Yeremia 13 - BAIBLO ALOO NGMAMI KLƆUKLƆU Ɔ

Kploba bɔjuɛ ɔ

¹ Yawɛ de mi ke ma ya he kploba bɔjuɛ nɛ ma tsɛ̃, se ma ko ngɔ kɛ wo nyu mi.

² I ya he bɔjuɛ ɔ nɛ i tsɛ̃ kaa bɔ nɛ Yawɛ de ɔ.

³ Yawɛ kɛ mi tu munyu si enyɔne, nɛ e de ke,

⁴ “Ngɔɔ bɔjuɛ nɛ o ya he, nɛ ngɛ o mlɛ mi ɔ kɛ ya Yufrate pa a nya, nɛ o kɛ ya laa ngɛ tɛ sa amɛ a kpɛ ngɛ lejɛ ɔ.”

⁵ Nɛ i ngɔ bɔjuɛ ɔ ya laa ngɛ Yufrate pa a kasa nya kaa bɔ nɛ Yawɛ fa mi ɔ.

⁶ Be saii se ɔ, Yawɛ de mi ke ma kpale kɛ ya Yufrate pa a nya, nɛ ma ya ngɔ bɔjuɛ ɔ kɛ ba.

⁷ Kɛkɛ nɛ i kpale kɛ ho Yufrate pa a nya ya, nɛ i ya tsua bɔjuɛ ɔ kɛ je puɔ ɔ mi he nɛ i ngɔ ya laa ngɛ ɔ. Se i na kaa bɔjuɛ ɔ puɛ; e hí kɛ ha nɔ́ ko nɔ́ ko peemi hu.

⁸ Yawɛ kɛ mi tu munyu ekohu ke,

⁹ “Yuda he nɔ womi, kɛ Yerusalem he nɔ womi babauu ɔ, bɔ nɛ nyagbe ɔ maa ba ha ji nɛ ɔ nɛ.

¹⁰ Nimli yiwutsotsɛmɛ nɛ ɔmɛ kua mi tue bumi. A wa tue, nɛ a pee nɔ́ nɛ a suɔ; a ya ja mawu kpahi, nɛ a sɔmɔ mɛ. Enɛ ɔmɛ a he je ɔ, ma ha nɛ a maa pee kaa bɔjuɛ nɛ ɔ nɛ he be se nami ko hu ɔ.

¹¹ Kaa bɔ nɛ bɔjuɛ mɛtɛɛ nɔ mlɛ mi kpɛii ɔ, ja i to nɛ Israel ma a, kɛ Yuda ma a tsuo nɛ a mɛtɛ ye he. I pee nɔ́ nɛ ɔ, konɛ a pee ye ma, nɛ a na biɛ, hɛ mi nyami, kɛ yi jemi kɛ ha mi. Se a bui mi fɛɛ.”

Wai tɔ ɔ

¹² Yawɛ de mi ke, “Yeremia, de ma a ke imi Yawɛ, Israel Mawu ɔ ke a wo wai tɔ tsuaa wai tɔ mi wai nɛ e hyi. Ke o de mɛ ja a, a ma bi mo ke, ‘Anɛ wa li kaa e sa kaa a wo wai tɔ tsuaa wai tɔ mi wai nɛ e hyi lo?’

¹³ Jehanɛ, de mɛ ke imi Yawɛ, ma ha nihi tsuo nɛ ngɛ zugba nɛ ɔ nɔ, matsɛmɛ ɔmɛ nɛ ji David nina a, osɔfo ɔmɛ, gbali ɔmɛ, kɛ Yerusalem bi ɔmɛ tsuo dã nɛ a nu kɛ yaa si a maa de kpɔtɔɔ.

¹⁴ Lɔ ɔ se ɔ, ma nuu tsɛmɛ kɛ bimɛ ngɔ fia a sibi, nɛ a ma gbo ngɔ pue si kaa tɔ nɛ ywia. Ma kpata a hɛ mi; ye tsui mi be mi sãe ngɛ a he, nɛ i be mɛ mɔbɔ nae.”

