Yakobo 2 - BAIBLO ALOO NGMAMI KLƆUKLƆU Ɔ

Nyɛ ko hyɛ nihi a hɛ mi

¹ Ye nyɛmimɛ, nyɛ heɔ Nyɔmtsɛ Yesu Kristo nɛ hɛ mi ngɛ nyami ɔ yeɔ, lɔ ɔ he ɔ, nyɛ ko hyɛ nɔ hɛ mi, nɛ nyɛ ko bu ni komɛ pe ni komɛ.

² Waa ngɔ lɛ kaa nyɛ ya kpe ngɛ jami he ɔ, nɛ ni enyɔ ba. Nɔ kake ha ablade bo, nɛ e wo sika tsu nguɛ ní. Nɔ kake ɔ lɛɛ ohiatsɛ ji lɛ, nɛ e ha bo gbagbɛ, loo bo sɛmusɛmu.

³ Nɔ nɛ dla e he saminya a, nyɛ he lɛ atuu kɛ bu, nɛ nyɛ de lɛ ke, “I kpa mo pɛɛ, ba hi hiɛ!” Se ohiatsɛ ɔ lɛɛ, nyɛ de lɛ ke, “Dá si ngɛ lejɛ ɔ he ko!” aloo “Ba sɔ̃ si ngɛ hiɛ ɔ!”

⁴ Tse nyɛ na nɔ nɛ nyɛ ngɛ pee ɔ! Mi gbami nyɛɛ kɛ ngɛ nyɛ kpɛti bae ɔ nɛ. Nyɛ ngɛ nyɛ sibi a he ga yaya toe.

⁵ Ye nyɛmimɛ nɛ i suɔ, nyɛɛ bu tue. Tse nyɛ le kaa nihi nɛ je ɔ buu mɛ ohiatsɛmɛ ɔ, mɛ Mawu hla a. Akɛnɛ a heɔ Yesu yeɔ ɔ, nimli nɛ ɔmɛ ba pee mumi mi niatsɛmɛ, nɛ matsɛ yemi ɔ nɛ Mawu wo si ha nihi nɛ suɔ lɛ ɔ ba pee a nɔ.

⁶ Se nyɛ pueɔ ohiatsɛmɛ ɔmɛ a hɛ mi si. Anɛ pi niatsɛmɛ ɔmɛ nɛ waa nyɛ yi mi ɔ? Anɛ pi mɛ nɛ a ngɔɔ nyɛ kɛ yaa kojomi he ɔ?

⁷ Biɛ kpakpa nɛ a wo nyɛ ɔ, anɛ pi mɛ nɛ a gbeɔ he guɛ ɔ?

⁸ E ngɛ ngmami ɔ mi ke, “Suɔ o nyɛmi kaa bɔ nɛ o suɔ mo nitsɛ o he.” Matsɛ yemi ɔ mi mlaa ji nɛ ɔ nɛ; ke o ye nɔ ɔ, lɛɛ o pee saminya.

⁹ Se ke nyɛ hyɛɔ nihi a hɛ mi ɔ, yayami nyɛ ngɛ pee ɔ nɛ, nɛ nyɛ yeɔ fɔ kaa nyɛ tɔ mlaa.

¹⁰ Nɔ tsuaa nɔ nɛ maa ye mlaa amɛ tsuo a nɔ pɛpɛɛpɛ, se e ma tɔ mlaa a kake ɔ, e yeɔ fɔ kaa e tɔ mlaa amɛ tsuo.

¹¹ Mawu ɔ nɛ wo mlaa ke a ko puɛ gba a, lɛ nɔuu lɛ e wo mlaa ke a ko gbe nɔmlɔ. Lɔ ɔ he ɔ, ke o puɛ we gba, se o gbeɔ nɔmlɔ ɔ, o tɔ mlaa a tsuo.

¹² Nyɛ munyu tumi, kɛ nyɛ ní peepee tsuo nɛ tsɔɔ kaa mlaa nɛ haa wa yeɔ wa he ɔ nɛ a kɛ maa kojo wɔ.

