Yeremia 22 - BAIBLO ALOO NGMAMI KLƆUKLƆU Ɔ

Yeremia sɛ gbi kɛ ha Yuda matsɛ we ɔ

^1-2 Yawɛ de mi ke ma ya Yuda matsɛ we ɔ, nɛ ma ya de Yuda matsɛ ɔ nɛ hii si ngɛ David sɛ ɔ nɔ ɔ, e tsɔli ɔmɛ, kɛ ma a nɛ guu agbo nɛ ɔmɛ a mi ɔ ke, “Bɔ nɛ lɛ, Yawɛ ɔ de ji nɛ ɔ nɛ:

³ ‘Imi Yawɛ, i wo nyɛ mlaa ke nyɛɛ ye dami sane, nɛ nyɛɛ pee nɔ́ nɛ da. Nyɛ je nɔ nɛ a ngɛ lɛ amimi yee ɔ kɛ je amimi yelɔ ɔ dɛ mi. Nyɛ ko wa nibwɔhi, awusahi, kɛ yalɔyihi yi mi; nɛ nyɛ ko pue nɔ nɛ pee we nɔ́ ko ɔ muɔ si ngɛ he klɔuklɔu nɛ ɔ.

⁴ Ke nyɛ maa ye mlaa nɛ i wo nyɛ nɛ ɔ nɔ niinɛ ɔ, lɛɛ David nina maa ye matsɛ daa. Nɛ matsɛmɛ ɔmɛ, a tsɔli ɔmɛ, kɛ ma a maa hi ta zugba lɛhi a mi, kɛ okpɔngɔhi a nɔ kɛ be ngɛ matsɛ we agbo nɛ ɔmɛ a mi daa.

⁵ Se ke nyɛ yi ye mlaa amɛ a nɔ ɔ lɛɛ i ngɛ ye he kita kae kaa ja matsɛ we nɛ ɔ pee we doku kokooko. Imi, Yawɛ lɛ i de.’ ”

⁶ “Yuda matsɛ we ɔ ngɛ fɛu ngɛ ye hɛ mi kaa bɔ nɛ Gilead zugba a, loo Lebanon yo ɔmɛ ngɛ ɔ. Se kɛ̃ ɔ, ma ha lejɛ ɔ maa pee we doku nɛ nɔ ko be mi.

⁷ Ma tsɔ nihi nɛ a ma ya puɛ lejɛ ɔ pɛsɛpɛsɛ. Nɔ tsuaa nɔ maa hɛɛ gbiɛ. A maa poo seda titima kpakpa amɛ, nɛ a ma sake kɛ wo la mi.

⁸ “Pee se ɔ, je mahi babauu ma ba gu lejɛ ɔ, nɛ a ma bi a sibi ke mɛni he je nɛ imi Yawɛ, i pee ma ngua nɛ ɔ kikɛ nɛ ɔ.

⁹ Kɛkɛ ɔ, a ma he nɔ ke i ye nyɛ sane nɛ ɔ, ejakaa somi nɛ imi, nyɛ Mawu ɔ, i kɛ nyɛ so ɔ, nyɛ yi nɔ; nyɛ ya nyɛɛ mawu kpahi mohu a se, nɛ nyɛ sɔmɔ mɛ.”

Yeremia sɛ gbi nɛ kɔɔ Yoahaz he

¹⁰ Yuda ma, nyɛ ko fo ya ha Matsɛ Yosia; nyɛ ko ye e gbenɔ ɔ he kɔmɔ. Nyɛɛ wo yana kɛ ha e binyumu Yoahaz mohu; ejakaa nɛ a ngɔ lɛ kɛ yaa nɛ ɔ, e be kpalee kɛ ba hu gblegbleegble; zugba nɛ a fɔ lɛ ngɛ nɔ ɔ, e be nae hu.

¹¹ Yosia binyumu Yoahaz nɛ ba ye e tsɛ se kaa Yuda matsɛ ɔ, bɔ nɛ Yawɛ de ngɛ e he ji nɛ ɔ nɛ: “Nɛ a kɛ lɛ yaa nɛ ɔ, e be kpalee kɛ ba hiɛmɛ nɛ ɔ hu gblegbleegble.

¹² He nɛ a nu lɛ nyɔguɛ kɛ ho ɔ, lejɛ ɔ e ma ya gbo ngɛ; zugba nɛ ɔ lɛɛ e be nae hu gblegbleegble.”

Yeremia sɛ gbi nɛ kɔɔ Yehoyakim he

¹³ Nɔmlɔ nɛ guu blɔ nɛ dɛ nɔ nɛ e kɛ poo we, nɔ nɛ kɛ nɔ sisimi maa mɔ, nɔ nɛ haa nɛ e nyɛmi sɔmɔɔ lɛ yaka nɛ e wui lɛ hiɔ ɔ, musu tloo lɛ!

¹⁴ Nɔmlɔ nɛ deɔ ke, “Ma ma mɔ nguaa kɛ e mi hiɔwe tsu agboagbohi”; kɛkɛ nɛ e jeɔ saflɛhi ngɛ tsu ɔmɛ a mi, nɛ e kaa seda tso kɛ woɔ gbogbo ɔmɛ a he, nɛ e saa we ɔ he tsopa tsu saminyayoo ɔ, musu tloo lɛ!

¹⁵ Ke o ngɔ seda kɛ po we saminyayoo nɛ ngɛ fɛu pe ni kpahi a wehi ɔ, anɛ lɔ ɔ peeɔ mo matsɛ slɔɔto ko lo? O tsɛ hi si saminya, nɛ nɔ́ tsuaa nɔ́ hi ha lɛ; e ye je mi ngɔɔmi nɛ e fiɛ e yi nɔ bɔ nɛ sa. Ejakaa e ye dami sane ngɛ nɔ́ tsuaa nɔ́ mi.

