Samuel II, 19 - BAIBLO ALOO NGMAMI KLƆUKLƆU Ɔ

Yoab ka David hɛ mi

¹ A ya bɔ Yoab amaniɛ ke matsɛ ɔ ngɛ ya foe, nɛ e ngɛ kɔmɔ yee ha Absalom.

² Lɔ ɔ he ɔ, jamɛ a ligbi ɔ manye yemi ɔ plɛ pee kɔmɔ yemi kɛ ha ma a tsuo; ejakaa ma a nu jamɛ a ligbi ɔ kaa matsɛ ɔ ngɛ kɔmɔ yee ha e bi ɔ.

³ Tabo ɔmɛ nyɛɛ blɛuu blɛuu kɛ ba sɛ ma a mi kaa nihi nɛ tu fo ngɛ ta nya, nɛ́ zo ngɛ mɛ pee.

⁴ Matsɛ ɔ kɛ nɔ́ ha e hɛ mi, nɛ e fo ya boboobo, nɛ e de ke, “Ao ye bi ɔ! Ye bi Absalom! Ye bi Absalom!”

⁵ Kɛkɛ nɛ Yoab ya matsɛ ɔ ngɔ ngɛ e we ɔ mi, nɛ e ya de lɛ ke, “Mwɔnɛ ɔ, o tsɔli ɔmɛ tsuo nɛ he mo, kɛ o binyumu ɔmɛ, o biyi ɔmɛ, o yi ɔmɛ, kɛ o plã amɛ a yi wami ɔ, o pue mɛ tsuo pɛpɛɛpɛ a hɛ mi si,

⁶ ejakaa o suɔ nihi nɛ nyɛɛ mo, nɛ o nyɛɛ ni nɛmɛ nɛ suɔ mo mohu. O tsɔɔ paa mwɔnɛ ɔ kaa o tatsɛmɛ ɔmɛ, kɛ o tabo ɔmɛ ɔ, a pi ni komɛ kulaa ha mo; ejakaa i kpa si mwɔnɛ ɔ kaa e ji Absalom yi na wami, nɛ wɔ tsuo wa gbo jinɛ e ko ngɔ o nya.

⁷ Lɔ ɔ he ɔ, tee si esɔ, nɛ o ya nɛ o ya jɔɔ o tsɔli ɔmɛ a bua. I na Yawɛ kaa ke o yɛ ɔ, nyɔ nɛ ɔ mi ke e piɛ nyumu kake ngmelu ngɛ o he fii! Nɔ́ nɛ ɔ ma ba pee haomi agbo kɛ ha mo pe haomi ɔmɛ tsuo nɛ ba o nɔ kɛ je o nihe mi kɛ ba si amlɔ nɛ ɔ.”

⁸ Kɛkɛ nɛ matsɛ ɔ te si nɛ e ho ya hi si ngɛ ma agbo ɔ nya. Nɛ benɛ e we bi ɔmɛ tsuo nu kaa matsɛ ɔ hii si ngɛ ma agbo ɔ nya a, mɛ tsuo a ya na lɛ ngɛ lejɛ ɔ. Jamɛ a be ɔ, Israel bi ɔmɛ a ti nɔ tsuaa nɔ tu fo kɛ ho lɛ nitsɛ e ma mi ya.

David kpale e se kɛ yaa Yerusalem

⁹ Ngɛ Israel wɛtso ɔmɛ tsuo a mi ɔ, ni ɔmɛ kɛ a he bɔni pɛmi nɛ a ngɛ dee ke, “Matsɛ David je wɔ kɛ je wa he nyɛli ɔmɛ a dɛ mi, nɛ e kpɔ wɔ kɛ je Filisti bi ɔmɛ a dɛ mi. Se amlɔ nɛ ɔ, Absalom fie lɛ kɛ je ma a mi.

¹⁰ Absalom ɔ nɛ wa pɔ lɛ nu nɛ wa wo lɛ matsɛ ɔ, lɛ hu e gbo ngɛ ta mi. Mɛni he je nɔ ko yɛ nɛ e ya ngɔ Matsɛ David ɔ kɛ ba mɔ?”

