Yeremia 16 - BAIBLO ALOO NGMAMI KLƆUKLƆU Ɔ

Yawɛ tsɔɔ Yeremia bɔ nɛ e hi si ha

¹ Yawɛ kɛ mi tu munyu ekohu ke,

² “Koo ngɔ yo, nɛ ko fɔ binyumuhi loo biyihi ngɛ hiɛmɛ nɛ ɔ.

³ Bimɛ nɛ a fɔ ngɛ zugba nɛ ɔ nɔ, kɛ a fɔli nɛ fɔ mɛ ɔ, nɔ́ nɛ maa ba a nɔ ji nɛ ɔ nɛ.

⁴ Hiɔ yaya maa gbe mɛ. Nɔ ko be kɔmɔ yee ha mɛ, nɛ nɔ ko be mɛ pue hulɔ; a gbogboe ɔmɛ maa pee kaa kuku ngɛ zugba. Ni komɛ maa nɔ ta, nɛ hwɔ hu maa gbe ni komɛ, nɛ a nɔmlɔ tso ɔmɛ ma plɛ pee niye ní ha lohwe pɛlitsɛmɛ, kɛ pu mi lohwehi.

⁵ “We nɛ ya ngɛ mi ɔ, koo ya lejɛ ɔ. Ko ya ye kɔmɔ ha nɔ ko. I be ye ma a tue mi jɔmi hae hu; ye suɔmi kɛ mɔbɔ nami ɔ hu se po.

⁶ Niatsɛmɛ, kɛ ohiatsɛmɛ tsuo ma gbo ngɛ zugba nɛ ɔ nɔ; se nɔ ko be mɛ pue, nɛ nɔ ko be kɔmɔ yee ha mɛ. Nɔ ko nɔ ko be blɔ jee nɛ e maa plaa e he, loo e maa po huɛ kɛ tsɔɔ kaa e ngɛ kɔmɔ yee.

⁷ Ke nɔ ko suɔlɔ gbo ɔ, nɔ ko nɔ ko kɛ lɛ be ní yee, nɛ nɔ ko nɔ ko kɛ lɛ be ní nue kɛ wo lɛ bua. Ke nɔ ko tsɛ, loo e nyɛ tete po gbo ɔ, nɔ ko nɔ ko be kɔmɔ yee ha lɛ.

⁸ “We mi he nɛ a ngɛ ní yee nɛ a ngɛ ní nue hoo ngɛ ɔ, koo ya lejɛ ɔ. O kɛ mɛ ko ya hi si nɛ nyɛɛ ye ní nɛ nyɛɛ nu ní.

⁹ Bɔ nɛ imi Yawɛ Tabohiatsɛ, Israel Mawu ɔ, i ngɛ dee ji ma ha nɛ nyami, kɛ bua jɔmi, kɛ ayɛflo he ní peemi hoo ɔ se maa po. Nyɛ maa na nɔ́ nɛ ɔ paa kɛ nyɛ nitsɛmɛ nyɛ hɛngmɛ ngɛ nyɛ wami be mi.

¹⁰ “Ke o ya de ma nɛ ɔ ní nɛ ɔmɛ tsuo ɔ, a ma bi mo ke mɛni he je lɛ i to ye yi mi kaa ma gbla a tue wawɛɛ kikɛ nɛ ɔ. A ma bi mo ke mɛni tɔmi a tɔ Yawɛ, a Mawu ɔ nɔ, nɛ mɛni yayami po a pee kɛ si lɛ.

¹¹ Ke a bi mo ja a, de mɛ ke, Yawɛ ke, ‘Nyɛ nɛmɛ ɔmɛ je ye se nɛ a ya ja mawu kpahi, nɛ a sɔmɔ mɛ. A kua mi, nɛ ye mlaa amɛ hu a yi nɔ.