Yeremia bɔ ma a kɔkɔ ngɛ he nɔ womi he

¹⁵ Israel ma, Yawɛ tu munyu! Nyɛɛ ba nyɛ he si, nɛ nyɛɛ bu lɛ tue.

¹⁶ Nyɛɛ wo Yawɛ, nyɛ Mawu ɔ hɛ mi nyami be mi nɛ e ha we nɛ diblii nɛ wo nyɛ nɛ nyɛ ba tɛ si ngɛ yoku ɔmɛ a nɔ, be mi nɛ e ha we nɛ la nɛ nyɛ ngɛ blɔ hyɛe ɔ nɛ plɛ pee diblii kpii.

¹⁷ Se ke nyɛ bui tue kɛ mwɔɔ ɔ, lɛɛ ma fo ya ngɛ laami mi ngɛ nyɛ he nɔ womi ɔ he. Ma fo ya hluu kɛ yaa si ye hɛngmɛ maa tɔ nyu, ejakaa a nuu Yawɛ ma mi bi ɔmɛ nyɔguɛ kɛ je.

¹⁸ Yawɛ de mi ke, “De matsɛ ɔ kɛ e nyɛ ɔ ke, a ba a he si, ejakaa a jlasi saminyawiiwi ɔmɛ je a yi nɔ si.

¹⁹ A sa Yuda leneyi je ma amɛ a yi; nɔ ko nɔ ko be nɛ maa je ngmlaa ha mɛ. A nuu Yuda bi ɔmɛ tsuo nyɔguɛ kɛ ho.”

²⁰ Yerusalem, hyɛ! O he nyɛli ɔmɛ je omleyi je kɛ ma. O nimli kpakpa amɛ nɛ a ha mo ke o hyɛ a nɔ ɔ, jije a ngɛ?

²¹ Nihi nɛ mo nitsɛ o tsɔse mɛ nɛ o kɛ mɛ ngɛ kaa huɛmɛ ɔ, ke a wo mɛ nɔkɔtɔma ngɛ o nɔ ɔ, kɛ o ma de kɛɛ? Anɛ o he mi be mo kɔɔe kaa yo nɛ nu kɔɔmi nɛ e miɔ nɛ e ma fɔ lo?

²² Ke o bi o he ke, “Mɛni he je ní nɛ ɔmɛ tsuo ba ye nɔ” ɔ, heto ɔ ji, o he yayami babauu ɔ he je nɛ he nyɛli ba pee mo kikɛ nɛ ɔ kaa yo nɛ nyumu kpa e he bo, nɛ e bɔ lɛ ahlua a nɛ.

²³ Anɛ nɔmlɔ yumu ma nyɛ ma tsake e he womi su ɔ lo? Anɛ ngatsɛ ma nyɛ ma tsake e he huatahuata a lo? Ke e maa hi peemi ja a, lɛɛ nyɛ nɛ yayami peemi pee nyɛ he nɔ́ nɛ ɔ, nyɛ hu nyɛ ma nyɛ maa pee kpakpa.

²⁴ Yawɛ maa gbɛ nyɛ ngɔ fĩa kaa tsakati nɛ ahlabata kɔɔhiɔ muɔ kɛ yaa.

²⁵ Yawɛ de to ke nɔ́ nɛ maa ba nyɛ nɔ ji nɛ ɔ nɛ. Bɔ nɛ e to nɛ e maa pee nyɛ ji nɛ ɔ nɛ, ejakaa nyɛ hɛ je e nɔ nɛ nyɛ ngɔ nyɛ hɛ ya fɔ lakpa níhi a nɔ.

²⁶ Yawɛ nitsɛ ma kpa nyɛ he bo, nɛ nyɛ we ahlua maa je kpo.

²⁷ Yawɛ na nyɛ nɛ nyɛ ngɛ níhi nɛ e sume pee. E na nyɛ nɛ nyɛ ya ngɛ mawu kpahi a se nyɛɛe ngɛ nga nɔ kɛ yokuhi a nɔ. E na nyɛ nɛ nyɛ ngɛ huhui kpae kaa okpɔngɔ kuhi kɛ okpɔngɔ yihi nɛ ngɛ bɔe. Yerusalem bi, musu tloo nyɛ! Mɛni be po nyɛ he ma tsɔ?