Yeremia 10 - BAIBLO ALOO NGMAMI KLƆUKLƆU Ɔ

Amaga jami kɛ Mawu nitsɛnitsɛ jami

¹ Nyɛ Israel ma, nyɛɛ bu sɛ gbi nɛ Yawɛ kɛ ngɛ nyɛ hae ɔ tue!

² Yawɛ ke, “Nyɛ ko ya nyɛɛ je ma kpa amɛ a blɔ ɔmɛ a nɔ; ke nyɛ na okadihi ngɛ hiɔwe ɔ, nyɛ ko ye mɛ gbeye kaa bɔ nɛ je ma kpa amɛ yeɔ gbeye ɔ.

³ Je ma amɛ a kusumi ɔmɛ ɔ, lakpa sɔuu. A ya poɔ tso ngɛ pu mi, nɛ tso kpɛ́lɔ kɛ dade tsuɔ he ní,

⁴ nɛ a kɛ sika hiɔ kɛ sika tsu haa he. A kaa plɛɛko kɛ woɔ tso ɔ mi nɛ a kɛ nuu tso ɔ ngɔ daa si konɛ e ko nɔ si.

⁵ Amaga amɛ ngɛ kaa lohwehi a he gbeye womi níhi nɛ maa si ngɛ jamatlɛ ngmɔ mi; a tu we munyu. A nyɛɛ we hulɔ; pe a woɔ a nɔ kɛ jeɔ he kake kɛ yaa he kake. Nyɛ ko ye mɛ gbeye, ejakaa a be nyɛe maa pee nyɛ yayami ko; kpakpa ko hu a be nyɛe maa pee ha nyɛ.”

⁶ Yawɛ, nɔ ko nɔ ko be nɛ kɛ mo sɔ; O je agbo, nɛ o biɛ hu kle nɛ e je agbo ja nɔuu.

⁷ Mo, je ma amɛ tsuo a matsɛ ɔ, mɛnɔ lɛ be mo gbeye yee? O sa bu. Je ma amɛ tsuo a kpɛti ɔ, nɔ ko be nɛ kɛ mo sɔ, a ní leli ɔmɛ jio, a matsɛmɛ ɔmɛ jio.

⁸ Mɛ tsuo pɛpɛɛpɛ a biɛ, nɛ a jeɔ kuasia. Amagahi nɛ a kɛ tso pee ɔ, mɛni a ma nyɛ maa kase kɛ je a dɛ?

⁹ A kɛ sika hiɔ nɛ a si nɔ jeɔ Spania, nɛ a kɛ sika tsu hu jeɔ Ufaz kɛ ba haa sika ga ní tsuli, nɛ a kɛ peeɔ amagahi. A buɔ amaga amɛ bo hiɔ, kɛ bo he jua wawɛ nɛ hɛɛ alamua tu su nɛ bo loli kpakpahi lo.

¹⁰ Se mo Yawɛ, Mawu nitsɛnitsɛ ji mo; mo ji Mawu hɛ kalɔ ɔ nɛ; neneene matsɛ ji mo. Ke o mi mi fu ɔ, zugba mimiɛɔ, nɛ je ma amɛ nyɛ we nya dami.

¹¹ Nyɛ de mɛ ke, jamɛ a mawu ɔmɛ nɛ a ngɛ jae, nɛ pohu pi mɛ nɛ a pee hiɔwe kɛ zugba a, a hɛ mi ma kpata. A be mɛ nae ngɛ je ɔ mi he ko he ko hu.

Mawu yi jemi la

¹² Yawɛ lɛ bɔ je ɔ ngɛ e he wami nya. Nile lɛ e kɛ bɔ je ɔ, nɛ jamɛ a nile ɔ nɔuu e kɛ bli hiɔwe mi.

