Samuel II, 3 - BAIBLO ALOO NGMAMI KLƆUKLƆU Ɔ

¹ Ta nɛ Saul we ɔ, kɛ David we ɔ hwu ɔ, ta a se kɛ saminya. Be mi nɛ David he wami ngɛ nɔ puee ɔ, Saul we ɔ lɛɛ a he wami nɔ ngɛ gbɔe kulaa.

David binyumuhi

² A fɔ binyumuhi ha David ngɛ Hebron. David kekleekle binyumu ji Amnon nɛ e kɛ Ahinoam, Yezreel no ɔ fɔ ɔ;

³ enyɔne ɔ ji Kileab nɛ David kɛ Nabal nɛ je Karmel e yalɔyo Abigail fɔ ɔ; etɛne ɔ ji Absalom, Geshur matsɛ, Talmai biyo Maaka bi ɔ;

⁴ eywiɛne ɔ ji Adoniya, Hagit bi ɔ; enuɔne ɔ ji Shefatia, Abital bi ɔ;

⁵ ekpane ɔ ji Itream, nɛ ji David yo Egla bi ɔ. A fɔ bimɛ nɛ ɔmɛ ha David ngɛ Hebron.

Abner ba piɛ David he

⁶ Benɛ Saul we ɔ, kɛ David we ɔ ngɛ ta hwue ɔ, Abner ba na blɔ nya ngɛ Saul we ɔ.

⁷ Saul ngɛ plã ko nɛ a tsɛɛ lɛ Rizpa, nɛ ji Aya biyo. Ligbi ko ɔ, Saul bi Ishboshet ya bi Abner ke, “Mɛni he je o kɛ tsaatsɛ plã a ya na bɔmi ɔ?”

⁸ Abner muklii mi fu wawɛɛ nitsɛ ngɛ munyu ɔ nɛ Ishboshet bi lɛ ɔ he, nɛ e de ke, “Anɛ e peeɔ mo kaa kuasia ji mi lo? Hyɛ, i kɛ o tsɛ, kɛ e nyɛmimɛ ɔmɛ, kɛ e huɛmɛ ɔmɛ hi si saminya. I je we mo kɛ wui David dɛ mi. Mwɔnɛ nɛ ɔ, moo o ngɛ sane poe kɛ ngɛ ye nɔ fɔe ke i kɛ nɔ ko yo ya na bɔmi!

^9-10 Yawɛ wo David si kaa e ma kpɔ matsɛ yemi ɔ ngɛ Saul kɛ e weku kɛ nina a dɛ, nɛ e maa to David matsɛ sɛ ɔ si, konɛ e ye Israel kɛ Yuda tsuo a nɔ kɛ maa je Dan kɛ yaa si Beersheba. Lɔ ɔ he ɔ, ke i ha we nɛ nɔ́ nɛ ɔ nɛ ba mi ɔ, lɛɛ Mawu nɛ fia mi nɔ́ nɛ e gbe!”

¹¹ Ishboshet nyɛ we nɛ e de Abner nɔ kpa ko hu; ejakaa e ye lɛ gbeye.

¹² Abner tsɔ kɛ ya Hebron he nɛ David ngɛ ɔ ke a ya bi lɛ ke, “Zugba a, mɛnɔ lɛ yeɔ nɔ?” E ya nɔ nɛ e de ke, “Mo ha nɛ waa so somi ko, nɛ ma piɛ o he kɛ gbla Israel tsuo kɛ ba o ngɔ.”

¹³ Heto nɛ David ha kɛ mane ji, “Saminya! I kɛ mo maa so somi nɛ ɔ. Se nɔ́ nɛ i ngɛ hlae nɛ o pee ha mi ji kaa ke o ma a, o kpaka Saul biyo Mikal ba ha mi. Ke pi ja a, lɛɛ i hla we nɛ ma na o hɛ mi.”

¹⁴ David tsɔ ke a ya de Saul bi Ishboshet hu ke, “Moo kpale ye yo Mikal ɔ ba ha mi; Filisti bi a mɔmlɔtɔ lafa kake nɛ i kɛ pee e he ní.”

