Yeremia 31 - BAIBLO ALOO NGMAMI KLƆUKLƆU Ɔ

Israel maa kpale kɛ ba we

¹ Yawɛ ke, “Be ma nɛ ma ba pee Israel wɛtso ɔmɛ tsuo a Mawu, nɛ mɛ hu a maa pee ye ma.

² I na nihi nɛ a he je gbenɔ mi ɔ mɔbɔ ngɛ nga a nɔ. Benɛ Israel bi ɔmɛ ngɛ hlae nɛ a jɔɔ a he ɔ,

³ i je ye he kpo ngɔ tsɔɔ mɛ ngɛ tsitsaa lokoo. Israel ma, kɛ je blema lɛ i je suɔmi nɛ nya wa kpo kɛ tsɔɔ nyɛ. Nɛ kɛ ba si piɔ hu jamɛ a suɔmi ɔ ngɛ; e se pui.

⁴ Ma to nyɛ si ekohu. Nyɛ maa ngɔ nyɛ fao ɔmɛ, nɛ nyɛ maa do kɛ bua jɔmi ekohu.

⁵ Nyɛ maa pee wai ngmɔhi ngɛ Samaria yo ɔmɛ a nɔ ekohu; ni nɛmɛ nɛ ma du ní ɔ, mɛ lɛ a maa ye niba ní ɔ.

⁶ Niinɛ, be ma nɛ buli ma kpa ngmlaa ngɛ Efraim yo ɔmɛ a nɔ ma de ke, ‘Nyɛ ha nɛ waa ya Zion, ngɛ Yawɛ, wa Mawu ɔ ngɔ.’ ”

⁷ Yawɛ ke, “Nyɛɛ kɛ bua jɔmi nɛ la ha Israel; nyɛ hwɔ lele ha ma nɛ he wa pe je ma amɛ tsuo ɔ. Nyɛ la yi jemi la, nɛ nyɛɛ fiɛ ke, ‘Yawɛ he e ma a yi wami; Yawɛ he nihi nɛ piɛ ɔ tsuo a yi wami.’

⁸ Ma ya ngɔ mɛ kɛ je omleyi je zugba a nɔ, ma ya bua a nya kɛ je zugba a nyagbe he tɔɔ. Hɛ yuyuili, akpaketsɛmɛ, yihɔyihi, kɛ ni nɛmɛ nɛ miɔ nɛ a ma fɔ po maa piɛ a he kɛ ba. Nihi babauu nitsɛ maa kpale kɛ ba hiɛ ɔ ekohu.

⁹ Ma kpale mɛ kɛ ba kɛ a hɛ mi ya, kɛ kue fami. Ma kpaka mɛ kɛ nyɛɛ pahi a tue ngɛ blɔ tlɔmɔɔ nɔ, konɛ a ko tɛ nɔ. I ngɛ kaa tsɛ kɛ ha Israel, nɛ Efraim ji ye kekleekle bi.”

¹⁰ Yawɛ ke, “Nyɛ je mahi, nyɛɛ bu mi tue nɛ nyɛɛ fiɛ ye munyu ɔmɛ ngɛ wo kpɔ ɔmɛ a nɔ tsitsaa lokoo ke, ‘Nɔ nɛ gbɛ Israel ma a ngɔ fĩa a, lɛ nɔuu e ma bua a nya ekohu, nɛ e maa hyɛ a nɔ kaa bɔ nɛ to hyɛlɔ hyɛɛ e tohi ɔ.’

¹¹ I he Israel yi wami, nɛ i kpɔ mɛ kɛ je je ma ko nɛ he wa pe mɛ ɔ dɛ mi.

¹² A ma ba la ngɛ Zion yo ɔ nɔ kɛ bua jɔmi, nɛ a bua maa jɔ ye nike ní ɔmɛ, blɛfo, wai, oliv nu, to, kɛ na a he. A maa pee kaa ngmɔ nɛ a pue e mi ní ɔmɛ a nɔ nyu; nɔ́ ko nɔ́ ko be mɛ hiae hu.

¹³ Jamɛ a be ɔ, yihewi ɔmɛ maa do kɛ bua jɔmi, nɛ nihewi ɔmɛ kɛ nimowi ɔmɛ tsuo ma nya. Ma jɔɔ a bua; ma ha nɛ a kɔmɔ yemi ɔ maa plɛ pee bua jɔmi, nɛ a we aywilɛho ɔ ma plɛ pee nyami.