¹⁶ E ye ohiatsɛmɛ, kɛ nɔ́ nali a sane ha mɛ, nɛ e nɔ́ tsuaa nɔ́ ya nɔ bɔ nɛ sa. Anɛ pi enɛ ɔ peemi ji Yawɛ lemi lo?

¹⁷ Se moo lɛɛ o susumi pɛ ji bɔ nɛ o maa pee kɛ sisi nihi nɛ o kpɔ a níhi yaka. O pueɔ nihi nɛ pee we nɔ́ ko a muɔ si; o yeɔ o ma a amimi, nɛ o waa mɛ yi mi. Yawɛ lɛ de.

¹⁸ Lɔ ɔ he ɔ, bɔ nɛ Yawɛ ngɛ dee ngɛ Yuda matsɛ, Yehoyakim, Yosia binyumu ɔ he ji nɛ ɔ nɛ: “Ke e gbo ɔ, nɔ ko nɔ ko be kɔmɔ yee ha lɛ; nɔ ko nɔ ko be dee ke, ‘Ye nyɛmi due! Due!’ Nɔ ko nɔ ko be ya foe ha lɛ ke, ‘Ye nyɔmtsɛ! Ye matsɛ!’

¹⁹ A maa pu lɛ kaa bɔ nɛ a puɔ teji; a maa gbla lɛ kɛ ho, nɛ a ma ya sake lɛ kɛ fɔ Yerusalem agbo ɔmɛ a se.”

Yeremia sɛ gbi nɛ kɔɔ Yerusalem he

²⁰ Yerusalem ma, nyɛɛ ya nɛ nyɛ ya kpa bubuubui ngɛ Lebanon. Nyɛɛ ya Bashan nɛ nyɛ ya kpa bubuubui ngɛ lejɛ ɔ. Nyɛ ya kpa kuu ngɛ Moab yo ɔmɛ a nɔ, ejakaa a kpata nyɛ huɛmɛ ɔmɛ tsuo a hɛ mi.

²¹ Benɛ nyɛ ná nyɛ he ɔ, Yawɛ kɛ nyɛ tu munyu, se nyɛ kua lɛ tue bumi. Kɛ je nyɛ nihe mi ɔ, nɔ́ nɛ nyɛ peeɔ ji kaa nyɛ bui Yawɛ tue.

²² Kɔɔhiɔ maa muɔɔ nyɛ hɛ mi nyɛɛli ɔmɛ tsuo kɛ ho; a maa nuu nyɛ huɛmɛ ɔmɛ nyɔguɛ; a maa bɔ nyɛ ma amɛ ahlua ngɛ ní yayamihi tsuo nɛ nyɛ pee ɔ a he.

²³ Nyɛ ngɛ tue mi jɔmi si himi mi ngɛ seda tsohi nɛ a kɛ je Lebanon kɛ ba a a mi. Se kɛ̃, haomi kɛ he hiami maa ba nyɛ nɔ kaa yo nɛ nu kɔɔmi; nyɛ ní maa pee mɔbɔ wawɛɛ nitsɛ.

Mawu maa gbla Yehoyakin tue

²⁴ Yawɛ de Matsɛ Yehoyakin, Yuda matsɛ, Yehoyakim bi ɔ ke, “Ligbi abɔ nɛ ye hɛ ngɛ nɛ ɔ, ke mo ji womi nya sɔumi nɔ́ ngɛ ye hiɔ nine nguɛ he po, ma je mo kɛ je lejɛ ɔ,

²⁵ nɛ ma ngɔ mo kɛ wo nihi nɛ o ngɛ gbeye yee, kɛ ni nɛmɛ nɛ ngɛ mo hlae nɛ a gbe ɔ a dɛ mi. Ma ngɔ mo kɛ wo Babilonia matsɛ, Nebukadnezar, kɛ e ta buli ɔmɛ a dɛ mi.

²⁶ Ma ha nɛ a maa nuu o kɛ o nyɛ nɛ fɔ mo ɔ nyɔguɛ kɛ ya ma ko mi nɛ pi lejɛ ɔ nɛ a fɔ nyɛ ngɛ. Nɛ lejɛ ɔ nyɛ ni enyɔ ɔmɛ tsuo nyɛ ma ya gbo ngɛ.

²⁷ Nyɛ hɛ ma ya ja ngɛ lejɛ ɔ, nɛ nyɛ maa suɔ kaa nyɛɛ na zugba nɛ ɔ ekohu; se nyɛ be kpalee kɛ ba hu gblegbleegble.”

²⁸ I bi ke, “Anɛ Matsɛ Yehoyakin ba pee kaa buɛ nɛ ywia nɛ a sake ngɔ fɔ he nɛ nɔ ko sume hu lo? Anɛ lɔ ɔ he nɛ a nuu lɛ kɛ e bimɛ ɔmɛ kɛ ho zugba nɛ a ti nɔ ko nɔ ko li ɔ nɔ ya lo?”

²⁹ Zugba lee, zugba! Bu Yawɛ munyu ɔ tue!

³⁰ “A gbiɛ nyumu nɛ ɔ gbidigbidi, e be bimɛ nae kɔkɔɔkɔ; e be nɔ yae gblegbleegble e wami be ɔ tsuo. E be nina nae nɛ ma ba ye tsɛ ngɛ David se, ngɛ Yuda zugba a nɔ. Imi, Yawɛ lɛ i de.”