Yeremia 30 - BAIBLO ALOO NGMAMI KLƆUKLƆU Ɔ

Yawɛ wo e ma a si

¹ Yawɛ, Israel Mawu ɔ

² de mi ke, “Ngmaa munyuhi nɛ i kɛ mo tu ɔ tsuo kɛ wo womi mi,

³ ejakaa be ma nɛ ma pee ye ma Israel, kɛ Yuda saminya ekohu. Zugba a nɛ i ngɔ kɛ ha a nɛmɛ ɔmɛ ɔ, ma kpale mɛ kɛ ba jamɛ a zugba a nɔ ekohu, nɛ e ma ba pee a weto ní. Imi, Yawɛ lɛ i de.”

⁴ Yawɛ ngɛ Israel kɛ Yuda dee ke,

⁵ “Wa nu gbi ko nɛ ngɛ pɛe, sawale kɛ gbeye, se pi tue mi jɔmi.

⁶ Nyɛ bi nɛ nyɛɛ hyɛ! Anɛ nyumu ko nu kɔɔmi nɛ e fɔ hyɛ lo? Mɛni he je mɔ lɛ i na nɛ nyumuhi tsuo nu a mlɛ mi kaa yo nɛ nu kɔɔmi ɔ? Mɛni he je nyɛ tsuo nyɛ hɛ mi pee kaa la zu la zu kikɛ nɛ ɔ?

⁷ Ligbi ko ma nɛ ngɛ gbeye; ligbi nɛ ɔ eko bɛ hyɛ. E ji amanehlu be kɛ ha Yakob nina, ye ma a, se kɛ̃ ɔ, a yi ma na wami.”

⁸ Yawɛ Tabohiatsɛ ɔ ke, “Jamɛ a ligbi ɔ, ma ku kuɛpã tsohi nɛ ngɛ a kuɛ ɔ, nɛ ma tsɔ kɔsɔkɔsɔ ɔmɛ. Nɛ a be ni kpahi sɔmɔe hu.

⁹ Se mohu, a ma sɔmɔ imi Yawɛ, a Mawu ɔ, kɛ David nina ko nɛ ma wo matsɛ ha mɛ ɔ.

¹⁰ “Ye ma, nyɛ ko ye gbeye; Israel ma, nyɛ tsui nɛ ko po. Ma kpɔ nyɛ kɛ je zugba nɔ, he nɛ a nuu nyɛ kɛ ho ngɛ tsitsaa lokoo ɔ. Nyɛ maa kpale kɛ ba we, nɛ nyɛ ma ba hi si ngɛ tue mi jɔmi mi; nyɛ he mi maa jɔ nyɛ, nɛ nɔ ko nɔ ko be nyɛ he gbeye woe.

¹¹ Ma ba nyɛ ngɔ nɛ ma ba kpɔ nyɛ. Je ma amɛ nɛ i fie nyɛ kɛ ya a ngɔ ɔ, ma kpata mɛ tsuo a hɛ mi pɛsɛpɛsɛ; se nyɛɛ lɛɛ i be nyɛ hɛ mi kpatae kɛ pi si. I be hae nɛ nyɛɛ ye nyɛ he kulaa; se kɛ̃ ɔ, ma gbla nyɛ tue bɔ nɛ sa. Imi, Yawɛ lɛ i de.”

¹² Bɔ nɛ Yawɛ ngɛ e ma a dee ji nɛ ɔ nɛ: “Nyɛ plaa wawɛɛ nitsɛ; nyɛ pa a be tsa ba.

¹³ Nɔ ko be nɛ maa hyɛ nyɛ nɔ, tsopa ko be nɛ a kɛ maa to nyɛ pa amɛ a nɔ; nyɛ be he wami nae.

¹⁴ Nyɛ suɔli ɔmɛ tsuo a hɛ je nyɛ nɔ, a bi we nyɛ si hu. I ba tua nyɛ kaa he nyɛlɔ tuaa nɔ; i gbla nyɛ tue wawɛɛ nitsɛ, ejakaa nyɛ pee yayami nguanguahi babauu.

¹⁵ Nyɛ ko tu nyɛ plaami ɔmɛ a he munyu hu; tsa ba ko be ha nyɛ. I gbla nyɛ tue kikɛ nɛ ɔ, ejakaa nyɛ pee yayami nguanguahi babauu.

¹⁶ Se jehanɛ lɛɛ, nihi tsuo nɛ kpataa nyɛ hɛ mi ɔ, a ma kpata mɛ hu a hɛ mi. A maa nuu nyɛ he nyɛli ɔmɛ tsuo pɛpɛɛpɛ kɛ ho ma se ya. Nihi tsuo nɛ waa nyɛ yi mi ɔ, a maa wa mɛ hu yi mi. Ni nɛmɛ nɛ haa nyɛ níhi ɔ, a maa ha mɛ hu a níhi.

¹⁷ Nyɛ he nyɛli tsɛɔ nyɛ ke nihi nɛ a fie mɛ; a deɔ ke, ‘Zion nɛ be huɛ.’ Se kɛ̃, ma ha nɛ nyɛ ma na he wami ekohu; ma tsa nyɛ pa amɛ. Imi, Yawɛ lɛ i de.”

¹⁸ Yawɛ ke, “Ma kpale ye ma a kɛ ba a zugba a nɔ ekohu, nɛ ma na we puɔ nya tsuaa we puɔ nya mɔbɔ. A maa ma Yerusalem ekohu ngɛ kpo ɔ nɔ, nɛ matsɛ we ɔ maa ma si ngɛ e ma he.

¹⁹ Ni nɛmɛ nɛ ngɛ lejɛ ɔ ma la yi jemi la, nɛ a ma hwɔ lele. Ma gbaa mɛ; a maa hiɛ babauu, nɛ ma wo a hɛ mi nyami.

²⁰ A bimɛ ɔmɛ ma ba hi si kaa bɔ nɛ a nɛmɛ ɔmɛ hi si ɔ; nɛ ma to ma a si wawɛɛ ekohu. Nihi tsuo nɛ maa wa mɛ yi mi ɔ, ma gbla a tue.

^21-22 A nɔ yelɔ ɔ maa je mɛ nitsɛmɛ a ma a mi; a matsɛ ɔ maa je mɛ nitsɛmɛ nɔuu a kpɛti. Ma tsɛ lɛ, nɛ e maa ba ye ngɔ. Mɛnɔ ma nyɛ maa hɛ lɛ kɛ su ye he be mi nɛ i tsɛ we lɛ? A maa pee ye ma, nɛ imi hu ma pee a Mawu. Imi, Yawɛ lɛ i de.”

^23-24 Yawɛ we abofu ngɛ kaa ahumi; e ngɛ kaa kɔɔhiɔ nɛ nya wa. E maa fia vuguvugu kɛ be ngɛ yiwutsotsɛmɛ a yi nɔ. Yawɛ we abofu ɔ se be poe kɛ yaa si e maa gbe níhi tsuo nɛ e to ke e maa pee ɔ nya. Pee se kulaa loko e ma a maa nu nɔ́ nɛ ɔ sisi saminya.