Yeremia 24 - BAIBLO ALOO NGMAMI KLƆUKLƆU Ɔ

Kusii enyɔ kɛ a mi ngmɔkɔ

¹ Yawɛ je nina ko ngɔ tsɔɔ mi be ko. I na kusii enyɔ kɛ a mi ngmɔkɔ nɛ maa si ngɛ Yawɛ we ɔ hɛ mi. Jamɛ a be ɔ mi ɔ, Babilonia matsɛ, Nebukadnezar nuu nimli nɛ ɔmɛ nyɔguɛ kɛ je Yerusalem kɛ ho Babilonia ya momo: Yuda matsɛ, Yehoyakin, Yehoyakim bi ɔ, Yuda ma nimeli, ga ní tsuli, kɛ sɔli.

² Ngmɔkɔ kpakpahi ngɛ kekleekle kusii ɔ mi; a ngɛ kaa ngmɔkɔhi nɛ fuu kɛ sɛɛ hlami ɔ. Kusii enyɔne ɔ lɛɛ ngmɔkɔ yayahi nɛ hí yemi lɛ ngɛ mi.

³ Kɛkɛ nɛ Yawɛ bi mi ke, “Yeremia, mɛni o na?” I he nɔ ke, “I na ngmɔkɔhi. Ngmɔkɔ kpakpa amɛ hi saminya. Ngmɔkɔ yaya amɛ lɛɛ a hí kulaa; e sɛ nɛ a yeɔ.”

⁴ Jehanɛ, Yawɛ de mi ke,

⁵ “Imi Yawɛ, Israel Mawu ɔ, i buu ni ɔmɛ nɛ a nuu kɛ ho Babilonia ya a nimli kpakpahi saminya kaa bɔ nɛ ngmɔkɔ kpakpa nɛ ɔmɛ ngɛ ɔ pɛpɛɛpɛ. Enɛ ɔ he je ɔ, ma hyɛ a nɔ saminya.

⁶ Ma bu a he, nɛ ma kpale mɛ kɛ ba zugba nɛ ɔ nɔ ekohu. I be hae nɛ a na nɔ, se mohu ma piɛ a he. I be a hɛ mi kpatae, se mohu ma to mɛ si kaa bɔ nɛ a duɔ tso ɔ.

⁷ Ma ha nɛ a maa nu he ngɛ a tsui mi tɔɔ kaa imi ji Yawɛ. A maa pee ye ma, nɛ imi hu ma pee a Mawu; ejakaa a maa kpale kɛ ba ye ngɔ ekohu kɛ a tsui tsuo.

⁸ “Se ni nɛmɛ nɛ piɛ nɛ a nuu we mɛ kɛ yɛ Babilonia a, bɔ nɛ a peeɔ ngmɔkɔ nɛ sa nɛ hí yemi ɔ, jã pɛ imi, Yawɛ ma pee mɛ. Mɛ ji Yuda matsɛ, Zedekia, ma nimeli ɔmɛ, Yerusalem ma mi bi ɔmɛ nɛ piɛ ngɛ zugba a nɔ, kɛ ni nɛmɛ nɛ ho Egipt ya a.

⁹ Ma ngɔ haomi nɛ nya wa wawɛɛ nitsɛ kɛ ba a nɔ, nɛ nɔ́ nɛ ɔ ma ha nɛ je ma amɛ tsuo maa nu sawale. A maa ye a he fɛu, a maa bɔ mɛ ahlua, nɛ a maa wo mɛ la ngɛ he tsuaa he nɛ ma fie mɛ kɛ ya a.

¹⁰ Ma ha nɛ ta, hwɔ, kɛ gbenɔ hiɔ ma ba sɛ a kpɛti kɛ yaa si a ma kpata a hɛ mi pɛsɛpɛsɛ, nɛ a ti nɔ kake ngmelu po be piɛe ngɛ zugba nɛ i ngɔ ha a kɛ a nɛmɛ ɔ nɔ.”