Yeremia 23 - BAIBLO ALOO NGMAMI KLƆUKLƆU Ɔ

Hɛ kɛ nɔ fɔmi ngɛ ha hwɔɔ se

¹ Ma nɔ yeli nɛ kpataa Yawɛ ma a hɛ mi, nɛ a gbɛɛ mɛ ngɔ fĩaa a, musu tloo mɛ!

² Ma nɔ yeli ɔmɛ nɛ sa kaa a hyɛ ma a nɔ saminya a, bɔ nɛ Yawɛ, Israel Mawu ɔ ngɛ dee ngɛ a he ji nɛ ɔ nɛ: “Nyɛ hyɛ we ye ma a nɔ fɛɛ! Nyɛ gbɛ mɛ ngɔ fĩa, nɛ nyɛ fie mɛ kɛ ho. Lɔ ɔ he ɔ, ma gbla nyɛ tue ngɛ nyɛ ní peemi ní yayami ɔmɛ a he.

³ Ye ma nɛ piɛ ɔ, ma bua a nya kɛ maa je zugbahi a nɔ hehi nɛ i fie mɛ kɛ ho ɔ, nɛ i kɛ mɛ maa ba mɛ nitsɛmɛ a zugba a nɔ ekohu. A ma fɔ, nɛ a he maa hiɛ babauu.

⁴ Ma je nɔ yeli kpakpahi ha mɛ nɛ a hyɛ a nɔ. A be gbeye yee hu; sawale be mɛ nue hu, nɛ i be a tue gblae hu. Imi, Yawɛ lɛ i de.”

⁵ Yawɛ ke, “Be ma nɛ ma hla dalɔ ko kɛ je David nina a a kpɛti nɛ e ba ye matsɛ. Matsɛ nɛ ɔ maa ye dami sane, nɛ e maa pee nɔ́ nɛ da ngɛ zugba a nɔ tsuo.

⁶ E yi nɔ ɔ, a ma he Yuda yi wami, nɛ tue mi jɔmi maa ba Israel. A ma tsɛ lɛ ke ‘Yawɛ ji wa yi wami hemi.’ ”

⁷ Yawɛ ke, “Be ma nɛ nihi be kita kae ngɛ ye biɛ mi hu kaa Mawu hɛ kalɔ ɔ nɛ jé Israel bi ɔmɛ kɛ je Egipt zugba a nɔ ɔ.

⁸ Mohu ɔ, a kɛ ye biɛ ma ka kita kaa Mawu hɛ kalɔ nɛ jé Israel nina a kɛ je ma se zugbahi a nɔ, omleyi je zugba a, kɛ hehi tsuo nɛ i fie mɛ kɛ ho ɔ kɛ ba. Nɛ a ma ba hi mɛ nitsɛmɛ a zugba a nɔ.”

Yeremia sɛ gbi nɛ kɔɔ gbali ɔmɛ a he

⁹ I hao wawɛɛ nitsɛ, nɛ imi nɔmlɔ ɔ tsuo ye he ngɛ doe blibliibli. Yawɛ kɛ e munyu klɔuklɔu ɔ a he je ɔ, i pee kaa nɔ nɛ tɔ dã, loo nɔ nɛ nu dã pe nine.

¹⁰ Zugba a nɔ hyi tɔ kɛ nimli nɛ yi Yawɛ anɔkuale. A peeɔ yayami, nɛ a kɛ a he wami tsu we nɔ́ kpakpa. Enɛ ɔ he je ɔ, Mawu gbiɛ zugba a; zugba a bɛ ní hu, nɛ e nɔ pee mɔbɔmɔbɔ.

¹¹ Yawɛ ke, “Gbali ɔmɛ, kɛ osɔfo ɔmɛ tsuo li Mawu; nimli yayamihi ji mɛ. I naa mɛ nɛ a ngɛ yayami pee ngɛ ye we ɔ mi tete po.

¹² Blɔhi nɛ a ngɛ nɔ nyɛɛe ɔ, blɔ ɔmɛ a nɔ maa sla, nɛ a maa wo diblii; ma ha nɛ a ma tɛ nɔ, nɛ a maa nɔɔ si. I kɛ haomi maa ba a nɔ; a tue gblami be ɔ su ta. Imi, Yawɛ lɛ i de.

¹³ I na Samaria gbali ɔmɛ a he yayami ɔ; a gba ngɛ Baal biɛ mi, nɛ a ha nɛ ye ma, Israel nane kpata.

