Yeremia 15 - BAIBLO ALOO NGMAMI KLƆUKLƆU Ɔ

Haomi maa ba Yuda ma a nɔ

¹ Kɛkɛ nɛ Yawɛ de mi ke, “Ke Mose kɛ Samuel ba da ye hɛ mi nɛ a fa kue ha mi tete po, i be nimli nɛ ɔmɛ mɔbɔ nae. Fie mɛ kɛ je ye hɛ mi hiɛmɛ nɛ ɔ nɛ a ho.

² Ke a bi mo ke jije a maa ya a, de mɛ ke bɔ nɛ imi Yawɛ, i de ji nɛ ɔ nɛ: Nihi nɛ hiɔ maa gbe ɔ, ha nɛ hiɔ nɛ gbe mɛ! Ni nɛmɛ nɛ maa nɔ ta a, ha nɛ a nɔ ta! Nihi nɛ hwɔ maa gbe ɔ ha nɛ hwɔ nɛ gbe mɛ! Ni nɛmɛ hu nɛ a maa nuu nyɔguɛ ɔ, ha nɛ a nuu mɛ nyɔguɛ kɛ ho!

³ Imi Yawɛ, i to kaa haomihi nɛ a nya wa eywiɛ maa ba a nɔ; ni komɛ ma gbo ngɛ ta mi; gbehi ma tsɔtslɔɔ ni komɛ; lohwe pɛlitsɛmɛ maa ye ni komɛ, nɛ ni komɛ lɛɛ pu mi lohwehi maa ye mɛ.

⁴ Nɔ́ nɛ Yuda matsɛ, Manase, Hezekia bi ɔ pee benɛ e ngɛ tsɛ yee ngɛ Yerusalem he je ɔ, ma gbla a tue wawɛɛ nitsɛ, nɛ nɔ́ nɛ ɔ ma ha nɛ je ma amɛ tsuo maa ye gbeye.”

⁵ Yawɛ ke, “Yerusalem bi, mɛnɔ maa na nyɛ mɔbɔ, aloo mɛnɔ maa ye nyɛ kɔmɔ? Mɛnɔ ma gba nɛ e ba bi si ke kɛ nyɛ ngɛ kɛɛ lo?

⁶ Nyɛ kua mi; nyɛ plɛ nyɛ se kɛ wo mi. Enɛ ɔ he je ɔ, imi hu i wo ye nine nɔ ngɛ nyɛ nɔ, nɛ i kpata nyɛ hɛ mi. Ejakaa bɔ nɛ i ngɔɔ nyɛ he kɛ kee nyɛ daa nɛ ɔ, pɔ ba tɔ mi jehanɛ.

⁷ I ngɔ nɔ́ mi sami nɔ́ kɛ sa nyɛ mi ngɛ ma amɛ tsuo a mi ngɛ zugba a nɔ. I kpata nyɛ, ye ma a hɛ mi; i gbe nyɛ bimɛ ɔmɛ, ejakaa nyɛ kpa we nyɛ ní yayami ɔmɛ peemi.

⁸ I ha nɛ yalɔyihi a he hiɛ babauu ngɛ nyɛ zugba a nɔ pe wo nya zia. I gbe nyɛ nihewi ɔmɛ ngɛ a nihe mi, nɛ i ha nɛ a nyɛmɛ ɔmɛ na nɔ́. I ha nɛ haomi nɛ nya wa, kɛ ní gbeyegbeyehi ba a nɔ tlukaa.

⁹ Bimɛ kpaago a nyɛ ɔ hɛli; nɔ́ nɔ e nɔ, ejakaa e bimɛ ɔmɛ tsuo a yi ta. Piani be mi ɔ, lɛɛ e pu ɔ nɔ si momo, nɛ diblii kpatu wo; a pue e hɛ mi si, nɛ a bɔ lɛ ahlua. Ma ha nɛ nyɛ he nyɛli ɔmɛ maa gbe nyɛ ni nɛmɛ nɛ nyɛ hɛ ngɛ kɛ mwɔɔ ɔ. Imi, Yawɛ lɛ i de.”