¹⁵ Lɔ ɔ he ɔ, Ishboshet tsɔ ya kpaka yo ɔ kɛ je e huno Paltiel, Laish bi ɔ ngɔ kɛ ba.

¹⁶ Paltiel fo ya kɛ nyɛɛ yo ɔ se hluu kɛ ya su Bahurim tɔɔ. Se Abner de lɛ ke, “Kpale o se esɔesɔ!” Nɛ e kpale e se.

¹⁷ Abner tsɛ Israel nimeli ɔmɛ kpe, nɛ e de mɛ ke, “Be saii ji nɛ ɔ, jinɛ nyɛ ngɛ David se blɔ hlae nɛ nyɛɛ wo lɛ matsɛ.

¹⁸ Jehanɛ lɛɛ be ɔ su; nyɛ tsu he ní. Nyɛ kai kaa Yawɛ wo David si ke, ‘Ma gu ye tsɔlɔ David nine nɔ kɛ kpɔ ye ma, Israel kɛ je Filisti bi ɔmɛ, kɛ a he nyɛli ɔmɛ tsuo a dɛ mi.’ ”

¹⁹ Abner kɛ Benyamin wɛtso ɔ hu ya na ní sɛɛmi. Lɔ ɔ se ɔ, e ya Hebron nɛ e ya bɔ David nɔ́ tsuaa nɔ́ nɛ Israel kɛ Benyamin we ɔ wo si ke a maa pee ɔ.

²⁰ Benɛ Abner ba David ngɔ ngɛ Hebron ɔ, nyumuhi nyingmi enyɔ piɛ e he kɛ ba; nɛ David tsɛ mɛ ní yemi.

²¹ Abner de David ke, “Jehanɛ, i yaa nɛ ma ya bua Israel ma a tsuo nya kɛ ba mo, ye nyɔmtsɛ matsɛ o ngɔ. A maa kplɛɛ nɛ o ye a nɔ matsɛ; kɛkɛ o nine maa su nɔ́ nɛ o ngɛ hlae ɔ nɔ, nɛ o maa ye zugba a tsuo nɔ.” Enɛ ɔ se ɔ, David wo Abner blɔ; nɛ e ho ngɛ he jɔmi mi.

A gbe Abner

²² E kɛ we nɛ Yoab kɛ David tsɔli kpa komɛ ba lejɛ ɔ. A ya tua ni komɛ nɛ a kpɔ a níhi babauu kɛ ba. Se a ba na we Abner ngɛ David ngɔ ngɛ Hebron, ejakaa David wo lɛ blɔ momo, nɛ e je ngɛ he jɔmi mi.

²³ Yoab kɛ e we bi ɔmɛ a lejɛ ɔ sumi pɛ nɛ a bɔ lɛ amaniɛ ke Ner binyumu Abner ba Matsɛ David ngɔ, nɛ David wo lɛ blɔ kɛ ho ngɛ he jɔmi mi.

²⁴ Enɛ ɔ he je ɔ, Yoab ya nɛ e ya de matsɛ ɔ ke, “Mɛni o pee nɛ ɔ? Hyɛ kaa Abner ba o ngɔ! Mɛni he je o ngmɛɛ e he nɛ e ho ɔ?

²⁵ Ná nɛ o le kaa Ner bi Abner ɔ, sisimi e ba sisi mo nɛ e kɛ le o yami kɛ bami, kɛ nɔ́ tsuaa nɔ́ nɛ o ngɛ pee.”

²⁶ Benɛ Yoab je David ngɔ ɔ, e tsɔ nihi kɛ nyɛɛ Abner se. Ni ɔmɛ ya ná lɛ ngɛ Sira nyu vu ɔ he, nɛ a kpale lɛ kɛ ba. Se David li he nɔ́ ko.

