Yeremia 2 - BAIBLO ALOO NGMAMI KLƆUKLƆU Ɔ

Mawu baa Israel yi

¹ Yawɛ kɛ sɛ gbi nɛ ɔ ha mi, nɛ e de mi ke

² ma fiɛ ha nɔ tsuaa nɔ ngɛ Yerusalem ke, “I kai kaa be nɛ nyɛ ngɛ nihe mi ɔ, nyɛ ye mi anɔkuale, nɛ nyɛ je nyɛ suɔmi kpo kɛ tsɔɔ mi kaa bɔ nɛ ayɛflo suɔ e huno ɔ; nyɛ nyɛɛ ye se kɛ ya gu nga kplanaa nɔ ngɛ zugba nɛ a du we ní ngɛ nɔ ɔ nɔ.

³ Jamɛ a be ɔ mi ɔ, imi nitsɛ ye nihi nɛ i hla ji nyɛ Israel bi; ye weto ní klɔuklɔu ji nyɛ. Nihi tsuo nɛ pee nyɛ yayami ɔ, i ngɔ haomi kɛ gbla a tue. Imi, Yawɛ lɛ i de.”

Israel bi a nɛmɛ ɔmɛ a he yayamihi

⁴ Nyɛ Yakob nina, kɛ Israel wɛtsohi tsuo, nyɛɛ bu Yawɛ sɛ gbi tue.

⁵ Yawɛ ke, “Mɛni tɔmi nyɛ nɛmɛ ɔmɛ na ngɛ ye he loko a tsɔ a he kɛ je ye he ɔ? A ya nyɛɛ níhi nɛ he be se nami a se, nɛ mɛ nitsɛmɛ a plɛ pee yaka nimli.

⁶ A bi we ke, ‘Jije Yawɛ ngɛ?’ Pohu, imi lɛ i je mɛ kɛ je Egipt zugba a nɔ; imi lɛ i kpaka mɛ kɛ gu nga kplanaa a nɔ, zugba kɛ e mi muɔhi kɛ e mi diblii kpii, zugba nɛ nyu be nɔ, nɛ nɔmlɔ adesa ko be nɔ, nɛ nɔ ko hu gui nɔ.

⁷ I ngɔ mɛ kɛ ba zugba nɛ baa ní nɔ, konɛ a ba ye zugba a nɔ yiblii kɛ ní kpakpahi. Se benɛ a ba a, a ba ble zugba a, nɛ a ngɔ ye weto ní ngɔ pee nɔ́ nɛ a hiee.

⁸ Osɔfo ɔmɛ bi we ke, ‘Jije Yawɛ ngɛ?’ Imi nitsɛ ye we osɔfohi po li mi. Nɔ yeli ɔmɛ te si kɛ wo mi; gbali ɔmɛ gba ngɛ Baal biɛ mi, nɛ a ya nyɛɛ níhi nɛ a he be se nami a se.

Yawɛ kɛ e ma a na

⁹ “Lɔ ɔ he ɔ, imi Yawɛ, i kɛ ye ma a maa to ní. I kɛ mɛ, kɛ a nina tsuo maa to ní.

¹⁰ Nyɛɛ ya Kipro wo kpɔ ɔmɛ a nɔ nɛ nyɛ ya hyɛ; nyɛɛ tsɔ kɛ ya Kedar nɛ nyɛ ya hla mi fitsofitso; nyɛɛ hyɛ kaa nɔ́ ko kaa kikɛ nɛ ɔ ba hyɛ lo!

¹¹ Anɛ je ma ko tsake e mawuhi hyɛ lo? Je ma amɛ a mawu ɔmɛ po tsa pi mawu nitsɛnitsɛhi ji mɛ. Se ye ma a lɛɛ a ngɔ imi, a hɛ mi nyami ɔ kɛ tsake mawuhi nɛ a he be se nami.

¹² Hiɔwe, ha nɛ nɔ́ nɛ ɔ nɛ pee mo nyakpɛ. Ha nɛ sawale nɛ nu mo, nɛ o he mi nɛ po.

¹³ Ejakaa yayami enyɔ lɛ ye ma a pee: imi, wami nyu vu ɔ, a kua mi, nɛ a ya kpɛ́ tɛ muɔhi ngɔ ha a he; pohu tɛ muɔ nɛ ɔmɛ ywia, nɛ nyu be a mi dae.

