Yeremia 3 - BAIBLO ALOO NGMAMI KLƆUKLƆU Ɔ

Israel yi Mawu anɔkuale

¹ Yawɛ ke, “Ke nyumu ko fie e yo, nɛ yo ɔ je e he nɛ e ya pee nyumu kpa e yo ɔ, nyumu nɛ ɔ be he blɔ nɛ e ya ngɔɔ lɛ ekohu. Ke e pee ja a, e ble zugba a gbidii. Se Israel, moo lɛɛ o je ye he nɛ o ya ngɔ yihi babauu. Nɛ jehanɛ lɛɛ o ngɛ hlae nɛ o kpale kɛ ba ye ngɔ!

² Wo o yi nɔ nɛ o hyɛ yoku kpataa amɛ a nɔ. Anɛ he ko ngɛ nɛ a kɛ mo hwɔɛ ngɛ lo? O ya hiɔ si ngɛ blɔ tue kɛ hii o suɔli blɔ hyɛe. Mo nɔ kake o ya hiɔ si ja, kaa Arabia no ngɛ nga kplanaa nɔ. O kɛ yahomi, kɛ ní yayamihi peemi ble zugba a.

³ Enɛ ɔmɛ a he je lɛ a tsi hiɔmi nɛmi nya, nɛ gbo hiɔmi po nɛ ɔ nɛ. O ngɛ kaa yo yaholɔ nɛ e zo tɔ ywia pɛ.

⁴ “O deɔ mi ke, ‘Tsaatsɛ, kɛ je ye jokuɛyo be mi tɔɔ lɛ o suɔ ye sane.

⁵ Anɛ o mi mi ma fu mi daa kɛ yaa neneene lo?’ Israel, bɔ nɛ o deɔ ji nɛ ɔ nɛ; se kɛ̃ ɔ, o hɛ ngɛ o he nɔ nɛ o ngɛ ní yayamihi pee kɛ mwɔɔ.”

E hia kaa Israel kɛ Yuda nɛ a tsake a tsui

⁶ Benɛ Yosia ngɛ matsɛ yee ɔ, Yawɛ de mi ke, “Tse o na nɔ́ nɛ Israel pee? Israel je ye se nɛ e ya ja mawu kpahi ngɛ yokuhi tsuo nɛ ya hiɔwe a nɔ, kɛ tsohi tsuo nɛ bɔ kusuu a sisi. E ngɛ kaa yo yaholɔ pɛ.

⁷ Jinɛ i susu kaa nɛ Israel pee ní nɛ ɔmɛ tsuo se ɔ, e maa kpale kɛ ba ye ngɔ nɛ e ba pee ye nɔ́ ekohu; se e pee we ja. Nɛ e nyɛmiyo Yuda, nɛ lɛ hu e yi anɔkuale kaa lɛ nɔuu ɔ na nɔ́ nɛ ɔ.

⁸ Yuda na kaa i ha Israel gba mi pomi womi nɛ i fie lɛ, ejakaa e je ye se nɛ e ya bɔ ajuama. Se Yuda nɛ ngɛ kaa e nyɛmiyo Israel ɔ yi gbeye.

⁹ E kɛ yahomi ble zugba a, nɛ nɔ́ nɛ ɔ si we lɛ kpu. E juɛmi ji ke e ya ja tso kɛ tɛ ɔ, tsa pi nɔ́ ko kulaa ji lɔ ɔ.

¹⁰ Ní nɛ ɔmɛ tsuo a se ɔ, Yuda, Israel nyɛmiyo yaholɔ ɔ kpale we kɛ bɛ ye ngɔ kɛ e tsui tsuo; e ní peemi níhi tsɔɔ we kaa e tsake. Imi, Yawɛ lɛ i de.”

¹¹ Jehanɛ, Yawɛ de mi ke Israel tsɔ e hɛ mi atuã mohu lɛɛ, se afani lɛ kulaa ngɛ Yuda he.

¹² E ke ma ya de Israel ke, “Israel, yaholɔ, moo kpale kɛ ba ye ngɔ ekohu; ejakaa mɔbɔ nalɔ ji mi, nɛ i be ye hɛ mi tue kɛ wo mo. Ye mi mi be fue kɛ wo mo kɛ ya neneene.

¹³ Moo lɛɛ moo kplɛɛ kɛkɛ kaa o ye fɔ, kaa o tsɔ Yawɛ, o Mawu ɔ hɛ mi atuã. Moo jaje kaa o ngɔ o suɔmi ya ha ma se mawuhi, nɛ o ja mɛ ngɛ tsohi tsuo nɛ bɔ kusuu a sisi. Moo jaje kaa o yi ye mlaa amɛ a nɔ. Imi, Yawɛ lɛ i de.