¹⁴ Ma ha nɛ osɔfo ɔmɛ maa ye ní kpakpahi nɛ a maa tɔ; ye ma a hu maa ye nɛ a maa tɔ. Imi, Yawɛ lɛ i de.”

Yawɛ maa na Israel mɔbɔ

¹⁵ Yawɛ ke, “A nu gbi ko ngɛ Rama, kɔmɔ yemi kɛ ya fomi nɛ nya wa, Rahel ngɛ e bimɛ ɔmɛ foe nɛ e kplɛɛ we kpatami, ejakaa a be hu.

¹⁶ Nyɛɛ jɔɔ ya fomi, nɛ nyɛ tsu vo nyu ɔ ngɛ nyɛ hɛ mi. Níhi tsuo nɛ nyɛ pee kɛ ha nyɛ bimɛ ɔmɛ ɔ, a maa wo he hiɔ; bimɛ ɔmɛ maa je he nyɛli ɔmɛ a zugba a nɔ kɛ ba hiɛmɛ nɛ ɔ ekohu.

¹⁷ Hwɔɔ se hɛ kɛ nɔ fɔmi ngɛ ha nyɛ; nyɛ bimɛ ɔmɛ maa kpale kɛ ba we ekohu. Imi, Yawɛ lɛ i de.

¹⁸ “I nu nɛ Israel ma a ngɛ kɔmɔ yee ke, ‘Yawɛ, jinɛ wa ngɛ kaa lohwe nɛ hɛ mi jɔɛ; se o tsɔse wɔ nɛ wa he jɔ. Moo kpale wɔ kɛ ba o ngɔ ekohu, ejakaa mo ji Yawɛ, wa Mawu ɔ nɛ.

¹⁹ Jinɛ wa je o se, se wa pia wa he, nɛ wa tsake wa tsui. Benɛ o gbla wa tue se ɔ, wa ywilɛ ho wa he. Zo gbe wɔ kpɔtɔɔ; ejakaa wa pee yayamihi babauu ngɛ wa nihe mi.’

²⁰ “Israel, mo ji ye bi nɛ i suɔ saminya; mo ji bi nɛ i suɔ pe bimɛ ɔmɛ tsuo. Be tsuaa be nɛ ma de nɔ́ ko kɛ si mo ɔ, ja i kɛ suɔmi kai mo kɛ̃. Ye hɛ jaa ngɛ o he, lɔ ɔ he ɔ, ma na mo mɔbɔ kɛ̃.

²¹ Nyɛɛ ma tsohi ngɛ blɔ he kɛ to blɔ ɔ he so. Blɔ nɛ nyɛ maa nyɛɛ nɔ kɛ ya a, nyɛɛ to blɔ ɔ he hɛ saminya. Israel ma, nyɛɛ kpale kɛ ba koo! Nyɛɛ kpale kɛ ba nyɛ nitsɛmɛ nyɛ ma amɛ a mi.

²² Nyɛ ma nɛ nyɛ be hemi kɛ yemi! Kɛ yaa si mɛni be lɛ nyɛ yi mi maa pee nyɛ enyɔɔnyɔ? I bɔ nɔ́ he ko kɛ wo je ɔ mi; yo mohu maa bu nyumu he.”

Mawu ma a ma ba bɔ hwɔɔ se

²³ Yawɛ Tabohiatsɛ, Israel Mawu ɔ ke “Ke i kpale ma a kɛ ba mɛ nitsɛmɛ a zugba a nɔ ekohu ɔ, a ma de ngɛ Yuda zugba a nɔ, kɛ ma amɛ a mi ekohu ke, ‘Yawɛ nɛ gbaa Yerusalem yo klɔuklɔu ɔ, he nɛ lɛ Yawɛ nitsɛ hii ɔ.’

²⁴ Nihi maa pee kake kɛ hi si ngɛ Yuda zugba a nɔ, kɛ ma amɛ a mi: ngmɔ huli, kɛ to hyɛli kɛ a tohi.

²⁵ Nihi nɛ pɔ tɔ mɛ ɔ, ma ha mɛ he wami he, nɛ ni nɛmɛ nɛ hwɔ gbe mɛ ɔ, ma ha mɛ ní nɛ a maa ye nɛ a maa tɔ.”

²⁶ Kɛkɛ nɛ ye hɛ tsɛ̃, nɛ i na kaa i hwɔɛ mahe nɛ ngɔ ye he saminya.

²⁷ “Imi Yawɛ, i ngɛ dee ke, be ma nɛ ma ha nɛ nimlihi, kɛ lohwehi ma hyi Israel zugba a, kɛ Yuda zugba a nɔ tɔ.