¹¹ Benɛ Matsɛ David nu nɔ́ nɛ Israel bi ɔmɛ ngɛ dee ɔ, e tsɔ osɔfo Zadok kɛ osɔfo Abiatar ke a ya nɛ a ya bi Yuda ma nimeli ɔmɛ ke, “Mɛni he je nyɛ mohu nyɛ de we kekle ke nyɛ yaa ngɔ matsɛ ɔ kɛ ba we ɔ?

¹² Ye nyɛmimɛ nitsɛnitsɛmɛ ji nyɛ; mɛni he je nyɛ mohu nyɛ de we kekle ke nyɛ ma ba ngɔ mi kɛ ba we ɔ?”

¹³ David sɛ mɛ ke a ya de Amasa hu ke, “Ye nyɛmi tutuutu ji mo. Kɛ je mwɔnɛ ɔ kɛ yaa a, i pee mo ye tabo ɔ nyatsɛ ngɛ Yoab nane mi. Mawu nɛ fia mi nɔ nɛ e gbe ke i pee we nɔ́ nɛ ɔ!”

¹⁴ Sɛ nɛ David kɛ mane Yuda bi ɔmɛ ɔ ha a yi mi plɛ, nɛ a pee kake. Lɔ ɔ he ɔ, a tsɔ kɛ ba de matsɛ ɔ ke, “Moo kpale o se kɛ ba kɛ o tsɔli ɔmɛ tsuo.”

¹⁵ Benɛ matsɛ ɔ kpale kɛ ma a, Yuda bi ɔmɛ ba kpee lɛ ngɛ Yordan pa a he. A sɛ hlami kɛ ba Gilgal momo, konɛ a ba ngɔ lɛ kɛ po pa a.

¹⁶ Jamɛ a be ɔ nɔuu ɔ, Benyamin no ɔ nɛ a tsɛɛ lɛ Shimei, nɛ ji Gera nɛ je Bahurim binyumu ɔ he sɔ nɛ e kɛ Yuda bi ɔmɛ ho, nɛ lɛ hu e ya kpee Matsɛ David.

¹⁷ Nyumuhi akpe nɛ je Benyamin wɛtso ɔ mi ɔ piɛ e he kɛ ho. Ziba nɛ ji tsɔlɔ ngɛ Saul we ɔ mi ɔ, lɛ hu e kɛ e bimɛ nyɔngma kɛ enuɔ ɔmɛ, kɛ e tsɔli nyingmi enyɔ ɔmɛ ho Yordan pa a nya ya loko matsɛ ɔ ya su lejɛ ɔ.

¹⁸ A ngɔ matsɛ ɔ we mi bi ɔmɛ kɛ po pa a; nɛ nɔ́ tsuaa nɔ́ nɛ matsɛ ɔ ngɛ hlae ɔ, a pee ha lɛ. Benɛ matsɛ ɔ maa ho pa a pomi ya a, Gera binyumu Shimei ya kpla si ngɛ e hɛ mi nɛ e nu matsɛ ɔ nane,

David na Shimei mɔbɔ

¹⁹ nɛ e de lɛ ke, “Nɛnɛ, yayami nɛ i pee mo ligbi ɔ nɛ o je Yerusalem ɔ, i kpa mo pɛɛ nɛ o kɛ pa mi. Mo ko ngɔ kɛ to ha mi, nɛ mo ko kai hu gblegbleegble.

²⁰ I le kaa i pee yayami; nɛ enɛ ɔ he je nɛ imi ji kekleekle nɔ nɛ je omleyi je wɛtso ɔmɛ nɛ ji Yosef we ɔ mi kɛ ma mo nɛnɛ kpeemi mwɔnɛ ɔ nɛ.”

²¹ Kɛkɛ nɛ Zeruya bi Abishai de ke, “E sa kaa a gbe Shimei, ejakaa e gbiɛ nɔmlɔ nɛ Mawu pɔ lɛ nu ɔ.”