Nɔ́ nɛ je ma se mawuhi a se nyɛɛmi mi

¹⁴ “Israel ɔ nɛɛ, nyɔguɛ ji lɛ lo? Anɛ nyɔguɛ si himi mi a fɔ lɛ ngɔ wo lo? Mɛni he je mɔ nɛ e he nyɛli ɔmɛ ngɛ e se nyɛɛe, nɛ a ngɛ lɛ dae kikɛ nɛ ɔ?

¹⁵ A ngɛ huãe kɛ ngɛ lɛ woe kaa jatahi; a pee e zugba a kaa nga kplanaa nɔ; e ma amɛ plɛ pee ma dokuhi, nɛ nɔ ko nɔ ko be ma amɛ a mi hu.

¹⁶ Ee, Memfis bi, kɛ Tapanhes bi ywia e yi kpoo!

¹⁷ Israel, mɛnɔ kɛ nɔ́ nɛ ɔ ba o nɔ? Anɛ pi mo nitsɛ nɛ o pee lo? Benɛ imi, Yawɛ o Mawu ɔ, i kpaka mo kɛ ma a, anɛ o tsɔ we ye hɛ mi atuã lo?

¹⁸ Mɛni o susu kaa o ma na ngɛ Egipt loko o ya lejɛ ɔ? Nɛ́ o ya nu Nilo pa a mi nyu, pi ja lo? Mɛni o susu kaa o ma na ngɛ Asiria loko o ya lejɛ ɔ? Nɛ́ o ya nu Yufrate pa a mi nyu, pi ja lo?

¹⁹ Mo nitsɛ o ní yayami ɔmɛ maa gbla o tue; o se yami ɔ ma ka o hɛ mi. O ma ba na paa kaa kuami nɛ o kua imi, Yawɛ o Mawu ɔ, kɛ ye hɛ mi atuã nɛ o tsɔ ɔ ji nɔ́ ko nɛ hí kulaa; e ngɛ kaa nɔ́ ko nɛ dooɔ kaa agba. Imi, Nyɔmtsɛ Yawɛ Tabohiatsɛ ɔ lɛ i de.”

Israel kua Mawu jami

²⁰ Nyɔmtsɛ Yawɛ ke, “Israel, blema lokoo lɛ o je o he kɛ je ye he wami sisi; o de ke o be mi jae hu fɛɛ. O kpla si ha amagahi ngɛ yoku tsuaa yoku nɛ ya hiɔwe nɔ, kɛ tso tsua tso nɛ bɔ kusuu sisi.

²¹ O ngɛ kaa wai tso saminyayoo nɛ i du; wu kpakpa mi lɛ o puɛ kɛ je. Se hyɛ bɔ nɛ o ba plɛ pee kaa wai sasɛ nɛ he be se nami.

²² Ke o du o he kɛ jale nɛ nya wa tete po, ma na o tɔmi ɔmɛ kaa so ko nɛ mɛtɛ o he.

²³ O ma de ke o ble we o he lo? O ma de ke o ja we Baalhi hyɛ lo? Hyɛ bɔ nɛ o pee yayami ngɛ kɔ̃ ɔ mi; hyɛ nɔ́ nɛ o pee. O pee kaa afukpɔngɔ yo nɛ he mi jɔɛ lɛ, nɛ ngɛ kpae kɛ ngɛ yae kɛ ngɛ bae.

²⁴ O ngɛ kaa nga mi teji yo nɛ nu nyumu he fu; mɛnɔ ma nyɛ maa tsi e nya? E hia we kaa nyumu nɛ hao e he kɛ ya hla lɛ; ke fiɛmi be ɔ su kɛkɛ o maa na lɛ.

²⁵ I de mo ke, Israel, kpa mawu kpahi a se nyɛɛmi, bɔ nɛ pee nɛ o nane nɛ ko ba gbo, nɛ kuma ba gbe mo. Se o de ke, ‘Dɛbi! I be ye se kpalee; i suɔ ma se mawuhi, nɛ ma se mawuhi a se lɛ ma nyɛɛ.’ ”

Israel sa tue gblami

²⁶ Yawɛ ke, “Kaa bɔ nɛ ke a nu julɔ nɛ a pueɔ e hɛ mi si ɔ, ja nɔuu lɛ a ma pue nyɛ Israel ma a tsuo, nyɛ matsɛmɛ ɔmɛ, ganɔ ɔmɛ, nyɛ we osɔfo ɔmɛ, kɛ gbali ɔmɛ nyɛ hɛ mi si.