²⁸ Nɛ kaa bɔ nɛ i gbo dengme nɛ i kɛ hia mɛ, nɛ i ku mɛ pue si, nɛ i butu mɛ, nɛ i kpata a hɛ mi, nɛ i kɛ haomi ba a nɔ ɔ, ja nɔuu ma gbo dengme kɛ ma mɛ, nɛ ma to mɛ si ekohu.

²⁹ Ke jamɛ a be ɔ su ɔ, a be dee hu ke, ‘Tsɛmɛ ɔmɛ ye wai yiblii ngmlikiti nɛ bimɛ ɔmɛ a lungu fĩa.’

³⁰ Se mohu ɔ, ke nɔ ko pee yayami ɔ, lɛ nitsɛ e yayami ɔ lɛ maa gbe lɛ; nɔ tsuaa nɔ nɛ maa ye wai yiblii ngmlikiti ɔ, lɛ nitsɛ e lungu lɛ maa fĩa.”

³¹ Yawɛ ke, “Be ma nɛ i kɛ Israel ma a, kɛ Yuda ma a maa so somi he.

³² Somi nɛ ɔ maa je kpa ngɛ somi nɛ i kɛ a nɛmɛ ɔmɛ so ɔ he. Benɛ i kɛ a nɛmɛ ɔmɛ so ɔ, jamɛ a be ɔ nɛ i nu a kɔni si nɛ i kpaka mɛ kɛ je Egipt zugba a nɔ. I kɛ mɛ hi si kaa a huno, se somi nɛ i kɛ mɛ so ɔ lɛɛ a yi nɔ fɛɛ.

³³ Se somi he ɔ nɛ i kɛ Israel ma a maa so jehanɛ ɔ, bɔ nɛ lɛɛ e maa hi ji nɛ ɔ nɛ; ma ngɔ ye mlaa kɛ wo a mi, nɛ ma ngma ngɛ a tsui nɔ. Ma pee a Mawu, nɛ a maa pee ye ma.

³⁴ Nɔ ko pa be e nyɛmi, loo e he nɔ ko tsɔɔe hu ke e le Yawɛ, ejakaa nɔ tsuaa nɔ maa le mi, kɛ je jokuɛyo pe kulaa nɔ kɛ yaa si nɔkɔtɔma pe kulaa nɔ. Ma ngɔ a he yayami ɔmɛ kɛ pa mɛ, nɛ a ní yayami ɔmɛ hu i be kaie hu. Imi, Yawɛ lɛ i de.”

³⁵ Yawɛ lɛ pee pu, konɛ e tso piani. Lɛ nɛ pee nyɔhiɔ kɛ dodoehi konɛ a kpɛ nyɔ mi. Yawɛ lɛ klɛɔ wo mi, nɛ e haa nɛ oslɔke ɔmɛ gliɔ E biɛ ji Yawɛ Tabohiatsɛ.

³⁶ Yawɛ ngɛ si woe ke, be abɔ nɛ adebɔ mlaa nɛ ɔ ngɛ nɛ e se pui ɔ, ja nɔuu kɛ̃ nɛ Israel ma a hu be gue.

³⁷ Ke a ma nyɛ ma susu hiɔwe, nɛ zugba a sisi tomi ɔ hu a ma nyɛ ma hla a, lɛɛ Yawɛ hu ma kua Israel ma a ngɛ níhi tsuo nɛ a pee ɔ a he. Yawɛ lɛ de.

³⁸ Yawɛ ke, “Be ma nɛ a maa ma Yerusalem ehe ekohu kɛ ha mi, kɛ je Hananel mɔ ɔ bonyoku je, kɛ yaa si kɔ̃ nya agbo ɔ he.

³⁹ Susumi kpa a maa je lejɛ ɔ tɛ̃ɛ̃ kɛ ya gu Gareb yo ɔ nɔ, nɛ e maa dɔ e yi kɛ ba Goa.

⁴⁰ Nɛ kɔ̃ ɔ tsuo maa pee klɔuklɔu kɛ ha mi: gɔ ɔ, kuku ɔ, kɛ ngmɔ ɔmɛ nɛ ngɛ Kidron pa a yi mi ɔ, hluu kɛ yaa si okpɔngɔ agbo ɔ beleku je. Nɔ ko nɔ ko be ma a ngɔe hu, nɛ a be e hɛ mi kpatae hu gblegbleegble.”