Yeremia 25 - BAIBLO ALOO NGMAMI KLƆUKLƆU Ɔ

He nyɛli nɛ je omleyi je ɔ

¹ Yuda matsɛ, Yehoyakim, Yosia bi ɔ yi nɔ jeha nɛ ji eywiɛ ɔ mi ɔ, i ná sɛ gbi ko kɛ je Yawɛ ngɔ nɛ kɔɔ Yuda ma a tsuo he. Jamɛ a be ɔ mi ɔ, Babilonia matsɛ, Nebukadnezar hu na jeha kake ngɛ e sɛ ɔ nɔ.

² I de Yuda ma a, kɛ Yerusalem bi ɔmɛ tsuo ke,

³ “Kɛ je be nɛ Yuda matsɛ, Yosia, Amon bi ɔ na jeha nyɔngma kɛ etɛ ngɛ e sɛ ɔ nɔ hluu kɛ ba si mwɔnɛ ligbi nɛ ɔ, jeha nyingmi enyɔ kɛ etɛ sɔuu ji nɛ ɔ nɛ. Kikɛmɛ a be nɛ ɔ tsuo ɔ, be tsuaa be ɔ, i naa sɛ gbi kɛ jeɔ Yawɛ ngɔ kɛ haa nyɛ. I deɔ nyɛ nɔ́ tsuaa nɔ́ fitsofitso; se nyɛ bui tue.

⁴ Daa nɛ ɔ, Yawɛ tsɔɔ e tsɔli gbali ɔmɛ kɛ baa nyɛ ngɔ. Se nyɛ bui mɛ tue, nɛ sɛ gbi nɛ a kɛ ba a hu nyɛ bui.

⁵ A de nyɛ ke nyɛɛ kpale kɛ je nyɛ blɔ yayami ɔmɛ a nɔ, nɛ nyɛ kpa yayami peemi, konɛ zugba a nɛ Yawɛ ngɔ ha nyɛɛ kɛ nyɛ nɛmɛ ɔmɛ blema kaa nyɛ weto ní ɔ, nyɛɛ hi nɔ daa.

⁶ A de nyɛ ekohu ke nyɛ ko ya nyɛɛ mawu kpahi a se; nyɛ ko sɔmɔ mɛ, nɛ nyɛ ko ja mɛ. Jehanɛ se hu, nyɛ ko puɛ amagahi nɛ nyɛ kɛ ba wo Yawɛ mi mi la. E ji nyɛ bu Yawɛ tue jinɛ lɛ hu e ko gbla we nyɛ tue.

⁷ Se Yawɛ nitsɛ de ke nyɛ bui lɛ tue fɛɛ. Mohu ɔ, nyɛɛ kɛ nyɛ we amaga amɛ wo e mi mi la, nɛ nyɛɛ kɛ ye nyɛ nitsɛmɛ nyɛ he awi.

⁸ “Lɔ ɔ he ɔ, akɛnɛ nyɛ bui Yawɛ Tabohiatsɛ ɔ tue he je ɔ, bɔ nɛ lɛ hu e ngɛ nyɛ dee ji nɛ ɔ nɛ:

⁹ ‘Ma tsɔ nɛ a ya kpee omleyi je ma amɛ tsuo, kɛ Babilonia matsɛ Nebukadnezar, ye tsɔlɔ ɔ kɛ ba. Ma ngɔ mɛ kɛ ba, nɛ a kɛ Yuda zugba a, kɛ ma mi bi ɔmɛ, kɛ je mahi tsuo nɛ bɔle mɛ ɔ ma ba hwu ta. Ma kpata zugba nɛ ɔ, kɛ mahi nɛ bɔle lɛ ɔ a hɛ mi pɛsɛpɛsɛ; a ma plɛ pee gbeye nɔ́, muɔ nɔ́, kɛ he fɛu yemi nɔ́ kɛ ya neneene. Imi, Yawɛ lɛ i de.

¹⁰ Ma ha nɛ nyami, kɛ bua jɔmi, kɛ ayɛflo he ní peemi hoo ɔ se maa po. A be nu nae kɛ wo a kane ɔmɛ a mi hu, nɛ blɛfo maa ta.

¹¹ Zugba nɛ ɔ tsuo hɛ mi ma kpata pɛsɛpɛsɛ, nɛ je ma nɛ ɔmɛ ma sɔmɔ Babilonia matsɛ ɔ jeha nyingmi kpaago.

