Yakobo 3 - BAIBLO ALOO NGMAMI KLƆUKLƆU Ɔ

Kristo se nyɛɛlɔ nɛ hyɛ e lilɛ nɔ saminya

¹ Ye nyɛmimɛ, nyɛ ti nihi fuu kó pee nyɛ he tsɔɔli. Kaa bɔ nɛ nyɛ le ɔ, wɔ tsɔɔli ɔmɛ ɔ, wa tue gblami nya maa wa pe ni kpa amɛ.

² Wɔ tsuo wa pɔɔ tɔmi peemi babauu. Se ke nɔ ko tɔ we ngɛ munyu tumi mi ɔ, lɛɛ nɔmlɔ nɛ hi kɛ pi si ji lɛ, nɛ e ma nyɛ maa ye e nɔmlɔ tso ɔ tsuo nɔ hulɔ.

³ Ke wa ngɛ hlae nɛ okpɔngɔ nɛ bu wɔ tue ɔ, waa kɛ dade woɔ e nya mi. Kɛkɛ ɔ, he tsuaa he nɛ wa suɔ kaa e ya a, e yaa.

⁴ Aloo waa ngɔ lɛ nɛ ngɛ pa nɔ. Ke e kle kaa mɛni, nɛ ja kɔɔhiɔ nɛ nya wa nɛ ma nyɛ tsɛ̃ e yi se po, kudɔɔ nyafii ko kɛkɛ kudɔɔtsɛ ɔ kɛ plɛɔ lɛ ɔ kɛ yaa he nɛ e suɔ.

⁵ Ja nɔuu lilɛ ngɛ; lilɛ ngɛ nyafii lɛɛ, se e fĩaa ní nguahi. Hyɛ kaa la bɔbɔyoo pɛ maa sã hue tso!

⁶ Ee, lilɛ ngɛ kaa la. Nɔmlɔ tso ɔ he nɔ́ kake nɛ ji lilɛ ɔ, yi wu tso ní sɔuu e tsuɔ. E kɛ yayami bleɔ nɔmlɔ tso ɔ tsuo. La nɛ je Abosiami a je nitsɛnitsɛ lɛ e kɛ mɛɛ wɔ kɛ kpataa wa hɛ mi pɛsɛɛ.

⁷ Adesa nyɛɔ jɔɔ adebɔ ní kpahi tsuo a he, nga mi lohwehi jio, lohwe pɛlitsɛmɛ jio, níhi nɛ sãã si jio, pa mi lohi jio.

⁸ Se lilɛ lɛɛ nɔ ko nɔ ko nyɛ we nɛ e jɔɔ he gblegbleegble. E ji nɔ́ yayami nɛ jɔɛ nɔ he mi; duɔ nɛ gbee nɔ hyi lɛ tɔ.

⁹ Lilɛ waa kɛ naa wa Nyɔmtsɛ, kɛ wa Tsɛ Mawu ɔ si; nɛ lɛ nɔuu waa kɛ gbiɛɔ wa sibi adesa nɛ Mawu bɔ ngɛ e subai nɔ ɔ.

¹⁰ Adesa lilɛ kake ɔ, e kɛ gbaa, nɛ e kɛ gbiɛɔ nɔ hulɔ. Ye nyɛmimɛ, e sɛ́ kaa e baa jã.

¹¹ Anɛ nyu hɛngmɛ baa nyu mua, kɛ nyu doodooe kɛ jee hɛngmɛ kake ɔ nɔuu mi lo?

¹² Ye nyɛmimɛ, anɛ ngmɔkɔ tso ma nyɛ wo oliv tso yiblii lo? Anɛ wai tso ma nyɛ wo ngmɔkɔ lo? Jã nɔuu ngo nyu be nyɛe maa pee nyu mua.

Nile nɛ je hiɔwe

¹³ Anɛ ní lelɔ ko ngɛ nyɛ kpɛti lo? Anɛ nɔ ko ngɛ nyɛ kpɛti nɛ nuɔ nɔ́ sisi lo? Jamɛ a nɔ ɔ, e ba e je mi saminya. E ngɔ he si bami kɛ tsu ní kpakpa kɛ ye e nile ɔ he odase.

¹⁴ Se ke hunga jemi yaya, kɛ pɛ ngɛ nyɛ tsui mi, nɛ nyɛ ti nɔ tsuaa nɔ ngɛ hlae kaa e hi ha lɛ nɔ kake pɛ ɔ, nyɛ ko fĩa, nɛ́ nyɛ ba ye lakpa ngɔ si anɔkuale ɔ.

¹⁵ Kikɛmɛ a nile nɛ ɔ, pi hiɔwe nɛ e je; zugba nɛ ɔ nɔ nɔ́; Mawu mumi be mi, mumi yayami sɔuu.

¹⁶ He nɛ hunga jemi ngɛ, nɛ nihi suɔ kaa e hi ha mɛ pɛ ɔ, lejɛ ɔ nɛ a naa sakasaka peemi, kɛ awi yemi slɔɔtohi babauu ngɛ.

¹⁷ Se nɔ nɛ ngɛ nile nɛ je hiɔwe ɔ, kekleekle nɔ́ nɛ a naa ngɛ e he ji kaa e he tsɔ. Lɔ ɔ se ɔ, a naa kaa e he jɔ; e hɛ ka si, nɛ e nuɔ nɔ́ he ha nɔ. E naa nɔ mɔbɔ saminya, nɛ ní kpakpahi sɔuu e tsuɔ. E hyɛ we nihi a hɛ mi, nɛ e pee we osato.

¹⁸ Nihi nɛ kpataa pɛ, nɛ a haa he jɔmi baa a, a ngɛ wu kpakpa due, nɛ yiblii nɛ a woɔ ji dami sane yemi.