Samuel II, 21 - BAIBLO ALOO NGMAMI KLƆUKLƆU Ɔ

A gbe Saul weku kɛ nina

¹ David yi nɔ ɔ, hwɔ ba zugba a nɔ jeha etɛ sɔuu. Lɔ ɔ he ɔ, David ya bi Yawɛ ga womi, nɛ Yawɛ de lɛ ke, “Saul kɛ e we ɔ ye fɔ kaa a pue muɔ si; ejakaa Saul gbe Gibeon bi ɔmɛ.”

² Lɔ ɔ he ɔ, matsɛ ɔ tsɛ Gibeon bi ɔmɛ nɛ e kɛ mɛ tu munyu. Gibeon bi nɛ ɔmɛ ɔ, pi Israel bi ji mɛ; Amor bi nɛ piɛ ɔ ekomɛ ji mɛ. Jinɛ Israel bi ɔmɛ ka Gibeon bi kita kaa a maa baa a yi; se be mi nɛ Saul hɛ dɔ ngɛ Israel kɛ Yuda he ɔ, e hla kaa e ma kpata a hɛ mi.

³ David bi Gibeon bi ɔmɛ ke, “Mɛni ma pee ha nyɛ? Mɛni ma ngɔ kɛ kpata nyɛ konɛ nyɛɛ gbaa Yawɛ ma a?”

⁴ Gibeon bi ɔmɛ de lɛ ke, “Sane nɛ ngɛ waa kɛ Saul, kɛ e we ɔ wa kpɛti ɔ, tsa pi sika hiɔ, loo sika tsu nɛ a kɛ maa ye; jehanɛ se hu, e pi wa blɔ nya kaa wa gbeɔ nɔ ko ngɛ Israel.” David ya nɔ nɛ e bi ke, “Lɛɛ mɛni nyɛ suɔ kaa ma pee ha nyɛ mɔ?”

⁵ A he nɔ ke, “Saul to kaa e ma kpata wa hɛ mi, bɔ nɛ pee nɛ a ko nu wa he ngɛ Israel zugba amɛ ekoeko nɔ hu.

⁶ Enɛ ɔ he je ɔ, á ngɔ nɔmlɔ nɛ ɔ binyumuhi kpaago ba ha wɔ nɛ waa sɛu mɛ ngɛ Yawɛ hɛ mi ngɛ Gibeon, ngɛ Yawɛ yo ɔ nɔ.” Matsɛ ɔ he nɔ ke, “Yoo, ma ngɔ mɛ ba ha nyɛ.”

⁷ Ngɛ kita nɛ David kɛ Saul bi Yonatan ka a he he je ɔ, matsɛ ɔ tɛ Yonatan bi Mefiboshet nɛ ji Saul bibi ɔ he.

⁸ Se e ngɔ Armoni, kɛ Mefiboshet nɛ ji Aya biyo Rizpa binyumuwi enyɔ ɔmɛ nɛ e kɛ Saul fɔ ɔ. Jehanɛ hu e ngɔ Saul biyo Merab binyumuwi enuɔ ɔmɛ nɛ e kɛ Adriel, Barzilai binyumu ɔ nɛ je Mehola fɔ ɔ.

⁹ David ngɔ mɛ kɛ wo Gibeon bi ɔmɛ a dɛ mi, nɛ a ya sɛu mɛ ngɛ yo ɔ nɔ, ngɛ Yawɛ hɛ mi. Mɛ ni kpaago ɔmɛ tsuo a gbo si kake too. Benɛ ní kpami be su, nɛ́ a bɔni ngma poomi ɔ, jamɛ a be ɔ nɛ a gbe ni ɔmɛ ɔ nɛ.

¹⁰ Kɛkɛ nɛ Rizpa, Aya biyo ɔ ngɔ kpekpe kɛ pee bo tsu ngɛ tɛ sa a nɔ. Nɛ kɛ je be mi nɛ a bɔni ní kpami kɛ ya si hiɔmi bɔni nɛmi ɔ, e huɔ gbogboe ɔmɛ nyɔ kɛ pia; e ngmɛ́ blɔ nɛ lohwe pɛlitsɛmɛ ba maa a nɔ piani; nɛ nyɔ mi ɔ, e fieɔ lohwe awi yeli kɛ jeɔ a he.