¹² Jeha nyingmi kpaago ɔ se ɔ, ma gbla Babilonia matsɛ ɔ, kɛ ma a tue ngɛ a ní yayami ɔmɛ a he. Ma kpata Babilonia zugba a hɛ mi pɛsɛpɛsɛ kɛ ya neneene.

¹³ Níhi tsuo nɛ i de to; haomihi nɛ a ngma ngɛ womi nɛ ɔ mi nɛ Yeremia fiɛ ke a maa ba je ma amɛ tsuo a nɔ ɔ, i kɛ maa gbla Babilonia tue.

¹⁴ Ma wo Babilonia bi ɔmɛ hiɔ ngɛ níhi nɛ a pee ɔ a he; mɛ hu a ma ba sɔmɔ je mahi babauu, kɛ matsɛmɛ nguanguahi kaa nyɔguɛhi.’ ”

Mawu maa gbla je ma amɛ a tue

¹⁵ Yawɛ, Israel Mawu ɔ de mi ke, “O nɛ wai kplu nɛ ye mi mi la hyi lɛ tɔ. Ngɔɔ kɛ ya ha je mahi tsuo nɛ ma tsɔ mo a ngɔ ɔ nɛ a nu.

¹⁶ Ke a nu ɔ, a hɛ mi ma tsitsɛɛ mɛ nɛ a fo godo ngɛ ta a nɛ i tsɔ kɛ ma a ngɔ ɔ he.”

¹⁷ Kɛkɛ nɛ i he kplu ɔ ngɛ Yawɛ dɛ, nɛ i ngɔ kɛ ya ha je ma amɛ tsuo nɛ Yawɛ tsɔ mi a ngɔ ɔ, nɛ a nu.

¹⁸ Yerusalem bi, nihi nɛ ngɛ Yuda ma amɛ tsuo a mi, matsɛmɛ ɔmɛ, kɛ ma nimeli ɔmɛ tsuo pɛpɛɛpɛ nu. Nɛ kɛ je jamɛ a ligbi ɔ kɛ ba si mwɔnɛ ligbi nɛ ɔ, a hɛ mi kpata pɛsɛpɛsɛ; a plɛ pee he fɛu yemi nɔ́, kɛ gbiɛmi.

^19-26 Ni kpahi tsuo nɛ mɛ hu a sa a nya kplu nɛ ɔ ji nɛ ɔmɛ nɛ: Egipt matsɛ ɔ, kɛ e tsɔli ɔmɛ, kɛ ma nimeli ɔmɛ; Egipt bi tsuo, kɛ nibwɔhi tsuo nɛ ngɛ Egipt ɔ; matsɛmɛ ɔmɛ tsuo nɛ ngɛ Uz zugba a nɔ ɔ; matsɛmɛ ɔmɛ tsuo nɛ ngɛ Filisti ma nɛ ɔmɛ a mi ɔ: Ashkelon, Gaza, Ekron, kɛ Ashdod fa a nɛ piɛ ɔ; nihi tsuo nɛ ngɛ Edom, Moab, kɛ Amon; matsɛmɛ ɔmɛ tsuo nɛ ngɛ Tiro, kɛ Sidon; matsɛmɛ ɔmɛ tsuo nɛ ngɛ zugba amɛ a nɔ ngɛ Mediterenia woɔ se ɔ; Dedan, kɛ Tema, kɛ Buz ma amɛ; nihi tsuo nɛ poɔ huɛ ngɛ a yi mi; Arabia matsɛmɛ ɔmɛ tsuo; futufututsɛmɛ nɛ ngɛ nga kplanaa a nɔ ɔ a matsɛmɛ ɔmɛ tsuo; matsɛmɛ ɔmɛ tsuo nɛ ngɛ Zimri, Elam, kɛ Media; omleyi je matsɛmɛ ɔmɛ tsuo, ni nɛmɛ nɛ a he kɛ, kɛ ni nɛmɛ nɛ a he kɛ we. Je nɛ ɔ mi matsɛ yemi ɔmɛ tsuo pɛpɛɛpɛ sa a nya kplu nɛ ɔ. A se ɔ, nɔ nɛ maa nu kɛ gbe nya ji Babilonia matsɛ ɔ.