¹³ Ejakaa nɔ nɛ nɛ́ mɔbɔ ɔ, benɛ a maa kojo lɛ ɔ, Mawu be lɛ mɔbɔ nae; se ke o naa mɔbɔ ɔ, Mawu be mo fɔ bue.

Hemi kɛ yemi, kɛ e he ní tsumi

¹⁴ Ye nyɛmimɛ, ke nɔ ko ke e ngɛ hemi kɛ yemi, se e ní peepee tsɔɔ we ja a, mɛni se nami ngɛ he? Anɛ jamɛ a hemi kɛ yemi ɔ ma nyɛ he e yi wami lo?

¹⁵ Waa ngɔ lɛ kaa nyɛmimɛ komɛ be heha ní, loo niye ní.

¹⁶ Ke nyɛ ha we mɛ níhi nɛ hia mɛ nɛ ɔ, mɛni se nami ngɛ he kaa nyɛ ma de mɛ ke, “Nyɛɛ ya ngɛ he jɔmi mi! Nyɛ ya hlue la; nyɛɛ ye ní nɛ nyɛɛ tɔ?”

¹⁷ Hemi kɛ yemi hu ja nɔuu e ngɛ; ke ní tsumi piɛ we he ɔ, e ji hemi kɛ yemi nɛ gbo.

¹⁸ Se nɔ ko ma de ke, “Moo lɛɛ o hɛɛ hemi kɛ yemi, nɛ imi lɛɛ i tsuɔ ní” Yoo, tsɔɔ mi o hemi kɛ yemi nɛ o tsu we he ní ɔ, nɛ imi hu i kɛ níhi nɛ i tsuɔ ɔ maa tsɔɔ mo kaa i heɔ yeɔ.

¹⁹ Nyɛ heɔ yeɔ kaa Mawu kake pɛ lɛ ngɛ! Saminya! Mumi yayami ɔmɛ po heɔ yeɔ ja nɔuu. Nɛ lɔ ɔ haa a nuɔ sawale, nɛ a he doɔ blibliibli.

²⁰ Kuasia! O ngɛ hlae nɛ nɔ ko nɛ de mo ke hemi kɛ yemi kɛkɛ nɛ ní tsumi piɛ we he ɔ, e wui yiblii.

²¹ Mɛni ba loko Mawu bu wa nɛ̃ Abraham dalɔ ɔ? E ní tsumi ɔ nya! Ejakaa e ngɔ e bi Isak kɛ fɔ bɔ sami la tɛ ɔ nɔ kaa e kɛ maa sã bɔ ha Mawu.

²² Tse nyɛ na! Abraham he ye, nɛ e tsu he ní hulɔ. Ní nɛ e tsu ɔ ha nɛ e hemi kɛ yemi ɔ mi ba wa wawɛɛ nitsɛ.

²³ Nɛ nɔ́ nɛ ngmami ɔ de ɔ ba mi ke, “Abraham he Mawu ye, nɛ e hemi kɛ yemi ɔ ha nɛ Mawu bu lɛ dalɔ.” Enɛ ɔ he nɛ a tsɛɛ Abraham ke Mawu huɛ ɔ nɛ.

²⁴ Lɛɛ tse nyɛ na kaa ní tsumi nɔ Mawu guu kɛ buɔ nɔ dalɔ, se pi hemi kɛ yemi pɛ nɔ.

²⁵ Yo ajuama a nɛ a tsɛɛ lɛ Rahab ɔ, lɛ hu ja nɔuu. Mawu da nɔ́ nɛ e pee ɔ nɔ kɛ bu lɛ dalɔ. Israel bi ɔmɛ nɛ a tsɔ kɛ ya slaa zugba a nigii ɔ, Rahab he mɛ atuu; nɛ lɔ ɔ se ɔ, e tsɔɔ mɛ blɔ, nɛ a gu he kpa kɛ je slɔkee.

²⁶ Lɔ ɔ he ɔ, kaa bɔ nɛ ke mumi je nɔmlɔ tso ɔ mi nɛ e plɛɔ nɔ́ gbogboe ɔ, jã hemi kɛ yemi nɛ ní tsumi piɛ we he ɔ peeɔ hemi kɛ yemi gbogboe.