¹⁴ Se i na kaa Yerusalem gbali ɔmɛ po pe mɛ kɛ yayami peemi; a puɛɔ gba, nɛ a yeɔ lakpa; a ya piɛɔ nihi a he nɛ a kɛ peeɔ yayami; nɛ enɛ ɔ he je ɔ, nɔ ko kpa we yayami peemi. Ngɛ imi ye hɛ mi ɔ, nimli yayamihi ji mɛ tsuo pɛpɛɛpɛ kaa Sodom kɛ Gomora bi.

¹⁵ “Lɔ ɔ he ɔ, bɔ nɛ imi, Yawɛ Tabohiatsɛ ɔ i ngɛ dee ngɛ Yerusalem gbali ɔmɛ a he ji nɛ ɔ nɛ: ‘Ma ha mɛ agba nɛ a maa ye kaa niye ní, nɛ i kɛ duɔ maa wo nyu mi ha mɛ nɛ a nu. Ejakaa mɛ Yerusalem gbali ɔmɛ a he je nɛ ní yayamihi gbɛ fĩa zugba a nɔ tsuo.’ ”

¹⁶ Yawɛ Tabohiatsɛ ɔ de Yerusalem ma mi bi ɔmɛ ke, “Nyɛ ko bu munyuhi nɛ gbali ɔmɛ ngɛ tue ɔ tue; sisimi a ngɛ nyɛ sisie ɔ nɛ. Ninahi nɛ a jeɔ kɛ tsɔɔ nyɛ ɔ, mɛ nitsɛmɛ a yi mi e je; pi imi Yawɛ ye nya mi munyuhi ji lɔ ɔmɛ.

¹⁷ Daa nɛ ɔ, bɔ nɛ a deɔ ni nɛmɛ nɛ sume nɛ a buɔ ye munyu ɔ tue ji, ‘Nyɛ ko ye tsui tete! Nɔ́ tsuaa nɔ́ maa hi.’ Tue wali ɔmɛ lɛɛ bɔ nɛ a deɔ mɛ ji, ‘Haomi ko haomi ko be nyɛ nɔ bae fɛɛ.’ ”

¹⁸ I de ke, “Gbali nɛ ɔmɛ a ti mɛnɔ le nɔ́ nɛ ngɛ Yawɛ yi mi? A ti mɛnɔ nu Yawɛ sɛ gbi hyɛ, nɛ e ma de pohu ke e nu sisi? Aloo a ti mɛnɔ bu e munyu ɔ tue hyɛ, nɛ e pee kaa bɔ nɛ munyu ɔ tsɔɔ kaa a pee ɔ?

¹⁹ Nyɛɛ hyɛ! Yawɛ mi mi fumi ɔ ngɛ kaa ahumi. E ngɛ kaa lasiogblee nɛ maa fia vuguvugu kɛ bɔle yayami peeli a yi he.

²⁰ Yawɛ mi mi fumi nɛ nya wa wawɛɛ nɛ ɔ se be poe kɛ yaa si e maa pee nɔ́ tsuaa nɔ́ nɛ e to ke e maa pee ɔ kɛ gbe nya. Be komɛ a se loko e ma a maa nu nɔ́ nɛ ɔ sisi saminya.”

²¹ Yawɛ ke, “I tsɔ we gbali nɛ ɔmɛ, se kɛ̃ a he sɔ kɛ ya fiɛ. I ha we mɛ sɛ gbi ko, se kɛ̃ a gba ngɛ ye biɛ mi.

²² A le nɔ́ nɛ ngɛ ye yi mi jinɛ a ko fiɛ ha ye ma a. Ke a pee ja a, ye ma a maa je a blɔ yayami ɔmɛ a nɔ, nɛ a ní yayami ɔmɛ hu a ma kpa peemi.

²³ “Anɛ ke i ngɛ nyɛ kasa nya pɛ loko Mawu ji mi? Ke i ngɛ se lokoo ɔ lɛɛ pi Mawu ji mi lo?

²⁴ Anɛ nɔ ko ma nyɛ maa laa e he ngɛ he ko nɛ i be lɛ nae lo? Anɛ nyɛ li kaa i ngɛ he tsuaa he lo? I ngɛ hiɔwe kɛ zugba tsuo.

²⁵ Munyuhi nɛ lakpa gbali ɔmɛ tuɔ ngɛ ye biɛ mi ɔ, i nu lɛ tsuo pɛpɛɛpɛ. A deɔ ke imi lɛ i ha mɛ sɛ gbi ngɛ nlami mi.

