Yeremia 29 - BAIBLO ALOO NGMAMI KLƆUKLƆU Ɔ

Yeremia ngma womi kɛ mane Yuda bi ɔmɛ ngɛ Babilonia

¹ I ngma womi kɛ mane osɔfo ɔmɛ, gbali ɔmɛ, ma nikɔtɔma amɛ, kɛ ma a tsuo nɛ Babilonia matsɛ, Nebukadnezar ngɔ kɛ je Yerusalem kɛ ho Babilonia ya a.

² Benɛ i ngma womi nɛ ɔ, jamɛ a be ɔ, nimli nɛ ɔmɛ je Yerusalem momo. Mɛ ji Matsɛ Yehoyakin, e nyɛ, matsɛ we ɔ tsɔli ɔmɛ, ma nimeli ɔmɛ nɛ ngɛ Yuda kɛ Yerusalem, ga ní tsuli ɔmɛ, kɛ sɔli ɔmɛ.

³ I ngɔ womi ɔ kɛ mane Elasa, Shafan bi ɔ, kɛ Gamaria, Hilkia bi ɔ. Mɛ ji nihi nɛ Yuda matsɛ, Zedekia tsɔ mɛ Babilonia matsɛ, Nebukadnezar ngɔ ɔ nɛ. Nɔ́ nɛ ngɛ womi ɔ mi ji nɛ ɔ nɛ:

⁴ “Nihi tsuo nɛ Yawɛ Tabohiatsɛ, Israel Mawu ɔ ha nɛ a nuu kɛ je Yerusalem kɛ ho Babilonia ya a, bɔ nɛ Yawɛ ngɛ mɛ dee ji nɛ ɔ nɛ:

⁵ ‘Nyɛɛ po wehi nɛ nyɛɛ hi a mi. Nyɛɛ pee ngmɔhi nɛ nyɛɛ ye a mi ní.

⁶ Nyɛɛ ngɔ yihi nɛ nyɛ fɔ binyumuhi kɛ biyihi. Nyɛɛ ngɔ yihi ha nyɛ binyumu ɔmɛ, nɛ nyɛ ha nyɛ biyi ɔmɛ gba, konɛ mɛ hu a fɔ bimɛ. Nyɛɛ bɔ ngɛ lejɛ ɔ; nyɛ nɔ nɛ ko gbɔ.

⁷ Ma a nɛ i ha nɛ a ngɔ nyɛ kɛ ya mi ɔ, nyɛ hla jamɛ a ma a nɔ yami. Nyɛɛ fa kue ha imi Yawɛ, konɛ ma na mɛ mɔbɔ; ejakaa ke a na a he ɔ, nyɛ hu e maa hi ha nyɛ.

⁸ Imi Yawɛ Tabohiatsɛ, Israel Mawu ɔ, i ngɛ nyɛ dee ke, gbali, kɛ klaali nɛ ngɛ nyɛ kpɛti ɔ, nyɛ ko ha nɛ a sisi nyɛ. Nyɛ ko ha nɛ a de nyɛ níhi nɛ nyɛ nitsɛmɛ nyɛ suɔ nɛ ba mi.

⁹ Lakpa gbami lɛ a ngɛ gbae ha nyɛ ngɛ ye biɛ mi ɔ nɛ; i tsɔ we mɛ. Imi, Yawɛ lɛ i de.’

¹⁰ “Yawɛ ke, ‘Babilonia jeha nyingmi kpaago ɔ se ɔ, ma kai nyɛ. Nɛ, si nɛ i wo ke ma ngɔ nyɛ kɛ ba we ekohu ɔ, ma ye jamɛ a siwo ɔ nɔ.

¹¹ Yi mi nɛ i to ngɛ nyɛ he ɔ, imi nɔ kake too pɛ lɛ i le; i to nɛ ma ha nɛ nyɛ he mi nɛ jɔ nyɛ, se pi kaa ma hao nyɛ. Ní kpakpahi nɛ nyɛ ngɛ blɔ hyɛe ɔ, i to nɛ ma ha nyɛ.

¹² Jamɛ a be ɔ, ke nyɛ tsɛ mi nɛ nyɛ fa kue ha mi ɔ, ma bu nyɛ tue.

¹³ Nyɛ ma hla ye se blɔ, nɛ nyɛ maa na mi. Ke nyɛ ngɔ nyɛ tsui tsuo kɛ hla ye se blɔ ɔ,

¹⁴ nyɛ maa na mi, nɛ ma ngɔ nyɛ kɛ ba nyɛ zugba a nɔ ekohu. Je mahi, kɛ hehi tsuo nɛ i fie nyɛ kɛ ho ɔ, ma bua nyɛ nya kɛ je lejɛ ɔmɛ, nɛ ma kpale nyɛ kɛ ba hiɛmɛ nɛ ɔ nɛ i ha nɛ a nuu nyɛ kɛ je ɔ ekohu. Imi, Yawɛ lɛ i de.’

¹⁵ “Nyɛ deɔ ke Yawɛ je gbali ha nyɛ ngɛ Babilonia.

¹⁶ Se matsɛ ɔ nɛ hii si ngɛ David sɛ ɔ nɔ, kɛ ma nɛ ɔ mi bi tsuo, nɛ ji nyɛ nyɛmimɛ ɔmɛ nɛ a nuu we mɛ kɛ piɛ we nyɛ he kɛ ya a, nyɛɛ bu nɔ́ nɛ Yawɛ ngɛ dee ngɛ a he ɔ tue.

