Yakobo 5 - BAIBLO ALOO NGMAMI KLƆUKLƆU Ɔ

A ngɛ niatsɛmɛ kɔkɔ bɔe

¹ Jehanɛ nyɛ niatsɛmɛ hu nyɛɛ bu tue! Nyɛɛ wo yana, nɛ nyɛ nya awe; ejakaa aywilɛho sanehi maa ba nyɛ nɔ!

² Ní babauu nɛ nyɛ na a plɛ pee kɔɔhiɔ, nɛ wɔyewɔye ye nyɛ heha ní kpakpahi.

³ Sika tsu, kɛ sika hiɔ babauu nɛ nyɛ bua nya a maa nɔ kana. Jamɛ a kana a maa ye odase kɛ si nyɛ, nɛ e ma kpe nyɛ he lo kaa nɔ́ nɛ a kɛ la sã. Nyɛ ngɛ juetli babanu buae kɛ ngɛ toe nyagbe be nɛ ɔ mi.

⁴ Apaa yeli nɛ hu nyɛ ngmɔ ɔmɛ ha nyɛ ɔ, nyɛ wui mɛ hiɔ. Nyɛɛ hyɛ bɔ nɛ a ngɛ ngmlaa kpae boboobo ha! Ní kpali nɛ bua nyɛ ngmɔ ní nya a a ngmlaa a ya su Nyɔmtsɛ Tabohiatsɛ ɔ tue mi tɔɔ.

⁵ Nyɛ na ní kpɔtɔɔ, nɛ nyɛ bua jɔ nyɛ he saminya ngɛ je ɔ mi. Ní kpakpahi nɛ nyɛ ye ɔ ha nyɛ wo zɔ saminya kɛ ha ligbi nɛ a ma kpata nyɛ hɛ mi ɔ.

⁶ Nihi nɛ peeɔ nɔ́ nɛ da, se a be he wami nɛ a kɛ ma fa a he ɔ, nyɛ bu mɛ fɔ, nɛ nyɛ gbe mɛ.

Tsui si tomi kɛ sɔlemi

⁷ Ye nyɛmimɛ nɛ i suɔ, e hia kaa nyɛɛ to nyɛ tsui si kɛ ya su be nɛ Nyɔmtsɛ ɔ maa ba. Nyɛɛ hyɛ bɔ nɛ ngmɔ hulɔ toɔ e tsui si, nɛ e mlɛɔ kɛ ya siɔ zugba a baa ní saminya. E toɔ e tsui si, nɛ e mlɛɔ kɛ ya siɔ gbo kɛ gbiɛ nyu nɛɔ pueɔ dumi ní ɔ nɔ.

⁸ Nyɛ hu nyɛɛ to nyɛ tsui si ja. Nyɔmtsɛ ɔ bami nɛ nyɛ ngɛ blɔ hyɛe ɔ, nyɛ lua nyɛ, ejakaa be ɔ na wɔ haa.

⁹ Ye nyɛmimɛ, nyɛ ko pia nyɛ sibi, konɛ Mawu ko kojo nyɛ. Hyɛ, kojolɔ ɔ daa si ngɛ sinya a nya.

¹⁰ Ye nyɛmimɛ, gbali ɔmɛ nɛ fiɛ munyu ɔ ngɛ Nyɔmtsɛ ɔ biɛ mi ɔ to a tsui si wawɛɛ kɛ na amanehlu. Nyɛ ha nɛ a pee nɔ hyɛmi nɔ́ ha nyɛ.

¹¹ Niinɛ, nihi nɛ to a tsui si wawɛɛ ɔ, wa buu mɛ nihi nɛ a gbaa mɛ. Nyɛ nu bɔ nɛ Hiob to e tsui si, nɛ́ nyagbe ɔ, Nyɔmtsɛ ɔ ha e na ní babauu. Nyɔmtsɛ ɔ mi mi jɔ, nɛ e naa mɔbɔ.

¹² Ye nyɛmimɛ nɛ i suɔ, enɛ ɔ tsuo se ɔ, nyɛ ko ka kita. Nyɛ ko ka hiɔwe; nyɛ ko ka zugba, nɛ nyɛ ko ka nɔ́ kpa ko hulɔ. Ke nɔ́ ɔ ngɛ mi anɔkuale ɔ, nyɛ de ke “Ee”; se ke e be mi ɔ, nyɛ de ke, “Dɛbi.” Kɛkɛ ɔ, Mawu be nyɛ fɔ bue.

¹³ Ke amanehlu ba nyɛ ti nɔ ko nɔ ɔ, e sɔle. Ke nyɛ ti nɔ ko bua jɔ ɔ, e la yi jemi la.

¹⁴ Ke nyɛ ti nɔ ko be he wami ɔ, e ha nɛ a tsɛ asafo ɔ mi nikɔtɔma amɛ kɛ ba; a sɔle ha lɛ, nɛ a pɔ lɛ nu ngɛ Nyɔmtsɛ ɔ biɛ mi.

¹⁵ Ke a sɔle kɛ hemi kɛ yemi ha lɛ kikɛ nɛ ɔ, hiɔtsɛ ɔ ma na he wami. Nyɔmtsɛ ɔ ma tsa lɛ kulaa, nɛ e maa ngɔ yayami tsuo nɛ ngɛ hiɔtsɛ ɔ he ɔ kɛ pa lɛ.

¹⁶ Lɔ ɔ he ɔ, nyɛɛ jaje nyɛ he yayami ɔmɛ kɛ tsɔɔ nyɛ sibi; nyɛɛ sɔle ha nyɛ sibi konɛ a tsa nyɛ. Ke nɔ nɛ peeɔ nɔ́ nɛ da fa kue ha Mawu ɔ, e tsuɔ ní saminya.

¹⁷ Eliya a, nɔmlɔ adesa ji lɛ kaa wɔ nɔuu. E sɔle kɛ hɛdɔ ke hiɔmi kó nɛ; nɛ hiɔmi nɛ́ ngɛ zugba a nɔ jeha etɛ kɛ nyɔhiɔ ekpa sɔuu.

¹⁸ Kɛkɛ nɛ e kpale sɔle, nɛ Mawu ha nɛ hiɔmi nɛ saminya, nɛ zugba a ba ní.

¹⁹ Ye nyɛmimɛ, ke nyɛ ti nɔ ko tla kɛ je anɔkuale ɔ he, nɛ nɔ ko kpale lɛ kɛ ba ekohu ɔ,

²⁰ nyɛ na nɛ nyɛɛ le kaa nɔ tsuaa nɔ nɛ ma tsake yayami peelɔ ko ɔ, e ma he yayami peelɔ ɔ yi wami, nɛ a maa ngɔ e he yayami babauu ɔ kɛ pa lɛ.