Yeremia ngɔ e nidɔ ní kɛ fɔ Yawɛ hɛ mi

¹⁰ Akuanyɛ! Imi nɔmlɔ ɔ, i be bua jɔmi ko bua jɔmi ko kulaa! Mɛni he je ye nyɛ fɔ mi kɛ ba je nɛ ɔ mi kulaa? Nɔ tsuaa nɔ kɛ mi ngɛ nya sãe, nɛ nɔ tsuaa nɔ kɛ mi ngɛ pɛe ngɛ zugba a nɔ. I pɛ sika ha we nɔ ko, nɛ i pɛ sika ngɛ nɔ ko dɛ hulɔ; se kɛ̃ ɔ, nɔ tsuaa nɔ ngɛ mi gbiɛe.

¹¹ Yawɛ, ha nɛ a gbiɛ mi! Anɛ i sɔmɔ we mo saminya lo? Anɛ i fa we kue ha mo ngɛ ye he nyɛli nɛ ɔmɛ a he, benɛ a ngɛ haomi kɛ fimi mi lo?

¹² Nɔ ko nɔ ko be nyɛe maa ku dade mi. Omleyi je dade nɛ a kɛ akɔblee futu mi ɔ, mɛnɔ ma nyɛ maa ku?

¹³ Yawɛ de mi ke, “Yayami nɛ ye ma a pee ngɛ zugba a tsuo nɔ he je ɔ, ma ha nɛ he nyɛli ma ba ha a ní, kɛ a juetli kɛ je.

¹⁴ Ma ha nɛ a ma sɔmɔ a he nyɛli ɔmɛ ngɛ zugba ko nɛ a li nɔ; ejakaa ye mi mi fumi ɔ ngɛ kaa la nɛ a slɛ, nɛ maa tso daa nɛ.”

¹⁵ Kɛkɛ nɛ i de ke, “Yawɛ, o le kaa o he lɛ i ngɛ nɔ́ nae ngɛ. O le kaa o he lɛ a ngɛ mi jɛe ngɛ. Kai mi nɛ o piɛ ye he. Nihi nɛ ngɛ mi yi mi wae ɔ, gbla a tue ha mi. Koo to o tsui si ha mɛ nɛ a ba ná ye he blɔ nɛ a gbe mi.

¹⁶ O kɛ mi tu munyu, nɛ i nu nɔ́ tsuaa nɔ́ nɛ o de mi ɔ fitsofitso. Yawɛ Tabohiatsɛ Mawu, o nɔ́ ji mi, nɛ enɛ ɔ he je ɔ, o munyu ɔ ha nɛ i na bua jɔmi kɛ be nɔ.

¹⁷ I ya piɛ we nihi nɛ ngɛ mle yee ɔ a he; i kɛ mɛ muɛ, nɛ i kɛ mɛ nya we. Se imi nɔ kake too i hi si kaa bɔ nɛ o fa mi ke ma pee ɔ; ejakaa o ha nɛ ye mi mi fu wawɛɛ nitsɛ.

¹⁸ Mɛni he je i ngɛ nɔ́ nae kɛ mwɔɔ? Mɛni he je ye pa amɛ be tsa ba a? Mɛni he je a gbo we ɔ? Anɛ o ngɛ hlae nɛ o sisi mi kaa pa nɛ gbli latsa be mi lo?”

¹⁹ Yawɛ he nɔ ke, “Ke o kpale kɛ ba a, i kɛ o blɔ he ɔ ma ha mo, nɛ o ma ba pee ye tsɔlɔ ekohu. Ke o maa fiɛ fiɛmi kpakpa, nɛ o be munyu gu tue ɔ, lɛɛ o maa pee ye gbalɔ ekohu. Ma a maa kpale kɛ ba o ngɔ, nɛ e be hiae kaa moo o ya a ngɔ.

²⁰ Ma ha nɛ o maa pee kaa akɔblee gbogbo nɛ he wa ngɛ a hɛ mi; a kɛ mo maa hwu ta, se a be mo nyɛe. I kɛ mo maa hi si; ma bu o he, nɛ ma he o yi wami.

²¹ Ma je mo kɛ je yiwutsotsɛmɛ, kɛ nimli yayamihi a dɛ mi. Imi, Yawɛ lɛ i de.”