²² Se David de ke, “Nyɛ Zeruya bimɛ, mɛni sane nɛ ɔ kɔɔ ngɛ nyɛ he, loko nyɛ ngɛ hlae nɛ nyɛɛ doo ye nya mwɔnɛ ligbi nɛ ɔ? Anɛ e sa kaa a gbe nɔ ko ngɛ Israel mwɔnɛ ligbi nɛ ɔ lo? Anɛ i li kaa mwɔnɛ ligbi nɛ ɔ, imi ji matsɛ ngɛ Israel lo?”

²³ Kɛkɛ nɛ matsɛ ɔ de Shimei ke, “I ngɛ mo kita kae kaa a be mo gbee!”

David na Mefiboshet mɔbɔ

²⁴ Mefiboshet, Saul bibi ɔ hu ba nɛ e ba kpee matsɛ ɔ. Kɛ je ligbi ɔ nɛ matsɛ ɔ je Yerusalem ɔ hluu kɛ ba si ligbi nɛ e kpale e se kɛ ba fiafiaafia a, Mefiboshet fɔ we e nanehi a he, e sɛ we e kpɛni; nɛ e tadehi hu e fɔ we a he.

²⁵ Benɛ e je Yerusalem kɛ ba nɛ e kɛ matsɛ ɔ ba kpe ɔ, matsɛ ɔ bi lɛ ke, “Mefiboshet, mɛni he je nɛ o kɛ mi yɛ ɔ?”

²⁶ E he nɔ ke, “Ye nyɔmtsɛ matsɛ, kaa bɔ nɛ o le ɔ, akpaketsɛ ji mi. I fa ye tsɔlɔ ɔ ke e wo ye teji ɔ nɔ ní ha mi nɛ ma hi nɔ nɛ i kɛ mo nɛ ya. Se ye tsɔlɔ ɔ sisi mi,

²⁷ nɛ e ba po ye nya ha mo. Mo nyɔmtsɛ matsɛ ɔ, moo lɛɛ o ngɛ kaa Mawu bɔfo, lɔ ɔ he ɔ, nɔ́ tsuaa nɔ́ nɛ da ha mo ɔ, moo pee.

²⁸ Jinɛ tsaatsɛ we ɔ tsuo pɛpɛɛpɛ sa gbenɔ; se kɛ̃ o ngɔ o tsɔlɔ ɔ ngɔ piɛ nihi nɛ yeɔ ní ngɛ o we okplɔɔ ɔ he ɔ a he. Lɛɛ mɛni he blɔ i ngɛ kaa ma bi nɛnɛ ekohu ke e na mi mɔbɔ?”

²⁹ Matsɛ ɔ de lɛ ke, “E hia we kaa o pa deɔ nɔ́ ko hu. I to ye yi mi kaa o kɛ Ziba maa dla Saul zugba a fiee.”

³⁰ Se Mefiboshet de ke, “Oo, ha nɛ e ngɔ lɛ tsuo kɛkɛ; nɛ́ ye nyɔmtsɛ matsɛ ná ba su we fiafiaafia nɛ ɔ kɛkɛ e hiɛ ha mi.”

David na Barzilai mɔbɔ

³¹ Jehanɛ Barzilai, Gilead no ɔ hu je Rogelim kɛ ba Yordan pa a nya, konɛ lɛ hu e ba po David pa.

³² Barzilai ye jeha nyingmi kpaanyɔ, nɛ e bwɔ kotokoto; nɛ niatsɛ ji lɛ. Benɛ matsɛ ɔ ngɛ Mahanaim ɔ tsuo, lɛ nɛ e hyɛ e nɔ ngɛ niye ní blɔ fa mi.

³³ Matsɛ ɔ de Barzilai ke, “Ha nɛ waa ho Yerusalem ya nɛ ma ya hyɛ o nɔ ngɛ lejɛ ɔ.”

³⁴ Se Barzilai de matsɛ ɔ ke, “Dɛbi, be bɔɔ pɛ nɛ piɛ ha mi nɛ ma hi je mi; mɛni he je i kɛ mo maa ya Yerusalem mɔ?