²⁷ Benɛ Abner kpale kɛ ba Hebron ɔ, Yoab nu e nine si nɛ e kɛ lɛ ho ma a agbo ɔ nya ya kaa nɔ́ nɛ e kɛ lɛ yaa dami. Yoab gbɔ Abner muklii mi nɔ́ nɛ e gbe lɛ ngɛ lejɛ ɔ, ngɛ e nyɛmi Asahel muɔ nɛ Abner pue si ɔ he.

²⁸ Pee se benɛ David ba nu sane ɔ he ɔ, e de ke, “Yawɛ le kaa Ner bi Abner muɔ si nɛ a pue nɛ ɔ he musu ko musu ko tloo we i kɛ ye nɔ yemi sisi bi ɔmɛ.

²⁹ Musu ɔ nɛ tloo Yoab kɛ e tsɛ we ɔ tsuo. Se tso mi hiɔtsɛ, loo nɔ ko nɛ he womi nɔ hiɔ yaya ngɛ e he, loo nyumu nɛ peeɔ e ní kaa yo, loo nɔ nɛ a gbe lɛ ngɛ ta mi, loo hwɔ yeyeetsɛ kó ta Yoab kɛ e nina a we mi gblegbleegble.”

³⁰ Yoab kɛ e nyɛminyumu Abishai gbe Abner, ejakaa lɛ hu e gbe a nyɛminyumu Asahel ngɛ Gibeon ta a mi.

A pu Abner

³¹ David fa Yoab kɛ e we bi ɔmɛ ke, “Nyɛ hía tade ɔmɛ ngɛ nyɛ he, nɛ nyɛ bu kpekpe ya bo kɛ nyɛ ya, nɛ nyɛɛ wo yana ha Abner.” Matsɛ David nitsɛ nyɛɛ gbogboe ɔ se.

³² Benɛ a ya pu Abner ngɛ Hebron ɔ, matsɛ ɔ fo ya yuuyuuyuu ngɛ yɔkɔ ɔ he; nɛ ma a tsuo wo yana kɛ piɛ e he.

³³ Matsɛ David la aywilɛho la nɛ ɔ kɛ nyɛ ya ha Abner: “Anɛ e sa kaa o gbo kaa kuasia gboɔ lo?

³⁴ O nine ɔmɛ ɔ, a tsa fi we mɛ; o nane ɔmɛ hu, a wui mɛ pã. Bɔ nɛ dikali taneɔ nɔ yi ɔ, ja pɛ a gbe mo nɛ ɔ nɛ.” Ma a tsuo wo yana ha Abner ekohu.

³⁵ Ma a nyɛ David nɔ ligbi ɔ tsuo ke e ye nɔ́ ko. Se David ka kita nɛ e de ke, “Ke i wo ye nya mi nɔ́ ko loko pu nɔ si ɔ, Mawu nɛ fia mi nɔ́ nɛ e gbe!”

³⁶ Ma a yɔse nɔ́ nɛ ɔ, nɛ e sa a hɛ mi. Niinɛ, nɔ́ tsuaa nɔ́ nɛ matsɛ ɔ pee ɔ sa ma a hɛ mi saminya.

³⁷ Lɔ ɔ he ɔ, David we bi ɔmɛ, kɛ Israel tsuo na le jamɛ a ligbi ɔ kaa David li Ner bi Abner gbenɔ ɔ he nɔ́ ko.

³⁸ Jehanɛ, matsɛ ɔ de e tsɔli ɔmɛ ke, “Nyɛ ná nɛ nyɛɛ le kaa ganɔ kɛ nɔmlɔ nguaa ko nɔ ngɛ Israel mwɔnɛ ligbi nɛ ɔ.

³⁹ Imi lɛɛ a pɔ mi nu nɛ a wo mi matsɛ mohu, se mwɔnɛ ligbi nɛ ɔ, i pee kaa nɔ nɛ be he wami. Kikɛmɛ a Zeruya binyumu nɛ ɔmɛ a sane wa pe mi. Yawɛ nɛ wo yayami peelɔ ɔ hiɔ bɔ nɛ sa lɛ!”