²⁷ A ma pue nyɛ tsuo pɛpɛɛpɛ nyɛ hɛ mi si, nyɛ ni nɛmɛ nɛ nyɛ tsɛɔ tso ke nyɛ tsɛ, nɛ nyɛ deɔ ke nyɛ nyɛ ji tɛ sa a. Nɔ́ nɛ ɔ maa ba mi, ejakaa nyɛ tsɔ ye hɛ mi atuã, be mi nɛ e sa kaa nyɛ ba nyɛɛ ye se mohu. Se ke haomi ba nyɛ nɔ lɛɛ nyɛ deɔ ke ma ba he nyɛ yi wami.

²⁸ “Mawu ɔmɛ nɛ nyɛ pee ngɔ ha nyɛ he ɔ, jije a ngɛ? Ke haomi ba nyɛ nɔ ɔ, nyɛ ha nɛ a he nyɛ yi wami ke a ma nyɛ ɔ! Yuda, bɔ nɛ o ma amɛ hiɛ babauu ɔ, ja nɔuu lɛ o mawu ɔmɛ hu hiɛ.

²⁹ Mɛni he je lɛ nyɛ ngɛ ye nya poe ɔ? Nyɛ tsuo pɛpɛɛpɛ nyɛ tsɔ ye hɛ mi atuã!

³⁰ I gbla nyɛ bimɛ ɔmɛ a tue, se lɛ tsuo pee yaka; nyɛ sume tsɔsemi. Nyɛ nitsɛmɛ hu nyɛ gbe ye gbali ɔmɛ kaa bɔ nɛ jata tsɔtslɔɔ lohwe ɔ.

³¹ Nyɛ Israel ma, nyɛɛ bu nɔ́ nɛ imi, Yawɛ i ngɛ dee ɔ tue. Anɛ i kɛ nyɛ ye sane nɛ dɛ lo? Anɛ i pee kaa nga kplanaa, aloo zugba nɛ e nɔ wo diblii kpii ha nyɛ lo? Mɛni he je mɔ nɛ nyɛ deɔ ke, ‘Jehanɛ lɛɛ wa ye wa he, wa pa be Mawu ngɔ yae hu?’ ɔ.

³² Anɛ yiheyo hɛ maa je e june nɔ lo? Anɛ ayɛflo hɛ maa je e tade nɔ lo? Se ye ma a lɛɛ a hɛ je ye nɔ ligbi babauu nɛ e be hie kanemi.

³³ Nyɛɛ hyɛ bɔ nɛ nyɛ toɔ ga kɛ hlaa yo! Yi yaholi kpanakuhi po maa kase ní kɛ je nyɛ ngɔ.

³⁴ Ohiatsɛmɛ nɛ pee we yayami ko a muɔ ji so nɛ ngɛ nyɛ tadehi a mi; pi ojo fiali a muɔ. “Se enɛ ɔmɛ tsuo a se ɔ,

³⁵ nyɛ deɔ ke, ‘Oo, i tsa pee we yayami ko kɛ wui Mawu mi mi la; e mi mi tsa fu we mi pohu.’ Se imi Yawɛ, ma gbla nyɛ tue kɛ̃, ejakaa nyɛ ye lakpa ke nyɛ pee we yayami ko.

³⁶ Nyɛɛ hyɛ bɔ nɛ nyɛ nane nya ngɛ sɔe kɛ ngɛ yae kɛ ngɛ bae, nɛ nyɛ ngɛ yemi kɛ buami hlae ngɛ je ma amɛ a ngɔ! Nyɛ hɛ mi ma pue si ngɛ Egipt kaa bɔ nɛ nyɛ hɛ mi pue si be ko ngɛ Asiria a.

³⁷ O kɛ o nine ma kpla o yi, nɛ o maa kpale kɛ je Egipt kɛ ba kɛ zo. Nihi nɛ o ngɔ o hɛ ngɔ fɔ a nɔ ɔ, imi Yawɛ i kua mɛ; o be nɔ́ ko nɔ́ ko nae kɛ je a dɛ.”