³⁵ Jeha nyingmi kpaanyɔ nɛ i ye nɛ ɔ nɛ; nɛ nɔ́ ko ha we mi bua jɔmi hu. Anɛ i ngɛ lilɛ nɛ ma kɛ le nɔ́ nɛ i yeɔ, kɛ nɔ́ nɛ i nuɔ a ngɔmi lo? Aloo i ngɛ tue nɛ a kɛ buɔ lali a gbi tue lo? Mɛni he je nɛ e sa kaa ma ba pee tlomi kɛ fɔ ye nyɔmtsɛ matsɛ nɔ kɛ mwɔɔ?

³⁶ Mɛni he je matsɛ maa pee nɔ́ kaa kikɛ nɛ ɔ kɛ to nɔ́ ko bɔbɔyoo nɛ i pee ha lɛ ɔ nane mi? Oo, ma je mo blɔ kɛ po Yordan pa a kɛkɛ.

³⁷ I kpa mo pɛɛ nɛ o ngmɛ imi, o tsɔlɔ ɔ blɔ nɛ ma kpale ye se kɛ ho, nɛ ma ya gbo ngɛ imi nitsɛ ye ma mi he nɛ a pu maa, kɛ tsaatsɛ ngɛ ɔ. O nɛ, ye binyumu Kimham ji nɛ ɔ nɛ, e ma sɔmɔ mo; o kɛ lɛ nɛ ya, konɛ nɔ́ tsuaa nɔ́ nɛ sa o hɛ mi ɔ, o pee ha lɛ.”

³⁸ Matsɛ ɔ he nɔ ke, “Yoo, i kɛ Kimham maa ya, nɛ ma pee ha lɛ kaa bɔ nɛ o ngɛ hlae ɔ. Nɔ́ tsuaa nɔ́ nɛ o ma bi mi ɔ, ma ha mo.”

³⁹ Enɛ ɔ se ɔ, ma a, kɛ matsɛ ɔ tsuo po Yordan pa a. Matsɛ ɔ fiɔ Barzilai nya he, nɛ e gbaa lɛ, nɛ e kɛ lɛ ye sɛ, nɛ Barzilai kpaale kɛ ho lɛ nitsɛ e ma mi ya.

Israel kɛ Yuda na nya sami ngɛ matsɛ ɔ he

⁴⁰ Benɛ matsɛ ɔ po pa a ta a, Yuda bi ɔmɛ tsuo kulaa, kɛ Israel bi ɔmɛ fa ngɔ lɛ kɛ ho Gilgal ya. Kimham hu piɛ a he.

⁴¹ Pee se ɔ, Israel bi ɔmɛ tsuo ba matsɛ ɔ ngɔ nɛ a ba bi lɛ ke, “Mɛni he je wa nyɛmimɛ Yuda bi ɔmɛ ya ju mo, nɛ a ngɔ mo, kɛ o we ɔ ltsuo, kɛ o we bi ɔmɛ kɛ po Yordan pa a?”

⁴² Yuda bi ɔmɛ de Israel bi ɔmɛ ke, “Matsɛ ɔ, wa weku no tutuutu ji lɛ. Mɛni he je nɔ́ nɛ ɔ dɔɔ nyɛ? Anɛ matsɛ ɔ jé lɛ nitsɛ e sika ko kɛ pee niye ní ha wɔ nɛ wa ye lo? Anɛ e ha wɔ nike ní ko lo?”

⁴³ Israel bi ɔmɛ he nɔ ke, “Wɛtso nyɔngma lɛ ngɛ Israel; nɛ matsɛ blɔ fa mi hu wa blɔ nya hiɛ pe nyɛ. Mɛni he je mɔ nɛ nyɛ nyɛɛ wɔ? Anɛ pi wɔ nɛ wa sɛ hlami kɛ de ke a ya ngɔ matsɛ ɔ kɛ ba lo?” A hɛɛ sane nɛ ɔ mi kɛ ya kɛ ba; se Yuda bi ɔmɛ a nya wa pe Israel bi ɔmɛ.