Yakobo 4 - BAIBLO ALOO NGMAMI KLƆUKLƆU Ɔ

Je ɔ kɛ huɛ bɔmi

¹ Ta kɛ pɛ nɛ ngɛ nyɛ kpɛti ɔ, mɛni kɛ ní nɛ ɔmɛ baa? Anɛ pi nyɛ he lo mi akɔnɔ nɛ ngɛ ní tsue ngɛ nyɛ mi lo?

² Ke nɔ́ ko pee nyɛ akɔnɔ nɛ nyɛ nine sui nɔ ɔ, nyɛ pueɔ muɔ si. Jã kɛ̃ ke nyɛ hɛ kɔ̃ nyɛ nyɛmimɛ a níhi a nɔ, nɛ nyɛ nine sui nɔ ɔ, nyɛ woɔ pɛ, nɛ nyɛ gbaa ta kɛ woɔ nyɛ sibi. Níhi nɛ hia nyɛ ɔ, nyɛ nine sui nɔ; ejakaa nyɛ bi we Mawu.

³ Ke nyɛ kpa pɛɛ hu, nyɛ nine sui nɔ, ejakaa nyɛ yi mi tomi ɔmɛ hí; níhi nɛ ma ha nyɛ bua jɔmi pɛ he pɛɛ nɛ nyɛ kpaa.

⁴ Nyɛ gba puɛli nɛ nyɛ yi Mawu anɔkuale! Anɛ nyɛ li kaa ke nɔ ko suɔ je ɔ, nɔ ɔ ngɛ Mawu nyɛe lo? Lɔ ɔ he ɔ, nɔ tsuaa nɔ nɛ e kɛ je ɔ bɔɔ ɔ, e peeɔ Mawu he nyɛlɔ.

⁵ Anɛ nyɛ susuu kaa yaka gu nɛ a ngma ke, “Mumi nɛ Mawu ngɔ wo wa mi ɔ, e jeɔ he hunga wawɛɛ” ɔ?

⁶ Se mɔbɔ nɛ Mawu naa wɔ ɔ nya wa kulaa pe lɔ ɔ po. Kaa bɔ nɛ ngmami ɔ deɔ ɔ, “Nihi nɛ woɔ a he nɔ ɔ, Mawu baa mɛ si; se ni nɛmɛ nɛ baa a he si ɔ lɛɛ e dlooɔ mɛ.”

⁷ Lɔ ɔ he ɔ, nyɛɛ ba nyɛ he si ha Mawu. Nyɛɛ te si kɛ wo Abosiami, nɛ e maa tu nyɛ nya fo.

⁸ Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he. Yayami peeli, nyɛ fɔ nyɛ dɛ! Nyɛ yi mi enyɔɔnyɔtsɛmɛ, nyɛ tsake nyɛ tsui.

⁹ Nyɛɛ ye kɔmɔ; nyɛɛ wo yana, nɛ nyɛ nya awe. Nyɛ kpa muɔmi, nɛ nyɛɛ wo yana. Nyɛ kpa nyami, nɛ nyɛɛ nu sawale!

¹⁰ Nyɛɛ ba nyɛ he si ngɛ Nyɔmtsɛ ɔ hɛ mi, nɛ e ma wo nyɛ nɔ.

Nyɛ ko tu nyɛmimɛ ɔmɛ a he munyu yaya

¹¹ Ye nyɛmimɛ, nyɛ ko tu nyɛ sibi a he munyu yaya. Nɔ nɛ tuɔ e nyɛmi he nyumu yaya a, mlaa a e ngɛ munyu tue kɛ ngɛ sie ɔ nɛ; nɛ nɔ tsuaa nɔ nɛ kojoɔ e nyɛmi ɔ, e ngɛ mlaa a kojoe. Ke nɔ ko tuɔ munyu kɛ siɔ mlaa a, pi mlaa a nɔ yelɔ ji lɛ, se mohu e peeɔ mlaa a kojolɔ.

¹² Mawu pɛ ji mlaa wolɔ kɛ kojolɔ. Lɛ nɔ kake nɔuu pɛ lɛ e ngɛ he wami nɛ e kɛ heɔ nɔ yi wami, nɛ e kɛ kpataa nɔ hɛ mi hulɔ. Se moo lɛɛ mɛnɔ ji mo, nɛ o kojoɔ o nyɛmi adesa?

Nyɛ ko fĩa ngɔ fɔ hwɔɔ se nɔ

¹³ Jehanɛ, nyɛ ti ni komɛ deɔ ke, “Hwɔɔ, loo hwɔɔ se ɔ, ma hia blɔ kɛ ya ma ko mi, nɛ ma ya ye jeha ngɛ lejɛ ɔ. Ma ya ye jua nɛ ma na ní.”

¹⁴ Nyɛ ti ni nɛmɛ nɛ deɔ ja a, nyɛɛ bu tue. Anɛ nyɛ le hwɔɔ se je nami mi sane? Nyɛ ngɛ kaa afua nɛ woɔ be kpiti, kɛkɛ a nɛ́ lɛ hu.

¹⁵ Nɔ́ nɛ mohu nɛ sa nɛ nyɛ deɔ ji, “Ke Mawu suɔ nɛ wa yi na wami ɔ, wa maa pee enɛ ɔ, loo enɛ.”

¹⁶ Se nyɛ woɔ nyɛ he nɔ, nɛ nyɛ fĩaa. Ní nɛ ɔmɛ tsuo ji yayami peemi.

¹⁷ Lɔ ɔ he ɔ, nɔ nɛ le nɔ́ kpakpa nɛ e pee we ɔ, yayami e pee ɔ nɛ.