛ peeɔ ye weto ní, lɔ ɔ he ɔ, ma he zugba a. Kɛkɛ nɛ i na kaa Yawɛ kɛ mi tu munyu niinɛ.

⁹ I he zugba a, nɛ i ngmɛ sika nɛ nya ji sika hiɔ yi nyɔngma kɛ kpaago, nɛ i kɛ wo Hanamel hiɔ.

¹⁰ A pee womi ngɛ zugba a juami ɔ he, nɛ i kɛ ye nine wo sisi, nɛ i sɔu nya. I tsɛ nihi odase, nɛ i ngmɛ sika a ngɛ sɛni nɔ.

¹¹ Kɛkɛ nɛ i kɛ̃ zugba a he womi ɔ nɛ a sɔu nya a, kɛ nɔ́ nɛ a sɔu we nya a tsuo. Womi ɔ nɛ a sɔu nya a tsɔɔ bɔ nɛ a ye zugba a nya ha, kɛ mlaa nɛ kɔɔ zugba a juami ɔ he.

¹² I ngɔ womi ɔmɛ kɛ ha Baruk, Maseya bi Neria bi ɔ ngɛ ye tsɛko bi Hanamel, kɛ odase yeli ɔmɛ nɛ ngɔ a nine kɛ wo womi ɔ sisi ɔ, kɛ Yuda bi tsuo nɛ hii si ngɛ kue ɔ mi ɔ a hɛ mi.

¹³ I de Baruk ngɛ ni ɔmɛ tsuo a hɛ mi ke,

¹⁴ “Yawɛ Tabohiatsɛ, Israel Mawu ɔ ngɛ mo fae ke o he zugba juami he womi nɛ ɔmɛ, nɔ́ nɛ a sɔu nya a, kɛ nɔ́ nɛ a sɔu we nya a tsuo, nɛ o ngɔ ya wo zu kplu ko mi, konɛ a se nɛ kɛ.

¹⁵ Yawɛ Tabohiatsɛ, Israel Mawu ɔ de ke nihi ma ba he wehi, zugbahi, kɛ wai ngmɔhi ngɛ zugba nɛ ɔ nɔ ekohu.”

Yeremia fa kue ha Yawɛ

¹⁶ Benɛ i ngɔ zugba a he womi ɔ kɛ ha Baruk, Neria bi ɔ se ɔ, i fa kue ha Yawɛ ke,

¹⁷ “Nyɔmtsɛ Mawu, mo lɛ o kɛ o he wami kpetekpleenyɛ pee hiɔwe kɛ zugba; nɔ́ ko nɔ́ ko peemi wɛ ha mo.

¹⁸ O jeɔ o suɔmi nɛ se pui gblegbleegble ɔ ngɔ tsɔɔ ni akpeakpe. Se kɛ̃ ɔ, o kɛ tsɛmɛ a tɔmi gblaa bimɛ a tue. Mawu nɛ kle, nɛ ngɛ he wami ji mo; o biɛ ji Yawɛ Tabohiatsɛ.

¹⁹ O toɔ nile gahi, nɛ o peeɔ ní nguanguahi. O naa níhi tsuo nɛ nimli adesahi peeɔ, nɛ o woɔ mɛ hiɔ bɔ pɛ nɛ sa mɛ.

²⁰ Blema lokoo ɔ, o pee okadihi, kɛ nyakpɛ níhi ngɛ Egipt zugba a nɔ. Kɛ ba si mwɔnɛ ligbi nɛ ɔ, o ngɛ jamɛ a nyakpɛ ní ɔmɛ, kɛ okadi ɔmɛ pee kɛ mwɔɔ, nɛ o kɛ he biɛ.

²¹ O pee okadihi, kɛ nyakpɛ níhi kɛ wo wa he nyɛli ɔmɛ a he gbeye, nɛ o kɛ o he wami kpetekpleenyɛ ɔ jé o ma Israel kɛ je Egipt zugba a nɔ.

²² O ha mɛ zugba kpakpa nɛ baa ní saminya nɛ ɔ kaa bɔ nɛ o wo a nɛmɛ ɔmɛ si ɔ.

²³ Se benɛ a ba su zugba a nɔ nɛ a ngɔ kɛ pee a weto ní ɔ, a bui mo tue; o mlaa amɛ hu a yi nɔ fɛɛ. Níhi nɛ o fa mɛ ke a pee ɔ, a pee we ekoeko fɛɛ. Enɛ ɔ he je nɛ o kɛ haomi nɛ ɔmɛ tsuo ba a nɔ ɔ nɛ.

²⁴ “Babilonia bi ɔmɛ fia kpoku kɛ wo ma a he konɛ a ngɔ ma a; amlɔ nɛ ɔ, a tua ma a. Ta, hwɔ, kɛ gbenɔ hiɔ ma ha nɛ a maa ngɔ ma a. O maa na kaa níhi nɛ o de ɔ tsuo ba mi.

²⁵ Se Nyɔmtsɛ Yawɛ lee, mo lɛ o fa mi ke ma he zugba a ngɛ odase yeli a hɛ mi, be mi nɛ o le paa kaa a ngɔ ma a kɛ wo Babilonia bi ɔmɛ a dɛ mi.”

²⁶ Kɛkɛ nɛ Yawɛ de mi ke,

²⁷ “Imi ji Yawɛ; nimli adesahi tsuo a Mawu ji mi. Anɛ nɔ́ ko peemi wa ha mi lo?

