Yeremia 28 - BAIBLO ALOO NGMAMI KLƆUKLƆU Ɔ

Yeremia kɛ gbalɔ Hanania

¹ Jamɛ a jeha a nɔuu mi ɔ, Azur bi Hanania, gbalɔ ɔ nɛ je Gibeon ɔ kɛ mi tu munyu ngɛ Yawɛ we ɔ. Yuda matsɛ, Zedekia yi nɔ jeha eywiɛne ɔ we nyɔhiɔ nɛ ji enuɔ ɔ mi sane ji nɛ ɔ nɛ. Ngɛ osɔfo ɔmɛ, kɛ ma a tsuo a hɛ mi ɔ, Hanania de mi ke,

² “Bɔ nɛ Yawɛ Tabohiatsɛ, Israel Mawu ɔ de ji nɛ ɔ nɛ: ‘Babilonia matsɛ ɔ he wami ɔ, i he ngɛ e dɛ.

³ Hiɛmɛ nɛ ɔ jeha enyɔ mi ɔ, Yawɛ we ɔ juetli tsuo nɛ Matsɛ Nebukadnezar ba muɔ kɛ ho Babilonia ya a, ma ngɔ kɛ ba hiɛ ɔ ekohu.

⁴ Yuda matsɛ, Yehoyakin, Yehoyakim bi ɔ, kɛ Yuda ma a tsuo nɛ a nuu mɛ kɛ ho Babilonia ya a, mɛ hu ma kpale mɛ kɛ ba hiɛ ɔ ekohu. Niinɛ, Babilonia matsɛ ɔ he wami ɔ, ma he ngɛ e dɛ. Imi, Yawɛ lɛ i de.’ ”

⁵ Kɛkɛ nɛ i de gbalɔ Hanania ngɛ osɔfo ɔmɛ, kɛ ma a tsuo nɛ daa si ngɛ Yawɛ we ɔ a hɛ mi ke,

⁶ “Saminya! Yawɛ nɛ pee nɔ́ nɛ ɔ. Gbami nɛ o gba a, Yawɛ nɛ ha nɛ e ba mi, konɛ Yawɛ we ɔ juetli tsuo nɛ a muɔ kɛ ho Babilonia ya, kɛ nihi tsuo nɛ a nuu kɛ ho ɔ, e kpale mɛ kɛ ba hiɛ ɔ ekohu.

⁷ Se kɛ̃, moo bu nɔ́ nɛ i ngɛ mo, kɛ ma a tsuo dee ɔ tue.

⁸ Gbali ɔmɛ nɛ nyɛɛ i kɛ mo tsuo wa hɛ mi blema lokoo ɔ gba ke ta, hwɔ, kɛ gbenɔ hiɔ maa ba je mahi babauu, kɛ matsɛ yemi nguanguahi a nɔ.

⁹ Gbalɔ nɛ gbaa ke tue mi jɔmi maa ba a, ke jamɛ a gbalɔ ɔ munyu ɔ na ba mi ɔ, lɔ ɔ loko a maa le kaa Yawɛ lɛ tsɔ lɛ niinɛ.”

¹⁰ Kɛkɛ nɛ gbalɔ Hanania je kuɛpã tso ɔ kɛ je ye kuɛ, nɛ e ku mi dukuduku.

¹¹ Nɛ e de ngɛ ma a tsuo hɛ mi ke, “Yawɛ ke, kuɛpã tso ɔ nɛ Babilonia matsɛ, Nebukadnezar ngɔ wo je ma amɛ tsuo a kuɛ ɔ, bɔ nɛ lɛ Yawɛ ɔ maa ku jamɛ a kuɛpã tso ɔ ji nɛ ɔ nɛ. E maa pee nɔ́ nɛ ɔ hiɛmɛ nɛ ɔ jeha enyɔ mi.” Kɛkɛ nɛ i je lejɛ ɔ.

¹² Benɛ Hanania ku kuɛpã tso ɔ nɛ ngɛ ye kuɛ ɔ mi dukuduku se ɔ, Yawɛ ha mi sɛ gbi ke

¹³ ma ya nɛ ma ya de Hanania ke, “Yawɛ ke o ku tso kuɛpã tso ɔ lɛɛ, se e maa pee dade nɔ́ kɛ to nane mi.

¹⁴ Yawɛ Tabohiatsɛ, Israel Mawu ɔ ke e kɛ dade kuɛpã tso maa fɔ je ma nɛ ɔmɛ tsuo a kuɛ, nɛ a ma ba sɔmɔ Babilonia matsɛ, Nebukadnezar. Yawɛ ke e ma ha nɛ pu mi lohwehi po ma sɔmɔ Nebukadnezar.”

¹⁵ I bɔ gbalɔ Hanania amaniɛ nɛ ɔ, nɛ i ya nɔ nɛ i de lɛ ke, “Hanania, bu tue! Yawɛ tsɔ we mo fɛɛ, nɛ o ha nɛ ma nɛ ɔ he lakpa munyu ɔmɛ ye.

¹⁶ Lɔ ɔ he ɔ, Yawɛ nitsɛ ke e ma je mo kɛ je je ɔ mi. O ma gbo jeha nɛ ɔ mi nɔuu, ejakaa o de ma a ke a tsɔ atuã kɛ wo Yawɛ.”

¹⁷ Nɛ gbalɔ Hanania gbo jamɛ a jeha a mi nɔuu, ngɛ nyɔhiɔ nɛ ji kpaago ɔ mi.