²⁶ Mɛni be gbali nɛ ɔmɛ maa ye lakpa kɛ yaa si? A deɔ níhi nɛ be mi nɛ a kɛ sisiɔ ye ma a.

²⁷ Nlamihi nɛ a sɛɛɔ kɛ haa a sibi ɔ, a susuɔ kaa lɔ ɔmɛ ma ha nɛ ye ma a hɛ maa je ye nɔ kaa bɔ nɛ a nɛmɛ ɔmɛ a hɛ je ye nɔ nɛ a ya sɔmɔ Baal ɔ.

²⁸ Ke gbalɔ ko nla a, e sɛɛ e nlami ɔ. Se ke nɔ ko ná sɛ gbi kɛ je ye ngɔ ɔ, e fiɛ ngɛ anɔkuale mi. Jakati kɛ ngma a, mɛni bɔmi lɛ ngɛ a kpɛti?

²⁹ Ye sɛ gbi ɔ, anɛ e be kaa la lo? Anɛ e be kaa hamle nɛ ywiaa tɛ sa wɔtsɔwɔtsɔ lo?

³⁰ Lɔ ɔ he ɔ, gbali nɛ juɔ ye sɛ gbi kɛ jeɔ a sibi a dɛ nɛ a fiɛɛ ɔ, i kɛ mɛ ná.

³¹ Jehanɛ, gbali nɛ mɛ nitsɛmɛ a munyu lɛ a tuɔ, se kɛ̃ a deɔ ke imi ye ngɔ lɛ a naa sɛ gbi ɔ kɛ jee ɔ, mɛ hu i kɛ mɛ ná.

³² Nyɛɛ bu nɔ́ nɛ imi Yawɛ, i ngɛ dee ɔ tue! Gbali nɛ sɛɛɔ lakpa nlami ɔ, i kɛ mɛ ná. A sɛɛɔ kikɛmɛ a nlami nɛ ɔmɛ, nɛ a kɛ lakpa yemi, kɛ fiami kpataa ye ma a nane. I tsɔ we mɛ, nɛ i fa we mɛ ke a ya tsu nɔ́ ko kaa kikɛ nɛ ɔ; a he be se nami ko kulaa kɛ ha ma a. Imi, Yawɛ lɛ i de.”

Yawɛ tlomi

³³ Yawɛ de mi ke, “Yeremia, ke ji nimli nɛ ɔmɛ a ti nɔ ko, aloo gbalɔ ko, aloo osɔfo ko bi mo ke, ‘Mɛni ji Yawɛ sɛ gbi?’ ɔ, de lɛ ke, ‘Mo ji tlomi nɛ Yawɛ tloo ɔ nɛ, nɛ e ma sake mo kɛ fɔ he.’

³⁴ Ke nimli nɛ ɔmɛ a ti nɔ ko, aloo gbalɔ ko, aloo osɔfo ko li peemi nɛ e de ke ‘Yawɛ tlomi’ ɔ, ma gbla e kɛ e we mi bimɛ a tue.

³⁵ Nɔ́ nɛ mohu nɛ sa kaa nyɛ ti nɔ tsuaa nɔ nɛ bi e nyɛmi, loo e huɛ ji nɛ ɔ nɛ: ‘Mɛni heto lɛ Yawɛ ha? Kɛ Yawɛ de kɛɛ?’

³⁶ Se ‘Yawɛ tlomi’ ɔ lɛɛ, nyɛ ko wo nɔ ta; nɔ tsuaa nɔ munyu maa pee nɔ ɔ nitsɛ tlomi. Mawu hɛ kalɔ ɔ, Yawɛ Tabohiatsɛ, wa Mawu ɔ munyu ɔmɛ lɛɛ nyɛ tsake a hɛ mi.

³⁷ Yeremia, bi gbali ɔmɛ ke, ‘Mɛni heto lɛ Yawɛ ha? Kɛ Yawɛ de kɛɛ?’

³⁸ Ke a ya yi ye mlaa a nɔ nɛ a de ke ‘Yawɛ tlomi’ ɔ, lɛɛ de mɛ ke,

³⁹ ma wo a nɔ, nɛ ma sake mɛ kɛ fɔ he ngɛ tsitsaa lokoo, mɛ, kɛ ma a nɛ i ngɔ kɛ ha a kɛ a nɛmɛ.

⁴⁰ Ma bɔ mɛ ahlua, nɛ a hɛ mi ma pue si kɛ ya neneene. Nɛ nɔ ko nɔ ko hɛ be nɔ́ nɛ ɔ nɔ jee gblegbleegble.”