¹¹ Benɛ a ya bɔ David nɔ́ nɛ Aya biyo Rizpa, Saul plã a pee ɔ,

¹² e ho nɛ e ya ngɔ Saul kɛ e bi Yonatan a wuhi ngɛ Yabesh Gilead bi ɔmɛ a dɛ. Ligbi ɔ nɛ Filisti bi ɔmɛ gbe Saul ngɛ Gilboa, nɛ a ngɔ e kɛ Yonatan kpla si ngɛ a kpe he ɔ ngɛ Bet Shan ɔ, Yabesh Gilead bi ɔmɛ ya ju mɛ.

¹³ David ya ngɔ Saul kɛ e bi Yonatan a wuhi kɛ je lejɛ ɔ kɛ ba, nɛ a bua ni nɛmɛ nɛ a sɛu ɔ hu a wuhi a nya.

¹⁴ A ya pu Saul kɛ e bi Yonatan a wu ɔmɛ ngɛ Benyamin zugba a nɔ ngɛ Zela, ngɛ e tsɛ Kish yɔkɔ ɔ mi; nɛ a pee nɔ́ tsuaa nɔ́ kaa bɔ nɛ matsɛ ɔ fa mɛ ɔ. Lɔ ɔ se ɔ, Mawu bu a kue nɛ a fa kɛ ha ma a tue.

Tahi nɛ a kɛ Filisti oblai komɛ hwu

¹⁵ Filisti bi ɔmɛ gba ta kɛ wo Israel bi ɔmɛ ekohu; nɛ David kɛ e tsɔli ɔmɛ ho nɛ a kɛ Filisti bi ɔmɛ ya hwu; se pɔ tɔ David.

¹⁶ Kɛkɛ nɛ oblai ko nɛ a tsɛɛ lɛ Ishbibenob ɔ susu kaa e nine gbe David ta. Ishbibenob hɛɛ akɔblee akplɔ ko nɛ e jiimi maa pee kilo etɛ kɛ fa, nɛ e fi klaate ehe hu ngɛ e mlɛ mi.

¹⁷ Se Zeruya bi Abishai ba piɛ David he; e tua Filisti no ɔ, nɛ e gbe lɛ. Kɛkɛ nɛ David we bi ɔmɛ ka David kita ke, “O kɛ wɔ be ta yae hu gblegbleegble. Israel hɛngmɛ ji mo; koo pee nɛ wa hɛngmɛ ɔ ba pɛ.”

¹⁸ Enɛ ɔ se ɔ, a kɛ Filisti bi ɔmɛ hwu ta ekohu ngɛ Gob, nɛ Sibekai nɛ je Husha a gbe oblai ko nɛ a tsɛɛ lɛ Saf.

¹⁹ Israel bi ɔmɛ kɛ Filisti bi ɔmɛ pa hwu ta ekohu ngɛ Gob; nɛ Yair binyumu Elhanan nɛ je Betlehem ɔ gbe Goliat, Gat no ɔ nɛ e akplɔ nya tso ngɛ kaa bo lolɔ gba tso ɔ.

²⁰ Jehanɛ, a hwu ta ekohu ngɛ Gat, he nɛ nyumu oblai kpanaa ko ngɛ ɔ. E ngɛ nine nguɛ ekpa kɛ nane nguɛ ekpa; nɛ lɛ tsuo peeɔ nyingmi enyɔ kɛ eywiɛ.

²¹ Nyumu nɛ ɔ bɔ Israel bi ɔmɛ ahlua, nɛ Yonatan nɛ ji David nyɛminyumu Shama binyumu ɔ gbe lɛ.

²² Ni eywiɛ nɛ ɔmɛ ɔ, Gat oblaihi a nina ji mɛ; nɛ mɛ tsuo a nɔ ngɛ David kɛ e tsɔli ɔmɛ a klaate nya.