²⁸ Ma ngɔ ma nɛ ɔ kɛ wo Babilonia matsɛ, Nebukadnezar kɛ e tabo ɔ a dɛ mi; a maa ngɔ ma a,

²⁹ nɛ a maa mɛ ma a he la. A maa sã ma a, kɛ wehi nɛ nihi sãã tsopa kɛ e he via ngɛ a yi mi kɛ haa Baal, nɛ a ngɔɔ dã kɛ sãã wai bɔ ha mawu kpahi kɛ woɔ ye mi mi la a.

³⁰ Kɛ je blema teteete ɔ, yayami sɔuu lɛ Israel bi, kɛ Yuda bi ngɛ pee, nɛ a kɛ ngɛ ye mi mi la woe.

³¹ Kɛ je be nɛ a bɔ ma nɛ ɔ, ye mi mi la sɔuu lɛ ma mi bi ɔmɛ ngɛ woe. I to kaa ma kpata ma a hɛ mi,

³² ejakaa Yuda ma a, kɛ Yerusalem bi ɔmɛ, a matsɛmɛ ɔmɛ, ma nimeli ɔmɛ, osɔfo ɔmɛ, kɛ gbali ɔmɛ pee yayamihi babauu nɛ a kɛ wo ye mi mi la.

³³ A plɛ a se ngɔ wo mi, nɛ a kua a tsui tsakemi. I gbo dengme kɛ tsɔɔ mɛ ní be babauu, se a bui tue fɛɛ; nɔ́ ko hu a kase we.

³⁴ We ɔ nɛ a ma nɛ a ja mi ngɛ mi ɔ tete po a ngɔ a we amagahi nɛ i hiee ɔ ya to lejɛ ɔ nɛ a kɛ ble we ɔ.

³⁵ A ya ma bɔ sami la tɛhi ha Baal ngɛ Hinom kɔ̃ ɔ mi, konɛ a ngɔ a binyumu ɔmɛ, kɛ a biyi ɔmɛ kɛ sã bɔ ha mawu ɔ nɛ a tsɛɛ lɛ Molek ɔ. I wui mɛ mlaa ke a pee nɔ́ ko kaa kikɛ nɛ ɔ; e bɛ ye yi mi po hyɛ kaa a maa pee nɔ́ ko kaa kikɛ nɛ ɔ nɛ a kɛ ha nɛ Yuda ma a nɛ pee yayami.”

Hɛ kɛ nɔ fɔmi he si womi

³⁶ Yawɛ, Israel Mawu ɔ de mi ke, “Yeremia, ni ɔmɛ ngɛ dee ke ta, hwɔ, kɛ gbenɔ hiɔ ma ha nɛ Babilonia matsɛ ɔ ma ba ye ma nɛ ɔ nɔ. Lɔ ɔ he ɔ, bu nɔ́ nɛ i ngɛ dee kɛ ngɛ he piɛe ɔ hu tue.

³⁷ Ma bua ma a nya kɛ je zugbahi a nɔ hehi nɛ i fie mɛ kɛ ho, benɛ ye mi mi fu mɛ ɔ, nɛ ma ngɔ mɛ kɛ ba hiɛmɛ nɛ ɔ ekohu nɛ a ba hi si ngɛ he jɔmi mi.

³⁸ Kɛkɛ ɔ, a maa pee ye ma, nɛ imi hu ma pee a Mawu.

³⁹ Ma ha nɛ mɛ tsuo a maa pee a yi mi kake, nɛ a maa wo ye hɛ mi nyami daa. Ke a pee ja a, e maa hi ha mɛ nitsɛmɛ kɛ a nina.

⁴⁰ I kɛ mɛ maa so neneene somi kaa ma pee mɛ kpakpa daa. Ma ngɔ ye gbeye yemi kɛ wo a tsui mi, nɛ a be ye se jee hu gblegbleegble.

⁴¹ Ma ná a he bua jɔmi, nɛ ma suɔ kaa ma pee mɛ kpakpa. Nɛ ma to mɛ si saminya ngɛ zugba nɛ ɔ nɔ.

⁴² “Kaa bɔ nɛ i ngɔ haomi nɛ kle kaa kikɛ nɛ ɔ kɛ ba ma nɛ ɔ nɔ ɔ, ja nɔuu kɛ̃ lɛ ma ha mɛ ní kpakpahi nɛ i wo si ɔ.

⁴³ Ni ɔmɛ ngɛ dee ke zugba nɛ ɔ ma ba pee nga kplanaa nɔ, nɛ nimli kɛ lohwehi be nɔ hie hu. A ngɛ dee hu ke a maa ngɔ zugba a kɛ wo Babilonia bi ɔmɛ a dɛ mi. Se, na nɛ o le kaa nihi ma ba he zugba ekohu ngɛ hiɛmɛ nɛ ɔ.

⁴⁴ Nihi maa ngɔ a sika kɛ ba he zugba. A kɛ a nine maa wo womihi nɛ a maa pee ngɛ zugba amɛ a he ɔ a sisi; a maa sɔu womi ɔmɛ a nya, nɛ a ma tsɛ nihi nɛ a ba ye odase. A maa pee nɔ́ nɛ ɔ ngɛ Benyamin zugba a nɔ; a maa pee ngɛ kɔpehi nɛ bɔle Yerusalem ɔ a mi, a maa pee ngɛ Yuda ma amɛ a mi; a maa pee ngɛ yo nɔ ma amɛ a mi; nɛ a maa pee ngɛ nga nɔ ma amɛ, kɛ leneyi je ma amɛ hu a mi. Imi, Yawɛ lɛ i de.”