¹⁴ “Atuã tsɔli! Nyɛɛ kpale kɛ ba ye ngɔ koo; ye ma ji nyɛ. Ma ngɔ nyɛ kɛ ba Zion yo ɔ nɔ ekohu: ma tsuaa ma a, ma ngɔ nɔ kake, nɛ we puɔ nya tsuaa we puɔ nya a, ma ngɔ ni enyɔ.

¹⁵ Ma ha nyɛ nɔ yeli nɛ peeɔ ye suɔmi nya ní, nɛ a kɛ nile kɛ nɔ́ sisi numi maa hyɛ nyɛ nɔ.

¹⁶ Pee se ke nyɛ ba fɔ babauu, nɛ nyɛ he ba hiɛ ngɛ zugba a nɔ ɔ, nihi pa be ye somi daka a he ní sɛɛe hu. A pa be he susue, nɛ a be kaie hu. E he pa be mɛ hiae hu, nɛ ekpa hu a be pee.

¹⁷ Ke jamɛ a be ɔ su ɔ, a ma tsɛ Yerusalem ke, ‘Yawɛ matsɛ sɛ,’ nɛ je ma amɛ tsuo ma ba bua a he nya ngɛ lejɛ ɔ, nɛ a ma ja mi. A pa be a tsui kpliie nɛ a pee mɛ nitsɛmɛ a suɔmi nya ní yayamihi hu.

¹⁸ Jamɛ a be ɔ mi ɔ, Israel bi, kɛ Yuda bi maa ye a he kɛ je nyɔguɛ si himi mi ngɛ omleyi je zugba a nɔ, nɛ a ma tsa bo nya kɛ kpale kɛ ba zugba a nɛ i ngɔ kɛ ha nyɛ nɛmɛ ɔmɛ kaa a weto ni ɔ nɔ ekohu.”

Mawu ma a ja amagahi

¹⁹ Yawɛ ke, “Israel, jinɛ i susu kaa e maa pee fɛu ke i ngɔ mo ba piɛ ye bimɛ ɔmɛ a he ngɛ hiɛ ɔ. I to nɛ ma ha mo zugba saminyayoo ko, zugba nɛ ngɛ fɛu pe kulaa ngɛ je ɔ mi. I hyɛ blɔ kaa o ma tsɛ mi ke ‘Tsaatsɛ’, nɛ i susu kaa o pa be ye hɛ mi atuã tsɔe hu.

²⁰ Se kaa bɔ nɛ yogbayo jeɔ e huno se nɛ e kɛ nyumu kpahi ya naa bɔmi ɔ, jã kɛ̃ lɛ mo hu o yi mi anɔkuale. Imi, Yawɛ lɛ i de.”

²¹ Ngmlaa ko ngɛ pɛe ngɛ yoku kpataa amɛ a nɔ; Israel bi lɛ a wo yana, nɛ a ngɛ kue fae; ejakaa a pee yayami, nɛ a hɛ je Yawɛ, a Mawu ɔ nɔ.

²² “Nyɛ nihi tsuo nɛ nyɛ je Yawɛ se, nyɛɛ kpale kɛ ba; e ma tsa nyɛ yayami hiɔ ɔmɛ.” Nyɛ ke, “Ee, wa ma Yawɛ ngɔ, ejakaa lɛ ji wa Mawu.

²³ Niinɛ, wɔhi nɛ wa ngɛ jae ngɛ yoku ɔmɛ a nɔ kɛ huhui bami nɛ ɔ, wa na we a he se ko. Yawɛ, wa Mawu ɔ pɛ ji Israel he piɛlɔ, kɛ yi wami helɔ.

²⁴ Baal jami kpata níhi tsuo pɛpɛɛpɛ nɛ wa nɛmɛ ɔmɛ gbo dengme kɛ na ha wɔ blema a, tohi, nahi, kɛ binyumuhi kɛ yihi a hɛ mi.

²⁵ Nyɛ ha nɛ waa kɛ zo nɛ pee wa heha nɔ́ kɛ hwɔ si, ejakaa wa pee yayami kɛ si Yawɛ, wa Mawu ɔ. Wa nɛmɛ ɔmɛ pee a nɔ́, nɛ wɔ hu kɛ je wa jokuɛwi a si kɛ ba si mwɔnɛ ɔ, wa kpa we. Wa yi Yawɛ, wa Mawu ɔ mlaa amɛ a nɔ.”