Samuel II, 9 - BAIBLO ALOO NGMAMI KLƆUKLƆU ƆDavid kɛ Mefiboshet 1 Ligbi ko ɔ, David bi si ke, “Anɛ Saul nina ko piɛ lo? Ke nɔ ko ngɛ ɔ, ma suɔ nɛ ma na lɛ mɔbɔ ngɛ Yonatan he.” 2 Tsɔlɔ ko ngɛ Saul we ɔ mi nɛ e biɛ ji Ziba; nɛ a tsɛ lɛ kɛ ba David hɛ mi. Matsɛ ɔ bi lɛ ke, “Mo ji Ziba a lo?” Nɛ e he nɔ ke, “Ee imi, ye nyɔmtsɛ.” 3 Matsɛ ɔ bi lɛ ekohu ke, “Anɛ Saul nina ko be, nɛ ma na lɛ mɔbɔ kaa bɔ nɛ i wo Mawu si ɔ lo?” Ziba de matsɛ ɔ ke, “E piɛ Yonatan binyumu kake; se lɛɛ akpaketsɛ ji lɛ.” 4 Matsɛ ɔ bi lɛ ke, “Jije e ngɛ?” Ziba he nɔ ke, “E ngɛ Amiel binyumu Makir we ɔ mi ngɛ Lodebar ma a mi.” 5 Matsɛ David tsɔ nɛ a ya ngɔ lɛ kɛ ba. 6 Benɛ Saul bibi Mefiboshet, nɛ ji Yonatan bi ɔ ba David ngɔ ɔ, e kpla si nɛ e kɛ e hɛ mi bu si kɛ tsɔɔ bumi. David tsɛ e biɛ ke, “Mefiboshet!” Nɛ e he nɔ ke, “Ye nyɔmtsɛ.” 7 David ya nɔ nɛ e de lɛ ke, “Koo ye gbeye; ejakaa o tsɛ Yonatan he ɔ, ma na mo mɔbɔ. Ma kpale o nɛ̃, Saul zugba amɛ tsuo kɛ ha mo, nɛ ye okplɔɔ he o maa ye ní ngɛ daa.” 8 Mefiboshet kpla si ngɛ David hɛ mi ekohu, nɛ e de ke, “Mɛnɔ po ji mi nɛ o naa mi mɔbɔ kaa kikɛ nɛ ɔ? Imi, o tsɔlɔ nɛ i ngɛ kaa gbe gbogboe ɔ!” 9 Enɛ ɔ se ɔ, matsɛ ɔ tsɛ Saul tsɔlɔ Ziba, nɛ e de lɛ ke, “I ngɔ Saul gbosi ní tsuo kɛ ngɛ o nyɔmtsɛ ɔ bibi Mefiboshet hae. 10 Lɔ ɔ he ɔ, o kɛ o binyumu ɔmɛ, kɛ o tsɔli ɔmɛ maa pee ngmɔ, nɛ nyɛ ma kpa ní, konɛ o nyɔmtsɛ Saul we ɔ nɛ a ná nɔ́ ko nɛ a ye. Se o nyɔmtsɛ ɔ bibi Mefiboshet lɛɛ e maa ye ní ngɛ ye okplɔɔ he daa.” Ziba ngɛ binyumuhi nyɔngma kɛ enuɔ, kɛ tsɔli nyingmi enyɔ. 11 Ziba he nɔ ke, “Nɔ́ tsuaa nɔ́ nɛ ye nyɔmtsɛ matsɛ fa mi ke ma pee ɔ, ma pee.” Lɔ ɔ he ɔ, Mefiboshet ya yeɔ ní ngɛ Matsɛ David okplɔɔ ɔ he kaa matsɛbi. 12 Mefiboshet ngɛ binyumu wayoo ko nɛ a tsɛɛ lɛ Mika. Nɔ tsuaa nɔ nɛ ngɛ Ziba we ɔ mi ɔ ba plɛ pee Mefiboshet tsɔlɔ. 13 Lɔ ɔ he ɔ, Mefiboshet nɛ e nane enyɔ ɔmɛ tsuo kplɔ ngɛ e sisi ɔ, lɛɛ e hi Yerusalem; nɛ e yeɔ ní ngɛ matsɛ okplɔɔ he daa ligbi. |
Bible in Dangme © Bible Society of Ghana, 2018.
Bible Society of Ghana