Yeremia 14 - BAIBLO ALOO NGMAMI KLƆUKLƆU ƆNyu hwɔ nɛ nya wa a 1 Sɛ gbi nɛ Yawɛ ha mi nɛ kɔɔ nyu hwɔ ɔ he ji nɛ ɔ nɛ: 2 “Yuda ngɛ kɔmɔ yee; Yuda ma amɛ ngɛ gboe; ma mi bi ɔmɛ hwɔɔ si ngɛ zugba mɔbɔmɔbɔ, nɛ bubuubui ngɛ pɛe ngɛ Yerusalem. 3 Odehe ɔmɛ tsɔɔ ke a ya yɛ nyu kɛ ba, se ke tsɔli ɔmɛ ya su vu ɔmɛ a he ɔ, a nɛ nyu, nɛ a kpaleɔ buɛ mi gu kɛ baa. Ke a hɛ mi pue si kikɛ nɛ ɔ, a kɛ nɔ́ haa a hɛ mi kɛ tsiɔ zo. 4 Akɛnɛ hiɔmi nɛ́, nɛ zugba a gbli keketee he je ɔ, ngmɔ huli ɔmɛ kɛ nɔ́ haa a hɛ mi kɛ tsiɔ zo. 5 Odabɔ tete po fɔɔ nɛ e jeɔ e bi he ngɛ nga nɔ, ejakaa nga ko nga ko be lejɛ ɔ. 6 Nga mi gbe ɔmɛ ya kuɔɔ yoku kpataa amɛ nɛ a hii kɔɔhiɔ mi fue kaa bɔ nɛ ogbeteehi peeɔ ɔ, hluu kɛ ya siɔ a hɛngmɛhi a nɔ peeɔ tsuu, ejakaa niye ní be a dɛ. 7 Ye ma a fa kue ha mi ke, ‘Yawɛ, wa he yayami ɔmɛ ngɛ odase yee kɛ ngɛ wɔ sie lɛɛ, se kɛ̃, moo piɛ wa he kaa bɔ nɛ o wo si ɔ. Wa tsɔ o hɛ mi atuã be babauu; wa pee yayami kɛ si mo. 8 Mo pɛ o nɔ Israel ngɔɔ e hɛ ngɔ fɔɔ; mo lɛ o jeɔ wɔ kɛ jeɔ amanehlu mi. Mɛni he je o pee kaa nubwɔ ngɛ zugba a nɔ, kaa blɔ nyɛɛlɔ nɛ gba ba to nubwɔ ligbi kake kɛkɛ? 9 Mɛni he je o pee kaa nyumu nɛ nɔ́ ko ti lɛ si tlukaa, loo katsɛ nɛ nyɛ we nɔ yi wami nɛ e he ɔ? Yawɛ, niinɛ o kɛ wɔ ngɛ! O ma ji wɔ; ko kua wɔ.’ ” 10 Bɔ nɛ Yawɛ ngɛ dee ngɛ nimli nɛ ɔmɛ a he ji nɛ ɔ nɛ: “A suɔ kaa a maa je ye blɔ ɔmɛ a nɔ kɛ ya kpa ngɛ he nɛ a suɔ. Enɛ ɔ he je ɔ, i sume mɛ. Ma kai yayamihi nɛ a pee ɔ, nɛ ma gbla a tue.” 11 Yawɛ de mi ke, “Koo fa kue ha mi ke ma pee ma nɛ ɔ kpakpa. 12 Ke a ha hwɔ tete po, i be a kue fami ɔ tue bue; nɛ ke a sã sami bɔ, kɛ niye ní bɔ ha mi hu, i be hee. Se mohu ɔ, níhi nɛ i kɛ ma kpata a hɛ mi ji ta, hwɔ, kɛ gbenɔ hiɔ.” 13 Kɛkɛ nɛ i de ke, “Nyɔmtsɛ Yawɛ! Mo nitsɛ o le kaa gbali ɔmɛ deɔ ma a ke ta, loo hwɔ be bae, ejakaa o wo si veveeve kaa tue mi jɔmi pɛ lɛ maa hi zugba a nɔ.” 14 Se Yawɛ he nɔ ke, “Lakpa