Yeremia 20 - BAIBLO ALOO NGMAMI KLƆUKLƆU Ɔ

Yeremia kɛ osɔfo Pashur pɛ

¹ Osɔfo Pashur, Imer bi ɔ, nɛ ji tsɔlɔ nɔkɔtɔma nɛ hyɛɛ Yawɛ we ɔ nɔ ɔ nu fiɛmi nɛ i ngɛ fiɛe ɔ.

² Kɛkɛ nɛ Pashur ha nɛ a fia mi ní, nɛ a bɔ mi pã ngɛ Benyamin agbo ɔ yiti je ngɛ Yawɛ we ɔ mi.

³ E nɔ jena mɔtu, benɛ Pashur je mi ngɛ pã a mi ɔ, i de lɛ ke, “Pi Pashur nɛ Yawɛ wo mo! Biɛ nɛ Yawɛ ha mo ji Magormisabib.

⁴ Yawɛ nitsɛ ke, ‘Ma ha o ma plɛ pee bubui ha mo nitsɛ o he, kɛ o huɛmɛ ɔmɛ tsuo. He nyɛli maa gbe o huɛmɛ ɔmɛ ngɔ pue si kɛ klaate, nɛ o maa na paa kɛ o hɛngmɛ. Ma ngɔ Yuda bi ɔmɛ tsuo ngɔ wo Babilonia matsɛ ɔ dɛ; e maa nuu ni komɛ nyɔguɛ kɛ ho e ma mi ya, nɛ e ma ya gbe mɛ ngɛ lejɛ ɔ.

⁵ Ma ha nɛ he nyɛli maa ha a níhi tsuo pɛpɛɛpɛ ngɛ ma a mi: níhi nɛ a gbo dengme kɛ na, weto ní kpakpahi, kɛ Yuda matsɛmɛ ɔmɛ a juetli; nɛ a maa muɔ kɛ ya Babilonia.

⁶ Nɛ mo Pashur! A maa nuu mo hu o kɛ o we mi bimɛ tsuo nyɔguɛ kɛ ya Babilonia. Lejɛ ɔ o ma ya gbo ngɛ, nɛ lejɛ ɔ ji he nɛ a maa pu mo, kɛ o huɛmɛ ɔmɛ tsuo nɛ o gba lakpa gbami ha mɛ ɔ ngɛ.’ ”

Yeremia kɛ Yawɛ na

⁷ Yawɛ, o sisi mi pɛ nɛ ye yi mi plɛ. O he wa pe mi nɛ o ye ye nɔ. Nɔ tsuaa nɔ ngɛ ye he fɛu yee; daa ligbi ɔ, muɔ kɛkɛ a ngɛ mi muɔe.

⁸ Daa nɛ ɔ, munyuhi nɛ maa je ye nya a, haomi kɛ yi wu tso níhi a he e kɔɔ. Yawɛ, daa nɛ ɔ, a ngɛ mi ahlua bɔe, nɛ a ngɛ ye he fɛu yee ngɛ o munyu ɔ nɛ i ngɛ fiɛe ɔ he.

⁹ Se ke i de ke, “I be Yawɛ biɛ ta woe hu, nɛ i be fiɛe ngɛ e biɛ mi hu” ɔ, o sɛ gbi ɔ peeɔ kaa la nɛ ngɛ tsoe ngɛ ye tsui mi, kɛ ye wuhi a mi. I bɔɔ mɔde saminya kaa ma tsi nya, se jehanɛ lɛɛ, i pa nyɛ we hu.

¹⁰ I nuɔ nɛ nihi babauu tuɔ munyu ngɛ a kuɔ si, nɛ a kɛ woɔ ye he gbeye. A deɔ ke, “Nyɛ ha nɛ wa ya po e nya ha nɔ yeli ɔmɛ!” Ye huɛmɛ kpakpahi tete po hii blɔ hyɛe kaa ye nane ma kpata lo. A deɔ ke, “Alini e maa du klama, kɛkɛ ɔ, wa nine maa su e nɔ nɛ wa maa ye wa he lue.”

¹¹ Se mo Yawɛ, moo lɛɛ o ngɛ ye se kpɛii kaa tatsɛ kpanaa; ni nɛmɛ nɛ ngɛ mi yi mi wae ɔ be mi nyɛe. Zo maa gbe mɛ daa, ejakaa a be nyɛe maa pee nɔ́ ko nɔ́ ko. A zo ɔ hu nɔ ko hɛ be nɔ jee gblegbleegble.

¹² Se mo, Yawɛ Tabohiatsɛ! Moo lɛɛ o hyɛɛ nimli a tsui mi kɛ a juɛmi mi; o le nihi nɛ peeɔ nɔ́ nɛ da. I tu ye sane ɔ kɛ wo o dɛ, lɔ ɔ he ɔ, gbla ye he nyɛli ɔmɛ a tue ha mi nɛ ma na kɛ ye hɛngmɛ.

¹³ Nyɛ la ha Yawɛ! Nyɛ je Yawɛ yi! Ejakaa e jeɔ nihi nɛ a ngɛ mɛ yi mi wae ɔ kɛ jeɔ yayami peeli a dɛ mi.

¹⁴ Á gbiɛ ligbi ɔ nɛ a fɔ mi ɔ! Ligbi ɔ nɛ maa fɔ mi ɔ, a ko gbaa jamɛ a ligbi ɔ kɔkɔɔkɔ!

¹⁵ Nyumu ɔ nɛ ba bɔ tsaatsɛ amaniɛ ke, “A fɔ binyumuyo ha mo”, nɛ tsaatsɛ bua jɔ e he ɔ, a gbiɛ lɛ!

¹⁶ Ha nɛ jamɛ a nyumu ɔ nɛ pee kaa jamɛ a ma amɛ nɛ Yawɛ kpata a hɛ mi nɛ mɔbɔ nami ko be mi ɔ pɛ. Mɔtu ɔ, ha nɛ bubuubui nɛ pɛ kɛ wo lɛ; piani lɛɛ e nu nɛ a he ose ngɛ ta mi,

¹⁷ ejakaa e gbi mi ngɛ maa mi mi. Kaa e pee ja, jinɛ maa mi mi ɔ pee ye yɔkɔ.

¹⁸ Mɛni he je a fɔ mi kulaa? Pe a fɔ mi nɛ ma ba na nɔ́, nɛ ma hao, nɛ zo nɛ gbe mi ye wami ligbi tsuo lo?