Tito 3 - BAIBLO ALOO NGMAMI KLƆUKLƆU Ɔ

Je mi bami nɛ sa Kristo se nyɛɛlɔ

¹ Mo kai o we bi ɔmɛ, nɛ a ba a he si ngɔ ha ma nɔ yeli, kɛ ni nɛmɛ nɛ hɛɛ blɔ nya. Á bu mɛ, nɛ a pee klaalo kaa a ma tsu ní tsumi kpakpa be tsuaa be.

² A ko tu nihi a he munyu yaya, nɛ a ko pɛ; se mohu a he nɛ jɔ, nɛ a tsɔ a hɛ mi ha nɔ tsuaa nɔ.

³ Ejakaa sa a, wɔ nitsɛmɛ hu wa je kuasia; wa gbo tue, nɛ wa tla blɔ. Wa ya di akɔnɔ yaya, kɛ he lo mi níhi nɛ haa wɔ bua jɔmi a se. Wa susuu nihi a he yayami, nɛ wa hɛ kɔ̃ɔ̃; nɔ́ peeɔ wɔ tai, nɛ wa nyɛɛ wa sibi.

⁴ Se benɛ Mawu, wa kpɔlɔ ɔ je e mi mi himi, kɛ e suɔmi ɔ kpo ɔ,

⁵ e he wa yi wami. Pi nɔ́ nɛ da nɛ wa pee he nɛ e he wa yi wami ngɛ; mɔbɔ kɛkɛ lɛ e na wɔ kɛ gu Mumi Klɔuklɔu ɔ nɔ. Mumi Klɔuklɔu ɔ du wa he, nɛ wa pee kaa nihi nɛ a fɔ mɛ ehe, nɛ́ a na wami he.

⁶ Kɛ gu wa kpɔlɔ Yesu Kristo nɔ ɔ, Mawu plɛ Mumi Klɔuklɔu ɔ ngɔ pue wa nɔ babauu.

⁷ E pee enɛ ɔ, konɛ wɔ nɛ a wo wɔ nguɔ kɛ gu Yesu Kristo dloomi ɔ nɔ ɔ, neneene wami ɔ nɛ wa ngɔ wa hɛ ngɔ fɔ nɔ ɔ, wa nine nɛ su nɔ.

⁸ Anɔkuale munyu sisiisi ji nɛ ɔ nɛ. I suɔ kaa o di ní nɛ ɔmɛ a se wawɛɛ, konɛ nihi nɛ ba he Mawu ye ɔ nɛ a ngɔ a be kɛ tsu ní kpakpahi. Enɛ ɔmɛ ji níhi nɛ hi, nɛ a he ngɛ se nami ha nihi tsuo.

⁹ Se nya sami yaka gu, weku kpa se jami, pɛ, kɛ mlaa a he nɔ́ jemi ɔ lɛɛ je o he kɛ je mi. Ní nɛ ɔmɛ a he be se nami, nɛ a he hia we hulɔ.

¹⁰ Nɔ ko nɛ ma hla kaa e kɛ mi gbami nɛ ba nyɛ kpɛti ɔ, ka e hɛ mi si kake, loo si enyɔ. Lɔ ɔ se ɔ, kɛ lɛ ko bɔ hu.

¹¹ Na nɛ o le kaa nɔmlɔ nɛ ngɛ kaa kikɛ nɛ ɔ ji yayami peelɔ nɛ je e glɛ nɔ, nɛ lɛ nitsɛ e he yayami ɔ buu lɛ fɔ.

Nyagbe sɛ yemi

¹² Ke i tsɔ Artema, loo Tihiko kɛ ba o ngɔ ɔ, bɔɔ mɔde nɛ o ba ye ngɔ ngɛ Nikopoli, ejakaa i to kaa ma ya ye fĩɛ be ɔ ngɛ lejɛ ɔ.

¹³ Moo bɔ mɔde nɛ o wo Zena, mlaa tsɔɔlɔ ɔ, kɛ Apolo blɔ saminya; hyɛ nɛ nɔ́ tsuaa nɔ́ nɛ maa hia mɛ ngɛ blɔ ɔ nɔ ɔ, a nine nɛ su nɔ.

¹⁴ Ha nɛ wa we bi ɔmɛ nɛ a kase bɔ nɛ a maa ngɔ a be kɛ tsu ní kpakpa ha. Kɛkɛ ɔ, ke fimi be ba a, nɔ́ ko be mɛ hiae; a ko pee a he nihi nɛ a he be se nami ko.

¹⁵ Nihi tsuo nɛ kɛ mi ngɛ hiɛmɛ nɛ ɔ ke a biɔ nyɛ. De wa suɔli ɔmɛ nɛ heɔ Kristo yeɔ ɔ ke wa biɔ mɛ. Mawu dloomi ɔ kɛ nyɛ tsuo nɛ hi si!