gbami gbali ɔmɛ ngɛ gbae ngɛ ye biɛ mi ɔ nɛ; i tsɔ we mɛ, i fa we mɛ, nɛ i kɛ mɛ tu we munyu ko hulɔ. Ninahi nɛ a ngɛ a he munyu tue ɔ, pi ye ngɔ nɛ a je; klaami nɛ a ngɛ klaae ɔ, yakayaka níhi nɛ mɛ nitsɛmɛ a susu ji lɔ ɔmɛ. 15 Lɔ ɔ he ɔ, jamɛ a gbali ɔmɛ nɛ i tsɔ we mɛ, nɛ a kɛ ye biɛ ngɛ munyu tue, nɛ a ngɛ dee ke ta, loo hwɔ be zugba nɛ ɔ nɔ bae ɔ, bɔ nɛ i ngɛ dee ngɛ a he ji, i kɛ ta, kɛ hwɔ ma kpata a hɛ mi. 16 Ni nɛmɛ nɛ a gba ní nɛ ɔmɛ ha a hu a hɛ mi ma kpata kikɛ nɛ ɔ nɔuu. A ma sake a gbogboe ɔmɛ ngɔ pue Yerusalem gbɛjegbɛ ɔmɛ a nɔ, nɛ a be nɔ ko nɔ ko nae nɛ maa pu mɛ. Nɔ́ nɛ ɔ maa ba mɛ nitsɛmɛ kɛ a yi ɔmɛ, a binyumu ɔmɛ, kɛ a biyi ɔmɛ tsuo a nɔ. Ma wo mɛ hiɔ ngɛ a ní yayami ɔmɛ a he.” 17 Yawɛ fa mi ke ma de ma a ke, “Ye hɛngmɛ nɛ tɔ nyu nyɔ kɛ pia daa nɛ ɔ nɛ ma ko kpa ya fomi gblegbleegble. Ejakaa a fia ye ma mi bi ɔmɛ ní kɛ pue si nɛ a plaa wawɛɛ nitsɛ. 18 Ke i je kpo kɛ ya nga nɔ ɔ, i naa nihi nɛ a gbe mɛ ngɛ ta mi ngɔ pue si. Ke i ya ma amɛ a mi hu i naa nihi nɛ hwɔ gbe mɛ ngɔ pue si. Se gbali ɔmɛ, kɛ osɔfo ɔmɛ lɛɛ kpami kɛkɛ a hii kpae ngɛ zugba nɛ a li nɔ.” Ma a fa kue ha Yawɛ 19 Yawɛ, anɛ o kua Yuda kulaa lo? Anɛ o ngɛ Zion bi ɔmɛ hiee lo? Mɛni he je mɔ lɛ o plaa wɔ kikɛ nɛ ɔ nɛ e hi tsami ɔ? Wa hyɛ blɔ kaa tue mi jɔmi maa ba, se nɔ́ kpakpa ko ji mi kɛ bɛ; wa hyɛ blɔ kaa be maa ba nɛ a ma tsa wɔ, se haomi kɛ gbeye sɔuu lɛ bɔle wɔ. 20 Yawɛ, wa ngɛ jajee ke wa pee yayami kɛ si mo, nɛ wa nɛmɛ ɔmɛ hu pee yayami kɛ si mo. 21 Kai o siwo ɔmɛ, nɛ o ko kua wɔ. Ko ha nɛ Yerusalem hɛ mi nɛ pue si. Lejɛ ɔ o sɛ saminyayoo ɔ ngɛ. Somi nɛ o kɛ wɔ so ɔ, koo po mi. 22 Je ma amɛ a we amaga amɛ ekoeko be nɛ ma ha nɛ hiɔmi maa nɛ ha wɔ; hiɔwe tete po be nyɛe ma ha nɛ hiɔmi maa nɛ. Yawɛ, wa Mawu, o nɔ wa ngɔ wa hɛ kɛ fɔ, ejakaa mo lɛ o peeɔ ní nɛ ɔmɛ tsuo. |
Bible in Dangme © Bible Society of Ghana, 2018.
Bible Society of Ghana