¹² Se nyɛɛ lɛɛ nyɛ nɔ́ pa pe nyɛ nɛmɛ ɔmɛ a nɔ́ ɔ po. Nyɛ tsuo pɛpɛɛpɛ nyɛ tue wa; nyɛ peeɔ yayami bɔ nɛ nyɛ suɔ, nɛ nyɛ bui mi fɛɛ.

¹³ Enɛ ɔ he je ɔ, ma fie nyɛ kɛ je zugba nɛ ɔ nɔ kɛ ya zugba nɛ nyɛ, loo nyɛ nɛmɛ ɔmɛ po li nɔ. Nyɛ ma ya sɔmɔ mawu kpahi ngɛ lejɛ ɔ nyɔ kɛ pia, nɛ i be nyɛ mɔbɔ nae.’ ”

Nihi nɛ a nuu kɛ ho ɔ maa kpale kɛ ba

¹⁴ Yawɛ ke, “Be ma nɛ nihi kɛ ye biɛ be kita kae hu kaa Mawu hɛ kalɔ ɔ nɛ jé Israel ma a kɛ je Egipt zugba a nɔ.

¹⁵ Mohu ɔ, a kɛ ye biɛ ma ka kita kaa Mawu hɛ kalɔ ɔ nɛ kpale Israel bi ɔmɛ nɛ a gbɛ fĩa a kɛ je omleyi je zugba kpahi a nɔ kɛ ba we ekohu. Lejɛ ɔmɛ ji hehi nɛ i fie mɛ kɛ ho ɔ nɛ. Ma ngɔ mɛ kɛ ba mɛ nitsɛmɛ a zugba a nɛ i ha a nɛmɛ ɔmɛ ɔ nɔ ekohu. Imi, Yawɛ le i de.”

Tue gblami maa ba

¹⁶ Yawɛ ke “Ma tsɔ hɛli babauu kɛ ba nɛ a ba hɛ nimli nɛ ɔmɛ kaa a hɛɛ lo. Lɔ ɔ se ɔ, ma tsɔ de dali babauu kɛ ba nɛ a ba da mɛ kaa a daa lohwe de ngɛ yo tsuaa yo, kɛ yoku tsuaa yoku nɔ, kɛ tɛ puɔ tsuaa tɛ puɔ mi ngɛ tɛ sa amɛ a nɔ.

¹⁷ Nɔ́ tsuaa nɔ́ nɛ a ngɛ pee ɔ, i ngɛ hyɛe. Nɔ́ ko nɔ́ ko be nɛ a ngɛ pee nɛ i nɛ; a ní yayami ɔmɛ fɔɔ si ngɛ ye hɛ mi.

¹⁸ Ma gbla a tue si enyɔ ngɛ a yayami ɔmɛ, kɛ a yi wu tso ní ɔmɛ a he. A ngɔ amagahi nɛ ngɛ kaa ni gbogboehi nɛ wami ko be a mi ɔ kɛ ble ye zugba a; nɛ zugba a hyi tɔ kɛ a níhi nɛ a hiee ɔ.”

Yeremia fa kue ha Yawɛ

¹⁹ Yawɛ mo ji ye he bulɔ; mo lɛ o haa mi he wami. Ke haomi ba ye nɔ hu, mo ji nɔ nɛ piɛɔ ye he. Je mahi maa je je mi nyagbe he ɔmɛ kɛ ba o ngɔ, nɛ a ma ba de mo ke, “Gbosi ní nɛ wa nɛmɛ ɔmɛ na pɛ ji lakpa mawuhi, kɛ amagahi nɛ se nami ko be a he.

²⁰ Anɛ nɔmlɔ ma nyɛ maa pee mawuhi ha lɛ nitsɛ e he lo? Dɛbi! Ke e bɔ mɔde kaa mɛni po, mawu nitsɛnitsɛhi lɛɛ e be nyɛe maa pee.”

²¹ Yawɛ ke, “Lɔ ɔ he ɔ, jehanɛ lɛɛ ma ha nɛ je ma amɛ maa na ye he wami kɛ ye kɔni si wami; a maa na kaa imi ji Yawɛ.”