Yeremia 21 - BAIBLO ALOO NGMAMI KLƆUKLƆU Ɔ

A gba kɛ to ke a maa ye Yerusalem nɔ kunimi

¹ Yuda matsɛ, Zedekia tsɔ Pashur, Malkia binyumu ɔ, kɛ osɔfo Zefania, Maaseya binyumu ɔ kɛ ba ye ngɔ kɛ sɛ gbi nɛ ɔ ke,

² “Babilonia matsɛ, Nebukadnezar ba tua wɔ. Lɔ ɔ he ɔ, i kpa mo pɛɛ nɛ o bi Yawɛ ga womi ha wɔ kaa alini Yawɛ ma tsu nyakpɛ ni ha wɔ, nɛ e ma ha nɛ Nebukadnezar maa kpale e se lo.”

³ Kɛkɛ nɛ Yawɛ kɛ mi tu munyu, nɛ i de tsɔli ɔmɛ ke

⁴ a ya de Zedekia ke, bɔ nɛ Yawɛ Israel Mawu ɔ, de ji nɛ ɔ nɛ: “Babilonia matsɛ ɔ, kɛ Kaldea bi nɛ ba sa nyɛ ma a yi, nɛ nyɛɛ kɛ mɛ ngɛ ta hwue ɔ, ma ha nɛ nyɛ ta hwumi ní ɔmɛ nɛ nyɛ hɛɛ ɔ maa pee yaka ngɛ a hɛ mi. Ma bua nya kɛ ba pue ma nɛ ɔ kpɛti tutuutu.

⁵ Imi nitsɛ i kɛ nyɛ maa hwu kɛ ye he wami tsuo, kɛ mi mi la nɛ nya wa wawɛɛ nitsɛ.

⁶ Ma kpata nɔ tsuaa nɔ hɛ mi ngɛ ma nɛ ɔ mi; hiɔ nɛ nya wa maa gbe nimli, kɛ lohwehi tsuo.

⁷ Se mo, Yuda matsɛ, Zedekia! Mo, kɛ o tsɔli ɔmɛ, kɛ nihi tsuo nɛ a yi ma na wami ngɛ ta, kɛ hwɔ, kɛ gbenɔ hiɔ ɔ se ɔ, nyɛɛ lɛɛ ma ngɔ nyɛ kɛ wo Babilonia matsɛ, Nebukadnezar, kɛ nyɛ he nyɛli ɔmɛ nɛ ngɛ nyɛ hlae nɛ a gbe ɔ a dɛ mi. Nebukadnezar ma kpata nyɛ tsuo pɛpɛɛpɛ nyɛ hɛ mi. E be nyɛ ti nɔ ko nɔ ko he ngmɛɛe, nɛ e be nɔ ko nɔ ko mɔbɔ nae. Imi, Yawɛ lɛ i de.”

⁸ Jehanɛ, Yawɛ de mi ke ma de ma a ke, “Nyɛɛ bu tue! I kɛ nɔ́ enyɔ ngɛ nyɛ hɛ mi fɔe nɛ nyɛɛ hla kake, blɔ nɛ kɛ nɔ yaa wami mi, kɛ blɔ nɛ kɛ nɔ yaa gbenɔ mi.

⁹ Nɔ tsuaa nɔ nɛ maa hi ma nɛ ɔ mi ɔ, e yi maa ta; ta, loo hwɔ, loo gbenɔ hiɔ maa gbe lɛ. Se nɔ tsuaa nɔ nɛ maa je ma a mi kɛ ya Babilonia bi nɛ ba sa ma a yi ɔ a ngɔ, nɛ e ma ya nu a nane ɔ, e yi ma na wami; nɛ e maa ya we mi hɛ ngmengmle.

¹⁰ I pee ye juɛmi kaa ja i kpata ma nɛ ɔ hɛ mi kokooko; i be nyɛ mɔbɔ nae. Ma ngɔ ma a kɛ wo Babilonia matsɛ ɔ dɛ mi nɛ e maa mɛ he la. Imi, Yawɛ lɛ i de.”

A maa gbla Yuda matsɛ we ɔ tue

^11-12 Yawɛ de mi ke ma ngɔ sɛ gbi nɛ ɔ ya ha Yuda matsɛ we ɔ nɛ ji David nina a ke, “Nyɛɛ bu nɔ́ nɛ imi Yawɛ, i ngɛ dee ɔ tue. Nyɛɛ ye dami sane daa ligbi. Nyɛ je nɔ nɛ a ngɛ lɛ amimi yee ɔ kɛ je amimi yelɔ ɔ dɛ mi. Ke nyɛ pee we ja a, yayami nɛ nyɛ ngɛ pee ɔ ma ha nɛ ye mi mi maa wo la wawɛɛ nitsɛ, nɛ nɔ́ ko nɔ́ ko be hie peemi ngɛ he.

¹³ Mo Yerusalem, o maa si piɔpiɔɔpiɔ ngɛ kɔ̃ ɔmɛ a mi kaa tɛ sa ngɛ nga kplanaa nɔ. Se i kɛ mo maa to ní. O deɔ ke nɔ ko be nyɛe ma ba tua mo, nɛ nɔ ko be nyɛe maa sɛ o mɔ ɔmɛ a mi.

¹⁴ Se imi lɛɛ ma gbla o tue ngɛ nɔ́ nɛ o pee ɔ he. Ma mɛ o matsɛ we ɔ he la, nɛ la a maa sa nɔ́ tsuaa nɔ́ kɛ bɔle si. Imi, Yawɛ lɛ i de.”