¹⁷ Yawɛ Tabohiatsɛ ɔ ke, ‘Ma ha nɛ ta, hwɔ, kɛ gbenɔ hiɔ ma ba sɛ a kpɛti; nɛ ma ha a maa pee kaa ngmɔkɔ nɛ sa, nɛ hí yemi.

¹⁸ I kɛ ta, hwɔ, kɛ gbenɔ hiɔ maa nyɛɛ a se; nɛ nɔ́ nɛ ɔ ma ha nɛ je ma amɛ tsuo maa nu sawale. A maa ye a he fɛu, nɛ a maa bɔ mɛ ahlua ngɛ he tsuaa he nɛ ma fie mɛ kɛ ya.

¹⁹ Ní nɛ ɔmɛ maa ba a nɔ, ejakaa sɛ gbi ɔ nɛ i haa mɛ be tsuaa be kɛ guu ye tsɔli gbali ɔmɛ a nɔ ɔ, a bui fɛɛ. A sume kaa a maa nu kɛ a tue po.

²⁰ Nyɛ nihi tsuo nɛ i ha nɛ a nuu kɛ je Yerusalem kɛ ho Babilonia ya, nyɛɛ bu nɔ́ nɛ imi Yawɛ, i ngɛ dee ɔ tue.’

²¹ “Kolaya bi Ahab, kɛ Maaseya bi Zedekia nɛ a ngɛ lakpa gbami gbae ngɛ ye biɛ mi kɛ ngɛ nyɛ hae ɔ, bɔ nɛ Yawɛ Tabohiatsɛ, Israel Mawu ɔ de ngɛ a he ji nɛ ɔ nɛ. E ke e maa ngɔ mɛ kɛ wo Babilonia matsɛ, Nebukadnezar dɛ, nɛ Nebukadnezar maa gbe mɛ ngɛ nyɛ hɛ mi.

²² Nihi nɛ a nuu kɛ je Yerusalem kɛ ho Babilonia ya a, ke a ngɛ hlae nɛ a gbiɛ nɔ ɔ, bɔ nɛ a ma de ji, ‘Yawɛ nɛ pee mo kaa Zedekia kɛ Ahab nɛ Babilonia matsɛ ɔ sã mɛ hɛ ngmengmle ngɛ la mi ɔ!’

²³ Nɔ́ nɛ maa ba a nɔ ji nɛ ɔ nɛ, ejakaa a pee ní yayamihi ngɛ Israel; a puɛ gba, nɛ a tu lakpa munyuhi ngɛ Yawɛ biɛ mi, pohu e fa we mɛ ke a tu jamɛ a munyu ko. Pi Yawɛ suɔmi nya ní ji nɛ ɔ; nɔ́ tsuaa nɔ́ nɛ a pee ɔ, e na, nɛ e ma nyɛ maa ye he odase. Yawɛ lɛ de.”

Womi ɔ nɛ Shemaya ngma a

^24-25 Yawɛ Tabohiatsɛ, Israel Mawu ɔ ha mi sɛ gbi kɛ ha Shemaya nɛ je Nehelam ɔ. Shemaya nɛ ɔ ngma womi ngɛ lɛ nitsɛ e biɛ mi kɛ mane osɔfo Zefania, Maaseya bi ɔ, kɛ osɔfo kpa amɛ tsuo, kɛ nihi tsuo nɛ ngɛ Yerusalem ɔ. Womi ɔ nɛ Shemaya ngma kɛ mane Zefania a, nɔ́ nɛ a ngma ngɛ mi ji,

²⁶ “Yawɛ wo mo osɔfo ngɛ Yehoyada nane mi konɛ o hyɛ Yawɛ we ɔ nɔ. O blɔ nya ní tsumi ji godotsɛ tsuaa godotsɛ nɛ peeɔ e he gbalɔ ɔ, o hyɛ nɛ a bɔ lɛ pã nɛ a wo e kuɛ dade kɔsɔkɔsɔ.

²⁷ Yeremia, Anatot no ɔ nɛ ngɛ lakpa gbami gbae ha ma a, mɛni he je o ka we e hɛ mi mɔ?

²⁸ Yeremia ngma womi ya ha nihi nɛ a nuu kɛ ho Babilonia ya a ke a se maa kɛ ngɛ ma se. Lɔ ɔ he ɔ, a po wehi nɛ a hi a mi, nɛ a pee ngmɔhi nɛ a ye a mi ní.”

²⁹ Osɔfo Zefania kane womi nɛ ɔ ngɔ tsɔɔ mi.

³⁰ Kɛkɛ nɛ Yawɛ de mi ke

^31-32 ma tsɔ nɛ a ngɔ sɛ gbi nɛ ɔ nɛ kɔɔ Shemaya he ɔ ya ha nihi tsuo nɛ a nuu mɛ kɛ ho ɔ ke, “Imi Yawɛ, ma gbla Shemaya kɛ e nina tsuo a tue. I tsɔ we lɛ, se e kɛ nyɛ ba tu munyu kaa nɔ́ nɛ gbalɔ ji lɛ; nɛ e ha nɛ nyɛ he e lakpa munyu ɔmɛ ye. E nina ko nina ko be nyɛ kpɛti hie. Ní kpakpahi nɛ ma ba pee kɛ ha ye ma a hwɔɔ se ɔ, e be je mi hie kɛ yaa si jamɛ a be ɔ nɛ e ba na kɛ e hɛngmɛ; ejakaa e de ye ma a ke a tsɔ atuã kɛ wo mi. Imi, Yawɛ lɛ i de.”