²⁷ Jehanɛ, Yawɛ de mi ke, “De ma a ke imi Yawɛ Tabohiatsɛ, Israel Mawu ɔ, i ngɛ mɛ fae ke nɔ tsuaa nɔ nɛ nu nɔ́ nɛ ngɛ kplu ɔ mi ɔ kɛ yaa si e maa tɔ dã, nɛ e maa vie, kɛ yaa si e maa nɔ si nɛ e be nyɛe maa te si hu; ejakaa i tsɔ ta nɛ nya wa wawɛɛ nitsɛ kɛ ma a ngɔ.

²⁸ Se ke a kplɛɛ we kaa a ma he kplu ɔ ngɛ o dɛ nɛ a nu nɔ́ nɛ ngɛ mi ɔ, de mɛ ke imi Yawɛ Tabohiatsɛ ɔ, i ngɛ mɛ dee ke bɔ tsuaa bɔ nɛ ji ɔ, ja a nu kɛ̃.

²⁹ Ma bɔni hɛ mi kpatami ní tsumi ɔ kɛ je imi nitsɛ ye ma a mi. Pe a susu kaa a maa ye a he lo? Dɛbi! A be a he yee; ja a gbla a tue kokooko. Ejakaa ma ha nɛ ta maa ba je ma amɛ tsuo a nɔ. Imi, Yawɛ Tabohiatsɛ ɔ lɛ i de.

³⁰ “Lɔ ɔ he ɔ, Yeremia, nɔ́ tsuaa nɔ́ nɛ i de mo ɔ, gbaa kɛ tsɔɔ nimli nɛ ɔmɛ. De mɛ ke, ‘Yawɛ ma huã kɛ je hiɔwe lokoo. E ma wo gbi kɛ je e hi he klɔuklɔu ɔ. E maa huã, nɛ e ma he ose wawɛɛ kɛ wo e ma a kaa bɔ nɛ wai ngali kpaa huhui ɔ. Nihi tsuo nɛ ngɛ zugba a nɔ maa nu nɔ́ nɛ ɔ,

³¹ nɛ huhui maa pɛ kɛ ya je ɔ nyagbe he ɔmɛ tɔɔ. Yawɛ kɛ je ma amɛ ná. E maa kojo nɔ tsuaa nɔ, nɛ yiwutsotsɛmɛ lɛɛ e maa gbe mɛ. Yawɛ lɛ de.’ ”

³² Yawɛ Tabohiatsɛ ɔ ke haomi maa ba je ma amɛ a nɔ nɔtonɔto, nɛ ahumi nɛ nya wa maa fia kɛ je je ɔ nyagbe he ɔmɛ tɔɔ.

³³ Jamɛ a ligbi ɔ, nihi nɛ Yawɛ maa gbe ɔ, a ma sake mɛ kɛ fɔ he kɛ maa je je ɔ nyagbe he kake kɛ maa ya nyagbe he kake. Nɔ ko nɔ ko be kɔmɔ yee ha mɛ, nɛ a be mɛ ngɔe kɛ ho nɛ a ya pu hulɔ; a ma plɛ pee kuku ngɛ zugba a nɔ.

³⁴ Nyɛ ma nɔ yeli nɛ nyɛ hyɛɛ ye ma a nɔ, nyɛɛ wo yana nɛ nyɛ kpa bubuubui! Nyɛɛ ye kɔmɔ, nɛ nyɛɛ ngɔ nyɛ he kɛ wuwlua si ngɛ la zu mi; ejakaa ligbi ɔ nɛ a maa gbe nyɛ ɔ su. A ma tsɔtslɔɔ nyɛ mi kaa bɔ nɛ a tsɔtslɔɔ agbosu mi.

³⁵ Nyɛ be blɔ nae kɛ tu fo.

^36-37 Nyɛ wo yana nɛ nyɛ ngɛ bubuubui kpae kɛ hɛdɔ, ejakaa Yawɛ puɛ nyɛ sihi he ɔmɛ. Yawɛ kɛ abofu kpata nyɛ tue mi jɔmi ma a hɛ mi pɛsɛpɛsɛ.

³⁸ Yawɛ je e ma a he kaa jata nɛ si e muɔ kɛ fɔ si. Ta ní puɛmi ɔ, kɛ Yawɛ abofu nɛ nya wa a ha nɛ zugba a plɛ pee nga kplanaa.