Yeremia 1 - BAIBLO ALOO NGMAMI KLƆUKLƆU Ɔ

¹ Yeremia, Hilkia binyumu ɔ munyuhi ji nɛ ɔmɛ nɛ. Osɔfohi nɛ hi Anatot ngɛ Benyamin zugba a nɔ ɔ, a ti nɔ kake ji Hilkia.

² Yuda matsɛ Yosia, Amon binyumu ɔ yi nɔ jeha nyɔngma kɛ etɛne ɔ mi ɔ, Yawɛ kɛ Yeremia tu munyu.

³ E kɛ lɛ tu munyu ekohu be mi nɛ Yehoyakim, Yosia binyumu ɔ ngɛ matsɛ yee ngɛ Yuda ma a nɔ. Lɔ ɔ se ɔ, Yawɛ kɛ Yeremia tu munyu nɔtonɔto hluu kɛ ya si Yuda matsɛ Zedekia, Yosia binyumu ɔ yi nɔ jeha nɛ ji nyɔngma kɛ kake ɔ nyagbe. Jamɛ a jeha a we nyɔhiɔ enuɔne ɔ mi ɔ, a ba nuu Yerusalem ma mi bi ɔmɛ nyɔguɛ kɛ ho.

Yawɛ tsɛ Yeremia

⁴ Yawɛ de mi ke,

⁵ “Loko i puɛ mo kɛ wo muklii mi ɔ, jamɛ a be ɔ mi ɔ, i le mo momo. Benɛ a na we nɛ a fɔ mo ɔ, jamɛ a be ɔ mi ɔ, i hla mo ngɔ to momo nɛ́ o ba gba kɛ tsɔɔ je ma amɛ.”

⁶ I he nɔ ke, “Ao, Nyɔmtsɛ Yawɛ! I li munyu tumi; niheyo kɛkɛ ji mi.”

⁷ Se Yawɛ de mi ke, “Ko de ke niheyo kɛkɛ ji mo. Nihi tsuo a ngɔ nɛ ma tsɔ mo ɔ, yaa; nɛ nɔ́ tsuaa nɔ́ nɛ ma fa mo ke o de ɔ, de.

⁸ Koo ye mɛ gbeye, ejakaa i kɛ mo ngɛ, nɛ ma bu o he. Imi, Yawɛ lɛ i de.”

⁹ Kɛkɛ nɛ Yawɛ juale e nine, nɛ e ta ye nya he, nɛ e de mi ke, “Hyɛ, ye munyu nɛ i ngɔ ha mo ji nɛ ɔ nɛ.

¹⁰ Mwɔnɛ ligbi nɛ ɔ, i ha mo he wami ngɛ je mahi, kɛ matsɛ yemihi a nɔ; o maa hia, o maa kũɔ, o ma puɛ, o ma kpata hɛ mi, o maa ma, nɛ o ma du.”

Nina enyɔ komɛ

¹¹ Jehanɛ Yawɛ bi mi ke, “Yeremia, mɛni o na?” I he nɔ ke, “I na ngmɛ́ tso kɔni ko.”

¹² Yawɛ de mi ke, “Anɔkuale! O na ngmɛ́ tso kɔni tutuutu niinɛ. I ngɛ hyɛe konɛ ye munyu ɔmɛ nɛ a ba mi.”

¹³ Kɛkɛ nɛ Yawɛ bi mi ekohu ke, “Mɛni hu o pa na?” I he nɔ ke, “I na buɛ ko kɛ e mi nyu nɛ ngɛ fiae kɔtɔkɔtɔ ngɛ omleyi je, nɛ buɛ ɔ nya plɛ kɛ tsɔɔ hiɛmɛ nɛ ɔ je.”

¹⁴ Yawɛ de mi ke, “Niinɛ, amanehlu maa fia kɛ je omleyi je kɛ ba pue zugba nɛ ɔ nɔ bi tsuo a nɔ.

¹⁵ I ngɛ je ma amɛ tsuo nɛ ngɛ omleyi je ɔ kpee kɛ ma Yerusalem. Matsɛ tsuaa matsɛ kɛ e sɛ ma ba ma Yerusalem agbo ɔmɛ a nya, kɛ gbogbo ɔmɛ a he kɛ kpe. A maa pee ja nɔuu ngɛ Yuda ma kpa amɛ hu a mi.

¹⁶ Ma gbla ye ma a tue, ejakaa a pee yayami: a kua mi, a sã bɔ kɛ ha mawu kpahi, nɛ a ja mɛ nitsɛmɛ a nine nya níhi nɛ a pee.

¹⁷ Yeremia, moo mia! Yaa nɛ o ya de mɛ nɔ́ tsuaa nɔ́ nɛ i fa mo ke o de ɔ. Koo ye gbeye; ke pi ja a, ke o ya da a hɛ mi ɔ, ma ha nɛ sawale nɛ nya wa maa nu mo.

^18-19 Yeremia, bu tue! Nɔ tsuaa nɔ nɛ ngɛ zugba nɛ ɔ nɔ ɔ: Yuda matsɛmɛ ɔmɛ, ganɔ ɔmɛ, osɔfo ɔmɛ, kɛ ma mi bi ɔmɛ maa te kɛ wo mo. Se mwɔnɛ ligbi nɛ ɔ, i ngɛ mo he wami hae nɛ o ye a nɔ. I pee mo kaa ma nɛ a fia gbogbo ngɔ wo he, aloo dade titima, aloo gbogbo nɛ a kɛ akɔblee pee. A be mo nyɛe; ejakaa i kɛ mo ngɛ, nɛ ma je mo kɛ je a dɛ mi. Imi, Yawɛ lɛ i de.”