¹³ Ke e wo gbi kikɛ nɛ ɔ, nyu nɛ ngɛ hiɔwe ɔ keɔ wawɛɛ nitsɛ; Yawɛ lɛ haa afua teɔ si kɛ jeɔ zugba a nyagbe he ɔmɛ. E haa oslabai gbaa be mi nɛ hiɔmi ngɛ nɛe, nɛ e jeɔ kɔɔhiɔ kpo kɛ jeɔ e nito he ɔ.

¹⁴ Nimli adesahi tsuo biɛ; a li nɔ́ ko nɔ́ ko. Sika gali a hɛ mi pue si pɛ; ejakaa amaga amɛ nɛ a puɛɛ ɔ, ní guhi ji mɛ; wami ko wami ko be a mi.

¹⁵ Amaga amɛ ɔ, se nami ko be a he, muɔ ní kɛkɛ ji mɛ. Be mi nɛ Yawɛ ma ba gbla ma a tue ɔ, a we amaga amɛ hu a maa ku mɛ dukuduku.

¹⁶ Yakob Mawu ɔ be kaa mɛ; lɛ ji nɔ nɛ pee nɔ́ tsuaa nɔ́, nɛ e hla Israel kɛ pee lɛ nitsɛ e ma. E biɛ ji Yawɛ Tabohiatsɛ.

A ma ba nuu ni ɔmɛ nyɔguɛ

¹⁷ Yerusalem bi, a sa nyɛ ma a yi oo! Nyɛ bua nyɛ níhi a nya.

¹⁸ Yawɛ ke, “Jehanɛ lɛɛ ma sake nimli ɔmɛ nɛ ngɛ zugba nɛ ɔ nɔ ɔ ngɔ fɔ he kaa bɔ nɛ a fɔɔ tɛ ɔ. Ma hao mɛ kɛ yaa si a maa nu he.”

¹⁹ Yerusalem bi ɔmɛ kpa bubuubui ke, “Akuanyɛ! Wa plaa pɛ! Wa pa a be tsa ba. Se wa susu kaa wa ma nyɛ ma mia wa hɛ mi kɛ to nɔ.

²⁰ Wa bo tsu ɔmɛ puɛ; kpahi nɛ fi mɛ ɔ tsɔ. Wa bimɛ ɔmɛ tsuo je wa he; nɔ ko nɔ ko be nɛ maa ngɔ wa bo tsu ɔmɛ kɛ ma si ekohu ha wɔ; nɔ ko nɔ ko be nɛ maa ngɔ bo ɔmɛ kɛ kpla bo tsu ɔmɛ a he ekohu.”

²¹ I he nɔ ke, “Wa nɔ yeli ɔmɛ be juɛmi; a bi we Yawɛ ga womi. Enɛ ɔ he je ɔ, a yɛ́ nɔ; nɛ wa ma mi bi ɔmɛ tsuo gbɛ fĩa.

²² Nyɛɛ bu tue! Sɛ gbi ko ma! Ose ko ngɛ pɛe kɛ je omleyi je zugba a nɔ kɛ ma. Ta nguaa ko ma nɛ e ba kpata Yuda ma amɛ a hɛ mi, nɛ ma amɛ maa pee kaa nga mi gbehi a hi he.”

²³ Yawɛ, i le kaa nɔmlɔ adesa ko be he wami ngɛ lɛ nitsɛ e wami nɔ. Pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.

²⁴ Yawɛ, mo ka o ma a hɛ mi; ka wa hɛ mi bɔ pɛ nɛ sa kɛkɛ. Koo ngɔ abofu kɛ gbla wa tue; ke o pee ja a, wa hɛ mi ma kpata.

²⁵ Je ma amɛ nɛ li mo ɔ, o mi mi nɛ fu mɛ; ni nɛmɛ nɛ ja we mo ɔ, gbla a tue. A gbe o ma mi bi nɛ ji Yakob nina a; a kpata wa hɛ mi pɛsɛpɛsɛ, nɛ a pee wa zugba a kaa nga kplanaa nɔ.